སོ་སོའི་བདག་གི་ཐད་ལ་ཕན་བདེའི་བསམ་ཕྱོགས་ཤིག་སྐྱེད་པ།

དེ་ལས་གསལ་བ་རྟོགས་པའི་ཕྱིར། ང་ཚོས་ཀུན་རྫོབ་ཀྱི་ “བདག་” གྲུབ་པ་དེ་བློའི་འདོགས་ཚུལ་གྱི་ “བདག་” དེ་ཕུང་པོ་ལྔ་ལ་གཞི་བྱས་ནས་གང་ལ་གོ་བ་སྒྲུབ་ཡོད་པ་ཙམ་དེ་ཕུང་པོ་ལྔ་ལ་བཏགས་པའི་ཀུན་རྫོབ་ཀྱི་ “བདག་” ཅིག་ལས་ཁྱད་པར་འབྱེད་དགོས། མདང་དགོང་ང་ཚོས་སྦྱོང་ཚན་ཞིག་གི་ནང་ “བདག་” ལ་བསམ་བློ་གཏོང་ཐབས་བྱས་ཡོད་པ་དང་། དེའི་སྐབས་སུ་ང་ཚོར་གཞི་རྟེན་ཞིག་མེད་པར་ “བདག་” ལ་བསམ་བློ་གཏོང་མི་ཐུབ་པ་ཤེས་རྟོགས་བྱུང་ཡོད། ང་ཚོས་ “བདག་” ལ་བསམ་པའི་སྐབས་ཀྱི་ “བདག་” ཅེས་པའི་ཚིག་གི་སེམས་ནང་གི་སྐད་སྒྲའམ། ཡང་ན་ང་ཚོ་གང་འདྲ་ཞིག་ཡོད་པའམ་ཚོར་བ་གང་འདྲ་ཞིག་ཡོད་པའི་སེམས་ཀྱི་རྣམ་པ་གང་ཡིན་མིན་ལ་མ་ལྟོར་པར། “བདག་” དེ་ང་ཚོའི་བསམ་བློའི་ནང་མཚོན་པར་བྱེད་མཁན་ཞིག་དགོས་ཀྱི་ཡོད། འདི་ནི་ཀུན་རྫོབ་ཀྱི་ “བདག་” ནི་བཏགས་པ་ཞིག་ཡིན་པར་གསལ་སྟོན་བྱེད་པའི་ཆེད་དུ་ཡིན། དེ་ལས་ཆ་ཚང་བའི་བཏགས་པའི་ཆོས་ཏེ། དེ་ནི་ཕུང་པོ་ལྔའི་གཞི་རྟེན་ཞིག་ལ་བརྟེན་ནས་གྲུབ་པ་དང་གཞི་རྟེན་དེའི་ཆ་ཤས་འགའ་ཞིག་ཀྱང་དུས་གཅིག་ཏུ་སྣང་བ་ལ་བརྟེན་ནས་རྟོགས་ཐུབ་པ་ཁོ་ན་ཡིན། མིང་དུ་བཏགས་པ་ཞིག་ཡིན་པའི་ཆ་ནས་ཀུན་རྫོབ་ཀྱི་ “བདག་” དེ་རྟོག་མེད་ཀྱི་སྒོ་ནས་རྟོགས་ཐུབ། ང་ཚོས་སོ་སོ་རང་ཉིད་མེ་ལོང་ནང་དུ་མཐོང་ཐུབ། སོ་སོའི་གདོང་པའི་ཁ་དོག་དང་དབྱིབས་མཐོང་བ་ཙམ་དུ་མ་ཟད། ང་ཚོས་ “བདག་” མཐོང་གི་ཡོད། ང་ཚོས་སོ་སོའི་གདོང་པ་མེ་ལོང་ཞིག་གི་ནང་མཐོང་བའི་སྐབས། རང་གིས་རང་ལ་མཐོང་བ་དེ་ནི་གདམ་ཀ་མིན། 

“བདག་” སྤྱིའམ་སྡེ་ཚན་དེ་ཡིན་ཞིང་ཀུན་རྫོབ་ཀྱི་ “བདག་” དེ་རང་མིན་པ་ནི་ཕུང་པོ་ལྔ་ལ་གཞི་རྟེན་བྱས་ནས་བློས་བཏགས་པ་རེད། སྤྱི་འདི་ལ་བརྟེན་ནས་ང་ཚོས་མེ་ལོང་ནང་དུ་མཐོང་བའི་གང་ཟག་དེ་ང་ཚོས་ “བདག་” རྟོགས་པའི་དཔེ་མཚོན་གཞན་དག་ཚང་མ་དང་མཉམ་དུ་རན་འཚམས་བཟོ་གི་ཡོད། སྤྱིའམ་སྡེ་ཚན་རྣམས་ནི་བསམ་བློ་ལས་ལོགས་སུ་ཡོད་པའི་ཡུལ་རྣམས་ཡིན། དེ་དག་ནི་རྟོག་བཅས་ཀྱི་སྒོ་ནས་རྟོགས་ཐུབ་པ་ཁོ་ན་ཡིན། ང་ཚོས་མེ་ལོང་ནང་ལྟ་བའི་སྐབས། སོ་སོ་རང་ཉིད་མཐོང་གི་ཡོད། ང་ཚོས་སོ་སོ་རང་ཉིད་མཐོང་བའི་སྐབས། “དེ་ནི་ང་རེད་” ཅེས་བསམ་སྲིད་པ་རེད་ལ་མི་སྲིད་པའང་རེད། གལ་ཏེ་ང་ཚོས་དེ་ལྟར་བསམ་གྱི་ཡོད་ན། དེ་ནི་སྤྱི་ཞིག་བརྒྱུད་ནས་ཡིན་པ་དང་ང་ཚོས་བློའི་སྒོ་ནས་སྤྱི་ལ་མིང་དུ་འདོགས་ཀྱི་ཡོད། དེ་བཞིན་ཕལ་ཆེར་ང་ཚོས་ “བདག་” ཅེས་པའི་ཚིག་དེ་ང་ཚོས་མེ་ལོང་ནང་གང་མཐོང་བ་ལ་འདོགས་ཀྱི་ཡོད་སྲིད། འདིའི་ལྡོག་ཟླར་ང་ཚོས་མེ་ལོང་ནང་ལྟ་བའི་སྐབས། སོ་སོ་རང་ཉིད་མཐོང་བའི་ཕྱིར་ང་ཚོས་ “དེ་ནི་ང་རེད་” ཅེས་བསམ་མི་དགོས། 

“བདག་” གྲུབ་ཡོད་པ་དེ་ང་ཚོས་ཇི་ལྟར་གཏན་ལ་འདེབས་སམ། ང་ཚོས་གང་བརྗོད་ཐུབ་པ་ནི་ཕུང་པོ་ལ་བློས་བཏགས་པར་གཞི་བྱེད་པའམ་ “བདག་” ཅེས་པའི་ཚིག་དེ་གཞི་གཅིག་པ་དེའི་སྟེང་དུ་བཏགས་པའི་སྐབས། ཚིག་དེ་གང་ལ་གོ་བ་དང་ “བདག་” སྤྱི་དེ་གང་ལ་གོ་བ་ཙམ་དེ་རེད། འོན་ཀྱང་། ང་ཚོ་ནི་ “བདག་” ཅེས་པའི་ཚིག་དེ་མིན་ལ། སེམས་ཀྱི་རྣམ་པ་ཙམ་མམ་ཚོར་བ་ཞིག་ཀྱང་མིན། “བདག་” ཅེས་པའི་ཚིག་དེ་ནི་ “བདག་” མཚོན་པར་བྱེད་པ་ལ་གཞི་རྟེན་ཐོག་རྟོག་པས་བཏགས་པ་ཞིག་རེད། དཔེར་ན། ང་ཚོས་མེ་ལོང་ནང་མཐོང་བའི་གདོང་གི་སྣང་བརྙན་ལྟ་བུ་རེད། 

