དགེ་སློང་མའི་ཚོགས་འདུའི་གསུང་བཤད་ཕྱོཌ་བསྡོམས། ཉིན་གསུམ་པ།

༸སྤྱི་ནོར་༸གོང་ས་༸སྐྱབས་མགོན་ཆེན་པོར་སྤྱན་འབུལ་ཞུས་པའི་སྐུ་ཚབ་རྣམས་ཀྱི་རྩོམ་ཤོག་སྙིང་བསྡུས།

༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཞུ་རྒྱུར། དགེ་སློང་མའི་འདུལ་བ་དང་སྡོམ་རྒྱུན་གནས་པའི་དགེ་འདུན་གྱི་སྡེའི་ནང་བུད་མེད་ཀྱི་ལས་འགན་ཞེས་པའི་རྒྱལ་སྤྱིའི་ལྷན་ཚོགས་ཤིག་གི་ཆེད་འདས་པའི་ཉིན་གཉིས་རིང་ངེད་ཚོ་ཧམ་བྷུརྒ་གཙུག་ལག་སློབ་ཁང་ཆེན་མོ་འདིའི་ནང་འཛོམས་པ་ཡིན། སྐབས་དེར་གྲྭ་བཙུན་དང་གྲྭ་བཙུན་མ་ཡིན་པའི་མཁས་དབང་གྲངས་ ༦༥ ཙམ་གྱིས་རྒྱལ་ཁབ་ ༡༩ ནས་ཕེབས་པའི་ཚོགས་བཅར་བ་མི་གྲངས་ ༤༠༠ མ་ཟིན་ཙམ་ལ་གསུང་བཤད་གནང་།

རྩོམ་ཤོག་ཁག་ནང་དགེ་སློང་མའི་སྡོམ་རྒྱུན་སླར་གསོ་བྱས་པའི་སྤྱི་ཚོགས་འདྲ་མིན་གྱི་ཉམས་མྱོང་ལ་དཔྱད་ཞིབ་གནང་བའི་གྲུབ་དོན་སྤེལ་ཡོད། ཉམས་མྱོང་སྤེལ་བའི་ཁྲོད་དམིགས་ཡུལ་དེའི་ཆེད་ཐབས་ལམ་མང་པོ་ཞིག་བཀོལ་སྤྱོད་བྱས་ཡོད། དགེ་སློང་མའི་སྡོམ་རྒྱུན་སླར་གསོ་བྱེད་ཕྱོགས་སྐོར་དགོངས་ཚུལ་སྣ་ཚོགས་བྱུང་བ་ལས། ཁ་ཡོད་ལག་ཡོད་ཀྱི་བསམ་ཞིབ་དང་བཀའ་བསྟན་གྱི་ལུང་ཐོག་ནས། དགེ་སློང་ཕ་མ་གཉིས་ཚོགས་ཀྱི་ཐབས་ལམ་དེར་མང་མོས་ཀྱིས་གཅིག་མཐུན་བྱུང་སོང་། དེའི་ཕྱིར་ཐབས་ལམ་གཉིས་ལག་བསྟར་གནང་ཡོད། རྒྱ་ནག་དུ་དར་བའི་ཆོས་སྲུང་སྡེ་པའི་དགེ་སློང་མའི་རྒྱུད་པའི་གནད་དོན་ཁྲོད། རྒྱ་ནག་གི་ཆོས་སྲུང་སྡེ་པའི་དགེ་སློང་ཕ་དང་ཤྲཱི་ལངྐའི་གནས་བརྟན་སྡེ་པའི་དགེ་སློང་མས་སྡོམ་པ་མནོས་ཡོད། ཕྱི་ལོ་༡༩༩༨ ལོར་ཤྲཱི་ལངྐའི་ནང་བསྐྱར་དུ་འགོ་བཙུགས་པའི་གནས་བརྟན་སྡེ་པའི་དགེ་སློང་མའི་སྡོམ་རྒྱུན་གྱི་གནད་དོན་ཁྲོད། དགེ་སློང་ཕ་མ་གཉིས་ཀ་རྒྱ་ནག་གི་ཆོས་སྲུང་སྡེ་པ་ཡིན་པ་དང་། ཤྲཱི་ལངྐའི་དགེ་སློང་མ་ལས་དང་པོ་བའམ་གསར་བུ་རྣམས་ལ་ཤྲཱི་ལངྐའི་དགེ་སློང་ཕའི་འདུས་པ་ལས་རྡ་ལྷི་ཀ་མྨའི་ (ལས་བརྟན་) dalhikamma ཆོ་གའི་ཐོག་ནས་གནས་བརྟན་སྡེ་པའི་ལུགས་ཀྱི་སྡོམ་པ་བསྐྱར་དུ་མནོས། ཆོ་ག་དེའི་རང་ལུགས་ཀྱི་ཆོས་སྲུང་སྡེ་པའི་སྡོམ་པ་འབོག་འཇོག་དེ་གནས་བརྟན་སྡེ་པའི་ཆོ་གར་གནད་ལ་སྨིན་པོའི་ཐོག་ནས་བསྒྱུར་ཡོད།

འོན་ཀྱང་སངས་རྒྱས་ཀྱིས་གནང་བ་བསྩལ་བའི་དགེ་འདུན་ཕ་རྐྱང་པའི་སྡོམ་པ་འབོག་འཇོག་ནི་འཛམ་གླིང་དམག་ཆེན་གཉིས་པའི་རྗེས་ཀོ་རི་ཡའི་ཆོས་སྲུང་སྡེ་པའི་དགེ་སློང་མའི་རྒྱུད་པ་སླར་གསོ་བྱ་ཕྱིར་ལག་བསྟར་བྱས་ཡོད། གནད་དོན་དེའི་ནང་ཀོ་རི་ཡའི་ཆོས་སྲུང་སྡེ་པའི་དགེ་སློང་ཕ་གཅིག་པུས་ཆོས་སྲུང་སྡེ་པའི་དགེ་སློང་མའི་སྡོམ་པ་མནོས་ཡོད། དགེ་སློང་མ་ལས་དང་པོ་རྣམས་བསླབ་པ་རྒན་པར་སོན་སྐབས། ཕྱི་ལོ་ ༡༩༨༢ ནས་འགོ་བཙུགས་ཏེ་ཁོང་ཚོས་གཉིས་ཚོགས་ཀྱི་སྡོམ་པ་འབོག་ཆེད་ཆོས་སྲུང་སྡེ་པའི་དགེ་སློང་མའི་སྡེ་བཙུགས་ཡོད།

བགྲོ་གླེང་དེ་གཞི་ཐམས་ཅད་ཡོད་པར་སྨྲ་བའི་སྲོལ་རྒྱུན་ཐོག་སླེབས་སྐབས། ཀོ་རི་ཡའི་ནང་བརྩམས་པ་བཞིན། རྒྱུད་པ་དེ་སླར་གསོ་བྱ་ཆེད་བོད་པའི་གཞི་སྨྲའི་ལུགས་ཀྱི་དགེ་སློང་ཕ་གཅིག་པུའི་ཐོག་ནས་འགོ་འཛུགས་དགོས་གལ་ཆེ་བར་ཁས་ལེན་བྱེད་མཁན་གྱི་རིམ་པ་གཅིག་འདུག །དེ་ནི་གཞི་སྨྲའི་ལུགས་ཀྱི་དགེ་སློང་མ་ལས་དང་པོ་བ་རྣམས་ཀྱིས་སྡོམ་པ་འབོག་པའི་ཆོ་ག་སྒྲུབ་པའི་ལོ་ཚད་ལ་སླེབས་སྐབས། གཉིས་ཚོགས་ཀྱིས་སྡོམ་པ་འབོག་འཇོག་སླར་གསོ་བྱེད་པའི་སྔོན་འཕྲལ་སེལ་གྱི་ཐམས་ལམ་ཙམ་དུ་འགྱུར་ངེས།

ལྷན་ཚོགས་འདིར་ཕེབས་པའི་བོད་པའི་བཙུན་མ་རྣམས་ཀྱིས་གསུང་རབ་ཀྱི་དགོངས་པ་དང་བསྟུན་ནས་དྲི་མ་མེད་པའི་ལམ་ནས་གཞི་སྨྲའི་ལུགས་ཀྱི་དགེ་སློང་མའི་སྡོམ་རྒྱུན་སླར་གསོ་བྱུང་བ་མཐོང་རྒྱུར་འདོད་པ་ཆེན་པོ་ཡོད་སྐོར་གསུངས་སོང་། ཁོང་ཚོས་ད་དུང་བོད་པའི་གཞི་སྨྲའི་ལུགས་ཀྱི་དགེ་སློང་ཕའི་སྡེ་པ་གཅིག་པུའི་ཐོག་ནས་སྡོམ་པ་འབོག་འཇོག་ལ་འདོད་མོས་ཀྱང་གནང་གི་འདུག

༸གོང་ས་༸སྐྱབས་མགོན་ཆེན་པ་མཆོག་དང་བོད་རིགས་འདུལ་བ་འཛིན་པ་རྣམས་ཀྱིས་གཞི་ཐམས་ཅད་ཡོད་པར་སྨྲ་བའི་དགེ་སློང་མའི་སྡོམ་རྒྱུན་སླར་གསོ་བྱ་རྒྱུའི་ཐབས་ལམ་གང་འདྲ་ཞིག་ཐག་གཅོད་གནང་ཀྱང་དེ་ལ་ཚང་མས་བློ་རྩེ་གཅིག་མཐུན་གྱིས་ངོས་ལེན་རྒྱབ་སྐྱོར་ཞུ་གི་འདུག

སློབ་དཔོན་ཆེན་པོ་ཟམ་གདོང་རིན་པོ་ཆེ་མཆོག་གི་གསུང་བཤད་ཕྱོགས་བསྡོམས།

བོད་རིགས་འགའ་ཞིག་ལ་ཆོས་སྲུང་སྡེ་པའི་ལུགས་ཀྱི་དགེ་སློང་མའི་སྡོམ་པ་ཐོབ་ཡོད་པ་དང་ང་ཚོས་ཆོས་སྲུང་སྡེ་པའི་དགེ་སློང་མར་ངོས་འཛིན་ཞུས་ནའང་། ཁོང་ཚོས་གཞི་ཐམས་ཅད་ཡོད་པར་སྨྲ་བའི་དགེ་སློང་མ་བྱེད་འདོད་གནང་གི་ཡོད། འོན་ཀྱང་སྡོམ་རྒྱུན་དེའི་ཁྲིམས་མཐུན་རང་བཞིན་ལ་བརྟགས་ན། སྐྱོན་བརྗོད་མང་པོ་ཡོང་གི་ཡོད།

