ཀུན་རྫོབ་ཀྱི་བདག་དང་། བདག་རྫུས་མ། ཐོག་མཐའ་མེད་པའི་བདག

ངོ་སྤྲོད། “བདག་གམ་ང་” ལ་དཔྱད་པ།

ང་ཚོའི་གཏམ་བཤད་ཀྱི་རིམ་པ་འདིའི་བརྗོད་གཞི་ནི་ལམ་རིམ་ལ་བརྟེན་ནས་རང་ཉིད་ཀྱི་བདག་གི་བཟང་ཕྱོགས་ཀྱི་ཡར་རྒྱས་ཞེས་པ་དེ་རེད། ནང་པའི་ཆོས་ཀྱི་ལམ་དུ་ “བདག་” ཅེས་བྱ་བ་ནི་གཙོ་བོ་དེ་རེད། འདི་ནི་ང་ཚོས་གཏམ་བཤད་འདི་ལ་ཉན་པར་ཀུན་སློང་བཅོས་པའི་སྐབས་སུའང་མཐོང་ཐུབ། སྙིང་རྗེས་ཀུན་ནས་བསླངས་ཏེ་མཐར་ཐུག་ང་ཚོས་གཞན་རྣམས་སྡུག་བསྔལ་ལས་ཐར་བར་ཕན་པ་གང་ནུས་བསྒྲུབ་ཐུབ་པའི་གནས་བབས་ཤིག་ཕལ་ཆེར་འཐོབ་ཀྱི་རེད། ཡིན་ནའང་། གཞན་ལ་ཕན་འདོགས་པར་སུ་ལ་སྙིང་རྗེས་ཀུན་ལས་བསླངས་པ་རེད་དམ། ང་ཚོས་ “བདག་གམ་ང་” ཞེས་བརྗོད་དགོས་ངེས་རེད། གཞན་ཐར་པ་དང་ཐམས་ཅད་མཁྱེན་པའི་གོ་འཕང་ལ་འགོད་རྒྱུར་འབད་བརྩོན་བྱེད་མཁན་དེ་སུ་རེད་དམ། དེ་ནི་སླར་ཡང་ “བདག་གམ་ང་” འདི་རེད། འདི་ལྟར་བྱེད་པ་ལ་དངོས་གནས་གང་གིས་འགོག་རྐྱེན་བྱེད་ཀྱི་ཡོད་དམ། འདིར་ཡང་ང་ཚོས་ “བདག་གམ་ང་” ཞེས་བྱ་བ་འདི་ཡིན་པར་བརྗོད་དགོས་ངེས་རེད། དེ་ནི་ང་ཚོས་སོ་སོའི་ལེ་ལོ་དང་། སྙིང་སྟོབས་བྲལ་བ། ཡང་ན་གཞན་ཚོར་ཤེས་ནུས་ཅན་མིན་པ་གང་ཡིན་རུང་དེ་ནི་ “བདག་གམ་ང་” དེ་ཡིན་པ་རེད།

དེའི་ལན་གང་ཡིན་མིན་ལ་མ་ལྟོས་པར། དེ་དག་ཐམས་ཅད་ “བདག་གམ་ང་” ཞེས་པའི་སྒང་ལ་བསླེབ་ཀྱི་ཡོད། མ་རེད་དམ། “ངས་འདི་བྱེད་སྙིང་འདོད་ཀྱི་མི་འདུག་” ཅེས་བསམ་པ་དང་། “ངས་འདི་བྱེད་འདོད་མེད་” ཅེས་བསམ་པ། “ངས་འདི་བྱ་རྒྱུར་ཞེད་སྣང་འདུག་” ཅེས་བསམ་པ་དེ་དག་ཐམས་ནི་ “བདག་གམ་ང་” ཞེས་པའི་ནང་འཁོར་བའི་བསམ་བློ་གཏོང་སྟངས་ཤིག་ཡིན་པ་རེད། དེ་དག་ཐམས་ཅད་ནི་ང་ཚོས་སོ་སོ་རང་ཉིད་སུ་ཡིན་བསམ་པ་དང་ང་ཚོས་གང་བྱེད་ཐུབ་བསམ་པ་ལ་གཞི་བྱས་ཡོད། 

ནང་ཆོས་ལྟར་བྱས་ན། ཅུང་ཟད་གཏིང་ཟབ་ཏུ་ལྟ་བའི་སྐབས། ང་ཚོའི་ཀུན་སློང་གི་དམིགས་ཡུལ་འཐོབ་པར་གེགས་བྱེད་མཁན་དང་དཀའ་ངལ་དངོས་དེ་ནི་སོ་སོ་རང་ཉིད་དོན་ངོ་མར་ཇི་ལྟར་ཡོད་པའི་གནས་ལུགས་མི་ཤེས་པའི་རྐྱེན་གྱིས་རེད། ང་ཚོས་སོ་སོ་ཇི་ལྟར་ཡོད་པ་མི་ཤེས་པའམ་ཡང་ན་ཡང་དག་པ་གང་ཡིན་པ་དེའི་ལྡོག་ཕྱོགས་ཀྱི་བསམ་བློ་སྟེ། གོ་རིམ་ལྡོག་པའི་བསམ་བློ་དེ་འདྲ་གང་རུང་ང་ཚོར་ཡོད། དེར་བརྟེན་དངོས་པོའི་གནས་ལུགས་དེ་གང་ཡིན་ཡང་དག་པར་རྟོགས་པར། “བདག་གམ་ང་” ཞེས་བྱ་བའི་གནད་དོན་འདི་ཡོངས་སུ་རྫོགས་པར་དཔྱད་པ་བྱ་རྒྱུ་དེ་ཧ་ཅང་གལ་ཆེན་པོ་ཆགས་ཡོད། 

དེ་ལ་ཐོག་མར་འགོ་འཛུགས་བྱེད་སྟངས་གཅིག་ནི། ང་ཚོ་མི་རེ་ངོ་རེ་ནས་དུས་ཚོད་ཐུ་ངུ་ཞིག་གི་ནང་སོ་སོ་རང་ཉིད་དང་ “བདག་གམ་ང་” ཞེས་པའི་སྐོར་ཤོད་སྐབས། དེ་གང་ལ་གོ་བར་བྱེད་ཀྱི་ཡོད་པའི་ཐད་བསམ་བློ་གཏོང་རྒྱུ་དེ་རེད། ཁྱེད་ཀྱིས་ “བདག་གམ་ང་” ཞེས་ཟེར་བའི་དོན་གང་ཡིན་ངོས་འཛིན་ཐབས་བྱ་རྒྱུ་དང་། ཐ་ན་དེའི་དོན་གང་ཡིན་འགྲེལ་བརྗོད་ཀྱི་ཐབས་ཤིག་རྙེད་རྒྱུ་དཀའ་ལས་ཁག་པོ་ཡོད་ནའང་། ད་དུང་ཡང་ང་ཚོ་ཚང་མས་ “བདག་གམ་ང་” ཞེས་པ་ལ་གཞིགས་ནས་བསམ་བློ་གཏོང་གི་ཡོད། མ་རེད་དམ། “བདག་གམ་ང་” ཞེས་པའི་ཚོར་བ་ཞིག་ཡོད། “ངས་གང་བྱེད་རྩིས་ཡོད་དམ། མི་རྣམས་ཀྱིས་ངའི་ཐད་ལ་གང་བསམ་གྱི་ཡོད་དམ། ང་རང་ནི་ཆོ་མེད་ཕམ་ཉེས་ཅན་ཞིག་རེད། ང་ནི་རྒྱལ་ཁ་ཐོབ་མཁན་ཞིག་རེད་” ཅེས་སོགས་ང་ཚོ་ཚང་མར་དེ་འདྲ་བའི་བསམ་བློའི་རིགས་སྣ་ཚོགས་པ་ཡོད། 

སྐབས་སུ་བབས་པའི་ནང་ “བདག་གམ་ང་” ཞེས་པ་དེ་ལ་བསམ་བློ་གཏོང་ཐབས་བྱོས། དེ་ཡང་གཞོན་ནུ་དང་། རྒས་འཁོགས། སྐྱེས་པ། བུད་མེད་སོགས་ “བདག་གམ་ང་” ཞེས་པའི་ཁྱད་ཆོས་སམ་ཡོན་ཏན་ལ་གཞིགས་ནས་མིན། དེ་འདྲའི་སྒོ་ནས་རང་ཉིད་ངོས་འཛིན་བྱ་རྒྱུ་མེད་ལ། “ང་སུ་རེད་དམ་” ཞེས་པའི་དྲི་བ་གཏོང་རྒྱུ་མེད། དེ་ནི་དྲི་བ་དངོས་གནས་དཀའ་ལས་ཁག་པོ་ཞིག་རེད། འོན་ཀྱང་། དེའི་ལན་ནི་ནམ་རྒྱུན་ “ང་ནི་ང་རེད་” ཅེས་པ་དེ་རེད། དེའི་དོན་ངོ་མ་གང་རེད་དམ། ང་ཚོ་མིང་ཞིག་རེད་དམ་ཚིག་ཅིག་རེད། 

ང་ཚོས་བདག་འཛིན་གྱི་སེམས་ཁམས་རིག་པའི་ལྟ་གྲུབ་ལ་གཞིགས་ནས་སྐད་ཆ་ཤོད་ཀྱིན་མེད། དཔེར་ན། བདག་འཛིན་ཁྱད་འཕགས་ལ་སོགས་པའི་སྐོར་ཤོད་ཀྱིན་མེད། དེ་ལས་ལྡོག་སྟེ། ང་ཚོས་འདིར་ “བདག་གམ་ང་” དཀྱུས་མ་དེའི་སྐོར་ཤོད་ཀྱིན་ཡོད། ང་ཚོས་བདག་གམ་ངའི་སྐོར་ཤོད་པའམ་སོ་སོ་རང་ཉིད་ཀྱི་སྐོར་བསམ་བློ་གཏོང་བའི་སྐབས། ག་རེའི་སྐོར་ཤོད་ཀྱིན་ཡོད་དམ། འདིའི་ཐོག་ལ་སྐར་མ་འགའི་རིང་བསམ་བློ་གཏོང་རྒྱུ་ཡིན། 

(སྒོམ་དུས།)

རྣམ་པར་རྟོག་པའི་ནང་གི་ “བདག་གམ་ང་” ཞེས་པའི་མཚོན་དོན།

ང་ཚོས་ “བདག་གམ་ང་” ཞེས་པ་འདི་དོན་ངོ་མར་གང་ཡིན་པའི་ཐད་ལ་བརྟག་ཞིབ་བྱེད་པའི་སྐབས། དེ་ནི་ཧ་ཅང་ལས་སླ་པོ་ཞིག་མེད། ཡོད་དམ། ང་ཚོས་སོ་སོའི་མི་ཚེའི་ནང་རྟག་ཏུ་ “བདག་གམ་ང་” ཞེས་པའི་ཧ་ཅང་མངོན་གསལ་དོད་པའི་བསམ་བློ་འདི་ལ་བརྟེན་ནས་ལས་དོན་ལ་འཇུག་གི་ཡོད། འོན་ཀྱང་། ང་ཚོས་ “བདག་གམ་ང་” ལ་དངོས་སུ་དམིགས་པ་གཏད་ཐབས་བྱེད་པའི་སྐབས། དེ་ནི་ཧ་ཅང་ལས་སླ་པོ་ཞིག་མེད། གལ་ཏེ་ང་ཚོས་འདིར་ཐུན་མིན་ཐབས་ཚུལ་གྱི་འགྲེལ་བརྗོད་བྱེད་པར་འདོད་ན། “བདག་གམ་ང་” ཞེས་པ་ལ་ཇི་ལྟར་དམིགས་པ་དེ་ནི་ནང་པའི་གཞི་རྩའི་ཤེས་པ་དང་འབྲེལ་བའི་ཆོས་ནས་འབྱུང་གི་ཡོད། “བདག་གམ་ང་” ཞེས་པར་བསམ་པའི་སྐབས། ང་ཚོས་དོན་ངོ་མར་གང་ལ་བསྒོམ་གྱི་ཡོད་ཅེ་ན། བང་རིམ་སྣ་ཚོགས་པའི་ཡུལ་ཞིག་ལ་སྒོམ་གྱི་ཡོད། 

ཐོག་མར་ང་ཚོས་ཤེས་དགོས་པ་ཞིག་ནི་བསམ་བློ་གཏོང་བ་ལ་རྟག་ཏུ་དོན་སྤྱི་ཞིག་ཡོད། འདི་ལ་གཞིགས་ལ་ “བདག་གམ་ང་” ཞེས་པའི་སྤྱི་དེ་ཡིན་པ་རེད། ང་ཚོས་བདག་གམ་ང་ལ་ག་དུས་བསམ་བློ་གཏོང་བའི་སྐབས། བདག་ཅེས་པའི་སྤྱིའམ་སྡེ་ཚན་དེའི་ནང་རན་འཚམས་སུ་འཇོག་པའི་བདག་གམ་ང་སྒེར་པ་ཞིག་གི་དཔེ་མཚོན་ལ་བསམ་བློ་གཏོང་གི་ཡོད། དེ་ནི་ “ཁྱོད་” ཅེས་པའི་སྡེ་ཚན་གྱི་ནང་རན་འཚམས་ཆགས་ཀྱི་མེད་ལ། དེ་ལས་གཞན་པའི་སྡེ་ཚན་གང་དུའང་རན་འཚམས་ཆགས་ཀྱི་མེད། ཆགས་ཀྱི་ཡོད་དམ། “བདག་གམ་ང་” ཞེས་པའི་སྤྱིའི་ནང་རན་འཚམས་ཡོད་པ་ནི་བདག་གི་དཔེ་མཚོན་བྱེ་བྲག་པ་རྣམས་ཁོ་ན་ཡིན། 

ཐུན་མིན་གྱི་ཐ་སྙད་དུ་སྡེ་ཚན་ནམ་སྤྱི་ “བདག་གམ་ང་” དེ་ནི་ “བློའི་འདོགས་ཚུལ་” ཞིག་ཡིན་པ་སྟེ། ང་ཚོས་བདག་གི་དཔེ་མཚོན་བྱེ་བྲག་ལ་བློས་བཏགས་པའི་བསམ་བློ་ཞིག་རེད། དེས་ “བདག་གམ་ང་” ཞེས་ག་དུས་ཡིན་ནའང་བསམ་དུ་འཇུག་གི་ཡོད་པ་དང་། དེ་ཡང་གང་ཟག་གཅིག་རང་ལ་རྟག་ཏུ་བསམ་དུ་འཇུག་གི་ཡོད། “བདག་གམ་ང་”  ཞེས་པའི་བློའི་འདོགས་ཚུལ་དེ་ནི་གང་ལྟར་གདམ་ཀ་རེད། ང་ཚོས་རྒྱུན་ཆད་མེད་པར་ “བདག་གམ་ང་” དེ་གྲུབ་པར་ “བདག་གམ་ང་” ལ་ཧུར་བརྩོན་གྱིས་བསམ་བློ་གཏོང་མི་དགོས། 

ད་ “བདག་གམ་ང་” ལ་བསམ་བློ་གཏོང་རྒྱུ་དེ་མི་སྲིད་པ་རེད། “བདག་” དང་དོན་སྤྱིའི་ “བདག་” གཉིས་ཀ་དངོས་མེད་རེད། “བདག་” ལ་བསམ་བློ་གཏོང་བར་ང་ཚོའི་བསམ་བློའི་ནང་མི་སྣང་བའི་དངོས་མེད་མིན་པ་དང་ “བདག་” མཚོན་པར་བྱེད་པ་ཞིག་དགོས། གང་སྣང་བ་ནི་ང་ཚོའི་ཕུང་པོ་ལྔ་ལས་འབྱུང་གི་ཡོད། ཕུང་པོ་དེ་དག་གིས་ང་ཚོའི་སྐད་ཅིག་རེ་རེའི་མྱོང་བ་སྐྲུན་གྱི་ཡོད། དེ་ཡང་ང་ཚོའི་ལུས་དང་། སེམས། ཚོར་བ། སེམས་ཚོར་སོགས་ཀྱི་མྱོང་བ་རྣམས་རེད། 

ང་ཚོས་ “བདག་” གི་སྐོར་བསམ་བཞིན་པའི་སྐབས། ང་ཚོའི་ཕུང་པོ་རྣམས་ཀྱི་ཁྲོད་ནས་ “བདག་” དེ་གང་གིས་མཚོན་པར་བྱེད་ཐུབ་པ་དང་ང་ཚོའི་བསམ་བློའི་ནང་སྣང་བ་དེ་ནི་གཟུགས་ཅན་གྱི་ཆོས་ཤིག་ཡིན་སྲིད། དཔེར་ན། ང་ཚོའི་གདོང་པ་ཅི་འདྲ་ཡོད་པའི་སེམས་ཀྱི་སྣང་བརྙན་ལྟ་བུ་རེད། དེ་ནི་ “ང་རང་གྲོད་ཁོག་ལྟོགས་པ་” ནང་བཞིན་ང་ཚོའི་གྲོད་ཁོག་ནང་ཚོར་བཞིན་པའི་ཕྱི་རོལ་གྱི་མྱོང་ཚོར་ཞིག་ཀྱང་ཡིན་སྲིད། ཡང་དེ་ནི་ང་ཚོའི་སེམས་ནང་ལྟར་སྣང་དུ་འཁོར་བཞིན་པའི་སེམས་ཀྱི་སྐད་སྒྲའམ། ཐ་ན་ “ང་” ཞེས་པའི་ཚིག་གི་སེམས་ཀྱི་སྒྲ་དེ་ཡིན་སྲིད། ཡང་ “ང་” དེ་ནི་ང་ཚོས་ “ང་རང་སྐྱིད་པོ་འདུག་” ཅེས་པའམ་ “ང་སྐྱིད་པོ་མི་འདུག་” ཅེས་བསམ་པའི་སེམས་ཀྱི་གནས་བབས་ལ་གཞི་བྱས་པ་ཞིག་ཡིན་སྲིད་ལ། “ང་རང་བློ་ཕམ་གྱི་འདུག་” བསམ་པ་ལྟ་བུ་སེམས་ཚོར་ཞིག་ཀྱང་ཡིན་སྲིད། ང་ཚོས་ “བདག་” ལ་བསམ་པའི་སྐབས་སུ་འབྱུང་བའི་རྐྱེན་སྣ་ཚོགས་པ་དེ་དག་ཐམས་ཅད་ནི་ང་ཚོའི་ཕུང་པོ་ལྔའི་ཆ་ཤས་ཡིན་པ་རེད། ང་ཚོས་ “བདག་” ལ་བསམ་པའི་སྐབས། དེ་དག་ལས་གང་རུང་ཞིག་སྣང་ཆོག་པ་དང་ “ང་” དེ་མཚོན་པར་བྱེད་ཆོག །འདེ་གང་ཡིན་ཞེ་ན། “བདག་གམ་ང་” ནི་དེ་དག་ཐམས་ཅད་ལ་གཞི་བྱེད་པའི་མིང་དུ་བཏགས་པ་དེ་ཡིན། 