ཁྱེད་ཀྱིས་ཏོག་ཙམ་ཞིག་ཤེས་ཀྱི་འདུག་གམ། ང་ཚོས་ནང་ཆོས་ནང་བློའི་འདོགས་ཚུལ་གྱི་སྐོར་ལ་ཧ་ཅང་མང་པོ་ཤོད་ཀྱི་ཡོད་ནའང་། ད་དུང་དེ་རྟོགས་རྒྱུ་ལས་སླ་པོ་མེད། སྤྱི་བསྡོམས་ཀྱི་འགྲེལ་བརྗོད་འདིས་གཅིག་བྱས་ན་ཏོག་ཙམ་ལས་སླ་རུ་གཏོང་སྲིད། ང་ཚོས་བགྲོ་གླེང་ཚོགས་འདུ་འདིའི་མཇུག་མཚམས་སུ་བསྐྱར་དུ་གོ་བསྡུར་བྱ་རྒྱུ་ཡིན། 

(སྒོམ་དུས།)

ད་ “བདག་” དེ་ཇི་ལྟར་གྲུབ་ཡོད་དམ། དེ་གྲུབ་ཚུལ་དངོས་ཤིག་ཡོད་པ་དང་། ཡང་ང་ཚོས་དེ་གྲུབ་ཡོད་སྲིད་ཅེས་བསམ་བློ་གཏོང་ཆོག་པའི་ཡིན་པ་མི་སྲིད་པའི་ཚུལ་གྱིས་གྲུབ་པ་ཞིག་ཀྱང་ཡོད། ཡིན་ནའང་། དེ་ལྟ་བུ་གྲུབ་པ་ཞིག་ནི་མེད་དེ། དེ་ནི་མི་སྲིད་པ་ཡིན་པའི་ཕྱིར། ངས་མདང་དགོང་འགྲེལ་བརྗོད་ཅན་གྱི་དཔེ་མཚོན་དེ་དག་བེད་སྤྱོད་བྱས་ཡིན། དེ་ཡང་།

• “ང་ནི་མི་ཐེར་འབུམ་བདུན་གྱི་ནང་ནས་གཅིག་ཡིན་པ་དང་ང་རང་གཞན་ལས་ཁྱད་དུ་འཕགས་པའི་དམིགས་བསལ་གང་ཡང་མེད། ངས་གཞན་ཚང་མ་དང་མཉམ་དུ་ཕན་ཚུན་གཅིག་ལ་གཅིག་ལྟོས་ཀྱིས་གནས་དགོས་” ཞེས་པ་དེ་རེད། དེ་ནི་ཡང་དག་པ་རེད།
• “ང་ནི་འཇིག་རྟེན་ནང་གི་མི་དམིགས་བསལ་ཅན་དང་གལ་ཆེ་ཤོས་དེ་ཡིན། ངས་རྟག་ཏུ་སོ་སོའི་འདོད་མོས་ལྟར་བྱེད་དགོས། ང་ལ་ནོར་འཁྲུལ་གཅིག་རྐྱང་མེད་” ཅེས་པ་དེ་རེད། དེ་ནི་མི་སྲིད་པ་རེད། 

དཔེ་མཚོན་དེ་གཉིས་ཀྱི་ནང་ང་ཚོས་གང་གི་སྐོར་ཤོད་ཀྱིན་ཡོད་དམ། ང་ཚོས་ཤོད་བཞིན་པའི་བརྗོད་གཞི་ནི་ཀུན་རྫོབ་ཀྱི་ “བདག་” དེ་རེད། དེ་ནི་གྲུབ་ཡོད། འོན་ཀྱང་། དཔེ་མཚོན་གཉིས་ནི་ང་ཚོས་ཀུན་རྫོབ་ཀྱི་ “བདག་” ཡོད་པར་བསམ་སྲིད་པའི་ཚུལ་མི་འདྲ་བ་གཉིས་རེད། དང་པོ་ནི་ཚུལ་ངོ་མ་དང་གཉིས་པ་ནི་མི་སྲིད་པའི་ཚུལ་དེ་རེད། ཚུལ་ངོ་མ་ནི་ང་ཚོ་དངོས་གནས་ཡོད་པའམ་གྲུབ་པའི་ཚུལ་དང་མཐུན་པའི་གྲུབ་ཚུལ་ཞིག་ལ་གོ་བ་དང་། མི་སྲིད་པའི་ཚུལ་དུ་གྲུབ་པ་ནི་དངོས་ཡོད་དུ་གྲུབ་ཚུལ་གང་དང་ཡང་མི་མཐུན་པའི་གྲུབ་ཚུལ་དེ་རེད། དེ་ནི་ང་ཚོའི་རྟོག་པའི་འཆར་སྒོ་རེད། དེ་ནི་ “ང་ནི་འཇིག་རྟེན་ནང་གི་གཙོ་བོ་དེ་ཡིན་” ཞེས་པའི་རྟོག་འཆར་ཞིག་ཡིན་པའམ། ཡང་ན་མི་སུ་ཡིན་རུང་འཛམ་གླིང་ནང་གི་མི་གལ་ཆེ་ཤོས་དེ་ཡིན་སྲིད་པ་དང་རྟག་ཏུ་ཡང་དག་པ་ཡིན་དགོས་ཤིང་། དེ་དག་གི་འདོད་མོས་ལྟར་བྱ་དགོས་ཞེས་པའི་རྟོག་འཆར་ཞིག་ཡིན། དེ་ནི་ཡིན་པར་སྲིད་པའམ་འབྱུང་སྲིད་པའི་གྲུབ་ཚུལ་གང་དང་ཡང་མཐུན་གྱི་མེད། 

འདི་གཉིས་ནི་ཆོས་གང་ཞིག་གྲུབ་ཚུལ་ཐད་ལ་བསམ་བློ་གཏོང་སྟངས་དེ་ཡིན་པ་དང་། དེ་ལ་ཀུན་རྫོབ་ཀྱི་ “བདག་” ཅེས་པའི་གཞི་རྟེན་དེ་གཅིག་པ་བཀོལ་སྤྱོད་བྱེད་ཀྱི་ཡོད། རྫུས་མ་གང་ཡིན་པ་དེ་ནི་དོན་ངོ་མར་ཀུན་རྫོབ་ཀྱི་ “བདག་” དེ་མིན། རྫུས་མ་གང་ཡིན་པ་དང་གང་དགག་བྱར་གྱུར་བ་ནི་ཀུན་རྫོབ་ཀྱི་ “བདག་” འདི་གྲུབ་པའི་ཐད་ལ་ང་ཚོས་བསམ་བློ་གཏོང་བའི་ཚུལ་ནོར་བའམ་ཡང་དག་མིན་པ་དེ་རེད། དེ་ལྟ་བུ་ “བདག་” ཅིག་མེད། ཀུན་རྫོབ་ཏུ་གྲུབ་པའི་ “བདག་” གི་ཐུམ་སྒྲིལ་དེ་དང་ཡིན་པ་མི་སྲིད་པའི་ཚུལ་དུ་གྲུབ་པའི་ཐུམ་སྒྲིལ་ཏེ། ང་ཚོས་དེ་ལ་ “བདག་” རྫུས་མ་ཞེས་བརྗོད་པ་དེ་ནི་གྲུབ་མེད། འདི་ལྟ་བུའི་གང་ཟག་གྲུབ་པའམ་ཡོད་པ་ནི་གང་དུ་ཡང་མ་མཆིས་སོ།།