གཞི་སྨྲའི་འདུལ་བའི་སྲོལ་རྒྱུན་ལ་བསམས་ན། ང་ཚོ་བོད་པ་ཚོས་དེའི་ཐད་སློབ་དཔོན་ཡོན་ཏན་འོད་དང་ཆོས་ཀྱི་བཤེས་གཉེན་ནམ་དྷརྨ་མིཏྲས་མཛད་པའི་རྒྱ་འགྲེལ་གྱི་རྗེས་སུ་མཐའ་གཅིག་ཏུ་འབྲང་གི་ཡོད། འགྲེལ་པ་དེ་དག་ནང་དགེ་འདུན་རྐྱང་པའི་སྡེས་དགེ་སློང་མའི་སྡོམ་པ་ནོད་ཆོག་ཅེས་གསུངས་པ་མི་འདུག དེ་ལས་ལྡོག་སྟེ། སངས་རྒྱས་ཀྱིས་སྡོམ་པ་འབོག་པའི་ཆོ་ག་གསར་པ་འགོ་བཙུགས་མཛད་པའི་སྐབས་སྔ་མོའི་སྡོམ་པ་འབོག་པའི་ཆོ་ག་རྣམས་ནུས་མེད་དུ་གྱུར་ཡོད་ཅེས་དེ་དག་ནང་གསུངས་ཡོད། དེ་ནི་གཉིས་ཚོགས་ཀྱི་སྡོམ་པ་འབོག་འཇོག་འགོ་འཛུགས་པའི་སྐབས། དགེ་འདུན་རྐྱང་པའི་སྡེས་སྡོམ་པ་འབོག་པའི་ཆོ་ག་སངས་རྒྱས་ཀྱིས་བཀག་མེད་ཅེས་པའི་གནས་བརྟན་སྡེ་པ་དང་ཆོས་སྲུང་སྡེ་པའི་ནན་རྩོད་ཀྱི་འགལ་ཟླར་གྱུར། དེར་མ་ཟད། དགེ་སློང་ཕས་ཚངས་སྤྱོད་ཀྱི་སྡོམ་པ་འབོག་ཆོག་པ་དང་ཐ་ན་དེའི་ཕྱིར་དབྱར་གནས་ལས་ཐོན་ཆོག་གི་ཡོད་ཅེས་གསུངས་ནའང་། གཞུང་དེའི་ནང་དགེ་སློང་ཕ་གཅིག་པུས་དགེ་སློང་མའི་སྡོམ་པ་ཆ་ཚང་གནང་ཆོག་ཅེས་གསུངས་མེད། དེས་ན། ཁུངས་དེ་དག་གིས་དགེ་འདུན་རྐྱང་པས་དགེ་སློང་མའི་སྡོམ་པ་འབོག་འཇོག་ཆོག་པའི་གནང་བ་བྱིན་མེད། འོན་ཀྱང་དུམ་ཚན་གཞན་ཞིག་གི་ནང་། དགོས་པའི་དབང་གིས་དགེ་ཚུལ་མའི་སྡོམ་པ་ནོད་པར་གསོལ་བ་བཏབ་ན། དགེ་སློང་ཕ་རྣམས་དབྱར་གནས་ལས་ཚུལ་བཞིན་དུ་ཐོན་ཆོག་པའི་གནང་བ་བསྩལ་ཡོད། གནང་བ་འདིས་གནས་སྟངས་གང་ཞིག་སྐབས་དགེ་སློང་མ་རྣམས་སྡོམ་པ་དེ་རིགས་ནོད་སར་མེད་པ་སྟོན་གྱི་ཡོད། བོད་རིགས་འདུལ་བ་འཛིན་འགའ་ཞིག་གིས་དགོས་མཁོ་མཆིས་ཚེ་གནང་བ་དེས་དགེ་འདུན་རྐྱང་པས་དགེ་སློང་མའི་སྡོམ་པ་ནོད་ཆོག་པར་བསམ་གྱི་ཡོད། འགྲེལ་བཤད་དེ་ལ་བོད་རིགས་མཁས་པ་གཞན་མང་པོས་མོས་མཐུན་བྱེད་ཀྱི་མེད།

གཞན་ཡང་གཞི་སྨྲའི་དགེ་སློང་ཕ་དང་ཆོས་སྲུང་སྡེ་པའི་དགེ་སློང་མ་གཉིས་ཀྱིས་གཞི་སྨྲའི་ལུགས་ཀྱི་ཆོ་ག་ལ་གཞིགས་ཏེ་གཉིས་ཚོགས་ཀྱི་སྡོམ་པ་འབོག་པར་ཡང་དགག་པ་བྱེད་པ་ཡོད། དགག་པ་ནི་འདུལ་བའི་ལུཌ་མི་འདྲ་བ་གཉིས་ཀྱིས་མཉམ་དུ་སྡོམ་པའི་ཆོ་ག་འཛིན་སྐྱོང་བྱེད་མི་ཆོག་པ་དེ་ཡིན།

མདོར་ན། དགེ་སློང་ཕ་མ་གཉིས་དང་དགེ་བསྙེན་ཕ་མ་གཉིས་བཅས་བཞི་ལས་གྲུབ་པའི་སྡེ་ཆ་ཚང་བ་ཞིག་དགོས་རྒྱུ་གལ་ཆེན་པོ་ཡིན་ནའང་། གཞི་སྨྲའི་དགེ་འདུན་མའི་སྡོམ་རྒྱུན་སླར་གསོ་བྱ་རྒྱུ་ནི་ཕོ་མོའི་གནད་དོན་ཞིག་མིན་ལ་སྤྱི་ཚོགས་དང་། རིག་གཞུང་། ཡང་ན་ཆབ་སྲིད་བཅས་ཀྱི་གནད་དོན་ཡང་མ་ཡིན། དེ་ནི་ཕྱོགས་ཡོངས་ནས་འདུལ་བའི་གནད་དོན་ཞིག་ཡིན། དེའི་སེལ་ཐབས་ཡང་ངེས་པར་དུ་འདུལ་བའི་བཅས་ཁྲིམས་ནང་ནས་འཚོལ་དགོས།

༸གོང་ས་མཆོག་ལ་ཕུལ་བའི་བཞུགས་མོལ་ལྷན་ཚོགས་ཀྱི་རྩོམ་ཤོག

འབུམ་རམས་པ་དགེ་སློང་བོ་དྷི། འདུལ་བ་ནི་ཕལ་ཆེར་ཡུལ་དུས་དང་བསྟུན་ནས་ཡོད། སངས་རྒྱས་ཀྱི་དགོངས་པ་ནི་བྱ་བའི་རྒྱུད་རིམ་གྱི་ལམ་སྟོན་ཐོག་ནས་གསལ་ཡོད། འོན་ཀྱང་ལམ་སྟོན་དེ་དག་གིས་གང་གི་དགོངས་པར་འགོག་རྐྱེན་མི་ཡོང་བ་ང་ཚོས་ངེས་པར་དུ་བྱ་དགོས། སངས་རྒྱས་ཀྱི་དགོངས་པ་ནི་དགེ་སློང་མའི་སྡེ་འཛུགས་རྒྱུ་དེ་ཡིན། དགེ་སློང་མའི་སྡོམ་པ་འབོག་པར་འབྱུང་སྲིད་པའི་ཐབས་ལམ་གཉིས་ཡོད། བོད་རིགས་བུད་མེད་མང་པོས་ཆོས་སྲུང་སྡེ་པའི་ལུགས་ཀྱི་དགེ་སློང་མའི་སྡོམ་པ་བླངས་ཡོད། དེར་བརྟེན་ཐབས་ལམ་གཅིག་ནི། གཞི་སྨྲའི་ལུགས་ཀྱི་སྡོམ་པའི་འདྲ་མཚུངས་དང་ཕན་ཚུན་བརྗེ་ལེན་བྱ་འོས་པའི་ཆོས་སྲུང་སྡེ་པའི་དགེ་སློང་མའི་སྡོམ་པ་དེ་གཞི་སྨྲའི་དགེ་འདུན་ཕ་རྣམས་ཀྱིས་ངོས་ལེན་བྱ་རྒྱུ་དང་། དེས་ན་བོད་རིགས་ཆོས་སྲུང་སྡེ་པའི་དགེ་སློང་མ་དེ་དག་གཞི་སྨྲའི་དགེ་སློང་མར་བསམ་ཞིབ་བྱ་དགོས། གནས་བརྟན་སྡེ་པར་དྷ་ལི་ཀཱ་མ་དང་སྦྲགས་བརྒྱུད་རིམ་འདི་རིགས་ཡོད་ཅིང་། ལམ་སྲོལ་ལྟར་ཡིན་མིན་གཉིས་ཀའི་ཐོག་ནས་ལག་བསྟར་བྱེད་ཀྱི་ཡོད། ཐབས་ལམ་གཉིས་པ་ནི། དགེ་འདུན་རྐྱང་པའི་སྡེ་པའི་ཐོག་ནས་སྡོམ་པ་འབོག་འཇོག་བྱེད་པ་དེ་ཡིན། པཱ་ལི་ཁུངས་ལ་གཞིགས་ན། དགེ་སློང་མ་མེད་པའི་སྔོན་སངས་རྒྱས་ཀྱིས་དགེ་སློང་ཕ་གཅིག་པུས་དགེ་སློང་མའི་སྡོམ་པ་ནོད་ན་འགྲིག་ཅེས་བཀའ་བསྩལ་ཡོད། ད་ལྟའི་དུས་བབས་ནི་སྐབས་དེའི་གནས་སྟངས་དང་འདྲ་པོ་ཡོད། དེར་བརྟེན་ད་ལྟའི་གནས་སྐབས་འདིར་དགེ་འདུན་རྐྱང་པས་སྡོམ་པ་འབོག་པར་གནང་བ་བྱིན་ཡོད་ཅེས་རྩོད་པ་བྱེད་ཆོག །ལོ་བཅུའི་རྗེས་གཉིས་ཚོགས་ཀྱིས་སྡོམ་པ་འབོག་སྲོལ་བསྐྱར་དུ་འགོ་འཛུགས་བྱེད་ཐུབ།  དེ་བས་ན་ཡུལ་དུས་དང་བསྟུན་ནས་དྷ་ལི་ཀཱ་མའམ་དགེ་འདུན་རྐྱང་པའི་ཐབས་ལམ་གང་ཡིན་རུང་མཚམས་སྦྱོར་དང་བཅས་ཁས་ལེན་རུང་བ་ཡིན།