“བཏགས་ཆོས་” ཞེས་པའི་ཚིག་འདི་ནི་གཞི་རྟེན་ཞིག་མེད་པར་གནས་མི་ཐུབ་པ་ཞིག་དང་ཆོས་གང་ཞིག་གི་གཞི་རྟེན་སྣང་དུ་མེད་པ་དང་། དེ་དང་དུས་མཉམ་དུ་རྟོགས་མི་ཐུབ་པའི་གནད་དོན་ལ་གོ་བ་ཡིན། དེ་ལྟ་བུ་ནི་ “བཏགས་བྱས་པའི་ཆོས་” མིན། གང་ཡིན་ཞེ་ན། དེ་དག་གྲུབ་པར་སུས་ཀྱང་མིང་དུ་འདོགས་དགོས་ཀྱི་མེད། དེ་ལ་ཐ་སྙད་ཡག་ག་ཞིག་དགོས་ན། “བཏགས་ཡོད་ཀྱི་ཆོས་” ཞེས་བརྗོད་རྒྱུ་ཡིན། དེ་དག་ནི་རང་མཚན་གྱི་ཆོས་རྣམས་རེད། གཞི་རྟེན་ཞིག་ལ་བཏགས་པའི་ཆོས་ཀྱི་དཔེ་མཚོན་ལས་སླ་ཤོས་ཤིག་ནི་ཆ་ཚང་བའི་གོང་བུ་གཅིག་དང་དེའི་ཆ་ཤས་ལྟ་བུ་རེད། ང་ཚོའི་ལུས་པོ་ལྟ་བུར་མཚོན་ན། ལུས་པོ་ཡོངས་སུ་རྫོགས་པ་ནི་དེའི་ཆ་ཤས་ལ་བརྟེན་ནས་བཏགས་པ་ཞིག་ཡིན་པ་ལས། དེ་ལས་ལོགས་སུ་རང་དབང་བར་གྲུབ་པ་མེད་ལ་རྟོགས་མི་ཐུབ། མ་མཐར་ཡང་དེ་དག་གི་ཆ་ཤས་འགའ་ཞིག་ “བཏགས་པའི་གཞི་” ལྟ་བུར་དགོས་ཀྱི་ཡོད། དེ་ཡང་སྣང་བ་དང་དེ་དང་དུས་མཉམ་དུ་རྟོགས་པ་ཞིག་དགོས། དཔེ་མཚོན་གཞན་ཞིག་ནི་གཡོ་འགུལ་དང་དུས་ཚོད་རིང་པོའི་ནང་བསྟུད་མར་གནས་བབས་མི་འདྲ་བའི་ནང་ཡོད་པའི་ཡུལ་ལྟ་བུ་རེད། 

དེ་དང་མཚུངས་པར་གང་ཟག་དང་ “བདག་གམ་ང་” དེ་ཡང་བཏགས་པའི་གཞིར་གྱུར་བའི་ཕུང་པོ་ལ་བཏགས་པའི་ཆོས་ཙམ་ཞིག་ཡིན། ང་ནི་ལུས་པོ་དང་། སེམས། ཚོར་བ། སེམས་ཚོར་གྱི་གཞི་རྟེན་དུ་གྱུར་བའི་གང་ཟག་ཅིག་ཡིན་པ་ནི་ཡུལ་རང་མཚན་གྱི་ངོས་ནས་བདེན་པ་ཡིན་ཞེས་སུས་ཀྱང་བཏགས་མི་དགོས། གཞན་གྱིས་ངའི་ལུས་པོ་མཐོང་བའི་སྐབས། ཁོང་ཚོས་ “བདག་གམ་ང་” མཐོང་བཞིན་ཡོད། 

དེ་བཞིན་ “བདག་” ཅེས་པའི་དོན་སྤྱི་ནི་དེའི་གཞི་རྟེན་དུ་གྱུར་ཞིང་། ཇི་ལྟར་ “བདག་” གི་དཔེ་མཚོན་བྱེ་བྲག་རྣམས་ནི་གཞི་རྟེན་དུ་གྱུར་བ་དང་དེ་མཚོན་པར་བྱེད་པའི་ང་ཚོའི་ལུས་པོ་དང་། བསམ་བློའམ་ཚོར་བའི་སྐད་ཅིག་བྱེ་བྲག་གི་སྟེང་དུ་བཏགས་པ་དེ་ཡིན་པ་ལྟར། དེ་མཚོན་པར་བྱེད་པའི་ “བདག་” གི་དཔེ་མཚོན་བྱེ་བྲག་པའི་སྟེང་དུ་བཏགས་པའི་ཆོས་ཤིག་ཡིན། འོན་ཀྱང་། “བདག་” ཅེས་པའི་གང་ཟག་ནི་མཐོང་བའམ་བསམ་ཐུབ་པ་ཞིག་ཡིན་པ་དང་ “བདག་” ཅེས་པའི་སྡེ་ཚན་དེ་ནི་བསམ་ཐུབ་པ་ཁོ་ནར་ཟད། ཁྱད་པར་དེ་མངོན་གསལ་དོད་དུ་གཏོང་བར། ངས་སྡེ་ཚན་ནམ་སྤྱི་དང་དེའི་ནང་རན་འཚམས་ཡོད་པའི་ཡུལ་བྱེ་བྲག་སྟེ། “བློའི་འདོགས་ཚུལ་” ཞེས་བརྗོད་པ་དང་། བདག་དང་ཕུང་པོའི་དབར་གྱི་འབྲེལ་བ་དེ་ལ་ངས་ “མིང་དུ་བཏགས་པ་” ཙམ་ཞེས་བརྗོད་ཀྱི་ཡོད། 

འདིའི་སྐོར་ལ་བསམ་མནོ་ཏོག་ཙམ་ཞིག་ཐོངས། དེ་མགོ་རྙོག་ཚ་པོ་ཞིག་ཡོད་ནའང་དེས་གོ་དོན་ཞིག་སྟོན་གྱི་འདུག་གམ། ང་ནི་ངའི་བསམ་བློའི་རྟོག་བཅོས་ཤིག་མིན། ང་ནི་ཡུལ་གྱི་ངོས་ནས་གྲུབ་པ་དང་ཤེས་ཐུབ་པ་ཞིག་ཡིན། བསམ་བློ་གང་གི་ནང་དུ་ང་ལ་ “བདག་” གི་སྐོར་ཡོད། གང་ལྟར་ཡང་། སྐད་ཅིག་དེའི་ནང་རྟག་ཏུ་ “བདག་” མཚོན་པར་བྱེད་པ་ཞིག་སྣང་གི་ཡོད། “བདག་” གི་དཔེ་མཚོན་བྱེ་བྲག་འདི་ནི་ “བདག་” གི་སྡེ་ཚན་ནང་རན་འཚམས་ཆགས་ཀྱི་ཡོད། “བདག་” ལ་མིང་བཏགས་པའི་གཞི་རྟེན་དུ་གྱུར་བ་གང་ཞིག་སྣང་རུང་ངས་དེ་ནི་ “བདག་” ཅེས་པའི་སྡེ་ཚན་བརྒྱུད་ནས་བསམ་བློ་གཏོང་གི་རེད། དེ་ནི་གང་ང་རང་ “བདག་” གི་དཔེ་མཚོན་བྱེ་བྲག་ནང་རན་འཚམས་ཆགས་པ་དེ་རེད། 

(སྒོམ་དུས།)

ཚུལ་བཅས་ཡིད་བྱེད་དང་ཚུལ་མིན་ཡིད་བྱེད་ཀྱི་ “བདག་”

ང་ཚོས་ག་དུས་ཡིན་ནའང་ “བདག་” ཅེས་པ་ལ་ཕུང་པོ་ལྔ་ལ་བརྟེན་ནས་མིང་དུ་བཏགས་པ་ཞིག་དང་བསྟུན་ནས་བསམ་བློ་གཏོང་བ་དང་། ང་ཚོས་ “བདག་” དེ་ཐབས་ཚུལ་ངེས་ཅན་ཞིག་གི་ཐོག་ནས་བསམ་ཞིབ་བྱེད་ཀྱི་ཡོད། རེད་དམ་མ་རེད། དོན་ངོ་མར་ང་ཚོས་རང་གིས་རང་ལ་ཇི་ལྟར་བསམ་བློ་གཏོང་བར་རིམ་པ་གཉིས་ཡོད་པ་དང་དེ་གཉིས་པོ་རེ་རེ་ནི་ཏག་ཏག་ཡང་དག་པའམ་ཡང་དག་མིན་པ་དང་ཚུལ་བཅས་དང་ཚུལ་མིན་གང་རུང་ཡིན་ཆོག །ངོས་སམ་ཕྱིའི་སྣང་ཚུལ་གྱི་ཆ་ནས་ང་ཚོས་རང་གིས་རང་ལ་གཞི་རྩའི་གནས་ཚུལ་དང་བསྟུན་ནས་བསམ་བློ་གཏོང་ཆོག །དེ་ནི་ཕྱིའི་སྣང་ཚུལ་ལམ་ཀུན་རྫོབ་ཀྱི་བདེན་པ་དེ་རེད། དཔེར་ན། ང་ཚོའི་མིང་དང་ལྗིད་ཚད་ལྟ་བུ་རེད། ང་ཚོས་རང་གིས་རང་ལ་ “བདག་” དེ་སོ་སོའི་མིང་དང་བསྟུན་ནས་བསམ་བློ་གཏོང་བའི་སྐབས། དེ་ནི་ནམ་རྒྱུན་ཡང་ཚུལ་བཅས་ཡང་དག་པ་རེད། འོན་ཀྱང་། ང་ཚོས་ “བདག་” དེ་ལྗིད་ཚད་དང་བསྟུན་ནས་བསམ་བློ་བཏང་ན། དེ་ནི་ལས་སླ་པོའི་སྒོ་ནས་ཚུལ་མིན་ཆགས་སྲིད་པ་རེད། 

དེ་ལས་གཏིང་ཟབ་པའི་རིམ་པའི་ཐོག་ནས་ང་ཚོར་ “བདག་” དེ་ཇི་ལྟར་གྲུབ་པའི་ཐད་ལ་ཚུལ་བཅས་དང་ཚུལ་མིན་གྱི་ཡིད་བྱེད་ཡོད་ཆོག །དེ་ནི་རང་གིས་རང་ལ་ཡོད་པའི་དོན་དམ་གྱི་བདེན་པ་ཞེས་སུ་གྲགས་པ་དེ་རེད། དེ་ལ་དཔེ་མཚོན་ཧ་ཅང་སྟབས་བདེ་ཞིག་ནི། “བདག་” གི་བཏགས་གཞི་དེ་འཇིག་རྟེན་ལྟེ་བའམ་མི་གལ་ཆེ་ཤོས་དེ་ཡིན་པ་དང་དེ་ལ་ཚང་མས་དོ་སྣང་བྱེད་དགོས། གང་ཡིན་ཞེ་ན། ང་ཚོས་ཞོགས་ཇ་གང་འཐུང་བའམ་ཡང་ན་གང་བསམ་པ་དེ་ནི་ཧ་ཅང་གནད་འགག་ཅན་ཡིན་པ་དང་། དེ་ནི་འཛམ་གླིང་ནང་གི་མི་ཚང་མས་ངོ་དེབ་དང་། ཨིནྶ་ཊ་གྲམ། (Instagram) འཕྲུལ་སྒྲ་ (Twitter) སོགས་བརྒྱུད་ནས་ངེས་པར་དུ་ཤེས་དགོས། ང་ཚོས་སོ་སོ་རང་ཉིད་ “བདག་” དེ་ལྟ་བུའི་གཞི་རྟེན་ཞིག་དང་བསྟུན་ནས་བསམ་བློ་གཏོང་བ་དང་དེ་ནི་ང་ཚོ་དོན་ངོར་མར་ཇི་ལྟར་གྲུབ་ཡོད་པ་དང་མཐུན་པར་བསམ་པའི་སྐབས། དེ་ནི་གཏིང་ཟབ་པའི་ཚུལ་མིན་ཡིད་བྱེད་ཅིག་ཡིན་པ་རེད། 

དེ་ལས་ལྡོག་སྟེ། ང་ཚོས་ “བདག་” ཅེས་བྱ་བའི་བཏགས་གཞི་དེ་མི་ཐེར་འབུམ་བདུན་གྱི་ནང་ནས་གཅིག་ཙམ་ཡིན་པར་འཛིན་ཆོག །དེ་ལ་གཞི་བཞག་ནས་ང་ཚོས་སོ་སོ་རང་ཉིད་གཞན་སུ་ལས་ལེགས་པ་དང་སྡུག་པ་མེད་པར་བསམ་སྲིད། ང་ཚོ་ཚང་མ་འདྲ་མཉམ་ཡིན་པ་དང་ཚང་མ་བདེ་བ་འདོད་ཅིང་སྡུག་བསྔལ་མི་འདོད་པ་ཤ་སྟག་རེད། དེ་བཞིན་ང་ཚོ་ཚང་མ་ཕན་ཚུན་རྟེན་ཅིང་འབྲེལ་ནས་ཡོད། དེ་ནི་ང་ཚོ་དོན་ངོ་མར་ཇི་ལྟར་གྲུབ་པ་དང་མཐུན་པ་སོང་ཙང་། འདི་ནི་ཚུལ་བཅས་ཡིད་བྱེད་རེད། 

ནང་ཆོས་ཀྱི་ནང་། ང་ཚོར་ཀུན་རྫོབ་ཀྱི་ “བདག་” ཟེར་བའི་ཐ་སྙད་ཅིག་ཡོད་པ་དང་ “ཡིན་པ་མི་སྲིད་པའི་བདག་” ཅེས་པའམ། ཡང་ན་ “བདག་” རྫུས་མ་ཟེར་བ་ཞིག་གམ། ཡང་མིན་དགག་བྱར་གྱུར་བའི་ “བདག་” ཅིག་ཡོད། གལ་ཏེ་ང་ཚོས་དངོས་པོའི་གནས་ལུགས་ཞེས་པའི་ཚིག་དེ་སྒྲ་ཡངས་པའི་དབང་དུ་བྱས་ན། ཀུན་རྫོབ་ཀྱི་ “བདག་” དེ་དངོས་པོའི་གནས་ལུགས་དང་མཐུན་པ་ཡིན། མི་སྲིད་པའི་ “བདག་” དེ་ནི་དངོས་ཡོད་གང་དང་ཡང་མཐུན་གྱི་མེད། ང་ཚོས་ཀུན་རྫོབ་ཀྱི་ “བདག་” གི་ཐད་ལ་ཕྱིའི་སྣང་ཚུལ་གྱི་བདེན་པ་ཇི་ལྟར་བསམ་པ་སྟེ། ང་ཚོའི་མིང་དང་ལྗིད་ཚད་ལྟ་བུ་ནི་ཚུལ་བཅས་དང་ཚུལ་མིན་གང་རུང་ཡིན་སྲིད། ང་ཚོས་ཚུལ་བཅས་དང་ཚུལ་མིན་ཡིད་བྱེད་ཀྱི་སྒོ་ནས་ཀུན་རྫོབ་ཀྱི་ “བདག་” ལ་དོན་དམ་བདེན་པ་ཇི་ལྟར་བསམ་བློ་གཏོང་གི་ཡོད་དམ། ང་ཚོ་འཇིག་རྟེན་ལྟེ་བའམ་ཡང་ན་མི་ཐེར་འབུམ་བདུན་གྱི་ནང་ནས་གཅིག་ཏུ་ཇི་ལྟར་གྲུབ་པ་དེའང་ཚུལ་བཅས་དང་ཚུལ་མིན་གང་རུང་ཡིན་སྲིད་པ་རེད། 

ལྗིད་ཚད་ནོར་བར་ཚུལ་མིན་ཡིད་ལ་བྱེད་པའི་ཀུན་རྫོབ་ཀྱི་ “བདག་” དེ་ནི་དེའི་ཐད་ཀྱི་ཕྱིའི་སྣང་ཚུལ་གྱི་བདེན་པ་དང་མཐུན་གྱི་མེད། ཡིན་ནའང་། “ཡིན་པ་མི་སྲིད་པའི་བདག་” ཅེས་པ་ནི་ནམ་རྒྱུན་ཀུན་རྫོབ་ཀྱི་ “བདག་” ལ་ཟུར་བཅད་བྱས་ཡོད་པ་དང་། དེའི་ལྗིད་ཚད་ཡིད་ལ་ཚུལ་བཞིན་དུ་བྱས་ཡོད་མེད་ལ་མ་ལྟོས་པར། དོན་དམ་བདེན་པའི་སྒོ་ནས་ཡིན་པ་མི་སྲིད་པའི་ཚུལ་དུ་གྲུབ་ཡོད། 