ཨ་ཅང་ཅང་། ང་ཚོས་ད་དུང་འདི་ལས་གནད་དུ་འཁེལ་བ་དང་གཏིང་ཟབ་པའི་སྒོ་ནས་བརྟག་དཔྱད་བྱེད་ཆོག་ཀྱང་། ང་ཚོའི་ངོ་སྤྲོད་ཀྱི་གོ་བསྡུར་ཆེད་དུ་དཔྱད་པའི་རིམ་པ་འདིས་འདང་ངེས་རེད། 

ཕྱོགས་བསྡོམས་ཤིག་རྒྱག་ན། ང་ཚོས་གང་ཞིག་དགག་པར་འདོད་ཀྱི་ཡོད་ཅེ་ན། ཡིན་པ་མི་སྲིད་པའི་ཚུལ་དུ་གྲུབ་པའི་ཀུན་རྫོབ་ཀྱི་ “བདག་” འདི་རེད། གལ་ཏེ་ང་ཚོས་དེ་རྟོགས་པ་དང་ཁྱད་པར་ལེགས་པར་འབྱེད་པ་ཡིན་ན། “ལུས་ཀྱི་ན་ཚ་དེ་སུས་མྱོང་གི་ཡོད་དམ། ཀུན་རྫོབ་ཀྱི་ “བདག་” དེས་མྱོང་གི་ཡོད་དམ་ཡང་ན་ “བདག་” རྫུས་མ་དེས་མྱོང་གི་ཡོད་” ཅེས་པའི་ཁ་རྩང་དྲིས་པའི་དྲི་བ་དེ་ལྟ་བུ་ཡོང་གི་མ་རེད། “བདག་” རྫུས་མ་མེད་པ་སོང་ཙང་། དེས་གང་ཡང་མྱོང་མི་ཐུབ། འོན་ཀྱང་། ང་ཚོས་ན་ཚ་དང་ན་ཟུག་དེ་མྱོང་གི་ཡོད། གཞན་སུས་མྱོང་གི་མེད། འདི་ནི་ཀུན་རྫོབ་ཀྱི་ “བདག་” རེད། དེ་ནི་གཞན་སུ་ཡང་ཡིན་མི་སྲིད་པ་རེད། 

དངོས་གནས་དཀའ་ངལ་གཅིག་རང་ཡོད་པ་ནི་ང་ཚོས་ནད་ཉམས་སུ་མྱོང་མཁན་གྱི་ “བདག་” དེ་ཇི་ལྟར་རྟོགས་སམ། ང་ཚོས་ “བདག་” དེ་དངོས་ཡོད་དང་མཐུན་ཞིང་འབྱུང་སྲིད་པའི་ཚུལ་དུ་བསམ་བློ་གཏོང་ཆོག །དཔེར་ན། “ནད་འདི་ཉམས་སུ་མྱོང་མཁན་ང་གཅིག་པུ་རྩ་ནས་མ་རེད། འདི་མྱོང་མཁན་གཞན་དག་མང་པོ་ཡོད། དེ་ནི་རྒྱུ་དང་རྐྱེན་ལ་བརྟེན་ནས་བྱུང་ཡོད་ནའང་། ཐོག་མའི་རྒྱུ་རྐྱེན་ངོ་མ་དེ་དག་ནི་འབྱུང་གི་མེད། ནད་འདི་ནི་རྗེས་སུ་འབྱུང་བའི་རྐྱེན་གྱིས་ཤུགས་རྐྱེན་བྱས་ཡོད་པ་དང་དེ་ནི་སྐད་ཅིག་སྐད་ཅིག་ལ་འགྱུར་གྱི་ཡོད། དེའང་སྐད་ཅིག་སྐད་ཅིག་ལ་འགྱུར་བ་འགྲོ་རྒྱུ་རེད། ང་ལ་གསར་དུ་ཤུགས་རྐྱེན་སྤྲོད་པ་དང་ནད་དེ་སླར་ཡང་འབྱུང་བར་བྱེད་པའི་རྒྱུ་གསར་པ་མེད་པ་སོང་ཙང་། ནད་འདི་ནི་མཐར་མཇུག་རྫོགས་ཀྱི་རེད་” ཅེས་པ་ལྟ་བུ་རེད། དེ་ལ་གཞི་བྱས་ནས་ང་ཚོར་བཟང་ཕྱོགས་ཀྱི་ལམ་ནས་ནད་ལ་གདོང་ལེན་བྱེད་པའི་བཟོད་སྒོམ་དེ་ཡོད། 

“ང་ནི་འཇིག་རྟེན་ན་ནད་འདི་ཡོད་མཁན་མི་གཅིག་པུ་དེ་རེད། ང་ནི་ཐབས་སྐྱོ་བ་ལ། ང་ནི་ཧ་ཅང་སྡུག་བསྔལ་མྱོང་མཁན་ཅན་དུ་གྱུར་ཡོད་པས། ཚང་མ་ང་ལ་ཤ་ཚ་སྙིང་རྗེ་ཚོར་དགོས་པ་དང་ང་ལ་དམིགས་བསལ་དོ་སྣང་བྱེད་དགོས། དེ་གང་ཡིན་ཞེ་ན། ང་ནི་ཧ་ཅང་སྡུག་གིས་མནར་བཞིན་ཡོད་” ཅེས་པའི་བྱུང་རིམ་གྱི་འགྲེལ་བཤད་འདིའི་སྒྲོ་འདོགས་ཅན་གྱི་རྟོག་འཆར་ལ་བསམ་བློ་ཐོངས། བློའི་ཁྱེར་སོ་འདི་ལྟ་བུའི་འབྲས་བུ་གང་རེད་དམ། ང་ཚོ་ནི་མཐའ་གཅིག་ཏུ་ཐབས་སྐྱོ་པོ་རེད། འདི་ནི་ཡིན་པ་མི་སྲིད་པའི་ཚུལ་དུ་གྲུབ་པ་དང་རང་གིས་རང་ལ་ཡོད་པའི་ཚུལ་མིན་ཡིད་བྱེད་ཀྱི་འདུ་ཤེས་འདི་ལ་བརྟེན་ནས་བསམ་བློ་གཏོང་བའི་དཔེ་མཚོན་ཞིག་རེད། ང་ཚོས་ན་ཚ་ཞིག་གི་མྱོང་བ་འདི་ལ་བསམ་བློ་ཇི་ལྟར་སྐྲུན་མིན་ལ་མ་ལྟོས་པར། དེ་ནི་ད་དུང་ཡང་ནད་མྱོང་མཁན་གྱི་ཀུན་རྫོབ་ཀྱི་ “བདག་” དེ་ཡིན་པ་ལས། གཞན་སུ་ནི་མ་ཡིན་ནོ།། 

