ངོ་སྤྲོད།
ཕ་རོལ་ཏུ་ཕྱིན་པ་དྲུག་ལས་ལྔ་པ་ནི། བསམ་གཏན་གྱི་ཕ་རོལ་དུ་ཕྱིན་པའམ་སེམས་བརྟན་ཆའི་རང་བཞིན་དེ་ཡིན། འདི་ལ་བརྟེན་ནས་ང་ཚོས་ཡུལ་གང་ཡང་རུང་བར་རང་གི་དགེ་བའི་སེམས་ཚོར་དང་གཏིང་ཟབ་པའི་རྟོགས་པ་གང་འདོད་འདོད་དུ་དམིགས་པ་ཡང་དག་པར་གཏད་ཐུབ་པ་དང་། ང་ཚོའི་སེམས་འདི་ ༼འདོད་པའི་ཡུལ་ལ་ཆགས་པ་གཙོ་བྱས་པའི་༽ རྣམ་གཡེང་དང་། ཉོན་མོངས་དབང་གིས་སེམས་བྱིང་བ་དང་རྒོད་པའི་མཐར་མི་ལྷུང་བ་ལས་ཡོངས་སུ་བྲལ་བ་ཞིག་ཡིན། སེམས་གྲུང་ཤ་དོད་པོའི་སྒོ་ནས་ང་ཚོའི་ནུས་པ་ཡོངས་སུ་རྫོགས་པ་རྩེ་གཅིག་པའི་བསམ་གཏན་དང་ཞི་དུལ་དུ་གྱུར་ནས་སོ་སོའི་སེམས་གང་བྱུང་འཕྲོ་གི་མ་རེད། གནས་སྐབས་དེར་ལུས་སེམས་གཉིས་ཀར་སྤྲོ་སེམས་རབ་ཏུ་འཁོལ་བའི་ཤིན་སྦྱངས་ཀྱི་བདེ་བ་དང་ཞི་བ་བླ་ན་མེད་པ་ཞིག་མྱོང་གི་ཡོད། རྣམ་གཡེང་གྱི་བསམ་བློ་དང་ལྷན་སྐྱེས་མིན་པའི་སེམས་ཚོར་གང་ཡོད་པ་ཐམས་ཅད་མེད་པ་ཆགས་ནས། རབ་ཏུ་དྭངས་ཤིང་གསལ་བའི་སེམས་ཤིག་ཉམས་སུ་མྱོང་བ་ཡིན། དེ་ལྟ་བུའི་གསལ་ཞིང་རིག་པའི་སེམས་ཀྱི་ངོ་བོ་རྗེན་པ་དང་བདེ་བའི་གནས་བབས་ལ་ཆགས་ཞེན་མེད་པར། དེ་རང་ཉིད་ཀྱི་འདོད་པའི་དགེ་བའི་དམིགས་འདུན་ལ་ཡོངས་སུ་བཀོལ་ཐུབ་ཀྱི་ཡོད།
བསམ་གཏན་གྱི་ཕ་རོལ་དུ་ཕྱིན་པ་ལ་དབྱེ་བ་འབྱེད་ཚུལ་ཁ་ཤས་ཡོད་པ་ནི། ངོ་བོ་དང་། རིགས། བྱེད་ལས་བཅས་ཀྱི་སྒོ་ནས་དབྱེ་བ་གསུམ་ཡོད་པ་ནི།
ངོ་བོའི་སྒོ་ནས་བསམ་གཏན་གྱི་དབྱེ་བ།
བསམ་གཏན་གྱི་ཕ་རོལ་དུ་ཕྱིན་པའི་རིམ་པ་མི་འདྲ་བ་རྣམས་ཀྱི་དབྱེ་བ་འབྱེད་ཚུལ་གཅིག་ནི། བསམ་གཏན་རྒྱུད་ལ་མངའ་བའི་གང་ཟག་གི་གནས་ཚད་དང་བསྟུན་ནས་དབྱེ་བ་འབྱེད་དགོས། བསམ་གཏན་གྱི་ཕ་རོལ་ཕྱིན་པར་དབྱེ་འབྱེད་གཏོང་བའི་སྐབས་འདི་ལྟར་དབྱེ་ཆོག་སྟེ།
- མི་ཕལ་པའམ་སོ་སོ་སྐྱེ་བོ། འདི་ནི་གང་ཟག་གང་ཞིག་སྟོང་པ་ཉིད་ལ་རྟོག་མེད་ཀྱི་སྒོ་ནས་རྟོགས་པ་བརྙེས་པ་དེ་ཡིན།
- སོ་སོ་སྐྱེ་བོ་ལས་འདས་པའི་འཕགས་པའི་གང་ཟག རྟོགས་པ་མཐོ་བའི་འཕགས་པའི་གང་ཟག་གང་ཞིག་སྟོང་ཉིད་ལ་རྟོག་མེད་མངོན་སུམ་དུ་རྟོགས་པའི་ཤེས་པ་དེ་ཡིན།