གང་ཡོད་པའམ་གྲུབ་པའི་ཀུན་རྫོབ་ཀྱི་ “བདག་” དང་དངོས་ཡོད་གང་དང་ཡང་མི་མཐུན་པའི་ “བདག་” ་རྫུས་མ་གཉིས་དབར་གྱི་ཁྱད་པར་འདི་ཤེས་རྒྱུ་གལ་ཆེན་པོ་རེད། ཐ་ན་ང་ཚོས་ཡིན་པ་མི་སྲིད་པའི་ “བདག་” གི་བཏགས་གཞི་ལྟ་བུར་འཛིན་པ་ཡིན་ནའང་། ང་ཚོའི་ལྗིད་ཚད་དང་། ལོ་ཚད། ཚོར་བའམ་བསམ་ཚུལ་རྣམས་གང་ཚུལ་བཅས་ཡིན་པ་དང་ “བདག་” རྫུས་པ་དེ་ནི་ད་དུང་ཡང་དངོས་ཡོད་གནས་ཚུལ་གང་དང་མཐུན་གྱི་མེད། ང་ཚོའི་གོ་བསྡུར་འདི་སྟབས་བདེ་རུ་བཟོ་བར། ཕྱིའི་སྣང་ཚུལ་ལམ་རྣམ་པའི་བདེན་པ་ལ་ཚུལ་བཅས་དང་ཚུལ་མིན་ཡིད་བྱེད་གང་ཡིན་རུང་ཀུན་རྫོབ་ཀྱི་ “བདག་” ཅེས་པའི་ཐ་སྙད་འདི་དོན་དམ་བདེན་པའི་དབང་དུ་ཚུལ་བཅས་ཡིད་བྱེད་ཀྱི་ “བདག་” ལ་གོ་བར་བྱེད་ཀྱི་ཡིན། 

ངོ་སྤྲོད་ཀྱི་གནད་དོན་རྣམས་བསྐྱར་ཞིབ།

ང་ཚོས་གང་བཤད་པ་རྣམས་ལ་བསྐྱར་ཞིབ་བྱེད་པར། “བདག་” ལ་ག་དུས་བསམ་བློ་གཏོང་བ་ཡིན་ནའང་། “བདག་” དེ་ནི་རྟག་ཏུ་ “བདག་” མཚོན་པར་བྱེད་པའི་ཆོས་ཤིག་གི་སྟེང་དུ་བཏགས་པ་ཞིག་རེད། ང་ཚོས་དེ་ནི་ “བདག་” ཅེས་པའི་སྡེ་ཚན་བརྒྱུད་ནས་བསམ་བློ་གཏོང་གི་ཡོད་པ་དང་། སོ་སོ་རང་ཉིད་ལ་ཡོད་པའི་ཕྱིའི་སྣང་ཚུལ་ལམ་རྣམ་པའི་བདེན་པ་དང་ང་ཚོ་ཇི་ལྟར་གྲུབ་པའི་དོན་དམ་གྱི་བདེན་པ་གཉིས་ཀའི་ཚུལ་བཅས་དང་ཚུལ་མིན་ཡིད་བྱེད་གང་རུང་ང་ཚོར་ཡོད། 

  • དོན་དམ་བདེན་པའི་ཚུལ་བཅས་ཡིད་བྱེད་ལ་བརྟེན་ནས་ང་ཚོས་ཀུན་རྫོབ་ཀྱི་ “བདག་” ་དང་བསྟུན་ནས་བསམ་བློ་གཏོང་བཞིན་ཡོད།
  • དོན་དམ་བདེན་པའི་ཚུལ་མིན་ཡིད་བྱེད་ལ་བརྟེན་ནས་ང་ཚོས་ “བདག་” རྫུས་མ་སྟེ། དོན་དངོས་སུ་མ་གྲུབ་པའི་ “བདག་” དང་བསྟུན་ནས་བསམ་བློ་གཏོང་བཞིན་ཡོད།

དེ་ལྟ་ནའང་། དེ་ནི་ཀུན་རྫོབ་ཀྱི་ “བདག་” གམ་ “བདག་” རྫུས་མ་གང་ཡིན་རུང་དེ་གཉིས་ཀ་ནི་ “བདག་” མཚོན་པར་བྱེད་པའི་ང་ཚོའི་ཕུང་པོ་ལ་བརྟེན་ནས་བཏགས་པ་ཙམ་དེ་རེད། 

“བདག་” བཟང་པོའི་འདུ་ཤེས་དང་ “བདག་” སྒྲོ་འདོགས་ཀྱི་འདུ་ཤེས།

ནུབ་ཕྱོགས་སུ་ང་ཚོས་ “བདག་” གི་གོ་དོན་དེ་བཟང་པོ་ཞིག་དང་ཡང་སྒྲོ་འདོགས་དང་ལྡན་པའི་ “བདག་” གི་སྐོར་ཤོད་ཀྱིན་ཡོད། “བདག་” བཟང་པོའི་འདུ་ཤེས་ལ་བརྟེན་ནས་ང་ཚོས་རང་གིས་རང་ལ་ཀུན་རྫོབ་ཀྱི་དབང་དུ་གྲུབ་པའི་ “བདག་” དང་བསྟུན་ནས་བསམ་བློ་གཏོང་གི་ཡོད། “བདག་” སྒྲོ་འདོགས་ཅན་ལ་བརྟེན་ནས་ང་ཚོས་རང་གིས་རང་ལ་དངོས་ཡོད་གནས་ཚུལ་དང་མི་མཐུན་པའི་ “བདག་” ་རྫུས་མ་དེ་ཡིན་པར་བསམ་གྱི་ཡོད། ལེ་ཚན་འདིའི་ནང་ང་ཚོས་ལམ་རིམ་ཉམས་ལེན་ལ་བརྟེན་ནས་ “བདག་” བཟང་པོའི་འདུ་ཤེས་དེ་ཇི་ལྟར་རང་རྒྱུད་ལ་སྐྱེད་པ་དང་སྒྲོ་འདོགས་ཀྱི་ “བདག་” གི་ངོས་འཛིན་དེ་ཇི་ལྟར་སྤོང་ཚུལ་སྐོར་གོ་བསྡུར་བྱ་རྒྱུ་ཡིན།

ཀུན་རྫོབ་ཀྱི་ “བདག་” བཟང་པོའི་འདུ་ཤེས་ལ་བརྟེན་ནས་ང་ཚོས་སོ་སོ་རང་ཉིད་དམིགས་བསལ་ཅན་གང་ཡང་མིན་པར་བསམ་གྱི་ཡོད། ང་ཚོ་ནི་འཛམ་གླིང་ནང་གི་མི་ཐེར་འབུམ་བདུན་ནང་གི་གཅིག་ཡིན་པ་དང་ང་ཚོ་ཚང་མར་བདེ་བ་འདོད་ཀྱི་ཡོད་པ་ཤེས་ཀྱི་ཡོད། གཞན་ཚང་མར་མི་འདོད་པ་ནང་བཞིན་ང་ཚོ་ལའང་སྡུག་བསྔལ་མི་འདོད་པ་ཡིན་པས། སོ་སོའི་མི་ཚེ་དང་སོ་སོས་གང་ཉམས་སུ་མྱོང་བ་དེའི་ཆེད་དུ་འགན་འཁྲི་དེ་འཁྱེར་དགོས། འདི་ལྟ་བུའི་རྟོགས་པ་ནི་ “བདག་” བཟང་པོའི་འདུ་ཤེས་ལས་འབྱུང་གི་ཡོད། གང་ལྟར་ཡང་། གལ་ཏེ་ང་ཚོས་རང་གིས་རང་ལ་ “བདག་” རྫུས་མ་དང་སྒྲོ་འདོགས་ཀྱི་ “བདག་” ལ་བརྟེན་ནས་བསམ་བློ་བཏང་ན། སོ་སོ་རང་ཉིད་གལ་ཆེ་ཤོས་ཡིན་པ་དང་སོ་སོའི་འདོད་པ་ནང་བཞིན་བྱེད་དགོས་པ་སོགས་ཚོར་གྱི་ཡོད། ང་ཚོས་ “བདག་” རྫུས་མ་ལ་བརྟེན་ནས་ངོས་འཛིན་བྱེད་པ་དང་སོ་སོ་རང་ཉིད་དེ་ལྟ་བུའི་ “བདག་” ཡིན་པར་བསམ་གྱི་ཡོད། དེ་ནི་ “བདག་” སྒྲོ་འདོགས་ཀྱི་འདུ་ཤེས་དེ་རེད། 

དེར་མ་ཟད། “བདག་” རྫུས་མ་དང་སྒྲོ་འདོགས་ཀྱི་འདུ་ཤེས་ཅན་འདི་དངོས་པོའི་གནས་ལུགས་དང་མི་མཐུན་པ་སོང་ཙང་། དེ་ནི་དོན་དམ་དུ་ནམ་ཡང་ཚིམ་གྱི་མེད། ང་ཚོ་ལ་རྟག་ཏུ་རང་གི་འདོད་པ་ལྟར་ཡོང་དགོས་པའམ་ཡང་ན་གཞན་ཐམས་ཅད་ཀྱིས་རང་ཉིད་ཚང་མ་ལས་གལ་ཆེ་ཤོས་དང་དམིགས་བསལ་ཅན་དུ་བརྩི་མི་སྲིད་པ་རེད། དེ་ནི་མི་སྲིད་པ་རེད། མ་རེད་དམ། འདི་ལྟ་བུའི་ཡིད་ཆེས་ཀྱིས་ང་ཚོ་ཁ་ཕྱོགས་གང་དུ་འཁྲིད་དམ། དེས་ང་ཚོ་སུན་སྣང་དང་། སྡུག་བསྔལ། མི་སྐྱིད་པར་འགྱུར་བའི་རྒྱུ་བྱེད་ཀྱི་ཡོད། ཕྱོགས་གཞན་ཞིག་ནས་གལ་ཏེ་ང་ཚོས་སོ་སོ་མི་ཐེར་འབུམ་བདུན་ནང་ནས་གཅིག་ཁོ་ན་དེ་ཡིན་བསམ་པ་དང་། མི་ཚེ་བདེ་སྐྱིད་ལྡན་པ་དང་དངོས་ཡོད་དང་མཐུན་པ་ཞིག་སྐྱེལ་བར། ང་ཚོས་གཞན་དང་མཉམ་དུ་ཞི་མཐུན་ངང་གནས་དགོས་པ་དང་གཞན་ལ་བསམ་ཤེས་དང་བརྩི་འཇོག་བྱེད་དགོས་པ་ཤེས་ཀྱི་ཡོད་ན། དེ་ལྟ་བུའི་ཡིད་ཆེས་ཀྱིས་མི་ཚེ་སྐྱིད་པ་ཡོང་གི་རེད། མ་རེད་དམ། དེ་ནི་དངོས་ཡོད་དང་མཐུན་ཆེ་བ་ཡོད། ཐབས་ཚུལ་འདི་ལྟ་བུས་ཀུན་རྫོབ་ཏུ་གྲུབ་པའི་ “བདག་” སྟོན་པ་དང་དེ་ལ་ནི་བདག་བཟང་པོའི་འདུ་ཤེས་ཤིག་ཡོད། 

འདིའི་ཐད་ལ་བསམ་ཞིབ་གནང་རོགས། གང་ཡིན་ཞེ་ན། དོན་ངོ་མར་ཡོད་པའི་ཀུན་རྫོབ་ཀྱི་ “བདག་” དང་ “བདག་” རྫུས་མ་དང་ངར་ཤུགས་ཅན་གྱི་ “བདག་” གར་ཡང་མ་གྲུབ་པ་གཉིས་དབར་གྱི་ཁྱད་པར་རྟོགས་རྒྱུ་དེ་གལ་ཆེན་པོ་རེད།

(སྒོམ་དུས།)

ཐོག་མཐའ་མེད་པའི་བདག

ངས་གོང་དུ་ཞུས་པ་ལྟར། ང་ཚོའི་བགྲོ་གླེང་འདིའི་བརྗོད་གཞི་ནི་ལམ་རིམ་ལ་བརྟེན་ནས་རང་ཉིད་བཟང་ཕྱོགས་སུ་ཡར་རྒྱས་གཏོང་རྒྱུ་དེ་རེད། འདིར་ཚེ་འདི་དང་བསྟུན་ནས་ལམ་གྱི་རིམ་པ་དེ་དག་ལ་བསམ་པའི་ “ཆོས་ཡངས་པའི་ལམ་རིམ་” ཞེས་པ་དེ་ཡོད་སྲིད་ནའང་། ལམ་རིམ་གྱི་ཉམས་ལེན་ཆ་ཚང་བ་དེ་ལ་ “ཆོས་ངོ་མའི་ལམ་རིམ་” ཞེས་ངས་བརྗོད་ཀྱི་ཡོད། ཆོས་ངོ་མའི་དབང་དུ་བྱས་ན། ང་ཚོ་རེ་རེ་ལ་ཐོག་མ་མེད་པའི་སྐྱེ་བ་སྔ་མ་ཡོད་པ་དང་མཐའ་མ་མེད་པའི་སྐྱེ་བ་ཕྱི་མ་མུ་མཐུད་མྱོང་རྒྱུ་ཡིན་ཚུལ་བརྗོད་ཀྱི་ཡོད། 

ཡིད་ཆེས་འདིས་གང་སྟོན་གྱི་ཡོད་དམ། འདིས་ང་ཞེས་བྱ་བའི་ “བདག་” འདི་ཐོག་མ་མེད་པ་ཡིན་པར་སྟོན་གྱི་ཡོད། དེ་ཡང་ཐོག་མ་དང་མཐའ་མ་མེད་པའི་རྟག་པ་རེད། ཐ་ན་ང་ཚོ་སངས་རྒྱས་པ་ཡིན་ནའང་། ང་ཚོ་ད་དུང་ཡང་ “བདག་” ཡིན་ངེས་རེད། ད་དངོས་པོ་འདི་དག་ལས་གང་ཞིག་ང་ཚོ་དང་འབྲེལ་བ་ཆགས་རྒྱུ་ཡིན་ན། ང་ཚོས་སོ་སོ་རང་ཉིད་རྟག་པ་ཡིན་པར་ཡིད་ཆེས་བྱེད་ཀྱི་ཡོད་མེད་བརྟག་དཔྱད་བྱེད་དགོས། ང་ཚོ་རྟག་པ་རེད་དམ། དེའི་སྐོར་ལ་བསམ་བློ་ཐོངས། དེ་ནི་དངོས་གནས་དོ་སྣང་བྱ་འོས་པའི་དྲི་བ་ཞིག་རེད། དངོས་གནས་བྱས་ན། དེ་ནི་ང་ཚོས་ནམ་རྒྱུན་ཐོག་མ་མེད་པའི་སྐོར་ལ་བསམ་བློ་གཏོང་འདོད་ཙམ་ཡང་མེད་པའི་གནས་སྟངས་ཆགས་ཀྱི་ཡོད། 

གལ་ཏེ་ང་ཚོ་ཨེབྷྲ་ཧེམ་གྱི་ཆོས་ལུགས་ཞེས་སུ་གྲགས་པའི་འཇིའུ་ཆོས་ལུགས་དང་ཡེ་ཤུ་དང་ཁ་ཆེའི་ཆོས་ལུགས་ཀྱི་རྗེས་སུ་འབྲང་མཁན་ཡིན་ན། ང་ཚོར་ཐོག་མ་མེད་པའི་འབྱུང་ཁུངས་ཤིག་ཡོད་པར་ཡིད་ཆེས་པའི་བཟོ་འདྲ་ཡོད། གང་ཡིན་ཞེ་ན། བྱེད་པོ་དཀོན་མཆོག་གིས་ང་ཚོ་མ་བསྐྲུན་གོང་དུ་ང་ཚོ་གང་ལྟར་ཡང་དཀོན་མཆོག་གི་ཆ་ཤས་ཤིག་ཡིན་པ་དང་དཀོན་མཆོག་ནི་རྟག་པ་རེད། ང་ཚོའི་ཐོག་མཐའ་མེད་པའི་ “བདག་” དེ་ནི་ང་ཚོ་མངལ་དུ་ཆགས་པ་དང་སྐྱེས་པའི་རྗེས་སུ་མུ་མཐུད་ནས་རྟག་ཏུ་འགྲོ་གི་ཡོད། ང་ཚོས་ཨེབྷྲ་ཧེམ་ཆོས་ལུགས་ཀྱི་ལས་རྟགས་གང་གི་རྗེས་སུ་འབྲང་གི་ཡོད་པར་བརྟེན་ནས་གང་ལྟར་ཡང་ང་ཚོས་ཚེ་འདིའི་རྗེས་དང་། གཅིག་བྱས་ན་བར་དོའི་གནས་སྐབས་སུ་ལྷ་ཡུལ་དང་དམྱལ་ཡུལ་གང་རུང་ཞིག་གི་ནང་རྟག་པའི་སྐྱེ་བ་ཕྱི་མ་ཞིག་ཏུ་འགྲོ་གི་རེད། འདི་ནི་སྤྱིར་བཏང་དབུས་ཤར་ཆོས་ལུགས་ཁག་གི་ནང་ཐོག་མཐའ་མེད་པའི་ངའམ་བདག་གི་གོ་རྟོགས་དེ་རེད། 