ང་ཚོས་ཀུན་རྫོབ་ཀྱི་ “བདག་” དང་ “བདག་” རྫུས་མའི་སྐོར་གྱི་བརྗོད་གཞི་ལ་གོ་བསྡུར་བྱེད་པའི་སྐབས། དེ་དག་ “བདག་” བཟང་པོ་དང་ངན་པར་མི་རྟོགས་རྒྱུ་དེ་ཧ་ཅང་གལ་ཆེན་པོ་རེད། “བདག་” རྫུས་མ་འདི་གྲུབ་ཡོད་པ་དང་འདི་ནི་སྡུག་ཅག་ཡིན་པ་དང་། གླེན་པ་ཡིན་པ། ཡག་པོ་མིན་པ་དེ་འདྲ་མ་རེད། ཡང་ན་འདི་ནི་ཀུན་རྫོབ་ཀྱི་ “བདག་” ཡག་པོ་དེ་རེད། ང་ཚོས་ལུགས་དེ་དག་གི་ཐོག་ནས་བསམ་པའི་སྐབས། བཟང་ཕྱོགས་ཀྱི་སྒོ་ནས་ནད་པ་ཡིན་པའི་གནད་དོན་འདི་ལ་གདོང་ལེན་ཇི་ལྟར་བྱེད་ངེས་པ་དང་ང་ཚོ་སྡུག་བསྔལ་ལས་ཇི་ལྟར་ཐར་ངེས་པའི་སྐོར་ལ་རང་གིས་རང་ལ་མགོ་སྐོར་གཏོང་གིན་ཡོད། 

འདིར་གནད་དོན་གཙོ་བོ་ནི་ང་ཚོས་སོ་སོའི་ “བདག་” ལ་དངོས་གནས་གང་ཞིག་བསམ་པ་དང་ང་ཚོ་གྲུབ་ཡོད་པ་ལ་བསམ་བློ་ཇི་ལྟར་གཏོང་གི་ཡོད་པ་དེ་རེད། དཀའ་ངལ་དེ་ “བདག་” མ་རེད། འགྲིག་གི་འདུག་གམ། དེའི་སྐོར་ལ་བསམ་བློ་ཐོངས། འདི་ནི་ང་ཚོའི་བསམ་ཕྱོགས་དང་འབྲེལ་ཆེ་བ་ཡོད། གལ་ཏེ་ང་ཚོས་དཀའ་ངལ་ནི་ “བདག་” རྫུས་མ་དེ་ཡིན་པ་དང་ང་ཚོའི་སེམས་ནས་སྤོང་དགོས་པ་ཞིག་ཡིན་བསམས་ན། དེ་ནི་གང་འཚམས་ཀྱི་ཁྱད་མཚར་པོ་རེད། དེ་ནི་སེམས་ནང་ཡོད་པའི་སྐར་མ་ནས་འོངས་པའི་བཙན་འཛུལ་བ་ཞིག་དང་ང་ཚོས་ཕྱིར་འབུད་གཏོང་དགོས་པའི་བདུད་འདྲ་པོ་རེད། ང་ཚོས་དེ་འདྲ་ཞིག་གི་སྐོར་ཤོད་ཀྱིན་མེད། ང་ཚོས་རྟོགས་པ་བརྒྱུད་དེ་རང་སོ་སོའི་བློའི་ཁྱེར་སོ་འགྱུར་བ་གཏོང་སྟངས་སྐོར་ཤོད་ཀྱིན་ཡོད། དེ་ནི་ནང་ཆོས་ནས་གང་གསུང་གི་ཡོད་པ་དག་རེད། 

ད་ང་ཚོས་དཔེ་མཚོན་དུ་ཐ་སྙད་མི་འདྲ་བ་ཞིག་བེད་སྤྱོད་བྱ་རྒྱུ་ཡིན། དཔེར་ན། ང་ཚོས་ “བདག་” རྫུས་མའི་དཀའ་ངལ་དེ་ནི་བདག་འཛིན་ཡོད་པ་ལྟ་བུ་ང་ཚོས་དེ་ལ་ “བདག་” རྫུས་མ་ཞིག་ཏུ་རྟོགས་ཀྱི་ཡོད་པ་ལྟ་བུ་རེད། ང་ཚོས་ “ངས་ངའི་བདག་འཛིན་སྤོང་དགོས་ཀྱི་འདུག །དེ་མིན་ང་རང་རང་མཐོང་ཆེན་པོ་ཞིག་གི་སྒང་ལ་གནས་ཀྱི་རེད་” ཅེས་བསམ་སྲིད་པ་ལྟ་བུ་རེད། ང་ཚོས་བདག་འཛིན་ཆེན་པོ་ཞིག་ཡོད་པ་ནི་དངོས་གནས་དཀའ་ངལ་ཡིན་པ་དང་ད་ལྟ་བདག་འཛིན་སྤོང་བའི་ལས་འགུལ་འདི་ང་ཚོར་ཡོད་པ་རེད། འདི་ནི་ནང་པའི་ལམ་ལ་ཡོད་པའི་གོ་བ་ལོག་སྒྲུབ་ཆ་ཚང་བ་ཞིག་རེད། ང་ཚོ་མང་པོ་ཞིག་ནི་ནུབ་ཕྱོགས་ཀྱི་རྒྱབ་ལྗོངས་ཤིག་ནས་བསླེབས་པ་དང་ནུབ་ཕྱོགས་ཀྱི་ལྟ་གྲུབ་དབང་དུ་བྱས་ན། སེམས་ཁམས་རིག་པའི་སྐོར་ལ་གོ་རྟོགས་ཅུང་ཟད་ཡོད་པ་དེས་ནང་ཆོས་ཀྱི་བདག་འཛིན་ལ་ཡིད་ཆེས་འདི་ལ་གཅིག་ཐོག་གཅིག་རྩེག་བྱེད་པ་དང་འདི་ནི་ང་ཚོས་གང་གི་སྐོར་ཤོད་ཀྱིན་ཡོད་པ་དེ་རེད་བསམ་གྱི་ཡོད། སླར་ཡང་དེ་ནི་མ་རེད། ང་ཚོས་བློའི་ཁྱེར་སོ་ཞིག་དང་ང་ཚོ་ཇི་ལྟར་ཡོད་པའི་གོ་བ་ལོག་སྒྲུབ་དེ་སྤོང་བཞིན་ཡོད། བདག་འཛིན་དང་བདག་འཛིན་མེད་པ་སོགས་ཀྱི་ཐ་སྙད་ལ་གཞིགས་ནས་བསམ་བློ་གཏོང་རྒྱུ་མེད། འདིས་མགོ་རྨོངས་ཁོ་ནའི་རྒྱུ་བྱེད་ཀྱི་རེད། 

འདིའི་ཐད་ལ་ཏོག་ཙམ་རིང་བསམ་ཞིབ་བྱོས།

(སྒོམ་དུས།)