གང་ཟག་གང་ཞིག་གིས་རྟོག་མེད་མངོན་སུམ་དུ་སྟོང་ཉིད་ཅུང་ཟད་ཙམ་ཞིག་ཉམས་སུ་མྱོང་ཡོད་ནའང། ཁོ་ཚོའི་སེམས་ཀྱི་ཉོན་མོངས་པའི་རིམ་པ་གང་ཙམ་ཞིག་སྤངས་ཡོད། བྱས་ཙང་། ཉོན་མོངས་དབང་གིས་རང་གི་ཉིན་རེའི་མི་ཚེ་ནང་བསམ་གཏན་གྱི་ཕ་རོལ་ཏུ་ཕྱིན་པ་ལག་ལེན་བསྟར་མི་ཐུབ་པའི་ཉེན་ཁ་ཆུང་བ་ཡོད།
རིགས་ཀྱི་སྒོ་ནས་བསམ་གཏན་གྱི་དབྱེ་བ།
དབྱེ་བ་འདི་ནི། བསམ་གཏན་གྱི་ཕ་རོལ་ཏུ་ཕྱིན་པ་འཐོབ་པར་འབད་བརྩོན་བྱེད་པའི་སྐབས་སུ་ང་ཚོས་ག་རེ་སྒྲུབ་ཐབས་བྱེད་ཀྱི་ཡོད་པ་དེ་ལ་གོ་གི་ཡོད། དེ་ཡང་ང་ཚོའི་བསམ་གཏན་དེ་ག་རེ་འཐོབ་ཐུབ་ཡག་གི་ཕྱོགས་སུ་དམིགས་ཀྱི་ཡོད་ཅེ་ན།
- ཞི་གནས། སེམས་བྱིང་བ་དང་རྒོད་པ་གཉིས་ལས་ཡོངས་སུ་བྲལ་ཞིང་། རྩེ་གཅིག་ཏུ་བརྟན་པོ་དང་ལྷིང་འཇགས་པོ་ཡོད་པ་དང་། ལུས་སེམས་གཉིས་ཀར་སྤྲོ་སེམས་འཁོལ་བའི་ཤིན་སྦྱངས་ཀྱི་བདེ་བ་མྱངས་བ་ལ་བརྟེན་ནས་སེམས་ལས་སུ་རུང་བར་གྱུར་བས་དགེ་བའི་དམིགས་པ་ལ་གང་འདོད་དུ་གནས་ཐུབ་པ་ཞིག་ཡིན། དེས་སེམས་དགེ་བའི་དམིགས་པ་རྩེ་གཅིག་པའི་ངང་ནས་འཇོག་ཐུབ་པ། དཔེར་ན། སེམས་ཅན་གཅིག་གམ་འགྲོ་བ་སེམས་ཅན་མཐའ་མེད་པ་ལ་སྙིང་རྗེ་སྒོམ་པ་ལྟ་བུ་ཡིན།
- ལྷག་མཐོང་། སེམས་ཀྱི་གནས་བབས་མངོན་སུམ་ཁྱད་པར་ཅན་ཞིག་དང་། དེ་ག་ནང་བཞིན་སེམས་བྱིང་རྒོད་དང་བྲལ་ཞིང་ལུས་སེམས་ཤིན་སྦྱངས་ཀྱི་དགའ་བདེའི་མངོན་སུམ་དུ་མྱོང་བ་མ་ཟད། དངོས་པོའི་གནས་ལུགས་ཞིབ་ཚགས་པོ་དང་གསལ་པོར་རྟོགས་ཐུབ་པ་ཞིག་ཡིན། ཞི་གནས་ཀྱི་ཉམས་ལེན་དང་འདྲ་བར། ལྷག་མཐོང་གིས་ཀྱང་སེམས་སྙིང་རྗེ་སོགས་དགེ་བའི་དམིགས་པར་རྩེ་གཅིག་ཏུ་གནས་པ་ཞིག་ཡིན། འོན་ཀྱང་སྐབས་འདིར་སེམས་ཅན་རྣམས་ཀྱི་མི་རྟག་པ་དང་དེའི་སྡུག་བསྔལ་གྱི་རང་བཞིན་གྱི་ཁྱད་ཆོས་སྤྱི་ལ་རྟོག་དཔྱོད་རགས་པ་བྱེད་པ་དང་དེའི་མྱོང་བའི་སྡུག་བསྔལ་གྱི་རིགས་སོ་སོའི་གནས་ལུགས་ཕྲ་ཞིང་ཕྲ་བ་ཞིབ་ཚགས་པོས་དཔྱོད་པ་བྱེད་ཀྱི་ཡོད།