འོ་ན་གལ་ཏེ་ང་ཚོ་ཆོས་ལ་དད་པ་མི་བྱེད་མཁན་ཡིན་ན། ག་རེ་ཆགས་ཀྱི་རེད་དམ། འདི་ག་ལཏ་ཝི་ཡར་ (Latvia) དེའི་སྲོལ་རྒྱུན་ལམ་ལུགས་ཤིག་ཡོད་སྙམ། དེ་ནི་ཕལ་ཆེར་སྲོལ་རྒྱུན་ཧ་ཅང་རིང་པོ་མིན་སྲིད་ཀྱང་། མ་མཐར་ཡང་དུས་རབས་མཐའ་མ་ནས་བཟུང་སྟེ་རྩ་འཛུགས་ཡག་པོ་ཆགས་ཡོད་པའི་སྲོལ་ཞིག་རེད། གལ་ཏེ་ང་ཚོས་བྱེད་པོ་དཀོན་མཆོག་གིས་འཇིག་རྟེན་བཀོད་པའམ་བསྐྲུན་པ་དང་། ལྷ་ཡུལ་རྟག་པའི་ཐར་པ་ཐོབ་པའམ་ཡང་ན་དམྱལ་ཡུལ་དུ་རྟག་པའི་དམྱལ་བའི་ཉེས་དམིགས་མྱོང་བ་ལ་ཡིད་ཆེས་དང་ཁས་ལེན་མ་བྱས་ན། ང་ཚོས་གང་ལ་ཡིད་ཆེས་བྱེད་ཀྱི་ཡོད་དམ། ང་ཚོས་ག་རེ་བསམ་གྱི་ཡོད་དམ། གལ་ཏེ་ཁྱེད་རང་དད་པ་མེད་མཁན་ཞིག་ཡིན་ན། དྲི་བ་འདི་ལ་བརྟག་དཔྱད་བྱོས། ཁྱེད་རང་མངལ་མ་ཆགས་གོང་གང་ནས་བྱུང་ཡོད་རེད་བསམ་གྱི་འདུག་གམ། ཁྱེད་རང་ཤི་བའི་རྗེས་སུ་གང་དུ་འགྲོ་གི་རེད་བསམ་གྱི་འདུག་གམ། ཆོས་ལུགས་ལ་མི་དད་མཁན་མང་ཆེ་བས་ “གང་ཡང་མེད་པ་” ཞེས་པའི་ལན་འདེབས་རྒྱག་གི་རེད། ང་ཚོ་ནི་གང་ནས་བྱུང་མེད་ལ་གང་དུའང་ལོག་གི་མེད། དེ་ཏག་ཏག་ཅིག་མ་རེད་དམ། 

ཤི་བའི་སྐབས་སུ་དུར་སར་འགྲོ་བ་དང་དེར་རྟག་པར་གནས་ཀྱི་ཡོད་ཅེས་ང་ཚོས་བརྗོད་སྲིད། ང་ཚོའི་ལུས་པོ་ནི་དུར་སར་ཡོད་ནའང་། “ང་ཚོ་” དུར་སར་ཡོད་དམ། ང་ཚོས་ “ང་དུར་སར་ཡོད། ང་ཤི་ཚར་བ་རེད་” ཅེས་བསམ་པའི་སྐབས། “ང་རང་ཤི་བ་རེད་” ཅེས་པ་འདིས་ད་དུང་ཡང་ “ང་” དེ་ཡོད་པ་སྟོན་གྱི་ཡོད། མ་རེད་དམ། “བདག་གམ་ང་” དེ་ཡོད་པའི་རིམ་པ་དེ་གང་རེད་དམ། རིམ་པ་དེ་ནི་འཆི་བའི་རིམ་པ་རེད། ང་ཚོས་རྒྱུ་མཚན་རིགས་པའི་སྒོ་ནས་ “ང་ཤི་བ་རེད་” ཅེས་པའི་བརྗོད་པ་འདི་ལ་བརྟག་དཔྱད་བྱེད་པའི་སྐབས། དེ་ལ་དུས་གསུམ་གྱི་དབང་དུ་དུས་ད་ལྟ་བ་བཀོལ་སྤྱོད་བྱས་ཡོད། མ་རེད་དམ། དེ་ནི་དངོས་གནས་འཇིགས་སུ་རུང་བའི་ལས་ཀྱི་བསྐོས་ཐང་ཞིག་རེད། དེའི་དོན་གང་རེད་དམ། གང་ཡང་མེད་པ་ཆེན་པོ་དེའི་ནང་དུ་ “བདག་” དེ་ད་དུང་ཡང་གྲུབ་པ་ཞིག་རེད་དམ། 

གཞན་ཡང་། ང་ཚོ་དུས་ཡུན་ཐུང་ངུ་ཞིག་གི་ནང་ཤི་བ་རེད་དམ། མ་རེད། ང་ཚོ་ནི་གཏན་དུའམ་རྟག་ཏུ་ཤི་བ་རེད། དེ་ནི་ཆོབ་ཚ་པོ་འདྲ་ཞིག་ཡོད་ནའང་། རྒྱུ་མཚན་རིགས་པའི་སྒོ་ནས་ང་ཚོ་ཐ་ན་ཆོས་ལ་དད་པ་མེད་མཁན་ཡིན་ནའང་། ད་དུང་ཡང་ཐོག་མཐའ་མེད་པའི་བདག་ཅིག་ཡོད་པར་ཡིད་ཆེས་བྱེད་ཀྱི་ཡོད་ཅེས་མཇུག་སྡོམ་རྒྱག་ཐུབ། དེའི་སྐོར་ལ་བསམ་བློ་ཐོངས། དེའི་གོ་དོན་ཞིག་སྦྱིན་གྱི་འདུག་གམ། དེ་ནི་ཇི་ཙམ་གྱིས་ཁྱད་མཚར་དུ་མཐོང་ནའང་། རྒྱུ་མཚན་ལྡན་པའི་མཇུག་སྡོམ་ནི་དེ་ཁོ་ན་རེད། 

(སྒོམ་དུས།)

ང་ཚོ་ནི་གང་ཡང་མེད་པ་ཞིག་གི་ནང་ཁ་སྒྱུར་རྒྱུ་ཡིན་པ་དེ་ནི་ཞེད་སྣང་ཅན་ཞིག་རེད། མ་རེད་དམ། འོན་ཀྱང་། ང་ཚོ་དངོས་གནས་གང་ཡང་མིན་པ་དང་། གང་ཡང་མིན་པར་གྲུབ་པ། གང་ཡང་མིན་པའི་ཆ་ཤས་ཡིན་ན། དེ་ཞེད་སྣང་ཅན་ཞིག་ཇི་ལྟར་ཡོང་སྲིད་དམ། ཞེད་སྣང་དེ་ནི་ང་ཚོ་ངེས་བརྟན་ཞེ་དྲགས་མེད་པའི་རྐྱེན་གྱིས་ཡིན་སྲིད། ཕལ་ཆེར་མི་ཚང་མས་གང་ཡང་མ་རེད་ཅེས་བརྗོད་ཀྱི་ཡོད། ང་ཚོ་ལའང་གང་ཡང་མིན་པར་བསླབས་ཡོད། ཡིན་ནའང་། ང་ཚོས་དངོས་གནས་ཤེས་ཀྱི་མེད། ཐ་ན་དེ་དང་འདྲ་བར་ང་ཚོ་ངེས་བརྟན་མེད་པའམ་དངོས་མིན་ཁས་མི་ལེན་མཁན་ཡིན་ནའང་། དེ་ནི་ད་དུང་ཡང་རྗེས་སུ་གཅིག་ཆགས་སྲིད་པ་དང་དེ་ཡང་གཏན་དུ་གནས་རྒྱུ་ཡིན་པ་སྟོན་གྱི་ཡོད། འཆི་བ་ནི་ཟླ་བ་གཅིག་ཙམ་གྱི་རིང་ཡིན་པ་དང་དེ་ནས་རྫོགས་འགྲོ་བ་དེ་འདྲ་མིན། 

དེར་བརྟེན་ང་ཚོས་དེ་ངོས་ལེན་བྱེད་འདོད་ཡོད་མེད་ལ་མ་ལྟོས་པར། ཐོག་མཐའ་མེད་པའི་བདག་ཅིག་ལ་ཡིད་ཆེས་བྱེད་ཀྱི་ཡོད། གང་ལྟར་ཡང་། ཐོག་མ་མེད་པའི་རང་བཞིན་གྱི་སྔ་ཕྱི་བར་གསུམ་དུ་ང་ཚོ་གྲུབ་པའི་རིམ་པ་སྣ་ཚོགས་པ་ལ་ཇི་ལྟར་བསམ་ཞིབ་བྱེད་ཀྱི་ཡོད་པ་དེ་ནི་མི་འདྲ་བའི་ཁྱད་པར་འགྲོ་ངེས་རེད། དེ་དག་ཐམས་ཅད་ནི་འཆི་བའི་རྣམ་པར་རྟོག་པའི་སྒྲོམ་གཞི་ལ་རག་ལུས་ཡོད། གལ་ཏེ་ང་ཚོས་དངོས་གནས་རྒྱུ་མཚན་དང་ལྡན་པའི་སྒོ་ནས་གདམ་ཀ་མི་འདྲ་བ་ཚང་མར་བརྟག་དཔྱད་བྱས་ན། ཚང་མས་མཐར་ཐུག་ཐོག་མ་མེད་པའི་བདག་ཅིག་ལ་བསམ་བློ་གཏོང་གི་ཡོད། 

ནང་པའི་ལུགས་ཀྱི་སྐྱེ་བ་ཐོག་མ་མེད་པ་ནི་ཐོག་མཐའ་མེད་པའི་བདག་གི་བརྗོད་བྱའི་ཁྱད་པར་གཅིག་ཙམ་རེད། དེ་ལ་ཚེ་འདི་ནི་ལེ་ཚན་གཅིག་ཁོ་ན་དེ་རེད། ང་ཚོ་མང་ཆེ་བས་ “བདག་” ཅེས་པ་འདི་སྐྱེ་བ་སྔ་མ་ཞིག་གམ་ཚེ་རབས་སྔ་མ་གང་རུང་ཞིག་ནས་དྲན་གྱི་མེད་པ་དང་། ང་ཚོས་ཀྱང་ “བདག་” ཅེས་པ་འདི་མ་འོངས་པའམ་སྐྱེ་བ་ཕྱི་མའི་ནང་དྲན་གྱི་མེད། ཡིན་ནའང་། འདི་ནི་དངོས་གནས་ཧོན་འཐོར་དགོས་པ་ཞིག་མིན། ང་ཚོ་ཨ་མའི་མངལ་དུ་སྦྲུབ་སྲིང་མངལ་གནས་ལྟ་བུ་ཡོད་སྐབས། དེ་ “བདག་གམ་ང་” རེད་དམ། རེད། ཡིན་ནའང་། ང་ཚོས་དེ་དྲན་གྱི་ཡོད་དམ། དྲན་གྱི་མེད། འོ་ན་ང་ཚོ་ཧ་ཅང་རྒས་པའི་སྐབས་སུ་དེ་ད་དུང་ “བདག་གམ་ང་” རུ་གནས་ཀྱི་ཡོད་དམ། དེ་ནི་ད་ལྟ་བྱུང་མེད་ནའང་། དེ་ནི་ད་དུང་ “བདག་གམ་ང་” རུ་གནས་རྒྱུ་ཡིན་པ་ལས། གཞན་ཞིག་ཆགས་ཀྱི་མ་རེད། ང་ཚོས་སྐྱེ་བ་སྔ་མ་རྣམས་མི་དྲན་པ་ཙམ་དང་སྐྱེ་བ་ཕྱི་མ་མི་ཤེས་པ་ཙམ་གྱི་རྒྱུ་མཚན་ལ་བརྟེན་ནས་སྐྱེ་བ་སྔ་མ་དང་ཕྱི་མ་མེད་པར་སྒྲུབ་མི་ཐུབ། 

མི་ལུས་རིན་ཆེན། 

འདི་དག་ཐམས་ཅད་གང་དུ་ཁ་ཕྱོགས་ཀྱི་ཡོད་པ་ཁྱེད་ཚོས་ཤེས་པའི་རེ་བ་ཡོད། ང་ཚོ་མི་ལུས་རིན་ཆེན་གྱི་སྐོར་གོ་བསྡུར་བྱ་རྒྱུ་ཕྱོགས་སུ་སྐྱོད་བཞིན་ཡོད། དེ་ནི་ལམ་རིམ་ཇི་ལྟར་འགོ་འཛུགས་བྱེད་ཚུལ་དེ་རེད། དེ་ཡང་ནང་པའི་སྐྱེ་བ་ཕྱི་མ་བཞེད་ཚུལ་ལམ་ཡང་ན་ཨེབྷྲ་ཧེམ་གྱི་བཞེད་ཚུལ་ལ་གཞིགས་ནས་བསམ་བློ་གཏོང་མིན་ལ་མ་ལྟོར་པར། ཐ་ན་གལ་ཏེ་ང་ཚོ་ཆོས་ཁས་མི་ལེན་མཁན་ཡིན་ནའང་བརྗོད་གཞི་འདི་ནི་ང་ཚོ་ཚང་མར་འབྲེལ་བ་ཆགས་ཀྱི་ཡོད། ཐོག་མཐའ་མེད་པའི་ “བདག་” ལ་གཞིགས་ན། ང་ཚོར་ད་ལྟ་ཐོབ་པའི་མི་ལུས་རིན་པོ་ཆེ་འདི་ནི་ལེ་ཚན་དམིགས་བསལ་ཅན་ཞིག་རེད།

ང་ཚོས་མི་ལུས་རིན་པོ་ཆེ་ལ་སྒོམ་པའི་ཕན་ཡོན་ཡོངས་སུ་རྫོགས་པ་ལ་དངོས་གནས་རྗེས་སུ་ཡི་རང་བྱེད་པར། ཐོག་མཐའ་མེད་པའི་ “བདག་” གི་སྐོར་བསམ་བློ་གཏོང་ཐུབ་པ་དགོས་རྒྱུ་དེ་གལ་ཆེན་པོ་ཅིའི་ཕྱིར་རེད་དམ། གལ་ཏེ་ང་ཚོས་ཚེ་འདི་ཁོ་ནར་བསམ་བློ་གཏོང་བ་དང་སྐྱེ་བ་སྔ་ཕྱི་ལ་དོ་གལ་གྱིས་བསམ་ཞིབ་མ་བྱས་ན། དེ་ནས་ཆོས་ཡངས་པ་ལ་བརྟེན་ནས་ང་ཚོས་ཚེ་འདི་ལས་ཁེ་བཟང་ལེན་ངེས་རེད། གང་ཡིན་ཞེ་ན། འཆི་བ་ནི་དངོས་ཡོད་ཀྱི་འབྱུང་ངེས་ཞིག་རེད། མི་ཚེ་ནི་ཡུན་དུ་གནས་ཀྱི་མ་རེད། དེར་བརྟེན་ང་ཚོར་མི་ལུས་རིན་ཆེན་ལ་སྒོམ་པའི་ཆོས་ཡངས་པའི་འགྲེལ་ཚུལ་འོས་འཚམས་ཀྱི་ཕན་ཐོགས་ཅན་ཞིག་ཡོད་ངེས་པ་རེད།

ང་ཚོར་ད་དུང་ཡང་ཚད་དང་ལྡན་ཞིང་ཧ་ཅང་ཕན་ཐོགས་ཅན་གྱི་ཆོས་ཡངས་པའི་ཐབས་ཚུལ་གཞན་ཞིག་ཡོད་པ་དེའི་ནང་ཐོག་མཐའ་མེད་པའི་རང་བཞིན་གྱི་གདམ་ཀ་དེ་ནི་ང་ཚོའི་རིགས་རྒྱུད་རྣམས་མུ་མཐུད་དེ་མ་འོངས་པར་འགྲོ་གི་ཡོད་པར་བསམ་རྒྱུ་དེ་རེད། ཐ་ན་ང་ཚོར་རྒྱུད་འཛིན་གྱི་ཕྲུ་གུ་མེད་ནའང་། ཤུལ་བཞག་གམ་ཕ་གཞིས་ལྟ་བུ་མ་འོངས་པར་མུ་མཐུད་ནས་འགྲོ་བ་ཞིག་ལ་བསམས་ནས་དེ་གནས་ཐུབ་པར་རེ་བ་བྱེད་ན་ཆོག །གནད་དོན་འདི་ལ་བསམས་ན། ང་ཚོས་མི་ལུས་རིན་ཆེན་འདི་ཡང་དག་པ་དང་ཕན་ནུས་ལྡན་པ་ཞིག་ཏུ་བེད་སྤྱོད་གཏོང་འདོད་ཡོད་པ་དང་། དེ་ལ་བརྟེན་ནས་མ་འོངས་པར་ང་ཚོའི་ཁོར་ཡུག་གི་ཕ་གཞིས་འཐོབ་པར་འགྱུར་བའི་རང་གི་ཕྲུ་གུ་དང་། སློབ་མ། ལས་བྱེད་དང་བཅས་པའི་མི་རབས་རྗེས་མ་རྣམས་ལ་དཀའ་ཚེགས་ཅན་གྱི་གནས་སྟངས་ཤིག་མི་འཇོག་པར་གཞིགས་ནས་བསམ་བློ་གཏོང་ཆོག །དེ་འདྲའི་སྒོ་ནས་བསམ་བློ་གཏོང་ཆོག་སྟེ། ང་ཚོས་མི་ལུས་རིན་ཆེན་འདི་བེད་སྤྱོད་ཡང་དག་པར་བཏང་ནས་ཤུལ་བཞག་གམ་ཕ་གཞིས་བཟང་པོ་ཞིག་རྒྱབ་ཏུ་འཇོག་རྒྱུར་ངེས་བརྟན་བཟོ་དགོས། 