དགེ་སློང་ཐིག་ཁུའང་སྦ། Thich Quang Ba ༸གོང་ས་མཆོག་ལ་ཞུ་རྒྱུར། དགེ་སློང་མའི་སྡོམ་པ་སླར་གསོ་བྱེད་པའི་ཕན་ཡོན་གཅིག་ནི་དགེ་སློང་མའི་སྡོམ་རྒྱུན་མེད་པའི་ནང་པའི་ལུང་པ་གཞན་གྱིས་ཀྱང་གཅིག་མཚུངས་ལག་བསྟར་ཐུབ་ངེས་ཡིན། དེར་མ་ཟད། རྒྱལ་ཁབ་འདྲ་མིན་ནང་ནས་བུད་མེད་མང་པོས་གཞི་སྨྲའི་ལུགས་ཀྱི་དགེ་སློང་མའི་སྡོམ་པ་ལེན་འདོད་ཡོད། དགེ་འདུན་གྱི་སྡེའི་མཛའ་མཐུན་དང་གྲོགས་འདྲིས་ཡོང་ཆེད། དགོས་མཁོ་ཡོད་པའི་ཚེ། འདུལ་བའི་སྡེ་སྣོད་ཀྱི་སྲོལ་རྒྱུན་གཞན་གྱི་དགེ་སློང་མའི་སྡོམ་པ་འབོག་མཁན་དང་དགེ་སློང་མའི་སྡོམ་པ་བླངས་ཟིན་པ་རྣམས་ཀྱིས་བོད་པའི་སྲོལ་རྒྱུན་ཉམས་ལེན་གནང་ནས། གཞི་སྨྲའི་ལུགས་ཀྱི་དགེ་སློང་མའི་སྡོམ་པ་འབོག་འཇོག་སྐབས་མཉམ་ཞུགས་བྱས་ན་ཆོག །རོགས་པ་བྱེད་འདོད་ཡོད་མཁན་ཧ་ཅང་མང་པོ་ཡོད། འོན་ཀྱང་ང་ཚོར་ད་ཆ་སྡོམ་རྒྱུན་དེ་སླར་གསོ་དགོས་པ་ཡིན།

དགེ་སློང་་ཕ་པྲ་ཛྙཱན་སྦང་ཤ། Prajna Bangsha ངས་དགེ་སློང་བོ་དྷིའི་ངོས་སྦྱོར་ལ་མཐའ་གཅིག་ཏུ་རྒྱབ་སྐྱོར་ཞུ་རྒྱུ་ཡིན། དུས་དང་གནས་སྟངས་ལ་གཞིགས་ནས་ཐག་གཅོད་ཅིག་ངེས་པར་དུ་བྱ་དགོས། པཱ་ལི་སྲོལ་རྒྱུན་དང་བསྟུན་ན། སངས་རྒྱས་ཀྱི་ཞལ་ནས། དགེ་འདུན་གྱི་སྡེའི་ངོས་ནས་འགྱུར་ལྡོག་གཏོང་དགོས་ཀྱི་འདུག་བསམ་པ་དང་། དགེ་འདུན་དམངས་ཀྱིས་མོས་མཐུན་བྱུང་ན། འགྱུར་བ་བཏང་ན་ཆོག །འོན་ཀྱང་ཐག་གཅོད་དེ་ཕྱོགས་སུ་ལྷུང་བའི་དགེ་འདུན་གྱི་སྡེ་བྱེ་བྲག་པ་ཞིག་གི་བསམ་ཚུལ་ཁོ་ནར་བསྟུན་ནས་བྱ་རྒྱུ་མེད་ཅེས་གསུངས་ཡོད། དེས་ན། སངས་རྒྱས་ཀྱིས་ཀུན་དགའ་བོར་བསླབ་ཁྲིམས་ཆུང་ཙག་རྣམས་ལ་འདི་ལྟར་འགྱུར་བ་བཏང་ན་ཆོག་ཅེས་གསུངས་ཡོད། བརྒྱུད་རིམ་དེ་ད་ལྟའི་དུས་འདིར་འགོ་བརྩམས་ན་ལེགས་ཤོས་ཡིན་ཅིང་དགེ་འདུན་གྱི་སྡེ་སྤྱི་ཡོངས་ནས་ཐག་གཅོད་དགོས།

འབུམ་རམས་པ་དགེ་སློང་མེ་ཏྟ་ནཱན་དོ། Mettanando དགེ་འདུན་གཉིས་ཚོགས་ཀྱི་སྡོམ་སྲོལ་ནི་དགེ་སློང་ཕ་དང་མའི་སྡེའི་དབར་མཛའ་མཐུན་གོང་མཐོར་ཡོང་བའི་དགོས་དོན་ཆེད་དུ་ཡིན། གནས་བརྟན་སྡེ་པའི་ལུགས་ནང་། ང་ཚོར་ད་ལྟའི་ཆར་དགེ་ཚུལ་མའི་རྒྱུད་པ་མེད། ཆོས་སྒོར་ཞུགས་མ་ཐག་པའི་བུད་མེད་ཚོར་རབ་བྱུང་མ་བརྗོད་ཀྱི་ཡོད། འོན་ཀྱང་ཁོང་ཚོའི་ཆོས་ཕྱོགས་ཀྱི་བསླབ་པ་སློབ་གཉེར་ཚད་མཐོན་པོར་སོན་པ་ན། དགོན་པའི་ནང་ལས་འགན་ལྷག་པོ་འཁྱེར་ཐུབ་པ་དགོས་རྒྱུ་དེ་གལ་འགངས་ཆེན་པོ་ཡིན། རང་གི་ཆོས་ཕྱོགས་ཀྱི་མི་ཚེའི་ཆེས་མཐའ་མའི་དམིགས་ཡུལ་དེ་ཐར་པའི་གོ་འཕང་འཐོབ་ཕྱིར་ངེས་བརྟན་བྱུང་ཆེད་ཁོང་ཚོས་དགེ་སློང་མའི་སྡོམ་པ་བླངས་ནས་དགོས་དོན་འགྲུབ་ཀྱི་ཡོད། དེ་བས་ན་དགེ་འདུན་གཉིས་ཚོགས་ཀྱི་ལམ་ནས་བྱེད་དགོས་ཞེས་ངས་བསམ་ཚུལ་བརྗོད་རྒྱུ་ཡིན།

འབུམ་རམས་པ་དགེ་སློང་ཧུའེ་མིན་ཤི། Huimin Shih གཞི་ཐམས་ཅད་ཡོད་པར་སྨྲ་བའི་དགེ་སློང་མའི་སྡོམ་རྒྱུན་སླར་གསོ་བྱེད་ཕྱོགས་ཐད་བོད་པའི་དགེ་འདུན་གྱི་སྡེས་ཐག་གཅོད་གང་གནང་ཀྱང་། དེ་ལ་རྒྱལ་སྤྱིའི་དགེ་འདུན་གྱི་སྡེའི་ངོས་ནས་ངོས་ལེན་དང་མོས་མཐུན་བྱེད་ཀྱི་རེད། དེ་འདིར་དང་མྱུར་དུ་གྲུབ་པའི་སྨོན་ལམ་ཞུ་རྒྱུ་ཡིན།

སཱ་ཡཱ་ཌའོ་ Sayadaw འབུམ་རམས་པ་ཨ་ཤིན་ནཱ་ནི་སཱ་ར། Ashin Nanissara གཞི་སྨྲའི་ལུགས་ཀྱི་དགེ་སློང་མའི་སྡོམ་རྒྱུན་སླར་གསོ་བྱེད་པར་དགེ་སློང་བོ་དྷིས་གསུངས་པའི་གདམ་ཀ་གཉིས་ཀ་སྲིད་པ་དང་འཐད་ལྡན་ཞིག་ཡིན་ནའང་། ངའི་ངོས་ནས་དགེ་འདུན་རྐྱང་པའི་སྡེ་པ་འོས་སྦྱོར་ཞུ་རྒྱུ་ཡིན། སངས་རྒྱས་ཞལ་བཞུགས་པའི་སྐབས་དེ་དུས་ཀྱང་གཉིས་ཚོགས་ནི་སྲིད་པ་དང་། དགེ་འདུན་རྐྱང་པའི་ཐབས་ལམ་ནི་ད་དུང་འཐད་ལྡན་གྱི་གདམ་ཀ་ཞིག་ཡིན།

དགེ་བཤེས་ལྷ་རམས་པ་དགེ་སློང་རིན་ཆེན་དངོས་གྲུབ་ལགས། སངས་རྒྱས་ཀྱི་ཞལ་ནས། གལ་ཏེ་ལས་གང་ཞིག་གནང་བ་བྱིན་མེད་ཚེ། དེ་སྤོང་དགོས་པ་ཡིན་ཞེས་གསུངས་ཡོད། འོན་ཏེ་ལས་གང་དག་ལ་སངས་རྒྱས་ཀྱིས་གང་གི་སྐུ་དུས་སུ་དམིགས་བསལ་དགག་བྱ་མ་གནང་བ་དང་། སངས་རྒྱས་ཀྱི་དགོངས་པ་དང་མ་འགལ་བ་རྣམས་ལ་གནང་བ་བསྩལ་ཡོད། འདུལ་བའི་གཞུང་ནང་ཚངས་སྤྱོད་ཀྱི་སྡོམ་པ་ནི་དགེ་སློང་མའི་སྡེ་པས་ནོད་སྐོར་གསུང་པ་དང་། མདོ་ཚན་གཞན་ནང་གལ་ཏེ་གསོལ་བ་བཏབ་ན་དགེ་སློང་ཕས་དགེ་སློབ་མར་ཕལ་ཆེར་སྡོམ་པ་ནོད་ཀྱི་ཡོད་ཅིང་། དགེ་སློང་ཕ་དེས་ཚངས་སྤྱོད་ཀྱི་སྡོམ་པ་གནང་ཤས་ཆེ། འདིའི་བསྟན་དོན་ནི། གལ་ཏེ་དགེ་སློང་མའི་སྡེ་མེད་ཚེ། དགེ་འདུན་རྐྱང་པའི་ཐོག་ནས་དགེ་སློང་ཕས་ཚངས་སྤྱོད་ཀྱི་སྡོམ་པ་གནང་ཆོག་པ་ཡིན། གང་ཡིན་ཟེར་ན། དགེ་སློང་མའི་སྡོམ་པ་འབོག་པའི་ཉིན་དེ་གར་ཚངས་སྤྱོད་ཀྱི་སྡོམ་པ་འབོག་དགོས། བསྟན་དོན་གཞན་ཞིག་ནི། དགེ་འདུན་རྐྱང་པའི་སྡེས་དགེ་སློང་མའི་སྡོམ་པ་གནང་ཆོག་པ་ཡིན། གང་ལྟར་དགེ་སློང་གི་སྡེས་དགེ་སློབ་མའི་སྡོམ་པ་འབོག་པ་ཡོད་སྐོར་གསུངས་མེད།

དགེ་སློང་སུ་ཇཱ་ཏོ། Sujato དགེ་སློང་མའི་སྡོམ་རྒྱུན་དང་འབྲེལ་བའི་ཐབས་ལམ་གང་ཡིན་རུང་ངེས་པར་དུ་རྩ་བའི་ཆ་ནས་རྒྱ་ཆེ་བའི་འདུལ་བའི་རྩ་དོན་གྱི་འོག་ཤར་སྐྱོད་བྱེད་དགོས། སྲོལ་རྒྱུན་གྱི་འགྲེལ་བ་དང་། སྤྱི་སྲོལ་གྱི་ཉམས་ལེན། སྒེར་གྱི་གདམ་ཀ་བཅས་ལ་གུས་བརྩི་དགོས། འོན་ཀྱང་དེ་དག་ཐག་གཅོད་བྱེད་ཀྱི་ཆ་རྐྱེན་དུ་མི་འགྲོ་བ་ངེས་པར་དུ་དགོས། འདུལ་བའི་ནང་གཞི་ཐམས་ཅད་ཡོད་པར་སྨྲ་བ་དང་། ཆོས་སྲུང་སྡེ་པ། གནས་བརྟན་སྡེ་པ། བོད། རྒྱ་ནག །ཡང་ན་ཤྲཱི་ལངྐ་ལྟ་བུ་ནམ་ཡང་གསུངས་མེད། དེར་བརྟེན་ང་ཚོས་ཁྱད་པར་དེ་དག་ཐོག་གལ་ཆེན་པོ་བརྩི་རྒྱུ་མེད།