ངའི་བསམ་པར། ནུབ་ཕྱོགས་ཀྱི་རྟོག་པའི་སྒྲོམ་གཞི་ཞིག་ལ་གཞིགས་ནས་བརྟག་དཔྱད་བྱེད་པ་དང་བསམ་བློ་གཏོང་བ་ལས་རང་གིས་རང་ལ་ཆ་རྐྱེན་དང་བྲལ་བར་བྱེད་པར་དུས་ཚོད་ཏོག་ཙམ་འགོར་གྱི་རེད་བསམ་གྱི་འདུག །ལས་དང་པོ་བའམ་གསར་བཞུགས་གནང་མཁན་ཚོ་ལ་ཆ་བཞག་ན། ང་ཚོས་སོ་སོའི་མི་ཚེའི་ནང་དེ་སྔོན་གང་སྦྱངས་པ་ལ་བརྟེན་ནས་ནང་ཆོས་ལ་འཇུག་གི་ཡོད། ང་ཚོར་སེམས་ཁམས་རིག་པའམ་ནུབ་ཕྱོགས་ཀྱི་ཆོས་ལུགས་ལ་གཞིགས་པའི་ནུབ་ཕྱོགས་ཀྱི་རྟོག་པའི་སྒྲོམ་གཞི་ཞིག་ཡོད་སྲིད། ང་ཚོས་ནང་ཆོས་ལ་སློབ་གཉེར་མ་བྱས་གོང་དུ་རང་གི་མི་ཚེའི་ནང་རང་ཉིད་ལ་ཐོབ་པའི་རྟོག་པའི་སྒྲོམ་གཞི་མི་འདྲ་བ་མང་པོ་ཡོད། ང་ཚོས་སྔོན་ཚུད་ནས་གོམས་འདྲིས་ཡོད་པའི་རྟོག་པའི་སྒྲོམ་གཞི་ལ་གཞིགས་ནས་ཆོས་ཀྱི་སྐོར་གང་སྦྱོང་བ་ལ་གོ་དོན་སྟོན་ཐབས་ཤིག་རང་བཞིན་གྱིས་བྱེད་ཀྱི་ཡོད། འོན་ཀྱང་། འདིས་གོ་བ་ལོག་སྒྲུབ་ཀྱི་རྒྱུ་བྱེད་སྲིད། 

གོ་དོན་ལོག་འཛིན་ལ་ཁ་གཏད་གཅོག་པར། ང་ཚོས་ནང་པའི་རྟོག་པའི་སྒྲོམ་གཞི་སྦྱོང་དགོས། རྒྱུ་མཚན་དེ་བས་ན་ནང་པའི་ཆོས་ལ་སློབ་གཉེར་བྱེད་པའི་སྐབས། སེམས་བྱུང་ལྔ་བཅུ་རྩ་གཅིག་དང་ཕུང་པོ་ལྔ་ལ་སོགས་པའི་གྲངས་འདྲེན་མང་པོ་ཡོད་པ་རེད། དེ་དག་ནི་མཁོ་མེད་ཀྱི་གནས་ཚུལ་མིན། དེ་དག་གིས་དོན་ངོ་མར་ང་ཚོར་རྟོག་པའི་སྒྲོམ་གཞི་མཁོ་སྤྲོད་བྱེད་ཀྱི་ཡོད་པ་དེའི་ནང་ང་ཚོས་ནང་ཆོས་ཀྱི་རྣམ་པ་གཏིང་ཟབ་པ་རྣམས་ལ་བརྟག་དཔྱད་དང་གོ་རྟོགས་རྙེད་ཐུབ་ཀྱི་ཡོད། རྟོག་པའི་སྒྲོམ་གཞི་འདིའི་ཕྱི་ལོགས་སུ་ནང་ཆོས་ལ་གོ་རྟོགས་རྙེད་ཐབས་བྱེད་པ་ནི་ཕན་ཐོགས་མེད།

ང་ཚོས་རྟོག་པའི་སྒྲོམ་གཞི་རྦད་དེ་གསར་པ་འདི་ལ་སློབ་སྦྱོང་བྱེད་འགོ་ཚུགས་མི་ཐུབ་པ་གསལ་པོ་རེད། བློའི་ཁྱེར་སོ་ལེགས་ཤོས་ནི། ནུབ་ཕྱོགས་ཀྱི་རྟོག་པའི་སྒྲོམ་གཞི་བརྒྱུད་ནས་ནང་ཆོས་ཀྱི་ཆེས་ཐོག་མའི་གོ་རྟོགས་དེ་ནི་གནས་སྐབས་ཙམ་ཞིག་ཡིན་པར་ཁས་ལེན་རྒྱུ་དེ་རེད། དེ་ལྟར་སློབ་སྦྱོང་ལ་གཏིང་ཇེ་ཟབ་ཏུ་སྦྱོང་བརྡར་བྱེད་པའི་སྐབས་སུ་ང་ཚོས་འདི་ལེགས་བཅོས་བྱེད་དགོས་པ་དང་དེ་ལ་ཧ་ཅང་ཆགས་པ་སྐྱེ་རྒྱུ་མེད། ང་ཚོའི་བསམ་བློ་གཏོང་སྟངས་ལེགས་བཅོས་བྱེད་པར། ཆགས་པ་སྐྱེ་མི་རུང་སྟེ། གང་ཡིན་ཞེ་ན། དེ་མིན་ང་ཚོས་ལྟ་བ་གཅིག་ལ་ཞེན་ནས་འདི་ནི་གོ་རྟོགས་རྙེད་ཐབས་གཅིག་པུ་དེ་རེད་ཅེས་ཨུ་ཚུགས་བྱེད་ཀྱི་རེད། 

ཡིན་ནའང་། རྟོག་པའི་སྒྲོམ་གཞི་རེ་རེ་ནི་ཚད་ལྡན་ཡིན་སྲིད། སེམས་ཁམས་རིག་པ་སོགས་བརྟག་དཔྱད་བྱེད་པའི་ཆེད་དུ་ནུབ་ཕྱོགས་ཀྱི་རྟོག་པའི་སྒྲོམ་གཞི་རྣམས་ཆོ་མེད་པ་དང་ཚད་ལྡན་མིན་ཞེས་ང་ཚོས་བརྗོད་ཀྱིན་མེད། དེ་དག་ནི་ཚད་ལྡན་རེད། འོན་ཀྱང་། ཆོས་གཅིག་པ་ཞིག་རྟོགས་པར་རྟོག་པའི་སྒྲོམ་གཞི་མང་པོ་ཡོད་ཆོག་པའམ། ཡང་ན་གཞི་རྐང་ང་ཚོའི་མི་ཚེའི་མྱོང་བ་རྟོགས་པའི་ཆེད་རྟོག་པའི་སྒྲོམ་གཞི་མང་པོ་ཡོད་ཆོག གལ་ཏེ་ང་ཚོས་ནང་ཆོས་ནས་ཁེ་ཕན་ཆེ་ཤོས་ཀྱི་ལམ་ནས་དངོས་གནས་ཕན་འདོགས་འདོད་ཡོད་ན། ནང་པའི་རྟོག་པའི་སྒྲོམ་གཞི་རང་ལ་བརྟེན་ནས་གཏིང་ཇེ་ཟབ་ཀྱི་རིམ་པར་འཇུག་དགོས། ཐ་ན་ནང་པའི་རྟོག་པའི་སྒྲོམ་གཞི་ནང་དུའང་གྲུབ་མཐའི་ལུགས་མི་འདྲ་བ་ཡོད་པ་དང་། དེ་དག་ལ་བརྟེན་ནས་ང་ཚོའི་གོ་རྟོགས་དེ་གཏིང་ཇེ་ཟབ་ཏུ་འགྲོ་གི་ཡོད། རྟོག་པའི་སྒྲོམ་གཞི་ནི་ལག་ཆ་ཕན་ཐོགས་ཅན་ཙམ་ཞིག་རེད། ཡིན་ནའང་། ང་ཚོས་འོས་འཚམས་ཤིག་འདེམས་ཀ་བྱེད་དགོས། 