འོན་ཀྱང་། གལ་ཏེ་ང་ཚོས་ཚེ་གཅིག་འདི་བཞིན་རྒྱ་ཆེ་བའི་རྟག་པའི་རྒྱུད་ཅིག་གི་ལེ་ཚན་གཅིག་ཡིན་པར་བསམས་ན། ཐ་ན་ང་ཚོས་རྗེས་མ་གང་འབྱུང་རྒྱུ་ཡིན་པ་མི་ཤེས་ནའང་། ཚེ་འདི་བེད་སྤྱོད་བྱེད་པ་ནི་རྦད་དེ་ཛ་དྲག་ཆེ་བ་ཆགས་ཀྱི་ཡོད། གང་ཡིན་ཞེ་ན། དེའི་རྗེས་སུ་དོན་ངོ་མར་གཅིག་ཡོད་པ་རེད། ང་ཚོ་མང་ཆེ་བ་ནི་ཆོས་ཕྱོགས་ནས་ཕུལ་དུ་བྱུང་བའི་ཡར་ཐོན་ཅན་ཞིག་མིན་ན། ང་ཚོས་མ་འོངས་པར་གང་ཉམས་སུ་མྱོང་བར་འགྱུར་བ་ནི་གཞན་གྱིས་གང་ཉམས་སུ་མྱོང་བ་ལས་རྦད་དེ་ཛ་དྲག་ཆེ་བ་ཡོད། དེའི་སྐོར་ལ་བསམ་བློ་ཐོངས། དཔེ་ཆ་བཞག་ན། གལ་ཏེ་ང་ཚོས་མི་གཞན་དག་ཚང་མས་གཙང་མ་བཟོ་དགོས་པ་ཤེས་བཞིན་དུ་ང་ཚོས་བཙོག་པ་བཟོས་པ་དང་བཙོག་པ་དེ་ང་ཚོས་གཙང་མ་བཟོ་དགོས་ངེས་ལ་བརྩི་འཇོག་ཇི་ལྟར་བྱེད་པ་དང་མཉམ་དུ་བསྡུར་ཞིབ་བྱེད་དགོས། དེ་གཉིས་ལས་བཙོག་པ་དེ་འདྲ་མི་བཟོ་བའི་ཛ་དྲག་ཆེ་བ་གང་གིས་བཟོ་གི་ཡོད་དམ། དེ་བདེན་པ་རེད། གལ་ཏེ་བཙོག་པ་དེ་ལ་ད་ལྟ་གདོང་ལེན་བྱེད་དགོས་ན། དེ་ལས་མི་གཞན་གྱིས་མ་འོངས་པར་དེ་ལ་གདོང་ལེན་བྱེད་དུ་འཇུག་པ་དེ་བཙོག་པ་མི་བཟོ་བའི་ཛ་དྲག་ཆེ་བ་ཡོད་པ་ངས་ཚོར་གྱི་འདུག

དེ་བཞིན་དུ་ང་ཚོས་སོ་སོའི་ལས་ཀྱི་རྗེས་འབྲས་མྱོང་དགོས་ཀྱི་ཡོད་པར་བསམ་པའི་སྐབས། མི་ལུས་རིན་ཆེན་འདི་ལ་བརྟེན་ནས་གང་བྱ་རྒྱུའི་གདམ་ཀ་བྱེད་པ་ནི། ང་ཚོས་གཞན་གྱིས་ང་ཚོའི་ཕ་གཞིས་མྱོང་དགོས་པའི་སྐོར་བསམ་པའི་སྐབས་ལས་རྦད་དེ་སྟོབས་ཆེ་བ་ཡོད། དེ་ནི་དངོས་གནས་གོ་རྟོགས་ནུས་པ་ཞིག་རེད། ང་ཚོས་གང་བྱེད་པ་དང་མི་ཚེ་ཇི་ལྟར་སྐྱེལ་བའི་འགན་འཁྲི་དེ་ང་ཚོར་ཡོད་པ་རྟོགས་པ་ནི་ “བདག་” བཟང་པོའི་འདུ་ཤེས་ཤིག་རེད། གང་ཡིན་ཞེ་ན། ང་ཚོ་ནི་སོ་སོས་གང་བྱས་པའི་ལས་ཀྱི་འབྲས་བུ་མྱོང་དགོས་མཁན་དེ་ཆགས་ཀྱི་རེད། འདི་ནི་གང་འཚམས་ཀྱི་བསམ་ཕྱོགས་བཟང་པོ་ཞིག་རེད། ད་དུང་དེ་ལས་སྨིན་ཚད་ཆེ་བ་དང་རྒྱ་སྐྱེད་ཆེ་བའི་ཐབས་ཚུལ་ནི། ང་ཚོ་ཙམ་དུ་མ་ཟད་གཞན་དག་གིས་ཀྱང་རྗེས་འབྲས་དེ་མྱོང་དགོས་ཀྱི་ཡོད་པ་དེ་རེད། བྱས་ཙང་། དངོས་པོའི་གནས་ཚུལ་ལ་ང་དང་ཁྱེད་དམ་ཡང་ན་རང་གཞན་གཉིས་ཀས་རྗེས་འབྲས་མྱོང་དགོས་ཀྱི་ཡོད། ང་ཚོས་མཐའ་གཅིག་ཏུ་གང་ཡང་མྱོང་མི་དགོས་པར་གཞན་ཁོ་ན་ཞིག་གིས་མྱོང་དགོས་ཞེས་བསམ་པ་ཙམ་དེ་ནི་སེམས་ཁམས་རིག་པའི་སྒོ་ནས་གང་ཙམ་འོས་འཚམ་ཞིག་མིན། 

གང་ལྟར་ཡང་། ད་ལྟ་ཐོབ་པའི་མི་ལུས་རིན་ཆེན་ལ་ཡི་རང་བྱེད་པའི་སྐབས། ང་ཚོས་ཐོག་མཐའ་མེད་པའི་རང་བཞིན་དེ་ཇི་ལྟར་ཡིད་ལ་འཁོར་མིན་ལ་མ་ལྟོས་པར། ཐོག་མཐའ་མེད་པའི་ “བདག་” ཅིག་ལ་བསམ་བློ་གཏོང་རྒྱུ་དེ་གལ་གནད་ཅིག་ཡིན་པར་བསམ་དགོས། 

ལམ་རིམ་ལ་བརྟེན་ནས་ཡར་རྒྱས་འགྲོ་བའི་ཐབས་ལམ་ཁག

ཆོས་ཡངས་པའི་སྒང་ལ་ད་དུང་ཡང་ཆོས་ངོ་མའི་ལམ་རིམ་སྟེ། ཐོག་མཐའ་མེད་པའི་ “བདག་” འདོད་པའི་རིམ་པ་ལ་བརྟེན་ནས་ཡར་རྒྱས་འགྲོ་བའི་རིམ་པའམ་ཐབས་ལམ་གཉིས་ཡོད། རིམ་པ་དེ་གཉིས་ནི་ནང་པའི་སྐྱེ་བ་ཕྱི་མའི་འགྲེལ་བཤད་དེ་བདེན་པ་ཡིན་པར་ཁས་ལེན་དང་ཡིད་ཆེས་བྱེད་མིན་ལ་རག་ལུས་ཡོད། ནང་པའི་ཆོས་ཁས་མི་ལེན་མཁན་ཞིག་ཡིན་ནའང་། ང་ཚོས་ལམ་རིམ་ལ་སློབ་གཉེར་དང་ཉམས་ལེན་བྱེད་ཆོག །དེ་ཡང་༧གོང་ས་མཆོག་གིས་གསུངས་པ་ལྟར། “ནང་པའི་ཚན་རིག་” དང་ “ནང་པའི་ལྟ་གྲུབ་” ལ་སློབ་སྦྱོང་བྱ་ཆོག ང་ཚོ་ནུབ་ཕྱོགས་པ་མང་ཆེ་བས་ལམ་རིམ་ནི་ནང་པའི་ཆོས་ཁས་ལེན་མཁན་ཞིག་ཡིན་པའི་ཆ་ནས་ལམ་རིམ་ལ་སློབ་གཉེར་འགོ་འཛུག་བྱེད་ཀྱི་མེད། ཡོད་དམ། ང་ཚོར་འདས་པའི་དུས་སུ་དད་པ་གང་འདྲ་ཞིག་ཡོད་པ་དང་མཉམ་དུ་སྤྱིར་བཏང་གི་གང་ཟག་ཅིག་ལྟ་བུར་འགོ་འཛུགས་བྱེད་ཀྱི་ཡོད། འོན་ཀྱང་། ཐ་ན་ཐོག་མའི་འགོ་འཛུགས་འདིའི་སྐབས་སུའང་ང་ཚོས་དངོས་གནས་བརྟག་དཔྱད་བྱས་ན། ཐོག་མཐའ་མེད་པའི་བདག་ཅིག་ལ་ཡིད་ཆེས་བྱེད་ཀྱི་ཡོད་པ་ཤེས་ཀྱི་རེད། ངའི་བསམ་པར། ཐོག་མཐའ་མེད་པའི་བདག་ལ་ཡིད་ཆེས་ཤིག་ཡོད་པ་དེ་ནི་ཆོས་ངོ་མ་ཉམས་ལེན་བྱེད་པའི་ཚད་འཛིན་ཆ་རྐྱེན་གཙོ་བོ་དེ་རེད། ང་ཚོ་རིམ་པས་ཡར་རྒྱས་འགྲོ་བ་དང་ཕྱི་རོལ་པ་ཞིག་ཡིན་པའི་ཆ་ནས་ཆོས་ངོ་མའི་རིམ་པ་ལ་བརྟེན་ནས་ང་ཚོས་ནང་པའི་དངོས་པོའི་གནས་ལུགས་ཀྱི་ལྟ་བའི་རིན་ཐང་ཡང་དག་པ་དེ་མཐོང་བ་དང་། དེ་ནས་མཐར་ང་ཚོས་ནང་པ་ཆོས་དད་ཅན་ཞིག་ལྟར་ནང་པའི་ལམ་དང་ཉམས་ལེན་ཁས་ལེན་གྱི་རེད། 

ནང་པ་ཆོས་དད་ཅན་ཞིག་ཏུ་འགྱུར་བར། ང་ཚོས་ནང་པའི་གནས་ལུགས་ཀྱི་ལྟ་བ་སྟོང་པ་ཉིད་དེ་གནད་དོན་གང་ལ་ཡར་རྒྱས་གཏོང་དགོས་པའི་དྲི་བ་ལ་ཆ་བཞག་ན།  འདི་ནི་ལམ་གྱི་རིམ་པ་གང་ཡང་རུང་བའི་སྐབས་སུ་ཡིན་ཆོག །ང་ཚོས་སྐྱབས་འགྲོའམ་ཉེན་མེད་ཀྱི་ཁ་ཕྱོགས་བཟང་པོ་བསྟེན་པའི་སྐབས་སུ་བརྗོད་གཞི་འདིའི་སྐོར་འཆད་སྲིད། ང་ཚོའི་ཉེན་མེད་ཀྱི་ཁ་ཕྱོགས་དེ་བརྟན་པོ་ཞིག་ཡོང་བ་དང་སངས་རྒྱས་ཀྱིས་གང་ཐོབ་པ་དང་གང་གསུངས་པ་ལ་ཡིད་ཆེས་རྙེད་པར། ང་ཚོས་འཕགས་པའི་བདེན་པ་བཞི་ངེས་པར་དུ་རྟོགས་དགོས། འཕགས་པའི་བདེན་པ་བཞི་ལ་དངོས་གནས་གོ་བ་ཞིག་བསླེབ་པར། ང་ཚོས་སྟོང་པ་ཉིད་དང་། དངོས་པོའི་གནས་ལུགས། ལམ་གྱི་བདེན་པའི་དོན་རྣམས་རྟོགས་དགོས། དེར་བརྟེན་དངོས་པོའི་གནས་ལུགས་ཀྱི་ཡང་དག་པའི་ལྟ་བ་ནི་རིམ་པ་འདིའི་སྐབས་སུ་འབྱུང་སྲིད་པའམ། ཡང་ན་དེ་ནི་སྐྱེས་བུ་འབྲིང་དང་སྐྱེས་བུ་ཆེན་པོའི་ལམ་གྱི་རིམ་པའི་སྐབས་སུ་སྐྱེད་སྲིད། མི་རྣམས་མི་འདྲ་བ་ཡོང་གི་རེད། 

སྐྱེས་བུ་ཆུང་ངུའི་ལམ་གྱི་རིམ་པའི་སྐབས་སུ་ང་ཚོས་ཆོས་ངོ་མའི་ལམ་རིམ་དེ་ནང་པ་མིན་པའམ་ཕྱི་རོལ་པ་ཞིག་ལྟར་ཉམས་ལེན་བྱེད་པའི་སྐབས། འཕགས་པའི་བདེན་པ་བཞི་ནི་ཡང་དག་པ་ཡིན་ཤག་བྱེད་ངེས་རེད། ཡིན་ནའང་། དེ་ལ་ང་ཚོས་ངེས་པ་རྙེད་མེད། ང་ཚོས་ཉམས་མྱོང་ཕར་ཞོག །ལུང་དང་རིགས་པར་གཞི་བྱས་ནས་ཤེས་ཀྱི་མེད། དེ་དག་བདེན་པ་ཡིན་ཤག་བྱེད་ཀྱི་ཡོད། སྐྱེས་བུ་འབྲིང་དང་ཆེན་པོ་ཁོ་ནའི་སྐབས་སུ་སྟོང་པ་ཉིད་ཀྱི་སྐོར་དངོས་སུ་བསླེབ་ཀྱི་ཡོད། འདི་ནི་ཡང་དག་པའི་གནས་ལུགས་ཀྱི་ལྟ་བའི་ཕྱོགས་སུ་འཕོ་འགྱུར་ཞིག་སྐྱེད་པ་དང་ང་ཚོར་འཕགས་པའི་བདེན་པ་བཞི་ལ་གདེང་ངམ་ཡིད་ཆེས་རྙེད་པའི་སྐབས་ཡིན། སྐྱེས་བུ་ཆེན་པོའི་ལམ་གྱི་རིམ་པར་བསླེབས་པ་དང་ང་ཚོའི་ཀུན་སློང་ལ་འཕོ་འགྱུར་ཞིག་ཡོད་པ་རེད། ཐེག་པ་ཆེན་པོའི་ཀུན་སློང་ཞིག་ལ་བརྟེན་ནས་ང་ཚོས་སེམས་ཅན་ཐམས་ཅད་ཀྱི་དོན་དུ་སངས་རྒྱས་ཀྱི་གོ་འཕང་ལ་དམིགས་ཀྱི་ཡོད། 

ཆོས་ངོ་མའི་ལམ་རིམ་བརྒྱུད་ནས་འགྲོ་བའི་ཐབས་གཉིས་པ་ནི་ཐེག་པ་ཆེན་པོ་ཉམས་ལེན་བྱེད་པ་དེ་རེད། ཆོས་ཁས་མི་ལེན་མཁན་ཞིག་གམ་ལོག་ལྟ་ཅན་ཞིག་ལྟར་བརྒྱུད་ནས་ལམ་རིམ་སྦྱོང་བརྡར་ཕལ་ཆེར་བྱས་ཟིན་པ་རེད། དེ་ཡང་ཡང་དག་པ་དང་ཐོག་མའི་སྟོང་ཉིད་ཀྱི་དོན་དང་ཐེག་པ་ཆེན་པོའི་ཀུན་སློང་ལ་བརྟེན་ནས་ང་ཚོ་ཆེས་ཐོག་མའི་གནས་སྐབས་སུ་རང་འཇགས་འགྲོ་དགོས་པ་དང་། སླར་ཡང་ལམ་གྱི་རིམ་དེ་དག་བརྒྱུད་ནས་འགྲོ་དགོས་ནའང་། དེ་ནི་ད་ལྟ་ཐེག་པ་ཆེན་པོའི་ནང་པ་ཆོས་དད་ཅན་ཞིག་ལྟར་བྱ་དགོས། འདི་ནི་ཧ་ཅང་གལ་ཆེན་པོ་རེད། ང་ཚོས་ལམ་རིམ་གྱི་རྒྱུད་རིམ་ཡོངས་སུ་རྫོགས་པར་ཐེངས་མ་གཉིས་པ་འགྲོ་བ་དང་། ད་ལྟ་ཐེག་པ་ཆེན་པོའི་ཆོས་དད་ཅན་ཞིག་ཡིན་པ་དང་ཀུན་སློང་བྱང་ཆུབ་ཀྱི་སེམས་དང་ལྡན་པར་གཞི་བྱས་ནས། སེམས་ཅན་ཐམས་ཅད་ཀྱི་དོན་དུ་སངས་རྒྱས་ཀྱི་གོ་འཕང་ཐོབ་པར་དམིགས་བཞིན་ཡོད་པ་དང་དེ་ལྟར་འཐོབ་རུང་ཡིན་པར་ང་ཚོར་གདེང་དང་ཡིད་ཆེས་ཡོད། སངས་རྒྱས་ཀྱི་གོ་འཕང་ཐོབ་པར། ང་ཚོས་མི་ལུས་རིན་ཆེན་འདི་བཀོལ་སྤྱོད་ཡག་ཤོས་གཏོང་དགོས་ཀྱི་ཡོད། དེ་གང་ཡིན་ཞེ་ན། ང་ཚོས་ཚེ་འདི་ནི་ཡུན་དུ་གནས་རྒྱུ་མིན་པ་སོགས་སྙིང་ཁོངས་ནས་ཤེས་ཀྱི་ཡོད། 