ལྷན་ཚོགས་སྐབས་དགེ་སློང་བོ་དྷིས་རོབ་བྲིས་གནང་བའི་གདམ་ཀ་གཉིས་པོ་གང་རུང་སྤྱིར་བཏང་མང་མོས་ཀྱིས་ཁས་ལེན་གནང་འོས་ཤིག་ཡིན། གདམ་ཀ་བྱེད་པའི་ཚད་འཛིན་ས་གཙོ་བོ་ནི་དགེ་སློང་མ་ལས་དང་པོ་བ་ཚོའི་ཆོས་ཕྱོགས་ཀྱི་བདེ་དོན་ཡིན་དགོས་པ་ལས་ཁྲིམས་མཐུན་གྱི་གནད་འགག་མ་ཡིན། སངས་རྒྱས་ཀྱི་དགོངས་པ་ནི་དགེ་འདུན་གྱི་སྡེའི་ཁོངས་སྡོམ་པ་གནང་བའི་སྣོད་དུ་མི་རུང་བའི་གང་ཟག་འགོག་རྒྱུ་དང་འོས་ཆོས་ཚང་བའི་གང་ཟག་ལ་དཔལ་འབྱོར་དང་ཆོས་ཕྱོགས་ཀྱི་རྒྱབ་སྐྱོར་གནང་རྒྱུ་ཡིན་ཅིང་། དེ་ཡང་གཙོ་བོ་དགེ་སློབ་ཀྱི་འབྲེལ་བའི་ཐོག་ནས་གནང་གི་ཡོད། འོན་ཀྱང་དགེ་འདུན་རྐྱང་པའི་སྡེས་སྡོམ་པ་འབོག་པའི་ཐབས་ལམ་གྱིས་འབྲེལ་ལམ་དེའི་སྲིད་པའི་གནས་བབས་ལ་ཚད་གཞི་བཟོ་གི་ཡོད། དེ་དང་ཆབས་ཅིག་གཉིས་ཚོགས་ཀྱི་ཐབས་ལམ་གྱིས་དེ་ལ་མཐུན་སྦྱོར་བྱེད་པ་ཡིན།

གལ་ཏེ་དགེ་སློང་ཕའམ་མ་ཞིག་དབྱེན་སྦྱོར་གྱི་ཉེས་ལྟུང་འགོས་པའི་སྡེ་ཚན་ནང་ཡོད་པའམ་དགེ་འདུན་གྱི་སྡེ་ལས་གནས་ཕྱུང་པ་ཞིག་ཡིན་ན། གཉིས་ཚོགས་ཀྱི་སྡེའི་ཁོངས་མིར་ཞུགས་མི་ཆོག་པའི་དམ་བསྒྲགས་འབའ་ཞིག་པཱ་ལི་གཞུང་ནང་མཛད་ཡོད། ད་ཡོད་ཀྱི་ནང་པའི་སྡེ་སྣོད་གསུམ་ནི་ད་ལྟའི་ཆར་དགེ་འདུན་གྱི་སྡེའི་ཁྲོད་དབྱེན་སྦྱོར་གྱི་ཉེས་ལྟུང་གི་ཐོག་ནས་བྱུང་མེད། དེར་བརྟེན་རྒྱུད་པ་དེ་དག་ལས་གཅིག་ལས་མང་བའི་ཁོངས་མི་ཐེ་བའི་གཉིས་ཚོགས་ཀྱིས་དགེ་སློང་མའི་སྡོམ་པ་འབོག་འཇོག་ལ་སྐྱོན་བརྗོད་ཡོང་མི་ཐུབ། དེས་ན་ངས་གཉིས་ཚོགས་ཀྱི་སྡོམ་པ་འབོག་པའི་ཆོ་གར་ངོས་སྦྱོར་ཞུ་རྒྱུ་ཡིན། དགེ་སློང་ཕའི་སྡོམ་རྒྱུན་ཐེ་བའི་སྡོམ་རྒྱུན་གང་ཡིན་རུང་འཐད་ལྡན་ཡིན་ཞེས་བརྒྱ་ཆ་བརྒྱ་ང་ཚོས་ངེས་བརྟན་བཟོ་མི་ཐུབ། འོན་ཀྱང་ང་ཚོས་ལག་བསྟར་བྱ་རྒྱུ་དང་གང་ཐུབ་ཐུབ་བྱ་རྒྱུའི་དུས་མཚམས་ལ་སླེབས་ཡོད།

མཁས་དབང་འབུམ་རམས་པ་ཧའེ་ཇུ་ཇེའོན་སུ་ནིམ། Hae-ju Jeon Sunim ཆ་རྐྱེན་མེད་པའི་སྒོ་ནས་ངས་གཞི་སྨྲའི་ལུགས་ཀྱི་དགེ་སློང་མའི་སྡོམ་རྒྱུན་སླར་གསོ་བྱ་རྒྱུ་དང་གཉིས་ཚོགས་ཀྱི་སྡོམ་པ་འབོག་འཇོག་ལ་རྒྱབ་སྐྱོར་ཞུ་རྒྱུ་ཡིན། འོན་ཀྱང་ཀོ་རི་ཡའི་ནང་། འཛམ་གླིང་དམག་ཆེན་གཉིས་པའི་རྗེས་ཐོག་མར་དགེ་འདུན་རྐྱང་པའི་སྡོམ་རྒྱུན་གྱི་ཐོག་ནས་ང་ཚོས་ཆོས་སྲུང་སྡེ་པའི་དགེ་སློང་མའི་རྒྱུད་པ་སླར་གསོ་བྱས་ཡོད། ཕྱིས་སུ་ཕྱི་ལོ་ ༡༩༨༢ ལོར་ང་ཚོས་ཆ་ཚང་གཉིས་ཚོཌ་ཀྱི་ཐབས་ལམ་དུ་འགྱུར་བཅོས་བཏང་ཡོད། ཐག་གཅོད་བྱ་རྒྱུ་ཕྱི་བཤོལ་མ་བྱེད་རོགས་ཞེས་འབོད་སྐུལ་ཞུ་རྒྱུ་ཡིན། དགེ་འདུན་གྱི་སྡེར་དེའི་གཤོག་པ་གཉིས་ཀ་སྟེ། དགེ་སློང་ཕ་མ་གཉིས་དགོས་ཀྱི་ཡོད།

དགེ་སློང་མ་ཝུ་ཡིན། Wu Yin ཐེ་ཝན་གྱི་དགེ་སློང་ཕ་མ་གཉིས་ཀྱི་ངོས་ནས་གཞི་སྨྲའི་ལུགས་ཀྱི་དགེ་སློང་མའི་སྡོམ་རྒྱུན་སླར་གསོ་བྱ་རྒྱུར་མཐའ་གཅིག་ཏུ་རྒྱབ་སྐྱོར་ཞུ་རྒྱུ་དང་། བོད་པའི་དགེ་འདུན་གྱི་སྡེར་རགས་བྱ་རྒྱུའི་སེམས་འཁུར་ཆེན་པོ་ཡོད། ངས་དགེ་སློང་བོ་དྷིའི་གསུང་ལ་རྒྱབ་སྐྱོར་ཞུ་རྒྱུ་ཡིན། ཐག་གཅོད་ཅི་རུང་བྱས་ཀྱང་ཁས་ལེན་བྱེད་འོས་པ་ལས་ཉམས་ཞིབ་ལྷག་པོ་བྱ་རྒྱུའི་ཐག་གཅོད་མ་ཡིན།

དགེ་སློང་མ་ཐིག་ནུ་ཧུའེ་ཧུའོང་། Thich Nu Hue Huong ཝི་ཊི་ནམ་གྱི་དགེ་འདུན་གྱི་སྡེས་གཞི་སྨྲའི་ལུགས་ཀྱི་དགེ་སློང་མའི་སྡོམ་རྒྱུན་སླར་གསོ་བྱེད་པར་རྒྱབ་སྐྱོར་ཞུ་རྒྱུ་དང་ང་ཚོས་གང་ཐུབ་ཐུབ་ཀྱིས་རོགས་རམ་བྱ་རྒྱུའི་འདོད་པ་ཡོད།

མཁས་དབང་འབུམ་རམས་མ་དགེ་སློང་མ་ཧེང་ཆིང་ཤི། Heng-ching Shih བོད་པའི་སྲོལ་རྒྱུན་ཉམས་ལེན་བྱེད་མཁན་གྱི་ནུབ་ཕྱོགས་པའི་དགེ་སློང་མ་རྣམས་གཞི་སྨྲའི་ལུགས་ཀྱི་དགེ་སློང་མ་སླར་གསོ་བྱ་རྒྱུར་སྤྲོ་སེམས་ཆེན་པོ་ཡོད། འོན་ཀྱང་གེགས་བར་མང་པོ་བྱུང་བའི་རྐྱེན་གྱིས་ཁོང་ཚོ་བློ་ཕམ་དང་སེམས་ངར་ཉམས་སུ་བཅུག་ཡོད། ང་ཚོ་ཚང་མའི་རེ་བར་༸གོང་ས་མཆོག་གིས་མྱུར་དུ་དེའི་ཐད་ཐག་གཅོད་གནང་བའི་རེ་བ་ཞུ་རྒྱུ་ཡིན། ངས་དགེ་སློང་བོ་དྷིས་གསུངས་པའི་གདམ་ཀ་གཉིས་ལ་མོས་མཐུན་ཡོད། གཉིས་ཚོགས་ཀྱི་ཐབས་ལམ་ནི་འདམ་ག་བྱ་འོས་པ་ཞིག་ཡིན་ཡང་། རྐྱང་པའི་ལུགས་ལྟར་གནང་ཡང་ང་ཚོ་ཐེ་ལྦེན་དུ་ཡོད་པའི་དགེ་འདུན་གྱི་སྡེས་དེར་རྒྱབ་སྐྱོར་ཞུ་རྒྱུ་ཡིན། འདུལ་གཞུང་ལ་གཞིགས་ན། གསོལ་བ་བཏབ་ཚེ་དགེ་སློང་མའི་སྡོམ་པ་ནོད་རྒྱུའི་ལས་འགན་དེ་དགེ་སློང་ཕ་ལ་ཡོད། ༸གོང་ས་མཆོག་གིས་ད་ལན་ལོ་རྒྱུས་ཀྱི་ཟིན་ཐོ་ཞིག་གཏོད་རོགས་གནང་ཞེས་འབོད་སྐུལ་ཞུ་རྒྱུ་ཡིན།