ང་ཚོས་གང་བཤད་པ་རྣམས་བསྐྱར་ཞིབ་མདོར་བསྡུས་བྱེད་པར། ཀུན་རྫོབ་ཀྱི་ “བདག་” དེ་ཡོད་པ་རེད། ཡིན་ནའང་། དེ་ཀུན་རྫོབ་ཏུ་ཡོད་པར་གང་གིས་སྒྲུབ་ཅེ་ན། སྐད་ཅིག་གིས་འགྱུར་བའི་ང་ཚོའི་སྒེར་གྱི་ཉམས་མྱོང་ལ་གཞི་བྱས་ནས་བློས་བཏགས་པའི་སྐབས། “བདག་” ས་པའི་སྤྱིའམ་བསམ་བློ་དེ་གང་ལ་གོ་བ་ཁོ་ནས་སྒྲུབ་ཀྱི་ཡོད། འདིའི་སྐོར་ལ་ད་ལྟ་གོ་བསྡུར་འགོ་ཚུགས་མེད་ནའང་། དེ་རང་གི་ངོས་ནས་གྲུབ་པའམ་རང་ངོས་ནས་རྙེད་དུ་རུང་བ་གང་ཡང་མེད། འདིའི་སྐོར་རྗེས་ལ་ཡོང་གི་རེད། དེ་ནས་ང་ཚོས་ “བདག་” དེ་དུས་ཡུན་ག་ཚོད་རིང་པོར་གནས་ཀྱི་ཡོད་པའི་སྔོན་གྱི་རྟོག་པའི་སྒྲོམ་གཞི་ལ་མ་ལྟོས་པར། དོ་གལ་ཆེན་པོའི་སྒོ་ནས་ལྟ་བའི་སྐབས། ང་ཚོས་རྟག་པའི་བདག་ལ་གཞིགས་ནས་བསམ་བློ་གཏོང་གི་ཡོད་པ་སྟེ། ཇི་ལྟར་དཔེ་མཚོན་ནང་ཡོད་པ་ལྟར། “ང་ནི་ཤི་བ་རེད་” ཅེས་ཇི་ལྟར་མཐོང་ཡོད་པའི་སྐོར་གོ་བསྡུར་བྱས་ཡོད། ང་ཚོ་ནི་གཏན་དུ་ཤི་བ་རེད་ཅེས་ང་ཚོས་བསམ་བློ་གཏོང་གི་ཡོད། སོ་སོ་རང་ཉིད་རྟག་པ་ཡིན་བསམ་པ་འདི་ནི་ང་ཚོའི་སེམས་ནང་གསལ་པོ་ཧ་ཅང་གསལ་ཆགས་མེད་སྲིད། འོན་ཀྱང་། དོན་ངོ་མར་དེ་ནི་ང་ཚོས་གང་བསམ་པ་དེ་རེད། 

ད་ང་ཚོས་ལམ་རིམ་གྱི་ཆོས་ལ་འཇུག་པར་གྲ་སྒྲིག་ཡོད། ང་ཚོས་རྟག་པ་ཡིན་པའི་ཀུན་རྫོབ་ཀྱི་ “བདག་” ལ་གདོང་ལེན་དང་འབྲེལ་བ་ཇི་ལྟར་བྱེད་དམ། ང་ཚོས་དཀའ་ངལ་ལས་ཐར་ཐུབ་པ་དང་སྡུག་བསྔལ་སྤོང་ཐུབ་པའི་ཕྱིར། “བདག་” དེ་བཟང་ཕྱོགས་ཀྱི་ལམ་ནས་ཇི་ལྟར་གོང་འཕེལ་གཏོང་ངམ། དེ་ནི་ནང་ཆོས་ཀྱི་དགོས་དོན་ཆ་ཚང་བ་དེ་རེད། མ་རེད་དམ། སྡུག་བསྔལ་ལ་གདོང་ལེན་བྱེད་པ་དང་དེ་སྤོང་བར། ང་ཚོར་ཀུན་རྫོབ་ཀྱི་བདག་བཟང་པོའི་འདུ་ཤེས་དང་ལྡན་པ་ཞིག་དགོས། སླར་ཡང་ང་ཚོར་རང་སོ་སོའི་མི་ཚེའི་ཆེད་དུ་འགན་འཁྱེར་མཁན་དང་ལས་ཀྱི་ཁ་ཕྱོགས་སྟོན་པར་འདུན་པའི་ཤུགས་ཡོད་མཁན་གྱི་བདག་བཟང་པོའི་འདུ་ཤེས་དང་ལྡན་པ་ཞིག་དགོས། གལ་ཏེ་ང་ཚོར་དེ་མེད་ན། ང་ཚོ་ཐ་ན་ཞོགས་པ་ཡར་ལངས་ནས་ལས་ཀ་འགྲོ་བའམ་ཕྲུ་གུར་ལྟ་སྐྱོང་བྱེད་ངེས་མ་རེད། གནས་སྟངས་དེ་འདྲ་ཞིག་ཡིན་ན། ཐར་པ་དང་ཐམས་ཅད་མཁྱེན་པའི་གོ་འཕང་འཐོབ་པའི་ཆེད་ཆོས་ཀྱི་ལམ་དུ་ཡར་རྒྱས་གོང་འཕེལ་གཏོང་བར། བདག་བཟང་པོའི་འདུ་ཤེས་དང་ལྡན་པ་དེ་ལས་ག་ཚོད་མང་བ་ང་ཚོར་དགོས་སམ། 

མི་ལུས་རིན་ཆེན།

ཐོག་མར་ང་ཚོས་མི་ལུས་རིན་ཆེན་ནས་བརྩམས་ཏེ་ལམ་རིམ་གྱི་སྐོར་ལ་གོ་བསྡུར་བྱ་རྒྱུ་ཡིན། གལ་ཏེ་ང་ཚོར་རྟག་པའི་བདག་གི་འདུ་ཤེས་ཤིག་ཡོད་ན། ད་ལྟ་ང་ཚོར་ཡོད་པའི་མི་ལུས་རིན་ཆེན་གྱི་གོ་སྐབས་འདི་ནི་ཆེས་ཤིན་ཏུ་དཀོན་པོ་རེད། གང་ལྟར་ཡང་། ང་ཚོ་ལུས་རྟེན་གང་དུའང་ཡང་བསྐྱར་སྐྱེ་ཆོག་པ་དང་འཛམ་གླིང་ནང་གི་འབུ་སྲིན་གྱི་གྲངས་ལ་བསམ་བློ་བཏང་ན། འགྲོ་བ་མིའི་གྲངས་ནི་ཧ་ཅང་ཉུང་ཉུང་ཡིན་པ་རེད། ང་ཚོ་ནི་འགྲོ་བ་མི་ཙམ་མིན་པར། དོན་ངོ་མར་ང་ཚོ་ཆོས་ཕྱོགས་ཡར་རྒྱས་ཐད་དོ་དབྱིངས་དང་བློ་ཁ་ཕྱོགས་པ་ནི་དཔེ་མི་སྲིད་པའི་ཡག་པོ་དང་ཁྱད་དུ་འཕགས་པ་རེད། དེར་བརྟེན་ང་ཚོས་མིའི་མི་ཚེ་འདི་བེད་སྤྱོད་ཡག་ཤོས་གཏོང་དགོས། 