- ཞི་ལྷག་ཟུང་འབྲེལ། ཞི་གནས་ཡོངས་སུ་ཐོབ་ཟིན་པའི་གནས་སྐབས་སུ། དེ་ལྷག་མཐོང་དང་ཟུང་དུ་འབྲེལ་བར་འབད་བརྩོན་བྱེད་དགོས། ལྷག་མཐོང་ངོ་མ་ནི་ཞི་གནས་སྔོན་དུ་ཐོབ་ཟིན་པའི་རྨང་གཞིའི་ཐོག་ནས་སྐྱེ་བ་ཡིན། ཞི་ལྷག་གཉིས་ཟུང་དུ་འབྲེལ་བ་ལས་དེ་གཉིས་ཀྱི་དྲངས་པའི་ཤིན་སྦྱངས་ཀྱི་དགའ་བདེ་ཐོབ་ཅིང་། སེམས་དགེ་བའི་དམིགས་པ་ལ་རྩེ་གཅིག་ཏུ་གང་འདོད་དུ་བཀོལ་ཆོག་པ་མ་ཟད། ཡུལ་གྱི་གནས་ལུགས་ཕྲ་རགས་གཉིས་ཀར་རྟོག་དཔྱོད་བྱེད་ཀྱི་ཡོད།
བྱེད་ལས་ཀྱི་སྒོ་ནས་བསམ་གཏན་གྱི་དབྱེ་བ།
བསམ་གཏན་གྱི་ཕ་རོལ་ཏུ་ཕྱིན་པ་ཐོབ་ཟིན་མཚམས་སུ། དེས་འབྲས་བུ་སྣ་ཚོགས་ཐོབ་པར་བྱེད་ཀྱི་ཡོད། དེ་དག་ནི་བསམ་གཏན་གྱི་བྱེད་ལས་ལ་གོ་བ་ཡིན། བསམ་གཏན་གྱི་བྱེད་ལས་གང་ཡིན་ཞེ་ན།
- མི་ཚེ་འདིར་རང་གི་ལུས་སེམས་གཉིས་བདེ་བའི་གནས་བབས་ལ་འཇོག་པ། དེ་ནི་ལུས་དང་སེམས་ལ་ཤིན་སྦྱངས་ཀྱི་དགའ་བདེ་མྱོང་བའི་གནས་བབས་དང་། གནས་སྐབས་ཉོན་མོངས་པའི་སེམས་ཚོར་མི་དགེ་བ་དག་ཞི་དུལ་དུ་བཟོ་བ།
- མཆོག་གི་ཡོན་ཏན་འབྱུང་བར་བྱེད་པ། རང་ཉིད་གཅིག་པུ་ཐར་པ་དོན་དུ་གཉེར་མཁན་གྱི་ཐུན་མོང་དུ་སྤྱོད་པའི་འཐོབ་བྱ། དཔེར་ན། མིག་གི་མངོན་ཤེས་དང་། ཚད་མཐོའི་དྲན་པ། རྫུ་འཕྲུལ་གྱི་ནུས་པ། རྨོངས་པ་དང་འདྲེས་པའི་ཚོར་བ་ལས་གནས་སྐབས་སུ་བྲལ་ཞིང་ཉོན་མོངས་ཟད་པའི་ཏིང་ངེ་འཛིན་ཚད་མཐོ་བ།
- སྡུག་བསྔལ་གྱིས་མནར་བའི་སེམས་ཅན་རྣམས་ལ་ཕན་པ་སྒྲུབ་ནུས་སུ་གྱུར་བ། ཚུལ་ཁྲིམས་དང་བརྩོན་འགྲུས་ཀྱི་ཕ་རོལ་ཏུ་ཕྱིན་པའི་སྐབས་བཤད་ཟིན་པ་ལྟར། ཕན་པ་བསྒྲུབ་པའི་གང་ཟག་བཅུ་གཅིག་ཡོད་པ་རྣམས་ཡིན།
ཕྱོགས་བསྡོམས།
ང་ཚོ་ལ་དུས་རྒྱུན་ལྡན་མངོན་གསལ་དོད་པོ་མེད་སྲིད་ཀྱང། ལྷམ་སྒྲོག་རྒྱག་པ་ལྟ་བུ་ལས་ཀ་ཆུང་ངུ་ཤིག་སྒྲུབ་པར་ཡང་བསམ་གཏན་གྱིས་སྒོ་ནས་རིག་པ་སྒྲིམ་དགོས་པ་ཡིན། མི་མང་ཆེ་བ་ལ་གནད་དོན་ཧ་ཅང་རྙོག་འཛིངས་ཅན་གྱི་རིགས་ལ་རིག་པ་སྒྲིམ་ཐུབ་པའི་ནུས་པ་ལྡན་ཡོད། དེ་འདྲའི་རིག་རྩལ་རྣམས་རང་གི་ཆོས་ཕྱོགས་ཀྱི་དམིགས་ཡུལ་སྒྲུབ་བྱེད་དུ་ལེགས་པར་བཀོལ་ཆོག བྱང་ཆུབ་སེམས་ཀྱི་དམིགས་ཡུལ་གྱིས་ཤུགས་དང་བཅས་ཕར་ཕྱིན་གཞན་ལྷག་མ་རྣམས་དང་ལྷན་དུ་ཉམས་ལེན་བྱས་ན། ང་ཚོའི་སེམས་བརྟན་ཆ་དང་བསམ་གཏན་འདི་རྒྱ་ཆེ་ལ་ཕུགས་རྒྱང་རིང་པོའི་ཐབས་སུ་གྱུར་ནས་ཡང་དག་པ་རྫོགས་པའི་བྱང་ཆུབ་ཏུ་འདྲེན་ཐུབ་པ་ཡིན།།