མཁས་དབང་འབུམ་རམས་པ་དགེ་སློང་མ་ཀརྨ་ལེགས་བཤད་མཚོ་མོ། བོད་པའི་བཙུན་མ་རྣམས་ལ་དགེ་འདུན་རྐྱང་པའི་ཐོག་ནས་གཞི་སྨྲའི་ལུགས་ཀྱི་སྡོམ་པ་ནོད་པའི་ཁེ་ཕན་ནི། སྐད་ཡིག་དང་། ས་གནས། གོམས་སྲོལ་བཅས་ཀྱི་ཐོག་ནས་སྟབས་བདེ་བ་དང་། བོད་པའི་སྤྱི་ཚོགས་ནང་ལས་སླ་པོར་ཁས་ལེན་ཐུབ་པ་ཞིག་ཡིན། དེ་ནི་ཕུལ་བྱུང་གི་ཐབས་ལམ་ཞིག་མིན། འོན་ཀྱང་སྡོམ་པ་ནོད་མཁན་གྱི་མཁན་པོར་ལྟུང་བ་ཕྲན་བུ་འབྱུང་། དེར་མ་ཟད། ལུགས་འདི་མ་འོངས་པར་ཚད་ལྡན་ཐོག་རྒྱུན་གནས་ཐུབ་པའི་ངེས་བརྟན་མེད་པ་དང་གཉིས་ཚོགས་ཀྱི་ཐབས་ལམ་ནི་འདུལ་རྒྱུད་གཞན་གྱིས་ཁས་ལེན་ཐུབ་པ་དང་། ཆབས་ཅིག་དེའི་ནང་གཞི་སྨྲའི་དགེ་སློང་ཕ་གཏོགས་ཡོད་པས་བོད་རིགས་མཁས་དབང་ཚོས་རྒྱབ་སྐྱོར་བྱེད་ངེས་པ་ཡིན། ཕྱིས་སུ་གཞི་སྨྲའི་དགེ་སློང་ཕ་དང་མ་འདུས་ནས། སྡོམ་པ་འབོག་པའི་ཆོ་ག་དེ་གཉིས་ཚོགས་ཀྱི་ཆོ་གར་བཅོས་སྒྱུར་བྱེད་ཐུབ། ཨེ་ཤི་ཡའི་ས་ཁུལ་འདྲ་མིན་ནང་། དགེ་འདུན་རྐྱང་པ་དང་འདུལ་རྒྱུད་མི་འདྲ་བ་གཉིས་ལས་གྲུབ་པའི་གཉིས་ཚོགས་ཀྱིས་སྡོམ་པ་མནོས་པ་སྔོན་ཚུད་ནས་བྱུང་བ་དང་། ཐབས་ལམ་གཉིས་ཀ་འཐད་ལྡན་དང་ཁས་ལེན་རུང་བར་མངོན།

དགེ་སློང་མ་བྱམས་པ་ཚེ་སྒྲོན། འོས་སྦྱོར་ཞུས་པའི་དགེ་སློང་མའི་སྡོམ་པ་འབོག་འཇོག་གི་ཐབས་ལམ་གཉིས་ལས། གལ་ཏེ་དགེ་འདུན་རྐྱང་པའི་ཐོག་ནས་ཡིན་ན། འཐད་ལྡན་ཡིན་ངེས་ལ་སྡོམ་པའི་མཁན་པོར་ལྟུང་བ་ཕྲ་མོ་ཙམ་ལས་འབྱུང་གི་མེད། ང་ཚོ་ཆོས་སྲུང་སྡེ་པའི་དགེ་སློང་མའི་སྡོམ་པ་བླངས་ཟིན་པ་རྣམས་ལ། གལ་ཏེ་ང་ཚོ་གཞི་སྨྲའི་ལུགས་ཀྱི་དགེ་སློང་མར་ཁས་ལེན་རུང་ན་ཁས་ལེན་གནང་རོགས་གནང་ཞུ་རྒྱུ་ཡིན། གལ་ཏེ་ཁས་ལེན་རུང་བ་མ་ཡིན་ན། ང་ཚོ་ཆོས་སྲུང་སྡེ་པའི་དགེ་སློང་མར་ངོས་ལེན་གནང་རོགས། འོན་ཀྱང་གནད་དོན་གཉིས་ཀའི་ཐད་སྐྱེ་དགུའི་བདག་མོར་དགེ་སློང་མའི་སྡོམ་པ་ནོད་པའི་སྐབས། དེར་སྡེ་སྣོད་མེད། ཐ་ན་ཤྲཱི་ལངྐའི་ནང་ནང་ཆོས་དར་བའི་སྐབས། དེ་ལ་ “གནས་བརྟན་སྡེ་པའམ་ཐེ་ར་ཝཱད་” ཞེས་བརྗོད་ཀྱི་མེད། དེར་བརྟེན་ང་ཚོས་སྡེ་སྣོད་ཀྱི་གནད་དོན་དེ་འགལ་རྐྱེན་ཆེ་བར་བཟོ་རྒྱུ་མེད། འདུལ་རྒྱུད་གཉིས་ཀྱི་དགེ་འདུན་འདྲེས་མས་ཕྱི་ལོ་ ༤༣༣ ནང་རྒྱ་ནག་དུ་ཆོས་སྲུང་སྡེ་པའི་དགེ་སློང་མའི་སྡོམ་རྒྱུན་སླར་གསོ་མཛད་པ་དང་སྦྲགས་སྡོམ་པ་མནོས་པ་དང་། བོད་ནང་དུས་རབས་བཅུ་པའི་ནང་བླ་ཆེན་དགོངས་པ་རབ་གསལ་ལ་སྡོམ་པ་མནོས་པ་མཉམ་དུ་གཞི་སྨྲའི་ལུགས་ཀྱི་དགེ་སློང་ཕའི་སྡོམ་རྒྱུན་སླར་གསོ་མཛད་པའི་སྲོལ་སྔ་མོ་ནས་བྱུང་ཡོད།

དགེ་སློང་མ་འབུམ་རམས་པ་དྷ་མ་ནནྡ། Dhammananda ཆོས་རྒྱལ་མྱ་ངན་མེད་ཀྱི་རྡོ་རིང་གཅིག་ཁོ་ན་ཐོག་མའི་ས་གནས་དེ་གར་རང་སོར་བཞུགས་ཡོད། དེ་ནི་དགེ་སློང་མའི་དགེ་འདུན་གྱི་སྡེ་ཐོག་མར་བཙུགས་སའི་གནས་ཡངས་པ་ཅན་དུ་ཡོད། ངས་བསམ་པར། བདེན་དོན་འདི་ནི་བཀྲ་ཤིས་པའི་རྟགས་མཚན་ཞིག་ཡིན། གང་དུ་དགེ་སློང་མའི་སྡེ་ཆད་པ་དེར་དགེ་སློང་མའི་སྡོམ་པ་གསར་འཛུགས་བྱེད་མཁན་རྣམས་ཀྱིས་ནང་བསྟན་གོང་འཕེལ་དུ་གཏོང་བར་བྱེད། དེར་བརྟེན་ད་དུང་སྒུག་ནས་སྡོད་མི་རུང་།

བཀུར་འོས་བློ་བཟང་བདེ་ཆེན། གཞི་སྨྲའི་ལུགས་ཀྱི་དགེ་སློང་མའི་སྡོམ་རྒྱུན་སླར་གསོ་བྱ་རྒྱུ་ནི་བོད་ཕྱི་ནང་གཉིས་ཀྱི་བོད་རིགས་ཚོར་ཧ་ཅང་གལ་ཆེན་པོ་ཡིན། སླར་གསོ་བྱེད་པའི་འདམ་ག་གཉིས་ཀར་སོ་སོའི་དགེ་སྐྱོན་ཡོད་ཀྱང་། དགེ་འདུན་རྐྱང་པའི་ཐབས་ལམ་དེ་ལེགས་ཤོས་སུ་མངོན། གང་ཡིན་ཞེ་ན། དེ་ཁས་ལེན་བྱེད་སྟབས་བདེ་ཤོས་ཀྱི་ཐབས་ལམ་ཞིག་ཡིན། ཐག་གཅོད་གནང་ཕྱོགས་དེ་༸གོང་ས་མཆོག་ཉིད་ཀྱིས་མཁྱེན།

༸གོང་ས་མཆོག་གི་བཀའ་ལན།

ཆོས་སྲུང་སྡེ་པའི་ལུགས་ཀྱི་དགེ་སློང་མའི་སྡོམ་པ་ཐོབ་པའི་བོད་རིགས་དང་ནུབ་ཕྱོགས་པ་རྣམས་ཆོས་སྲུང་སྡེ་པའི་དགེ་སློང་མར་ང་ཚོ་ཚང་མས་ཁས་ལེན་དང་ངོས་འཛིན་ཞུ་ཡི་ཡོད། དེ་ནི་གནད་དོན་མ་ཡིན། གནད་དོན་ནི་གཞི་སྨྲའི་ལུགས་ཀྱི་འདུལ་བའི་གཞུང་དང་མཐུན་པའི་དགེ་སློང་མའི་སྡོམ་པ་ནོད་ཕྱོགས་ཀྱི་ཐབས་ལམ་འཚོལ་སྒྲུབ་བྱ་རྒྱུ་དེ་ཡིན། དེའི་ཕྱིར་འདི་དང་དེར་བཀའ་འདྲི་ཞུ་བར་སངས་རྒྱས་སྐུ་ངོ་མ་ཞིག་དགོས་པ་ཡིན། གལ་སྲིད་ང་སངས་རྒྱས་ཡིན་ན། ངས་ཐག་གཅོད་བྱེད་ཐུབ། འོན་ཀྱང་གནད་དོན་དེ་འདྲ་མ་རེད། ང་སངས་རྒྱས་མ་ཡིན། ངས་གནད་དོན་ཁ་ཤས་ཁྲོད་བཀས་བཀོད་རྒྱུན་འཛིན་པ་ཞིག་ལྟར་བྱེད་ཐུབ་ཀྱང་། འདུལ་བའི་གནད་དོན་སྐབས་དེ་ལྟར་རྩ་བ་ནས་མི་ཐུབ། ངས་ཆོས་སྲུང་སྡེ་པའི་སྲོལ་རྒྱུན་གྱི་སྡོམ་པ་བླངས་པའི་བོད་རིཌ་དགེ་སློང་མ་རྣམས་འཛོམས་ནས་དགེ་འདུན་གྱི་ཆོ་ག་གསུམ་སྟེ། གསོ་སྦྱོང་དང་། དབྱར་སྦྱོར། དགག་དབྱེ་བཅས་ཉམས་ལེན་བྱ་རྒྱུ་འགོ་འཛུགས་ཐུབ། འོན་ཀྱང་སྡོམ་རྒྱུན་སླར་གསོའི་ཆོ་ག་ནི་གནད་དོན་ཐ་དད་ཅིག་རེད། ངོས་ནས་ཀྱང་དེ་ལྟར་ཡོང་བར་འདོད་པ་ཡོད། དེ་ལ་བསླབ་པ་རྒན་པའི་དགེ་འདུན་གྱི་སྤྱི་མོས་དགོས་ཀྱི་ཡོད། འགའ་ཞིག་གིས་འགོག་རྒོལ་ཤུགས་ཆེན་པོ་བྱེད་ཀྱི་ཡོད། ཚང་མ་གཅིག་མཐུན་གྱི་མོས་མཐུན་མེད་སྟབས་དེ་དཀའ་ངལ་རེད། འོན་ཀྱང་རྒྱ་སྐད་ནས་བོད་སྐད་དུ་བསྒྱུར་བའི་དགེ་འདུན་གྱི་ཆོ་ག་གསུམ་པོ་དེའི་སྐོར་གྱི་ཆོས་སྲུང་སྡེ་པའི་འགྱུར་གྱི་གཞུང་འཚམས་པོ་ཞིག་ངོས་ལ་མྱུར་དུ་འབྱུང་ངེས་པས། དེ་ལ་སུ་གཅིག་གིས་ཀྱང་འགོག་རྒོལ་བྱེད་མི་ཐུབ།