ང་ཚོས་ཆོས་ངོ་མའི་ལམ་རིམ་ལ་འཇུག་ཚུལ་མི་འདྲ་བ་གཉིས་ཡོད། དེ་ནི་ཐོག་མར་ཕྱི་རོལ་པ་ཞིག་ཡིན་པའམ་ཡང་ན་ཐེངས་གཉིས་པ་ཡིད་ཆེས་སྙེད་པའི་ཐེག་པ་ཆེན་པོ་གང་རུང་ཡིན། དེ་གཉིས་ཀའི་ནང་ང་ཚོའི་སློབ་གཉེར་དང་ཉམས་ལེན་དེ་ཆོས་ངོ་མ་གང་གིས་བཟོ་གི་ཡོད་ཅེ་ན། ང་ཚོས་ཐོག་མཐའ་མེད་པའི་བདག་ལ་གཞིགས་ནས་བསམ་བློ་གཏོང་གིན་ཡོད་པ་དེ་རེད། དེའི་ལྡོག་ཕྱོགས་སུ་ང་ཚོར་ཆོས་ཡངས་པ་ཡོད་དེ། དེའི་སྐབས་སུ་ང་ཚོས་ཚེ་འདི་ཁོ་ན་ཡར་རྒྱས་གཏོང་བའི་སྒྲོམ་གཞི་དང་སེམས་འཁུར་གྱི་ནང་ལམ་གྱི་རིམ་པ་ཆ་ཚང་བརྒྱུད་ནས་འགྲོ་གི་ཡོད། ངས་གོང་དུ་ཞུས་པ་ལྟར། ཀུན་སློང་འདི་ནི་ཧ་ཅང་ཕན་ཐོགས་ཅན་ཞིག་ཡིན་སྲིད། འོན་ཀྱང་། དེ་ལ་དཀའ་ངལ་འགའ་ཞིག་ཡོད། ལྷག་པར་དུ་ང་ཚོས་ཚེ་འདིའི་ནང་གང་བྱས་པའི་ལས་མང་ཆེ་བའི་འབྲས་བུ་རྣམས་མྱོང་གི་མེད་པ་ལ་བསམ་པའི་སྐབས་སུ་དཀའ་ངལ་ཆགས་ཀྱི་ཡོད། འདིས་ནང་པའི་བཟང་སྤྱོད་དང་ལས་འབྲས་ཀྱི་རྣམ་གཞག་གི་གོ་རྟོགས་དེ་ཏོག་ཙམ་བརྟན་ཆ་མེད་པ་བཟོ་གི་ཡོད། 

གོང་སྨྲོས་ཀྱི་རིམ་པ་ཆ་ཚང་ཕྱོགས་བསྡོམས་བྱས་ན། 

  • ཆོས་ཡངས་པ།
  • ཆོས་ངོ་མ་སྟེ། འདི་ནི་ཆེས་ཐོག་མའི་སྐབས་སུ་ཕྱི་རོལ་པ་ཞིག་ལྟར་ནང་པའི་དངོས་པོའི་གནས་ལུགས་དང་སྟོང་པ་ཉིད་ཀྱི་ཆོས་ཚུལ་རྣམས་ལ་དངོས་གནས་ཡིད་ཆེས་མ་རྙེད་པའམ་ཤེས་ཀྱི་མེད།
  • ནང་པའི་ལམ་ལ་སྔོན་ཚུད་ནས་སྦྱོང་བརྡར་ཟིན་པ་ལ་གཞི་བཞག་པའི་ཆོས་ངོ་མ་སྟེ། སྟོང་པ་ཉིད་དང་འཕགས་པའི་བདེན་པ་བཞིའི་སྐོར་ལ་གོ་རྟོགས་གང་འཚམས་ཤིག་ཡོད་པར་གཞི་བྱས་ནས་ནང་པའི་ཆོས་ལ་དད་པ་ཡོད་མཁན་ཆགས་པ་དང་། དེ་ནས་ད་གཟོད་ཐེག་པ་ཆེན་པོའི་ཀུན་སློང་ལ་བརྟེན་ནས་ཕྱིར་ལོག་དང་བཅས་ད་དུང་བརྟན་དུ་བཟོ་བཞིན་ཡོད།

སྤྱི་ཡོངས་ནས་བཤད་ན། འདི་ནི་ངོ་སྤྲོད་ཙམ་ཞིག་ཆགས་པ་རེད། ཆོས་ངོ་མའི་ལམ་རིམ་ལ་བརྟེན་ནས་རང་ཉིད་བཟང་ཕྱོགས་ཀྱི་ཡར་རྒྱས་ཤིག་གཏོང་ཚུལ་སྐོར་མུ་མཐུད་ནས་འཆད་རྒྱུ་ཡིན། དེ་ཡང་ནང་པའི་ལྟ་ཚུལ་ལ་ད་དུང་ཡང་ཁས་མི་ལེན་པའི་ཆེས་ཐོག་མའི་ཀུན་སློང་གི་རིམ་པ་ནས་འགོ་འཛུགས་བྱ་རྒྱུ་ཡིན། གང་ལྟར་ཡང་། ང་ཚོས་སོ་སོ་རང་ཉིད་མི་དཀྱུས་མ་ནང་བཞིན་བློ་དང་ལྡན་པའི་བརྟག་ཞིབ་ཀྱི་རྗེས་སུ་ཐ་ན་དེ་ནི་ “ད་ང་ཤི་ཚར་རེད་” ཅེས་པ་ལྟར་གང་ཡང་མེད་པ་ཆེན་པོ་འདི་ལ་གཞིགས་ནའང་། ང་ཚོ་ནི་གང་ལྟར་ཐོག་མཐའ་མེད་པའི་ “བདག་” ཅིག་ཏུ་གྲུབ་པར་རྟོགས་ཀྱི་ཡོད། 

འདིའི་སྐོར་ལ་དྲི་བ་དང་འགྲེལ་བརྗོད་མ་བྱས་གོང་ལ་ང་ཚོས་དེ་སྔོན་དུ་གོ་བསྡུར་དང་སློབ་སྦྱོང་བྱས་པའི་ལམ་རིམ་ལ་ཇི་ལྟར་འཇུག་ཡོད་པའི་ཐད་ལ་བསམ་ཞིབ་བྱེད་ན་འགྲིགས། དཔེར་ན། ང་ཚོས་ལམ་རིམ་དེ་གཏིང་ཟབ་པའི་རིམ་པའི་ཐོག་ནས་ཕྱིན་ཡོད་དམ་ཡང་ན་ཕྱིའི་སྣང་ཚུལ་ཙམ་ཕྱིན་ཡོད། དེ་ལས་བྱུང་བའི་ཕན་ཡོན་གང་ང་ཚོར་ཐོབ་ཡོད་དམ་ཞེས་པ་ལྟ་བུ་རེད།

(སྒོམ་དུས།)

དྲི་བ་ཁག

ཀུན་རྫོབ་ཀྱི་ “བདག་” དང་སྒྲོ་འདོགས་ཀྱི་ “བདག་” ལ་བརྟེན་ནས་སྡུག་བསྔལ་མྱོང་བ།

ཁྱེད་ཀྱིས་ཀུན་རྫོབ་ཀྱི་ “བདག་” དང་སྒྲོ་འདོགས་ཀྱི་ “བདག་” གི་སྐོར་གསུངས་སོང་། ང་ཚོས་ཀུན་རྫོབ་ཀྱི་ “བདག་” དང་ “བདག་” རྫུས་མའམ་སྒྲོ་འདོགས་ཅན་གཉིས་དབར་གྱི་དབྱེ་བ་ལ་གཞིགས་ནས་ལུས་ཀྱི་ནད་རྣམས་ཇི་ལྟར་རྟོགས་སམ། གལ་ཏེ་ང་ཚོས་སྡུག་བསྔལ་དང་དཀའ་ངལ་རྣམས་སྒྲོ་འདོགས་ཀྱི་“བདག་”ལ་བསམ་པ་ལས་འབྱུང་གི་ཡོད་ཅེས་བརྗོད་ན། དེ་གང་དུ་རན་འཚམས་ཆགས་ཀྱི་ཡོད་དམ། 

ཐོག་མར་ལུས་ཀྱི་ན་བའི་སྡུག་བསྔལ་དེ་སུས་མྱོང་གི་ཡོད་དམ། དེ་ནི་ཀུན་རྫོབ་ཀྱི་ “བདག་” དེ་ཡིན་པ་ལས་ “བདག་” རྫུས་མ་དེ་མིན། “བདག་” རྫུས་མ་དེ་ནི་གར་ཡང་གྲུབ་མེད། རྒྱུ་མཚན་དེ་ལ་བརྟེན་ནས་ “བདག་” རྫུས་མ་དེས་གང་ཡང་མྱོང་ཐུབ་ཀྱི་མེད། འོན་ཀྱང་། “བདག་” རྫུས་མ་ལྟ་བུར་རང་གིས་རང་ལ་ཚུལ་མིན་ཡིད་བྱེད་ཀྱི་སྒོ་ནས་གྲུབ་པར་བསམ་བཞིན་དུ་ང་ཚོས་ན་བ་དང་ན་བའི་སྡུག་བསྔལ་མྱོང་ཐུབ། དེ་ཅི་ལྟར་ཡོད་ཅེ་ན། “ང་ཐབས་སྐྱོ་བ་ལ། ང་ནི་སྡུག་བསྔལ་མྱོང་མཁན་དེ་ཡིན་པ་དང་ང་ལ་ཡོད་པའི་སྡུག་བསྔལ་དྲག་པོ་འདི་འདྲ་གཞན་སུ་ཞིག་ལའང་མེད། ང་ལ་འདི་འདྲ་མྱོང་དགོས་དོན་གང་ཡིན་ནམ་” ཞེས་པ་ལྟ་བུ་ཡོད། ང་ཚོས་འདི་འདྲའི་སྒོ་ནས་བསམ་བློ་གཏོང་བའི་སྐབས། སེམས་ཀྱི་ན་ཟུག་དྲག་པོ་ཞིག་ང་ཚོའི་ནད་དང་མཉམ་དུ་མྱོང་གི་ཡོད། 

འདི་ནི་དངོས་གནས་གང་ཙམ་མགོ་རྙོག་ཅན་གྱི་གནད་དོན་ཞིག་ཡིན་པ་དང་མི་འགའ་ཤས་ནི་ལན་འདེབས་ཧ་ཅང་ཐུང་ངུ་བྱེད་པར་ཧ་ཅང་མཁས་པོ་ཡོད་ནའང་། ང་རང་མཁས་པོ་མེད། དེར་བརྟེན་ངས་དེའི་སྐོར་ལ་ཞིབ་ཅིང་ཕྲ་བའི་དཔྱད་པ་བྱ་རྒྱུ་ཡིན། 

ངས་གོང་དུ་འགྲེལ་བརྗོད་བྱས་པ་ལྟར། ཀུན་རྫོབ་ཀྱི་ “བདག་” གིས་ན་བའི་སྡུག་བསྔལ་མྱོང་བ་དང་ “བདག་” རྫུས་མས་མྱོང་གི་མེད། དེ་གསལ་པོ་རེད། དེའི་རྗེས་སུ་ན་བའམ་ནད་དེ་ནི་ལས་ཀྱི་འབྲས་བུ་ཡིན་ཞེས་བརྗོད་ཆོག །ང་ཚོས་སྐྱེ་བ་སྔ་མར་ལས་ཤིག་བསགས་ཡོད་པ་སྟེ། དཔེར་ན། གཞན་གྱི་ཚེ་ཐུང་དུ་བཏང་བའམ་སྲོག་གཅོད་པའི་ལས་ལྟ་བུའི་འབྲས་བུར་སོ་སོ་རང་ཉིད་ཀྱི་མི་ཚེ་ཐུང་དུ་ཕྱིན་ཡོད་པའམ། ཡང་ན་ང་ཚོར་ནད་ཀྱིས་མནར་བ་སོགས་ཡོང་གི་ཡོད། མ་རིག་པ་དང་དོན་ངོ་མར་ང་ཚོ་ཇི་ལྟར་གྲུབ་པའི་ཚུལ་དེ་མི་ཤེས་པའི་རྨོངས་པའི་དབང་གིས་ལས་བསགས་ཡོད། འདི་ལྟར་བསམ་བློ་གཏོང་བ་ལ་བརྟེན་ནས་ང་ཚོས་ལས་སླ་པོའི་སྒོ་ནས་ “བདག་” རྫུས་མ་ཞིག་ལ་གཞིགས་ནས་རང་གིས་རང་ལ་བསམ་བློ་གཏོང་སྲིད། དེའི་འབྲས་བུར། ང་ཚོའི་འགྲེལ་བ་དང་གོ་རྟོགས་དེ་དངོས་དོན་དུ་ཚད་ལས་བརྒལ་བའི་ལས་སླ་པོ་ཞིག་ཆགས་ངེས་རེད།  

གང་ལྟར་ཡང་། ད་ང་ཚོས་ཞིབ་པར་དཔྱད་པ་བྱ་རྒྱུ་ཡིན། སེམས་ཀྱི་གནས་བབས་ཞི་ཞིང་བརྟན་ཚུགས་པའི་ཞི་གནས་སྐྱེད་པའི་དམིགས་པའི་ཡུལ་ལ་རྗེ་ཙོང་ཁ་པ་ཆེན་པོའི་འགྲེལ་བརྗོད་གནང་བ་ལྟར་ན། སེམས་ནང་ལ་སྐད་ཆ་ཧ་ཅང་མང་པོ་ཡོད་མཁན་གྱི་གང་ཟག་རྣམས་ལ་ནི་དབུགས་ལ་དམིགས་པ་གཏད་རྒྱུ་དེ་ཕན་ཐོགས་ཆེན་པོ་ཡོད། འོན་ཀྱང་། དངོས་པོའི་གནས་ལུགས་ལ་རྨོངས་པའི་མ་རིག་པ་ཡོད་མཁན་གྱི་གང་ཟག་རྣམས་ལ་ནི་ཕུང་པོ་དང་བསྟུན་ནས་རྟེན་ཅིང་འབྲེལ་བར་འབྱུང་བ་ལ་དམིགས་པ་གཏད་དགོས་ཞེས་ལམ་སྟོན་གནང་ཡོད། 

ང་ཚོའི་ནད་ལ་བརྟེན་ནས་འདི་ཇི་ལྟར་བྱེད་དམ། དེ་ནི་ལས་སླ་པོ་ཞིག་མེད། ཡིན་ནའང་། ང་ཚོས་ལུས་ཀྱི་ནད་ལ་བརྟེན་ནས་གང་ཞིག་ལ་དམིགས་ཀྱི་ཡོད་པ་ནི་ང་ཚོས་ཉམས་སུ་མྱོང་བཞིན་པའི་གནས་སྟངས་ཤིག་ལ་དམིགས་ཀྱིན་ཡོད། དེ་ལ་རྒྱུ་དང་རྐྱེན་ནས་བྱུང་བའི་རྟེན་འབྱུང་དེ་ཡོད། ལྷག་དོན་དུ་ང་ཚོས་དེ་ཉམས་སུ་མྱོང་བ་དེ་ནི་ལས་ཀྱི་ས་བོན་གྱི་འབྲས་བུ་ཞིག་ཡིན། དེ་ནི་ “ཉེར་ལེན་གྱི་རྒྱུ་” ཞེས་བྱ་བ་དེ་ཡིན་ཆོག །དེ་ནི་ནད་དེ་ལས་བྱུང་བའི་མྱོང་བ་ང་ཚོར་ཐོབ་པ་དེ་རེད། དེའི་སྟེང་ལ་ནད་དེ་དུས་ཚོད་ངེས་ཅན་འདིའི་ནང་ཅིའི་ཕྱིར་འབྲས་བུ་སྨིན་པའི་རྐྱེན་ཚང་མ་ཡོད་པ་རེད། རྐྱེན་ཏག་ཏག་གམ་མཐུན་པའི་རྐྱེན་མེད་པར་འབྲས་བུ་ད་གཟོད་སྨིན་ངེས་མ་རེད། འབྲས་བུ་དེ་སྨིན་པའི་རྐྱེན་ནི་གནམ་གཤིས་དང་། བྱ་བཞག །ང་ཚོའི་ཟས་བཅུད། ང་ཚོའི་རྒྱུན་ལྡན་གྱི་ལུས་སྦྱོང་། ད་ཡོད་ཀྱི་ནད་ཡམས། ཡང་ན་ང་ཚོ་དང་འབྲེལ་བ་ཡོད་པའི་མི་རྣམས་སོགས་ཡིན་སྲིད། ང་ཚོས་ནད་དེ་ད་ལྟ་ཅིའི་ཕྱིར་མྱོང་གི་ཡོད་པ་དང་དེ་མྱོང་བའི་མཐུན་རྐྱེན་དུ་གྱུར་བའི་རྒྱུ་རྐྱེན་སྣ་ཚོགས་པའི་ཐོ་འགོད་བྱེད་འགོ་ཚུགས་ཆོག

དེར་མ་ཟད། ང་ཚོའི་སེམས་ཁམས་ཀྱི་རྒྱབ་ལྗོངས་ཡོངས་སུ་རྫོགས་པར་གཞིགས་ནས་སེམས་ཚོར་གྱི་ཡ་ལན་མཉམ་དུ་ཡོད་པའི་རྒྱུ་རྐྱེན་སྣ་ཚོགས་པ་དེ་དག་ཐམས་ཅད་ཡོད་ཅིང་། ནང་མི་ཁྱིམ་ཚང་དང་འཚར་ལོངས་སོགས་དེ་ལ་ཤུགས་རྐྱེན་སྤྲད་པ་ཚང་མ་ཚུད་ཡོད། རྒྱུ་རྐྱེན་དེ་དག་ཐམས་ཅད་ཀྱིས་རང་གིས་རང་ལ་ཤ་ཚ་སྙིང་རྗེ་གང་ཙམ་ཞིག་ཅིའི་ཕྱིར་ཡོད་པ་དང་ན་བའི་མྱོང་བ་ལ་གྲོགས་བྱེད་པའི་སེམས་ཚོར་ཡོད་དོ་ཅོག་གི་རྒྱུ་མཚན་ཆགས་ཀྱི་ཡོད། རྣམ་པ་དེ་དག་རེ་རེ་ནི་ས་བོན་དང་གོམས་པའི་རིགས་མི་འདྲ་བ་ཞིག་ནས་འབྱུང་གི་ཡོད། ང་ཚོས་མྱོང་བཞིན་པའི་གནས་སྟངས་ནི་སྟོང་པ་ཞིག་གི་ནང་ཡོད་པ་མིན། 