མི་ལུས་རིན་ཆེན་ལ་བསམ་བློ་དེ་དག་ཡོད་པ་དང་དེ་ལ་ང་ཚོའི་རྗེས་སུ་ཡི་རང་ཡོད་པར་བརྟེན་ང་ཚོས་རང་གིས་རང་ལ་དགེ་བའི་བསམ་ཕྱོགས་ཤིག་སྐྱེད་ཀྱི་ཡོད། “ང་ནི་ཅི་འདྲའི་བསོད་ནམས་ཅན་རེད། ངས་གང་མྱོང་བཞིན་པ་ནི་མི་ཚེ་འདི་ཡིན་པ་ནི་ཅི་འདྲའི་ཡིད་ཆེས་དཀའ་བ་ཞིག་རེད། ངས་མི་ལུས་རིན་ཆེན་ཞིག་མྱོང་བཞིན་ཡོད་” ཅེས་པ་ལྟ་བུ་རེད། བསམ་ཕྱོགས་འདི་ལ་བརྟེན་ནས་ང་ཚོས་རང་གིས་རང་ལ་བསམ་ཕྱོགས་བཟང་པོ་ཞིག་འཛིན་རྒྱུ་འགོ་བཙུག་གི་ཡོད། 

ངའི་གྲོགས་པོ་གཅིག་ནང་པའི་དགེ་བའི་བཤེས་གཉེན་ཞིག་རེད། ཁོང་གིས་སློབ་མ་རྣམས་ལ་ང་ཚོའི་མིག་གི་དབང་པོར་རྗེས་སུ་ཡི་རང་བྱ་ཕྱིར་སྦྱོང་བརྡར་ཧ་ཅང་ཤུགས་ཆེན་ཞིག་བྱེད་དུ་འཇུག་པ་རེད། མིག་གི་དབང་པོ་ནི་ང་ཚོར་མི་ལུས་རིན་ཆེན་གྱི་ཆ་ཤས་སུ་ཡོད་པ་ཞིག་རེད། ཁོང་གིས་རང་གི་སློབ་མ་རྣམས་ལ་ཉིན་གང་པོར་མིག་རས་ནག་པོ་མཐུག་པོ་ཞིག་གྱོན་དུ་བཅུག་ནས་ཁོང་ཚོ་མིག་ལོང་བ་གཅིག་དང་འདྲ་བར་གནས་འཇུག་གི་ཡོད། དེ་ནས་སློབ་མ་རྣམས་ཀྱིས་རང་གི་མིག་རས་བཀྲོལ་བ་དང་མཐོང་ཐུབ་པ་དང་ཁོང་ཚོས་ཐད་ཀར་མིག་གི་དབང་པོར་བསྔགས་བརྗོད་ཆེན་པོ་ཉམས་སུ་མྱོང་གི་ཡོད། དེ་ནི་ཧ་ཅང་གཟབ་ནན་གྱི་སྦྱོར་བརྡར་ཞིག་ཡིན་པ་རེད། 

བྷར་ལིན་ལ་ང་ཚོར་ “ལོང་བའི་ཟ་ཁང་” ཟེར་བ་ཡོད་པ་དང་དེའི་ནང་བརྒྱ་ཆ་བརྒྱ་ཐམ་པ་ནག་ཁུང་རེད། མི་རྣམས་ཀྱིས་སོ་སོའི་བཟའ་མ་རྦད་དེ་ནག་ཁུང་གི་བཟའ་གི་ཡོད། ད་དུང་ཁྲོམ་རའི་འགྲེམས་སྟོན་ཁང་ཞིག་ཀྱང་ཡོད་པ་དེ་ས་ཆ་མུན་ནག་ཅིག་ལ་བཙུགས་ཡོད། བྱས་ཙང་། མི་རྣམས་མིག་གིས་མི་ལྟ་བར་ཉོ་ཆ་རྒྱག་ཏུ་འགྲོ་ཐབས་བྱེད་དགོས་ཀྱི་ཡོད། ཐ་ན་འདི་ལ་བསམ་བློ་གཏོང་བའི་སྐབས། ང་ཚོས་སོ་སོ་རང་ཉིད་ལ་གང་ཡོད་པར་ཡི་རང་བྱེད་འགོ་བཙུག་ཆོག་པ་དང་། ཐ་ན་ང་ཚོར་གཞི་རྐང་མིག་གི་དབང་པོ་ཡོད་པ་འདི་ལའང་ཡི་རང་བྱེད་ཆོག་པ་ཞིག་ཡིན། འོན་ཀྱང་། ཤེས་ཡོན་སློབ་སྦྱོང་ཆེད་དུ་གོ་སྐབས་བཟང་པོ་དེ་དག་མེད་ན། གང་འདྲ་ཆགས་ཀྱི་རེད་དམ། སྤྱི་ཚོགས་ཡོངས་སུ་རྫོགས་པ་ཀླ་ཀློ་ཅན་ནམ་ཆོས་ཕྱོགས་ཀྱི་དགེ་བའི་བཤེས་གཉེན་རྩ་ནས་མེད་པ་དང་ཆོས་ཀྱི་དོན་གང་འདྲ་ཞིག་ལའང་རྒྱབ་སྐྱོར་མེད་ན། ཅི་འདྲ་ཆགས་ཀྱི་རེད་དམ། དཔེར་ན། འདི་ག་ལཏ་ཝི་ཡར་ཡོད་པ་ཁྱེད་རྣམ་པ་འགའ་ཞིག་ནི་སྔོན་སུའུ་ལེན་མནའ་འབྲེལ་རྒྱལ་ཁབ་ཀྱི་དུས་སུ་ཡོད་པའི་གོ་སྐབས་དང་ད་ལྟར་ཡོད་པའི་གོ་སྐབས་བར་བསྡུར་བ་ལ་ཧ་ཅང་རྒས་འཁོགས་ཆགས་ཡོད། དེ་འདྲ་བསམ་བློ་གཏོང་བ་ལ་བརྟེན་ནས་ང་ཚོས་སོ་སོ་རང་ཉིད་ཅི་འདྲའི་བསོད་ནམས་ཅན་ཡིན་པར་རྟོགས་ཀྱི་རེད། 

དཔེ་མཚོན་དེ་དག་ཐམས་ཅད་ལ་བརྟེན་ནས་ང་ཚོས་ཀུན་རྫོབ་ཀྱི་ “བདག་” གི་སྐོར་ཤོད་ཀྱིན་ཡོད། འདིའི་ནང་རང་གིས་རང་ལ་ལྟ་ཚུལ་ཧ་ཅང་བཟང་པོ་ཞིག་ཡོད། ནང་པའི་སྦྱོང་བརྡར་གྱི་ནང་། ང་ཚོས་ “བདག་” བཟང་པོའི་འདུ་ཤེས་ཤིག་རང་རྒྱུད་ལ་སྐྱེད་འགོ་ཚུགས་པའི་སྐབས། དེ་ནི་སོ་སོ་རང་ཉིད་ཅི་འདྲའི་བསོད་ནམས་ཅན་ཡིན་པར་ཡི་རང་དང་བཅས་འགོ་བཙུག་གི་ཡོད། ང་ཚོས་སོ་སོའི་མི་ཚེའི་ནང་དགེ་བའི་ལས་བྱ་རྒྱུ་ཡོད་པ་ནི་གོ་སྐབས་བཟང་པོ་ཞིག་ཡིན་པ་དང་། ལྷག་པར་དུ་ང་ཚོ་ཚེ་འདིའི་རྗེས་སུའང་མུ་མཐུད་ནས་འགྲོ་རྒྱུ་ཡིན་པའི་བདེན་དོན་ལ་བསམས་ནས་དེ་ལྟར་བྱ་དགོས། 