དེ་མིན་གནད་དོན་གཞན་གྱི་ཐོག་ང་ཚོས་བགྲོ་གླེང་མང་ཙམ་བྱེད་དགོས། ནང་པའི་སྲོལ་རྒྱུན་གཞན་གྱི་དགེ་འདུན་གྱི་སྡེའི་རྒྱབ་སྐྱོར་གལ་ཆེན་པོ་ཡིན་པ་དང་། དེར་བརྟེན་ཚོགས་འདུ་འདི་བརྒྱུད་རིམ་དེའི་ཁྲོད་ཕན་ཐོགས་ཆེ་བའི་རིམ་པ་ཞིག་ཡིན། རྗེས་སུ་ངས་རྒྱལ་སྤྱིའི་བསླབ་པ་རྒན་པའི་དགེ་འདུན་གྱི་སྡེ་རྣམས་རྒྱ་གར་དུ་གདན་འདྲེན་ཞུས་ཏེ། གཞི་སྨྲའི་ལུགས་ཀྱི་དགེ་སློང་མའི་སྡོམ་རྒྱུན་སླར་གསོ་བྱེད་པར་ངོ་རྒོལ་བྱེད་མཁན་གྱི་བོད་རིགས་ལྟ་བ་མཁྲེགས་པོ་རྒན་གྲས་དེ་ཚོ་དང་མཉམ་དུ་འབྲེལ་ཡོད་གནད་དོན་ཐོག་བགྲོ་གླེང་བྱེད་འཇུག་གི་ཡིན།

གལ་སྲིད་དེ་རིང་སངས་རྒྱས་འདིར་བཞུགས་ཡོད་ན། ཁོང་གིས་ཐེ་ཚོམ་མེད་པར་གནང་བ་སྦྱིན་ངེས་ཡིན། འོན་ཀྱང་ངས་སངས་རྒྱས་ལྟར་བྱེད་མི་ཐུབ། དུས་རབས་བརྒྱད་པ་ནས་བཟུང་བོད་ནང་གི་གྲྭ་བཙུན་གྱི་མི་ཚེ་སྐྱེལ་སྟངས་ཁྲོད་དགེ་འདུན་གྱི་ཆོ་ག་གསུམ་པོ་ལག་བསྟར་བྱེད་མཁན་གྱི་དགེ་སློང་མ་རྩ་བ་ནས་བྱུང་མེད། དེར་བརྟེན་ད་ཆ་ཏན་ཏན་དེ་འབྱུང་ངེས་ཡིན། འོན་ཀྱང་སྡོམ་རྒྱུན་གྱི་སྐོར་ཐག་གཅོད་བྱ་རྒྱུར་ད་ལྟའི་ཆར་མགྱོགས་དྲག་པ་ཡོད།

ལོ་འདིའི་ནང་དགེ་སློང་མའི་ཆོ་ག་གསུམ་པོ་དེ་དག་འགོ་འཛུགས་བྱ་རྒྱུ་ཁག་པོ་ཡོད་སྲིད། འོན་ཀྱང་ལོ་རྗེས་མ་ཏན་ཏན་འགོ་འཛུཌ་ཐུབ་ངེས་ཡིན། དགེ་སློང་མའི་སོ་ཐར་གྱི་སྡོམ་པའི་སྐོར་རྒྱ་སྐད་ནས་བོད་སྐད་ནང་བསྒྱུར་ཟིན། ཤོག་གྲངས་སུམ་ཅུ་ནས་བཞི་བཅུའི་བར་འདུག བོད་པའི་ཆོས་སྲུང་སྡེ་པའི་དགེ་སློང་མ་ཚོས་དེ་བློ་འཛིན་བྱེད་དགོས། འོན་ཀྱང་དགེ་འདུན་གྱི་ཆོ་ག་གསུམ་པོའི་གཞུང་དངོས་གཞི་དེ་ད་དུང་སྒྱུར་དགོས་པ་ཡིན།

བོད་པའི་བཙུན་མ་ཚོས་གཞི་སྨྲའི་ལུགས་ཀྱི་དགེ་སློང་མའི་སྡོམ་པ་ལེན་འདོད་ཀྱང་། ཆོས་སྲུང་སྡེ་པའི་དགེ་སློང་མའི་སྡོམ་རྒྱུན་དེ་གཞི་སྨྲའི་ལུགས་ཀྱི་སྡོམ་རྒྱུན་དེར་ཁས་ལེན་བྱེད་མི་ཐུབ། གལ་སྲིད་དེ་གཉིས་ནང་ཕན་ཚུན་འགྱུར་རུང་བ་ཞིག་ཡིན་ན། བོད་ནང་དགེ་འདུན་ཕལ་ཆེན་སྡེ་པའི་དགེ་སློང་ཕའི་སྡོམ་པ་མ་གནང་རོགས་ཞེས་ཇོ་བོ་རྗེ་དཔལ་ལྡན་ཨ་ཏི་ཤཱ་ལ་ཞུ་དགོས་དོན་མེད། དུས་རབས་བཅུ་གཅིག་པའི་འགོ་སྟོད་ལ་རྒྱལ་པོ་བྱང་ཆུབ་འོད་ཀྱིས་རྒྱ་གར་གྱི་སློབ་དཔོན་ཨ་ཏི་ཤཱ་བོད་དུ་གདན་དྲངས་པའི་སྐབས། རྒྱལ་པོའི་སྤོ་བོ་རྒྱལ་པོ་ཡེ་ཤེས་འོད་ཀྱིས་རྒྱ་གར་ཤར་ནས་སློབ་དཔོན་དྷརྨ་པཱ་ལཱ་གདན་དྲངས་པ་དང་དེའི་རྗེས་ཀྱི་གཟིགས་སྐོར་སྐབས་རྒྱལ་ཁམས་ནང་གཞི་སྨྲའི་ལུགས་ཀྱི་དགེ་སློང་ཕའི་སྡོམ་རྒྱུན་སླར་གསོའི་ལས་གཞིར་སྔ་ས་ནས་སྦྱིན་བདག་མཛད། ཇོ་བོ་རྗེར་དགེ་འདུན་ཕལ་ཆེན་སྡེ་པའི་དགེ་སློང་ཕའི་སྡོམ་པ་མ་གནང་རོགས་ཞེས་གསོལ་བ་བཏབ། རྒྱུ་མཚན་ནི་བོད་ནང་འདུལ་བའི་རྒྱུད་པ་གཉིས་མི་ཡོང་བའི་སླད་དུ་ཡིན།

གཞན་ཡང་གལ་ཏེ་ཆོས་སྲུང་སྡེ་པའི་སྡོམ་རྒྱུན་དེ་གཞི་སྨྲའི་སྡོམ་རྒྱུན་དུ་རུང་ན། གནས་བརྟན་སྡེ་པའི་སྡོམ་རྒྱུན་ཡང་གཞི་སྨྲའི་སྡོམ་རྒྱུན་དུ་རུང་བས། དེ་ནི་ཁུངས་མེད་ལུང་མེད་རང་ཡིན། ང་ཚོས་གཞི་སྨྲའི་འདུལ་གཞུང་དང་བསྟུན་ནས་གཞི་སྨྲའི་ལུགས་ཀྱི་དགེ་སློང་མའི་སྡོམ་རྒྱུན་སླར་གསོ་བྱེད་དགོས་པ་ཡིན།

ཕྱི་ལོ་ ༢༠༠༧ ཟླ་ ༧ ཚེས་ ༢༡ ཉིན་ལྷན་ཚོགས་ཀྱི་སྐུ་ཚབ་མཇལ་བཅར་སྐབས་བསྩལ་བའི་༸གོང་ས་མཆོག་གི་བཀའ་འགྲེལ་སྣོན་མ།

འདི་ལོའི་དགུན་ཁར། ང་ཚོས་རྒྱ་གར་གྱི་མངའ་ཁུལ་རྡོ་རྗེ་གདན་ནམ་སཱ་རཱ་ན་ཐཱ་ཡང་ན་ལྡི་ལིར་འདི་དང་འདྲ་བའི་ལྷན་ཚོགས་ཤིག་སྐོང་འཚོགས་བྱེད་ཀྱི་ཡིན། ཧམ་བྷུརྒ་ Hamburg གི་ལྷན་ཚོགས་འདིར་ཕེབས་པའི་རྒྱལ་སྤྱིའི་དགེ་འདུན་བསླབ་པ་རྒན་པ་རྣམས་ཀྱི་ཁར། ང་ཚོས་བོད་པའི་ཆོས་རྒྱུད་ཆེ་ཁག་བཞིའི་དགོན་སྡེ་ཁག་གི་བླ་ཆེན་དང་མཁན་པོ་རྣམས་གདན་འདྲེན་ཞུ་རྒྱུ་ཡིན། དེ་བཞིན་བོན་པོ། བོན་པོའི་ནང་དགེ་སློང་མ་ད་དུང་ཡོད། ང་ཚོས་བསླབ་པ་རྒན་པ་དང་། གུས་བཀུར་འོས་པའི་ཚད་ལྡན་གྱི་དགེ་སློང་བརྒྱ་སྐོར་ཞིག་གདན་འདྲེན་ཞུ་རྒྱུ་ཡིན། དེ་རྗེས་རྒྱལ་སྤྱིའི་དགེ་འདུན་གྱི་བསླབ་པ་རྒན་པའི་སྡེ་རྣམས་ཀྱི་སྐུ་མདུན་དུ་ངོ་དང་ངོ་ཐུག་ནས་དགེ་སློང་མའི་སྡོམ་རྒྱུན་སླར་གསོ་དགོས་ཕྱོགས་ཐད་ཀྱི་རང་རང་གི་དགོས་པ་རྒྱུ་མཚན་གསུང་རོགས་གནང་ཞེས་ངོས་ནས་འབོད་སྐུལ་ཞུ་རྒྱུ་ཡིན། དེ་འདྲ་བྱུང་ན་ཕན་རླབས་ཆེན་པོ་ཡོང་ངེས། ང་ཚོ་བོད་པ་ཚོས་ཚོགས་ཆེན་དེའི་དཔལ་འབྱོར་གྱི་འགྲོ་གྲོན་གཏོང་རྒྱུ་དང་གོ་སྒྲིག་བྱེད་མཁན་སུ་ལེགས་མིན་ཐག་གཅོད་བྱེད་ཀྱི་ཡིན།