གཞན་ཡང་། གནས་སྟངས་འགའ་ཞིག་ཀྱང་ཡོད་དེ། དཔེར་ན། སྨན་གྱི་མཐུན་རྐྱེན་ཡོད་པ་། ང་ཚོར་རྒྱབ་སྐྱོར་བྱེད་མཁན་གྱི་གྲོགས་པོ་དང་གཅེས་སྐྱོང་བྱེད་མཁན་གྱི་ནང་མི་ཡོད་མེད། ཡང་མིན་ན་ང་ཚོ་རྦད་དེ་ཁེར་རྐྱང་ཡིན་མིན་བཅས་པ་ལྟ་བུ་རེད། གནས་སྟངས་ལ་མཐུན་སྦྱོར་བྱེད་པའི་ཆ་རྐྱེན་གཞན་ཧ་ཅང་མང་པོ་ཡོད་པ་དང་དེ་ལ་ང་ཚོའི་སེམས་ཚོར་གྱི་ཡ་ལན་ཀྱང་ཡོད་པ་རེད། 

ལས་ཀྱི་རྒྱུ་ལ་མཚོན་ན། སྔོན་གྱི་ལས་སམ་ལས་ཀྱི་སྡེ་ཚན་དེ་དག་ཀྱང་རྒྱུ་རྐྱེན་མང་པོ་འདུས་པའི་འོག་ནས་བྱས་ཡོད། འདིའང་རྒྱུ་རྐྱེན་རྟེན་འབྲེལ་ཆེན་པོ་ཞིག་གི་ཆ་ཤས་ཤིག་ཡིན་པ་རེད། རྟེན་ཅིང་འབྲེལ་བར་འབྱུང་བ་ནི་ང་ཚོའི་དམིགས་པའི་ཡུལ་ལྟ་བུར་བྱས་ཏེ། ཞི་གནས་ཐོབ་པར་བྱེད་པར་ང་ཚོས་རྩེ་གཅིག་ཏུ་རྟེན་ཅིང་འབྲེལ་འབྱུང་གི་ཆོས་ཤིག་ཡིན་པའམ་རྒྱུ་དང་རྐྱེན་གྱི་རྙོག་འཛིངས་ཆེན་པོ་འདི་ནས་བྱུང་བར་རྟོགས་པའི་སྒོ་ནས་གནས་སྟངས་ལ་དམིགས་དགོས་ཞེས་རྗེ་ཙོང་ཁ་པ་ཆེན་པོས་གསུངས། ང་ཚོས་རྒྱུ་རྐྱེན་དེ་དག་ལ་དམིགས་ཚུལ་དེའང་བདེན་པར་གྲུབ་པའི་ཆོས་ “བདག་” རྫུས་མ་ཞིག་མེད་པར་རྟོགས་པ་ལ་བརྟེན་དགོས་ཏེ། “བདག་” རྫུས་མ་དེ་ནི།

  • སྐྱེ་བ་སྔོན་མའི་ནང་མི་ངན་པའམ་སྡིག་ཅན་བྱས་པ་སོང་ཙང་། ལས་དེ་དག་རྒྱུ་ཁོ་ན་བྱས་ནས་ད་ལྟ་ནག་ཉེས་ཅན་དུ་གྱུར་བ་དེ་ཡིན།
  • འབྲས་བུར་འདི་མྱོང་བཞིན་པའི་ཐབས་སྐྱོ་བའི་སྡུག་བསྔལ་མྱོང་མཁན་དེ་ཡིན།
  • འབྲས་བུ་འདི་ཉེས་ཆད་ཀྱི་ཚུལ་དུ་འོས་བབ་ཡོད་པའི་བུའམ་བུ་མོ་སྡུག་ཅག་དེ་ཡིན།

ང་ཚོས་ཡང་དག་པའི་ལྟ་བ་ལ་བརྟེན་ནས་གནས་སྟངས་འདི་རྒྱུ་དང་རྐྱེན་གྲངས་ལས་འདས་པ་ལ་བརྟེན་ནས་བྱུང་བར་དམིགས་དགོས། ང་ཚོས་འདིའི་སྐོར་ཞིབ་ཅིང་ཕྲ་བར་འགྲོ་མི་དགོས་པའི་ཐོག་ནས་དམིགས་པ་གཏད་དགོས། དེ་ནི་ཞི་གནས་ཐོབ་པར་ང་ཚོའི་དམིགས་གཏད་དེ་ཡིན། འདི་ནི་དངོས་གནས་དྲང་གནས་ཁྱད་དུ་འཕགས་པའི་སྒོམ་ཞིག་ཡིན།

འདི་ནི་དངོས་གནས་ཕུལ་དུ་བྱུང་བའི་སྒོམ་ཞིག་ཡིན་པའི་བདེན་དོན་དེའི་ཞོར་ལ་ངས་འདི་སྐོར་ལ་ཤོད་ཀྱི་ཡོད། གང་ཡིན་ཞེ་ན། ཆོས་ལ་སློབ་གཉེར་བྱེད་པའི་སྐབས། ང་ཚོའི་དཀའ་ངལ་ཡོངས་སུ་རྫོགས་པའི་རྩ་བ་ནི་ང་ཚོ་ཇི་ལྟར་ཡོད་པ་དང་། “བདག་” ཇི་ལྟར་གྲུབ་པ། དེ་བཞིན་གཞན་ཚང་མ་ཇི་ལྟར་གྲུབ་པ་ལ་རྨོངས་པ་དེ་ཡིན་ཞེས་བརྗོད་ཀྱི་ཡོད། རྟེན་འབྲེལ་ཡན་ལག་བཅུ་གཉིས་ཀྱི་ནང་། ཡན་ལག་དང་པོ་སྟེ། ང་ཚོའི་དཀའ་ངལ་ཡོད་དོ་ཅོག་གི་རྩ་བ་ནི་མ་རིག་པ་འདི་རེད། ང་ཚོ་ཇི་ལྟར་གྲུབ་ཡོད་པ་ང་ཚོས་དངོས་གནས་མི་ཤེས་པའམ་ལོག་པར་ཤེས་ཀྱི་ཡོད་པས། མི་ཤེས་པའམ་མ་རིག་པ་འདི་ལ་བརྟེན་ནས་དཀའ་ངལ་ཚང་མ་འབྱུང་གི་ཡོད། 

དཔྱད་པ་འདི་ཡང་དག་པ་ཞིག་ཡིན་ནའང་། ང་ཚོས་འདི་ལ་གོ་བ་ལོག་སྒྲུབ་བྱེད་སྲིད། གོ་བ་ལོག་སྒྲུབ་དེ་གང་རེད་དམ། འདི་ནི་བདེན་བཞིའི་མི་རྟག་སོགས་རྣམ་པ་བཅུ་དྲུག་ལ་གཞིགས་ནས་འཕགས་པའི་བདེན་པ་གཉིས་པའི་ཚུལ་མིན་ཡིད་བྱེད་བཞི་དང་འབྲེལ་བའི་ཐོག་ནས་གསུངས་ཡོད། 

སྡུག་བསྔལ་གྱི་རྒྱུ་དངོས་དེ་ཡང་དག་མིན་པར་རྟོགས་པ་ཞེས་པ་དེ་གང་རེད་དམ་ཞེ་ན། སྡུག་བསྔལ་ཀུན་རྒྱུ་གཅིག་ལས་འབྱུང་གི་ཡོད་པ་དེ་རེད། དེ་ལ་རྩ་བའམ་ཆེས་རྨང་གཞིར་གྱུར་བའི་རྒྱུ་ཞིག་ཡོད་ཆོག་ནའང་། དེ་ནི་རྒྱུ་རྐྱེན་ཁོ་ན་དེ་མིན། དེ་ནི་ “བདག་” དང་ “བདག་གི་མ་རིག་” པ་ཁོ་ན་རྒྱུ་མཚན་དུ་བྱས་ནས་ང་ཚོས་སྡུག་བསྔལ་མྱོང་གིན་མེད། 

རང་མཐོང་ཆེན་པོ་དེ་འདྲ་བསམ་པ་དང་དེ་ལྟར་བསམ་པའི་ཉེན་ཚབས་དེ་ཁྱེད་ཀྱིས་མཐོང་ཐུབ་ཀྱི་འདུག་གམ། དེ་ནི་ “བདག་” ཙམ་རྒྱུ་མཚན་དུ་བྱས་ནས་མིན་ལ། ང་རང་གླེན་པ་ཞིག་ཡིན་པ་དང་མི་ཤེས་པ་སོང་ཙང་། ང་ནི་ཐབས་སྐྱོ་བའི་སྡུག་བསྔལ་མྱོང་མཁན་ཞིག་ཀྱང་མིན། གལ་ཏེ་ང་ཚོ་གཉིད་ལས་ཡར་ལངས་ནས་ཡང་དག་པར་རྟོགས་ན། ང་ཚོའི་དཀའ་ངལ་ཚང་མ་མེད་པ་ཆགས་ཀྱི་རེད་ཟེར་བ་དེ་འདྲ་མ་རེད། དེ་ནི་ཧ་ཅང་ལས་སླ་པོ་རེད། དེ་ནི་འབྲས་བུ་དངོས་གནས་རྒྱུ་གཅིག་ཁོ་ན་ལས་འབྱུང་གི་ཡོད་བསམ་པ་དེ་རེད། དོན་ངོ་མར་འབྲས་བུ་ནི་རྒྱུ་དང་རྐྱེན་མང་པོ་འདུས་པ་ལས་འབྱུང་གི་ཡོད། 

ང་ཚོ་ལམ་རིམ་གྱི་གོ་རིམ་ནང་གྲ་སྒྲིག་ཨང་བསར་ཡོད་ནའང་། འདི་ནི་ཧ་ཅང་གལ་ཆེ་བ་དང་མེད་དུ་མི་རུང་བའི་གནད་དོན་ཞིག་རེད། གནད་དོན་བྱེ་བྲེག་འདི་ལ་གཞིགས་ནས་ཁྱེད་ཀྱི་ “བདག་” བཟང་པོ་དང་ “བདག་” སྒྲོ་འདོགས་ཅན་གྱི་དབར་གྱི་ཁྱད་པར་མཐོང་ཐུབ་ཀྱི་འདུག་གམ། ང་ཚོས་མྱོང་བའི་སྡུག་བསྔལ་ལ་གཞིགས་ནས་ང་ཚོའི་ལས་འགན་གང་རེད་དམ། སྒྲོ་འདོགས་ཅན་གྱི་ “བདག་” ནི་ “འདི་དག་ཐམས་ཅད་ངའི་ནོར་འཁྲུལ་རེད་” ཅེས་བསམ་པའི་ “བདག་” ཆེན་པོ་འདི་རེད། ང་ཚོས་སོ་སོའི་ལས་ངན་པ་བསགས་པའི་རྐྱེན་གྱིས་གང་འབྱུང་བ་ཐམས་ཅད་ང་ཚོའི་ནོར་འཁྲུལ་ཡིན་པར་བསམ་པའི་སྐབས། དེ་ནི་ “བདག་” རྫུས་མའི་ནང་ཀུན་རྫོབ་ཀྱི་ “བདག་” གི་སྒྲོ་འདོགས་ཤིག་ཡིན། ང་ཚོས་སྐྱེ་བ་སྔ་མའི་ནང་ལས་ངན་འདི་བསགས་པའི་རྐྱེན་ད་ལྟ་ང་ཚོས་སྡུག་བསྔལ་མྱོང་གི་ཡོད་ཅེས་བསམས་ནས་གང་ལ་གང་འཚམས་ཀྱི་བློ་འཚབ་སེམས་འཁྲེལ་ཅན་ཆགས་རྒྱུ་འགོ་ཚུགས་སྲིད།

ཕན་ཐོགས་ཅན་ནམ་ “བདག་” བཟང་པོའི་འདུ་ཤེས་ལ་བརྟེན་ནས་ང་ཚོས་ཀུན་རྫོབ་ཀྱི་སྒོ་ནས་ལས་ཀ་འདི་དང་དེ་བྱས་པ་ཤེས་ཀྱི་ཡོད། དེར་བརྟེན་འདི་དང་དེ་མྱོང་འཇུག་མཁན་གྱི་ལས་ཀྱི་ས་བོན་ཡོད་པ་རེད། འོན་ཀྱང་། དེའི་ནང་ད་དུང་རྒྱུ་དང་རྐྱེན་གྲངས་ལས་འདས་པ་ཡོད། ང་ཚོས་འཛམ་གླིང་ནང་འབྱུང་བའི་རྐྱེན་ངན་གོད་ཆག་ཐམས་ཅད་ཀྱི་འགན་དེ་ང་ཚོར་ཡོད་བསམ་པ་དང་། དམིགས་བསལ་ང་ཚོར་འབྱུང་བའི་རྐྱེན་ངན་པ་དང་བཀྲ་མི་ཤིས་པ་ཚང་མའི་འགན་དེ་ང་ཚོར་ཡོད་ཅེས་བསམས་ནས་ “བདག་” གི་འདུ་ཤེས་ལ་སྒྲོ་འདོགས་བྱེད་ཀྱི་མེད། “དེ་ནི་མཐའ་གཅིག་ཏུ་ངའི་ནོར་འཁྲུལ་རེད་” ཅེས་བསམ་པ་ནི་སྒྲོ་འདོགས་ཐལ་དྲག་པ་རེད། 

འོ་ན་ཧ་ཅང་དཀའ་ཚེགས་ཅན་དེ་གང་རེད་དམ་ཞེ་ན། དེ་ནི་མཐའ་གཉིས་སྤོང་རྒྱུ་དེ་རེད། 

  • “དེ་ནི་མཐའ་གཅིག་ཏུ་ངའི་ནོར་འཁྲུལ་རེད་” ཅེས་པ་ནི་མཐའ་གཅིག་སྟེ། སྒྲོ་འདོགས་ཅན་གྱི་ “བདག་” གི་མཐའ་དེ་རེད། 
  • མཐའ་གཞན་དེ་ནི་ “ངའི་ལས་འགན་རྩ་ནས་མ་རེད། ཕྱིའི་རྒྱུ་ཙམ་ལ་བརྟེན་ནས་འབྱུང་བཞིན་པའི་གནས་སྟངས་འདི་ངས་མྱོང་བཞིན་ཡོད། ངས་གང་ཡང་བྱས་མེད། ང་རང་མཐའ་གཅིག་ཏུ་ཉེས་མེད་ཡིན་” ཞེས་པའི་མཐའ་དེ་རེད། 

དེ་དག་ནི་མཐའ་གཉིས་ཡིན་པ་དང་ང་ཚོར་ “བདག་” གི་འདུ་ཤེས་བཟང་པོ་ཞིག་ཡོད་པ་དང་སྒྲོ་འདོགས་མེད་པའི་བདག་བཟང་པོ་ཞིག་གི་ལས་འགན་ཞིག་ཡོད་པ་དེའི་དབུས་སུ་ཡོད། ཉེས་མེད་དང་ཉེས་ཅན་གྱི་ཚད་གཞི་དེ་དག་ནི་ནང་པའི་སྐབས་དོན་གྱི་ནང་དངོས་གནས་རན་ཞིང་འཚམས་པ་ཞིག་མེད། དེ་ནི་ང་ཚོའི་ཁྲིམས་ཀྱི་འདུ་ཤེས་ལས་བྱུང་བའི་རིག་གཞུང་ནས་གནད་དོན་འགའ་ཞིག་ནང་ཆོས་ཀྱི་ནང་གཅིག་ཐོག་གཅིག་རྩེག་བྱེད་པ་ལ་བརྟེན་ནས་ང་ཚོར་གོ་བ་ལོག་སྒྲུབ་དེ་དག་ཇི་ལྟར་ཐོབ་ཀྱི་ཡོད་པའི་སྐོར་དེ་དངོས་གནས་དོ་སྣང་བྱ་འོས་པ་ཞིག་ཡོད། གནས་སྟངས་འདིའི་ནང་ནག་ཉེས་ཅན་དང་ཉེས་མེད་ནི་འབྲེལ་བ་མེད་པ་ཙམ་རེད། 

ངས་དྲི་བ་གཅིག་རང་གི་དོན་དུ་དུས་ཚོད་མི་ཉུང་བ་ཞིག་བཏང་བར་བཟོད་གསོལ་ཞུ། ང་ཚོའི་ཆོས་ཐུན་གཞན་དག་གི་སྐབས་སུ་དྲི་བ་གང་མང་གཏོང་བའི་དུས་ཚོད་ཡོང་གི་རེད། ཁྱེད་ཀྱིས་ད་ལྟ་བཏང་བའི་དྲི་བ་དེ་ཡག་པོ་ཞིག་ཡིན་པ་དང་དེས་གནད་དོན་ཧ་ཅང་གལ་ཆེན་ཞིག་སྟོན་གྱི་འདུག །ང་ཚོས་གང་ཉམས་སུ་མྱོང་བའི་འགན་འཁྲི་ལ་ལྟ་ཚུལ་གྱི་སྒོ་ནས་ནད་ཀྱི་གནད་དོན་ལ་ལྟ་བ་དེས་ “བདག་” བཟང་པོའི་འདུ་ཤེས་ཅན་ཞིག་དང་ “བདག་” སྒྲོ་འདོགས་ཀྱི་འདུ་ཤེས་ཅན་གཉིས་དབར་གྱི་ཁྱད་པར་དེ་རྟོགས་པར་ཕན་གྱི་ཡོད། 