འདས་པའི་དུས་རབས་ཉི་ཤུ་རྩ་དྲུག་རིང་། ཆོས་མངོན་པའི་ཐད་པཱ་ལི་དང་ལེགས་སྦྱར་གྱི་འབྲེལ་ཚུལ་ལ་ཁྱད་པར་མང་པོ་བྱུང་ཡོད། མགོན་པོ་ཀླུ་སྒྲུབ་ཀྱིས་དོན་ཚན་ཁག་ཅིག་འགྲེལ་བརྗོད་གནང་བ་དང་སྲོལ་རྒྱུན་དེ་གཉིས་དབར་གྱི་དེ་མིན་ཁྱད་པར་མངོན་གསལ་དོད་པོ་རྣམས་བརྟག་དཔྱད་བྱེད་པའི་ཐོག་ནས་གསལ་ཁ་འདོན་ཐུབ། དེའི་ཕྱིར་ང་ཚོས་རང་དབང་ངང་སངས་རྒྱས་ཀྱི་བཀའ་ལ་བརྟག་དཔྱད་བྱེད་ཆོག དཔེར་ན། རི་རྒྱལ་ལྷུན་པོ་དང་། འཛམ་གླིང་ལེབ་ལེབ་རེད་ཟེར་བ། ཉི་མ་དང་ཟླ་བ་གཉིས་ཕལ་ཆེར་ཆེ་ཆུང་གཅིག་པ་དང་ས་གཞི་ལས་རྒྱང་ཐག་རིང་ལོས་གཅིག་པ་རེད་ཟེར་བ་ལྟ་བུ། དེ་དག་ནི་མཐའ་གཅིག་ཏུ་ཁས་ལེན་བྱ་ཐབས་མེད་པ་ཞིག་ཡིན། ངོས་ཀྱི་ཡོངས་འཛིན་རྣམ་གཉིས་ཀྱིས་ཀྱང་ལྷ་ས་ནས་ངའི་རྒྱང་ཤེལ་བརྒྱུད་གཟིགས་སྐབས། ཟླ་བའི་སྟེང་ནས་རིའི་གྲིབ་གཟུགས་གཟིགས་ཏེ་མངོན་པ་མཛོད་ནང་གསུངས་པ་བཞིན་ཟླ་བ་རང་ངོས་ནས་འོད་ཟེར་འབྱིན་གྱི་མེད་པ་ཁས་ལེན་གནང་དགོས་བྱུང་། དེར་བརྟེན་མགོན་པོ་ཀླུ་སྒྲུབ་ཀྱིས་གསལ་བཤད་མཛད་པར་དགེ་འདུན་གྱི་སྡེའི་ངོས་ནས་བགྲོ་གླེང་གནང་དགོས་དོན་མེད། མདོའི་གནད་དོན་ལ་བསམས་ནའང་གཅིག་མཚུངས་ཡིན། འོན་ཀྱང་འདུལ་བའི་ཐོག་ལ་སླེབས་སྐབས་རྩ་བ་ནས་མི་འདྲ་བ་ཡིན།

འདུལ་བའི་འགྱུར་ཚང་མ་ཐམས་ཅད་མཁྱེན་པ་ལ་མཆོད་པ་བརྗོད་པའི་སྒོ་ནས་འགོ་རྩོམ་གྱི་ཡོད། དེའི་དོན་ནི་ཐམས་ཅད་མཁྱེན་པ་ཉིད་ཀྱིས་ལས་གང་ཞིག་ཉམས་སུ་ལེན་དགོས་པ་དང་གང་ཞིག་སྤོང་དགོས་པ་ཇི་ལྟ་བ་བཞིན་དུ་མཁྱེན་སྟབས། སངས་རྒྱས་ཉིད་ཀྱིས་གཞུང་དེར་ངོས་སྦྱོར་གནང་བ་ཡིན། ཕྱོགས་གཞན་ཞིག་ནས། ཆོས་མངོན་པ་མཛོད་ཀྱི་ནང་འཇམ་དཔལ་དབྱངས་ལ་མཆོད་པ་བརྗོད་ཀྱི་ཡོད། སངས་རྒྱས་ཡོངས་སུ་མྱ་ངན་ལས་འདས་པའི་རྗེས། དགེ་འདུན་གྱི་ལྷན་འཛོམས་མཛད་དེ་འདུལ་བའི་གཞུང་ལ་སྒྱུར་བཅོས་ཕྲན་བུ་གནང་། དེ་ལ་སངས་རྒྱས་ཀྱིས་གནང་བ་ཡོངས་སུ་བྱིན་པ་དང་གནད་དོན་གཞན་གྱི་ཐོག་ཏུའང་རྒྱ་སྐྱེད་གཏོང་ཆོག་ཅེས་གསུངས། དཔེར་ན། ང་ཚོ་བོད་པ་ཚོས་བྱང་སེམས་ཀྱི་ཐེག་པ་དང་སྔགས་ཀྱི་ཐེག་པ་ཉམས་ལེན་བྱེད་ཀྱི་ཡོད། དེ་དག་སོ་སོར་སོ་སོའི་སྡོམ་པ་ཆ་ཚང་རེ་ལྡན་ཡོད། དེ་དག་ནང་དང་འདུལ་བའི་ནང་གནད་དོན་དང་སྲུང་སྡོམ་ཁག་ཅིག་ལ་འགལ་བ་ཡོད། གནད་དོན་དེ་རིགས་སྐབས་སྡོམ་པ་རིམ་པ་མཐོ་བ་རྣམས་ངེས་པར་དུ་དམའ་བའི་མཚན་གཞིར་འཁྱེར་དགོས་པ་ཡིན།

དུས་རབས་ཉི་ཤུ་རྩ་གཅིག་པའི་ནང་། དམག་འཁྲུག་གི་ལྟ་ཚུལ་ནི་དུས་ཚོད་ཡོལ་ཟིན་པ་རེད། དེའི་ཚབ་ལ་གནད་དོན་ཐག་གཅོད་བྱེད་པར་ང་ཚོས་གོ་བསྡུར་བྱེད་དགོས། དེ་ལ་རྣམ་དཔྱོད་ཙམ་གྱིས་འདང་གི་མེད། གཞན་གྱི་བདེ་ཐབས་སླད་ང་ཚོར་སེམས་པ་བཟང་པོ་དང་བཅོས་མིན་གྱི་དོ་དབྱིངས་དགོས། བཅོས་མིན་གྱི་གོ་བསྡུར་ཡོང་བར་སྙིང་རྗེ་ཧ་ཅང་གལ་ཆེན་པོ་ཡིན། བུད་མེད་རྣམས་ལ་ལུས་པོའི་གྲུབ་ཆའི་ཐོག་ནས་གཞན་གྱི་སྡུག་བསྔལ་ལ་སྐྱེས་པ་ལས་ཚོར་བ་སྐྱེན་པ་ཡོད། དཔེར་ན། སྡེབ་གསོད་བྱེད་མཁན་ནམ་ཤན་པ་བྱེད་མཁན་བུད་མེད་ཧ་ལམ་ཉུང་ཉུང་ཡིན། དེར་བརྟེན་རྒྱལ་སྤྱིའི་རིམ་པའི་ཐོག་ནས་གྲོས་མོལ་བྱེད་སྐབས། བུད་མེད་གང་མང་མང་དགོས་རྒྱུ་གལ་ཆེན་པོ་ཡིན་ཅིང་བུད་མེད་ཚོས་ལས་འགན་གང་རྒྱ་ཆེ་ཆེ་སྒྲུབ་དགོས་པ་ཡིན།

སངས་རྒྱས་ཀྱི་སློབ་མ་སྡེ་བཞིའི་ནང་དགེ་སློང་ཕ་མ་གཉིས་དང་དགེ་བསྙེན་ཕ་མ་གཉིས་གཏོགས་ཡོད། བུད་མེད་དང་སྐྱེས་པ་ཚོས་ལས་འགན་དང་བྱ་གཞག་གཅིག་མཚུངས་སྒྲུབ་བཞིན་པ་སྨྲོས་ཅི་དགོས། འོན་ཀྱང་ད་ལྟ་བོད་པའི་ནང་འཁོར་བཞི་ཆ་ཚང་བ་མེད། མི་ལུས་རིན་ཆེན་གྱི་དལ་པ་བརྒྱད་དང་འབྱོར་བ་བཅུའི་ནང་ནས། གཅིག་ནི་ས་བཤད་དམ་ཆོས་ཀྱི་ཐོག་ནས་འགྲེལ་བརྗོད་བྱེད་པའི་ཡུལ་དབུས་སུ་སྐྱེ་བ་དེ་ཡིན། བོད་ནི་ས་བཤད་ཀྱི་ཐོག་ནས་ཡུལ་དབུས་མ་ཡིན། ཆོས་ཀྱི་ཐོག་ནས་བོད་ནི་འཁོར་བཞི་ཚང་བའི་ཡུལ་དུ་འགྲེལ་བརྗོད་བྱས་ཡོད། དགེ་སློང་མ་མེད་པར་ཆ་ཚང་མེད་པ་གསལ་པོ་རེད། བོད་པ་མང་པོ་ཞིག་གིས་དགེ་སློང་ཕ་རྣམས་འཁོར་བཞི་ལས་གལ་ཆེ་ཤོས་ཡིན་སྟབས། གལ་ཏེ་དགེ་སློང་ཕ་ཡོད་ན་ཡུལ་དབུས་སུ་བརྗོད་ཀྱི་ཡོད། འོན་ཀྱང་དེས་ཡུལ་དབུས་དང་མི་ལུས་རིན་ཆེན་གྱི་ཆ་ཙམ་འགྲེལ་བརྗོད་བྱེད་པ་ཡིན། བོད་ནང་གི་སྔོན་གྱི་མཁས་པ་རྣམས་ཀྱིས་དེའི་ཐོག་དོ་སྣང་མཛད་ཡོད་ངེས་ཡིན།

དགེ་འདུན་གྱི་སྡེར་གྲོས་མ་དྲིས་པར། བོད་རིགས་བཙུན་མ་རྣམས་ཀྱི་ཤེས་ཡོན་གོང་མཐོར་གཏོང་བའི་ལས་གཞིར་ངས་སྣེ་ཁྲིད་ཐུབ། ངས་དེ་ལྟར་འབད་བརྩོན་བསྟེན་པ་ཡིན་ལ་བཙུན་མ་མང་པོ་ཞིག་གི་ཤེས་ཡོན་གྱི་གནས་ཚད་མཐོན་པོ་སླེབས་ཡོད། རྒྱ་གར་ལྷོ་ཕྱོཌ་མོན་གྷོ་གཞིས་ཆགས་སུ་ཡོད་པའི་དགོན་སྡེ་ཁག་གི་ནང་། ང་ཚོས་དགེ་བཤེས་མའི་ཡིག་རྒྱུགས་ལ་གྲ་སྒྲིག་བྱེད་དགོས་ཞེས་ངོས་ནས་ཁྱབ་བསྒྲགས་བྱས་པ་ཡིན། གྲྭ་པ་རྒན་གྲས་ཁ་ཤས་ཀྱིས་དགག་པ་བྱས་ཡོད། འོན་ཀྱང་ངས་ཁོང་ཚོར་སངས་རྒྱས་ཀྱིས་བུ་དང་བུ་མོ་ཚོར་དགེ་སློང་ཕ་མ་བྱེད་པར་ཐོབ་ཐང་གཅིག་གྱུར་གནང་ཡོད་ཅེས་བཤད་པ་ཡིན། དེར་བརྟེན་དགེ་བཤེས་ཕ་དང་མ་བྱེད་པར་ཐོབ་ཐང་གཅིག་པ་མེད་པའི་རྒྱུ་མཚན་གང་ཡོད་དམ། ངའི་བསམ་པར། དཀའ་ངལ་ནི་གྲྭ་པ་རྒན་པ་དེ་དག་ལ་བསམ་བློ་འདི་འདྲ་གཏོང་བའི་གོམས་གཤིས་མེད་པའི་རྐྱེན་གྱིས་རེད་བསམ་གྱི་འདུག

ལོ་རབས་དྲུག་བཅུ་པའི་ནང་། ཟླ་རེའི་གསོ་སྦྱོང་སྐབས་གྲྭ་པ་གཅིག་པུ་མིན་པར་བཙུན་མ་རྣམས་ཀྱང་ཕེབས་དགོས་ཞེས་ངས་འབོད་འགུགས་བྱས་པ་ཡིན། ལོ་དེ་དག་ནང་དགེ་སློང་མ་མེད་པ་དང་། དགེ་ཚུལ་མ་རྣམས་སྤྱིར་བཏང་གྲྭ་པའི་གསོ་སྦྱོང་ལ་མཉམ་ཞུགས་ཆོག་གི་མེད་ཀྱང་། ངོས་ཀྱིས་ཡོངས་འཛིན་རྣམ་གཉིས་ནས་ཁོང་ཚོར་མཉམ་ཞུགས་ཆོག་པར་ཆོག་མཆན་གནང་ཡོད། དེར་བརྟེན་ང་ཚོས་དེ་ལྟར་ལག་ལེན་བྱས་པ་ཡིན། བཙུན་པ་དང་བཙུན་མ་རྣམས་མཉམ་དུ་གསོ་སྦྱོང་ཚོགས་པའི་བྱུང་བ་མེད་སྟབས། རྒྱ་གར་ལྷོ་ཕྱོཌ་ཀྱི་དགོན་སྡེ་ཁག་ནང་ནས་ཟུར་ཟའི་ཚུལ་དུ་དགག་པ་དུ་མ་བརྒྱབ་ཡོད། འོན་ཀྱང་རྒྱུ་མཚན་དེ་ལ་བརྟེན་སྐྱ་སར་བབ་མཁན་གཅིག་ཀྱང་བྱུང་མེད།

ལོ་རབས་བདུན་བཅུ་པ་ནས། བོད་རིགས་ཁ་ཤས་ཀྱིས་རྒྱ་ནག་གི་སྲོལ་རྒྱུན་ལས་དགེ་སློང་མའི་སྡོམ་པ་བླངས་ཡོད། ངོས་རང་ཐེའེ་ཝན་ལ་འགྲོ་དགོས་པའི་རྒྱུ་མཚན་གཙོ་བོ་གཅིག་ནི་དེ་གའི་དགེ་སློང་མའི་རྒྱུད་པའི་གནས་སྟངས་ལ་ལྟ་རྒྱུ་དང་བརྟག་དཔྱད་བྱ་རྒྱུའི་ཆེད་དུ་ཡིན། ངས་དགེ་སློང་བློ་བཟང་ཚེ་རིང་ལགས་དགེ་སློང་མའི་སྡོམ་པར་ཞིབ་འཇུག་བྱེད་མིར་བཀོད་པ་དང་ཁོང་གིས་ལོ་ཉི་ཤུ་ཙམ་དེའི་ཐད་ཞིབ་འཇུག་གནང་ཡོད། ང་ཚོས་འབད་བརྩོན་གང་ཐུབ་ཅི་ཐུབ་བྱས་ཡོད། རྒྱ་ནག་གི་དགེ་སློང་ཕ་སྡོམ་པ་ནོད་མཁན་གཙོ་བོ་རྣམས་ལ་རྒྱལ་སྤྱིའི་དགེ་འདུན་གྱི་ཚོགས་ཆེན་ཞིག་སྐོང་འཚོགས་གནང་རོགས་ཞེས་ངས་རེ་བ་ཞུས་པ་ཡིན། འོན་ཀྱང་ཁོང་ཚོས་དེ་ལྟར་སྒྲུབ་ཐུབ་མེད། ངོས་རང་གིས་དེ་ལྟའི་ཚོགས་ཆེན་གོ་སྒྲིག་ཞུ་ཐུབ་ཀྱི་མི་འདུག གང་ཡིན་ཞེ་ན། རྒྱ་ནག་སྤྱི་མཐུན་རྒྱལ་ཁབ་ཀྱི་ངོས་ནས་དཀའ་རྙོག་དང་རྙོག་དྲ་ཡོང་ངེས་ཡིན། དེར་བརྟེན་སྒྲིག་འཛུགས་གཞན་ཞིག་གིས་གོ་སྒྲིག་བྱས་ན་ལེགས་པ་ཡོད། དེས་ན་ངས་བྱམས་པ་ཆོས་སྒྲོན་ལགས་སུ་རེ་བ་ཞུས་པ་ཡིན། གྲྭ་པ་སྒེར་ཞིག་གི་ངོས་ནས་བྱེད་དགོས་རྒྱུ་ཚང་མ་བྱས་པ་ཡིན། ད་ཆ་ང་ཚོས་བོད་པའི་དགེ་སློང་བསླབ་པ་རྒན་པ་རྣམས་ཀྱི་གཅིག་གྱུར་གྱི་མོས་མཐུན་དགོས་ཀྱི་ཡོད།

དགེ་ཚུལ་ཕ་མ་གཉིས་ཀྱི་སྡོམ་པ་འབོག་འཇོག་སྐབས་གུས་བཀུར་ཞུ་ཡུལ་ཏག་ཏག་ཅིག་ངེས་པར་དུ་ཤེས་དགོས་པ་གསུངས་ཡོད། དེ་ལྟར་གསུངས་ནའང་། སྡོམ་པ་ཉིད་ཀྱི་ཐོག་ནས་དགེ་སློང་མའི་སྡོམ་པ་མཐོ་བ་ཡོད། འོན་ཀྱང་དེ་དག་ནི་དགེ་ཚུལ་ཕའི་གུས་བཀུར་ཞུ་ཡུལ་ཞིག་མ་ཡིན་པ་གསུངས་ཡོད། བྱང་སེམས་དང་གསང་སྔགས་ཀྱི་སྡོམ་པ་སེམས་ལ་བཞག་པའི་ཐོག་ནས་དེ་ལ་བཅོས་སྒྱུར་དགོས་ཤས་ཆེ། ལྷག་པར་དུ་སྔགས་སྡོམ་ནང་བུད་མེད་ལ་སྨད་ར་བཏང་ན་རྩ་ནས་མི་འགྲིག་པ་ཡིན། ལྟ་ཚུལ་དེའི་ཐོག་ནས་འདུལ་བའི་གནད་དོན་དེ་ལག་བསྟར་བྱ་རྒྱུ་སྟབས་བདེ་པོ་མེད། དེ་བཞིན་སྡོམ་པ་གསུམ་པོ་རྣམས་སེམས་ལ་བཞག་པའི་ཐོག་ནས་གནད་དོན་ཆུང་ཙག་འགའ་ལའང་བཅོས་སྒྱུར་གཏོང་དགོས། གཞི་སྨྲའི་ལུགས་ཀྱི་དགེ་སློང་མའི་སྡོམ་པ་མ་བླངས་སྔོན་དེ་སློབ་སྦྱོང་བྱེད་ཕྱོགས་ཐད། ཆོས་སྲུང་སྡེ་པའི་ལུགས་ཀྱི་དགེ་སློང་མའི་སྡོམ་པ་བླངས་ཟིན་པ་རྣམས་ཀྱིས་རང་ལུགས་ཀྱི་ཆོ་ག་ལྟར་འགྲོ་དགོས་ཀྱང་། དེར་ལྟ་ཀློག་བྱས་ཏེ་སློབ་སྦྱོང་བྱས་ན་འགྲིག་གི་ཡོད། གང་ལྟར་དགེ་སློང་མ་མ་ཡིན་པ་རྣམས་ཀྱིས་སྡོམ་པ་དེ་དག་སློབ་སྦྱོང་བྱེད་ཕྱོགས་ཐད་ད་དུང་དཀའ་ངལ་ཡོད།

སྒྱུར་བཅོས་དེ་དག་ཚང་མ་གཏོང་བའི་ཁྲོད་དང་ལྷག་པར་དུ་གཞི་སྨྲའི་ལུགས་ཀྱི་དགེ་སློང་མའི་སྡོམ་རྒྱུན་སླར་གསོ་བྱེད་པའི་གནད་དོན་ཐད་བོད་པའི་དགེ་འདུན་གྱི་སྡེ་འགའ་ཞིག་ཙམ་གྱིས་བྱ་རྒྱུ་མེད་པར་ཧ་ཅང་གལ་ཆེན་པོ་ཡིན། ང་ཚོས་དགེ་འདུན་གྱི་སྡེ་ཁ་བྲལ་གཏོང་བའི་བྱ་སྤྱོད་ངེས་པར་དུ་སྤོང་དགོས། བོད་པའི་དགེ་འདུན་གྱི་སྡེ་སྤྱི་ཡོངས་ནང་ང་ཚོར་རྒྱ་ཆེ་བའི་བསམ་བློ་གཅིག་མཐུན་དགོས། དེ་ལྟར་བྱུང་ན། ང་ཚོས་ཁ་ཕྱོགས་དེའི་ཐོག་གོམ་པ་མུ་མཐུད་སྤོ་ཡི་ཡོད། ངོས་ནས་ཁྱེད་རང་ཚོ་ཚང་མས་འབད་བརྩོན་ཧུར་ཐག་གནང་བར་ཐུགས་རྗེ་ཆེ་ཞུ་རྒྱུ་ཡིན།།