རང་འདོད་དོན་གཉེར་དང་། དཀའ་ངལ་གྱི་རྩ་བ་དང་སྡུག་བསྔལ་གྱི་རྒྱུ།

གལ་ཏེ་ “བདག་” རྫུས་མ་འདི་རང་འདོད་དོན་གཉེར་ཅན་ཡིན་ན། ང་ཚོས་ཀུན་རྫོབ་ཏུ་གྲུབ་པའི་བདག་ཀྱང་རང་འདོད་དོན་གཉེར་ཅན་ཡིན་ཞེས་བརྗོད་ཐུབ་བམ།

“བདག་” རྫུས་མ་ནི་དོན་ངོ་མར་བདེན་པར་གྲུབ་མེད་པས། རང་འདོད་དོན་གཉེར་ཅན་དེ་སུ་རེད་དམ། དེ་ནི་ “བདག་” རྫུས་མ་དེ་ཡིན་མི་སྲིད། གང་ཡིན་ཞེ་ན། བདག་རྫུས་མ་དེ་གྲུབ་མེད་པའི་ཕྱིར། དེ་ནི་ཀུན་རྫོབ་ཀྱི་ “བདག་” དེ་རེད། ང་ཚོས་འཛམ་གླིང་ཉམས་སུ་མྱོང་བ་ལ་དེའི་ཆ་ཤས་ཤིག་ཡོད་པ་ནི་ང་ཚོའི་མྱོང་བའི་སྐད་ཅིག་སྣ་ཚོགས་པར་གྲོགས་བྱེད་མཁན་གྱི་རང་འདོད་དོན་གཉེར་གྱི་སེམས་བྱུང་དེ་རེད། ང་ཚོའི་ཕུང་པོའི་ནང་གཞན་གང་འབྱུང་བཞིན་པའི་སྟེང་དུ་ང་ཚོའི་མྱོང་བ་སྐྲུན་པའི་འདུས་བྱས་འདིའི་ནང་ “བདག་” གི་ཚུལ་མིན་ཡིད་བྱེད་དེའང་ཚུད་ཡོད། ང་ཚོས་ཀུན་རྫོབ་ཀྱི་ “བདག་” ་དེ་ “བདག་” རྫུས་མ་ནང་བཞིན་གྲུབ་ཡོད་པར་བསམ་གྱི་ཡོད། དེ་ལ་དཔེ་མཚོན་ཁག་ནི། “ང་ནི་ཡག་ཤོས་ཡིན། ང་ནི་རྩེ་ཕུད་དེ་ཡིན། ངས་གང་འདོད་པ་ལྟར་བྱེད་དགོས་” ཞེས་པ་ལྟ་བུ་རེད། དེའི་རྗེས་སུ་ང་ཚོས་ “བདག་” ཁོ་ནར་བསམ་པ་དང་བདག་ལ་གང་འཐོབ་ཀྱི་རེད་ཅེས་བསམ་པ་ལས། གཞན་དོན་དུ་བསམ་བློ་གཏོང་གི་མེད། 

ང་ཚོས་སེམས་བྱུང་དེ་དག་གི་སྐོར་ལ་སྦྱོང་བའི་སྐབས། དེ་དག་ནི་བློ་ལ་འཐད་པའི་སློབ་སྦྱོང་གི་དུམ་ཚན་ཙམ་ཞིག་ཏུ་བསམ་ཆོག །ཡིན་ནའང་། གལ་ཏེ་ང་ཚོས་ལུགས་དེ་དག་ལ་གཞིགས་ནས་ང་ཚོའི་མྱོང་བ་ལ་དངོས་གནས་བརྟག་དཔྱད་བྱེད་འགོ་ཚུགས་ཐུབ་ན། དེ་དག་གིས་དཀའ་ངལ་སྣ་ཚོགས་པར་གདོང་ལེན་ཇི་ལྟར་བྱེད་དགོས་པ་སྟོན་གྱི་ཡོད། གང་ལྟར་ཡང་། སངས་རྒྱས་ཆོས་གང་ཞིག་གསུངས་པ་ཚང་མ་ནི་དཀའ་ངལ་དང་སྡུག་བསྔལ་རྣམས་ལས་ཐར་བར་མཐུན་རྐྱེན་སྦྱོར་བའི་ཆེད་དུ་ཡིན། 

དཔེར་ན། ང་ཚོ་འགྲོ་འདོད་ཡོད་པའི་རོལ་དབྱངས་སྤྲོ་སྟོན་ཞིག་གི་ཆེད་དུ་ཊིག་འཛིན་མཐའ་མ་དེ་ཐོབ་པ་དང་ང་ཚོས་དེ་རང་འདོད་དོན་གཉེར་དང་བཅས་ཉམས་སུ་མྱོང་བ་ལྟ་བུ་རེད། ག་རེ་འབྱུང་བཞིན་ཡོད་དམ། ཀུན་རྫོབ་ཀྱི་ “བདག་” དེས་གནས་སྟངས་ཉམས་སུ་མྱོང་བཞིན་ཡོད། འོན་ཀྱང་། ང་ཚོས་ཚུལ་མིན་ཡིད་བྱེད་ཀྱི་སྒོ་ནས་ཀུན་རྫོབ་ཀྱི་བདག་དེ་ “བདག་” རྫུས་མ་ལྟར་དུ་འཛིན་པའི་རྒྱུ་མཚན་དང་། རང་འདོད་དོན་གཉེར་གྱི་སྒོ་ནས་རང་ཉིད་ཁོ་ནར་བསམ་པ་དང་ཁོང་ཁྲོ་ལངས་ཏེ། “ང་ནི་ཐབས་སྡུག་པ་ལ་” ཞེས་བསམ་གྱི་ཡོད། ང་ཚོས་མི་གཞན་དག་ལ་ཊིག་འཛིན་རག་ནས་ནང་དུ་འཛུལ་ཐུབ་པ་དེ་ཧ་ཅང་ཡག་པོ་བྱུང་འདུག་ཅེས་བསམ་གྱི་མེད།

གལ་ཏེ་ང་ཚོས་ “བདག་” ལ་ཡོད་པའི་གོ་བ་ལོག་སྒྲུབ་དེ་མེད་པ་བཟོ་ཐུབ་ན། ང་ཚོར་རང་འདོད་དོན་གཉེར་གྱི་བློ་འདི་ཡོད་ངེས་མ་རེད། “བདག་” ལ་ཡོད་པའི་གོ་བ་ལོག་སྒྲུབ་འདི་ནི་ང་ཚོས་དངོས་གནས་གདོང་ལེན་དང་འབད་བརྩོན་བྱེད་དགོས་ས་དེ་རེད། ཕྱོགས་གཞན་ཞིག་ནས། གལ་ཏེ་ང་ཚོས་རང་འདོད་དོན་གཉེར་སྤོང་བར་འབད་བརྩོན་ཁོ་ན་བྱས་ནས་སྒྲོ་འདོགས་ཅན་གྱི་ “བདག་” གི་འདུ་ཤེས་དེ་མ་བཤད་པ་ཡིན་ན། ང་ཚོས་ད་དུང་ཡང་ “ང་”   “ང་”  “ང་” ཞེས་པ་འདི་ལ་གཞིགས་ནས་བསམ་བློ་གཏོང་བཞིན་ཡོད། ང་ཚོས་ད་དུང་ཡང་རང་ཉིད་ནི་སྡུག་བསྔལ་ཐམས་ཅད་དང་དུ་ལེན་མཁན་གྱི་དཔའ་བོ་ཡིན་པར་གཞིགས་ནས་བསམ་བློ་གཏོང་བཞིན་ཡོད། སྒྲོ་འདོགས་ཅན་གྱི་ “བདག་” ཆེན་པོ་ཞིག་དེར་ཡོད་པ་རེད། གནས་སྟངས་འདིའི་ནང་། ང་ཚོས་ད་དུང་ཡང་སོ་སོ་རང་ཉིད་ནི་ “བདག་” རྫུས་མ་ལྟ་བུར་བསམ་གྱིན་ཡོད། ང་ཚོ་ད་དུང་ཡང་དཀའ་ངལ་གྱི་རྩ་བར་བསླེབ་མེད། 

མི་ཞིག་ལ་རོལ་དབྱངས་སྤྲོ་སྟོན་དེའི་ཊིག་འཛིན་མཐའ་མ་དེ་རག་པ་ལ་བརྟེན་ནས་ང་ཚོར་ཡོད་པའི་དཀའ་ངལ་གྱི་རྒྱུ་རྣམས་ནི་དངོས་གནས་ཧ་ཅང་མགོ་རྙོག་པོ་རེད། དེ་དག་ནི་ཆ་ཤས་དུ་མ་དང་རྐྱེན་དུ་མ་ལས་གྲུབ་པ་རེད། ཡིན་ནའང་། ཁྱོན་ཡོངས་ནས་གནས་སྟངས་དེ་འདྲ་འབྱུང་བའི་སྐབས། “བདག་” ལ་གོ་བ་ལོག་སྒྲུབ་ཡོད་པ་དེ་ནི་ང་ཚོས་མྱོང་བའི་སྡུག་བསྔལ་གྱི་རྩ་བ་ཡིན་པ་རེད། 

“འདི་ནི་དཀའ་ངལ་གྱི་རྩ་བ་ཡིན་པ་དང་། དེ་ཡང་དཔེར་ན། རྩི་ཤིང་ཞིག་ལྟར་དེ་སླར་ཡང་མི་སྐྱེ་བའི་ཕྱིར་མེད་པར་བཟོ་བར། ང་ཚོས་དེའི་རྩ་བ་མེད་པ་བཟོ་དགོས་” ཞེས་བརྗོད་པ་དང་། ཡང་ “རྩ་བ་ནི་རྩི་ཤིང་གི་རྒྱུ་གཅིག་པུ་དེ་རེད་” ཅེས་བརྗོད་པ་གཉིས་ཀྱི་དབར་ལ་ཁྱད་པར་ཆེན་པོ་ཞིག་ཡོད། རྩི་ཤིང་དེ་ས་དང་། ཆར་ཆུ། གནམ་གཤིས་སོགས་རྒྱུ་རྐྱེན་དུ་མ་འཛོམས་པ་ལ་བརྟེན་ནས་སྐྱེས་ཡོད།

དེ་ག་ནང་བཞིན་ང་ཚོར་ཊིག་འཛིན་མཐའ་མ་དེ་ཅིའི་ཕྱིར་མ་ཐོབ་པའི་རྒྱུ་རྐྱེན་དུ་མ་ཡོད་པ་དང་དེ་ལྟར་བྱུང་བའི་སྐབས་སུ་ང་ཚོ་ཅིའི་ཕྱིར་ཧ་ཅང་སྡུག་བསྔལ་གྱིས་མནར་ཡོད་དམ། དེ་ལའང་རྒྱུ་རྐྱེན་དུ་མ་ཡོད། རྒྱུ་མཚན་སྣ་ཚོགས་པ་ལ་བརྟེན་ནས་ང་ཚོ་དུས་ཚོད་ཏག་ཏག་སྤྲོ་སྟོན་འཛོམས་སར་འབྱོར་མ་ཐུབ་པའི་འགོར་འགྱང་ཕྱིན་ཡོད་པ་རེད། རྒྱུ་མཚན་དེ་དག་ནི་གནམ་གཤིས་ཡག་པོ་མེད་པ་དང་། སྣུམ་འཁོར་འཚང་འགག་ཆེ་བ། ཁ་པར་གཏོང་ལེན་བྱེད་པ་སོགས་དུ་མ་ཡོད། ང་ཚོ་རོལ་དབྱངས་སྤྲོ་སྟོན་ལ་འགྲོ་འདོད་ཡོད་པ་རེད། གང་ཡིན་ཞེ་ན། ང་ཚོ་རོལ་ཚོགས་དེ་ལ་ཧ་ཅང་དགའ་མོས་ཅན་ཡིན་པ་རེད། ང་ཚོའི་གྲོགས་པོ་ཚོར་ཊིག་འཛིན་རག་ཡོད་པ་དང་ང་ཚོ་དེའི་རྗེས་སུ་ཕྱི་ལ་འཆམ་འཆམ་འགྲོ་རྩིས་ཡོད་པ་རེད། ང་ཚོར་ཊིག་འཛིན་མ་རག་པ་དང་ཧ་ཅང་བློ་ཕམ་པོ་བྱུང་བ་ནི་རྒྱུ་རྐྱེན་དེ་དག་ཐམས་ཅད་ལ་རྟེན་ཅིང་འབྲེལ་བའི་སྒོ་ནས་བྱུང་ཡོད་པ་ལས། “བདག་” ལ་ཡོད་པའི་གོ་བ་ལོག་སྒྲུབ་སྟེ། རྒྱུའི་རྩ་བ་ཁོ་ན་ལས་བྱུང་བ་ཞིག་མིན། དེ་ནི་དངོས་གནས་མགོ་རྙོག་ཅན་གྱི་རྟེན་ཅིང་འབྲེལ་བར་འབྱུང་བ་ཞིག་རེད། 

དཀའ་ངལ་གྱི་རྩ་བ་དང་དཀའ་ངལ་དེ་རྒྱུ་གཅིག་ཁོ་ན་ལས་བྱུང་བ་དང་དེར་བརྟེན་ང་ཚོ་ནི་ནག་ཉེས་ཅན་རེད་ཅེས་པའི་གོ་ནོར་གཉིས་དབར་གྱི་ཁྱད་པར་ཐད་ལ་ཏོག་ཙམ་རིང་བསམ་བློ་གཏོང་རོགས། གཞི་རྐང་ནས་དེ་དཀའ་ངལ་གྱི་རྩ་བ་སྤོང་བ་དང་དེ་ནི་ “མཐའ་གཅིག་ཏུ་ངའི་ནོར་འཁྲུལ་རེད་” ཅེས་པའི་དབར་གྱི་ཁྱད་པར་ལ་ཐུག་གི་ཡོད། 

(སྒོམ་དུས།)

ང་ཚོས་རྒྱུ་རྣམས་མ་བསྐྲུན་པའི་གནས་སྟངས་ཀྱི་འབྲས་བུ་ཉམས་སུ་མྱོང་ཐུབ་བམ། 

དེ་ནི་ལས་ཀྱི་དབྱེ་བ་བཞི་པ་སྟེ་ལས་མ་བྱས་པ་དང་མི་འཕྲད་པ་ཞེས་ལས་ཀྱི་རྒྱུ་རྣམས་མ་བསགས་བར་དུ་ལས་ཀྱི་འབྲས་བུ་ང་ཚོས་ཉམས་སུ་མྱོང་གི་མ་རེད་ཅེས་པ་དེ་རེད། གལ་ཏེ་ང་ཚོས་མ་བྱས་པའི་ལས་ཀྱི་འབྲས་བུ་མྱོང་ཐུབ་པའི་དབང་དུ་བཏང་ན། དེ་ནི་ “ང་ནི་མཐའ་གཅིག་ཏུ་ཉེས་མེད་ཡིན། ངས་གང་ཡང་བྱས་མེད། བྱས་ཙང་། ང་ལ་འདི་ཅིའི་ཕྱིར་འབྱུང་བཞིན་ཡོད་དམ་” ཞེས་པའི་མཐའ་རུ་ལྷུང་ངེས་རེད། དེ་ནི་སྡུག་བསྔལ་མྱོང་མཁན་ཡིན་པའི་ཆད་ལྟའམ་ཆད་མཐའ་ཅན་ཡིན་པ་རེད། 

ད་བསྔོ་བ་སྨོན་ལམ་དང་བཅས་དོ་དགོང་འདིར་མཇུག་སྒྲིལ་རྒྱུ་ཡིན། ང་ཚོས་གོ་བསྡུར་བྱས་པ་ལས་རྟོགས་པ་དང་དགེ་བའི་ནུས་པ་གང་དང་གང་བྱུང་བ་དེ་དག་ཐམས་ཅད་གཏིང་ཇེ་ཟབ་ནས་ཇེ་ཟབ་ཏུ་ཕྱིན་ཏེ། “ང་” “ང་” “ང་” ཞེས་པ་འདི་ཁོ་ན་ཙམ་མིན་པར། སེམས་ཅན་ཐམས་ཅད་སངས་རྒྱས་ཀྱི་གོ་འཕང་དུ་འགོད་པའི་རྒྱུར་གྱུར་ཅིག །རྒྱུ་མཚན་དེ་ལ་བརྟེན་ནས་སློབ་དཔོན་ཆེན་པོ་ཞི་བ་ལྷའི་སྤྱོད་འཇུག་ལེའུ་བཅུ་པ་བསྔོ་བའི་ལེའུ་ནང་གསུངས་པ་དེ་ནི་ཆེས་ཤིན་ཏུ་ཁྱད་པར་དུ་འཕགས་པ་ཞིག་ཡོད། དེ་གང་ཡིན་ཞེ་ན། དེ་ནི་དུས་རྟག་ཏུ་ “སེམས་ཅན་ཐམས་ཅད་” ཀྱི་དོན་དུ་བསྔོ་བ་ཞིག་ལས། “བདག་གམ་ང་” ཡི་དོན་དུ་འདི་དང་དེ་འདྲ་ཞིག་ཡོང་བར་ཤོག་ཅེས་ནམ་ཡང་གསུངས་མེད་པས་སོ།།

Top