ཤེས་རབ་དང་རང་གིས་རང་ལ་བརྟེན་པ།

ང་ཚོས་སོ་སོའི་མི་ལུས་རིན་ཆེན་ཐད་ལ་དངོས་གནས་ཇི་ལྟར་བསམ་གྱི་ཡོད་དམ། དེའི་ཐོག་ལ་ང་ཚོས་སྒོམ་ཇི་ལྟར་རྒྱག་གི་ཡོད་དམ། སྒོམ་འདིའི་ནང་ང་ཚོས་ཀུན་རྫོབ་ཀྱི་ “བདག་” གི་སྐོར་ཤོད་ཀྱིན་ཡོད། “བདག་” གི་སྐོར་བསམ་བློ་གཏོང་དགོས་པ་དེ་དྲན་དགོས་ཤིང་། ང་ཚོར་ “བདག་” མཚོན་པར་བྱེད་མཁན་ཞིག་སྣང་དགོས་ཀྱི་ཡོད། ང་ཚོར་སོ་སོ་རང་ཉིད་ཀྱི་སེམས་ཀྱི་པར་རིས་ཞིག་གམ་ཡང་ན་ང་ཚོར་གང་འདོད་པ་ཞིག་ཡིན་ནའང་ཆོག །དེ་ལ་ཁྱད་པར་མེད། དེ་ནི་སེམས་ཀྱི་ཚིག་ “བདག་” ཅེས་པ་དེའི་སྒྲ་སྐད་ཙམ་དེ་ཡིན་ཆོག །འོ་ན་ང་ཚོ་ཇི་ལྟར་གྲུབ་ཡོད་དམ། གནད་དོན་གཙོ་བོ་ནི་དེའི་ཐད་ལ་ཡང་དག་པའི་ལྟ་བ་དང་ཡང་དག་མིན་པའི་ལྟ་བ་གང་ཡིན་ཐག་གཅོད་བྱ་རྒྱུ་དེ་རེད། དེ་ལ་ང་ཚོས་ཆོས་རྣམ་པར་འབྱེད་པའི་ “ཤེས་རབ་” ཅེས་བརྗོད་པ་དེ་བཀོལ་སྤྱོད་བྱེད་ཀྱི་ཡོད། ཤེས་རབ་དེ་ལ་བརྟེན་ནས་ང་ཚོས་གང་ཡང་དག་པ་དང་གང་ཡང་དག་པ་མིན་པ་རྣམ་པར་འབྱེད་དགོས། 

དཔེ་ཆ་བཞག་ན། གང་ཡང་དག་པ་ཡིན་པ་ནི་ཚོགས་ཁང་འདིའི་ནང་ཡོད་པའི་ང་ཚོ་ཚང་མ་ལོང་བ་མིན་པ་ལྟ་བུ་རེད། གལ་ཏེ་མི་འགའ་ཞིག་གིས་སོ་སོའི་ནང་ནས་གཏམ་བཤད་འདི་ཉན་བཞིན་ཡོད་པ་དང་དེ་དག་དངོས་གནས་ལོང་བ་ཡིན་པའི་དབང་དུ་བཏང་ན། ཁོང་ཚོས་འོན་པའང་མིན་པའི་དཔེ་མཚོན་དེ་བེད་སྤྱོད་བྱེད་ཆོག །འོན་ཀྱང་། ང་ཚོ་ནི་གནས་སྐབས་རིང་ལོང་བ་ལས་ཐར་བ་རེད། གང་ཡིན་ཞེ་ན། ང་ཚོ་རྒས་པའི་སྐབས་རང་གི་མིག་དབང་བརླག་སྲིད་པའམ་ལོང་བ་ཆགས་སྲིད་པ་རེད། ད་ལྟ་ང་ཚོར་མིག་གི་དབང་པོ་ཡོད་པ་དང་ང་ཚོས་མཐོང་ཐུབ་ཀྱི་ཡོད། ང་ཚོར་གང་མེད་པ་དང་གང་ཡོད་པའི་དབར་ལ་རྣམ་པར་འབྱེད་ཆོག་པ་སྟེ། གང་མེད་པ་དེ་ནི་ལོང་བ་ཡིན་པ་དང་གང་ཡོད་པ་ནི་མཐོང་ཐུབ་པ་དེ་རེད། དེ་ག་ནང་བཞིན་ང་ཚོ་ནི་སྔོན་སུའུ་ལེན་མནའ་བྲེལ་རྒྱལ་ཁབ་སྐབས་ཀྱི་ངལ་རྩོལ་གྱི་སྡོད་སྒར་ (gulag) ཞིག་གི་ནང་དུ་མེད་པར་ང་ཚོར་རང་དབང་ཡོད། འདི་ནི་ང་ཚོས་སྐབས་འདིར་བེད་སྤྱོད་བྱེད་བཞིན་པའི་རྣམ་པར་འབྱེད་པའི་ཤེས་རབ་ཀྱི་རིགས་དེ་རེད། 

ད་ང་ཚོས་རང་གིས་རང་དགེ་བའི་བཤེས་གཉེན་ཞིག་ལ་བློ་གཏད་ཇི་ལྟར་བྱེད་པའི་ཆོས་ཚུལ་ཐད་ཡོད་པའི་བློའི་ཁྱེར་སོ་གཙོ་བོ་གཉིས་ཀྱི་སྐོར་ཤོད་ཆོག །བློའི་ཁྱེར་སོ་གཅིག་ནི་དགེ་བའི་བཤེས་གཉེན་གྱི་ཡོན་ཏན་ལ་ཡིད་ཆེས་བརྟན་པོ་ཡོད་པ་དེ་རེད། མི་ལུས་རིན་ཆེན་གྱི་སྐབས་དོན་ནང་། ང་ཚོས་ཡིད་ཆེས་བརྟན་པོ་ནི་ང་ཚོར་རང་དབང་ངམ་དལ་བ་ཧ་ཅང་མང་པོ་ཡོད་པའི་བདེན་དོན་གྱི་སྐོར་ཤོད་ཀྱིན་ཡོད། ང་ཚོར་མིག་ཤེས་ཡོད་པ་དང་ལོང་བ་མིན་པ། ང་ཚོར་རང་དབང་ཡོད་པ་དང་ངལ་རྩོལ་གྱི་སྡོད་སྒར་ཞིག་གི་ནང་མེད་པ་སོགས་མི་ལུས་རིན་ཆེན་ལ་བརྟེན་ནས་རང་དབང་དང་། དལ་བ། གོ་སྐབས་ཀྱི་ཐོ་གྲངས་ཧ་ཅང་རིང་པོ་ང་ཚོར་ཡོད་པ་རེད། 

ང་ཚོས་ “རེད། ང་རང་ལ་དངོས་གནས་རང་དབང་ཡོད། མ་མཐར་ཡང་ད་ལྟའི་དུས་སྐབས་སུ་གེགས་དང་བར་ཆད་ཀྱི་རིགས་དེ་དག་ལས་རང་དབང་ཡོད། ང་རང་ལ་མིག་གི་དབང་པོ་ཡོད་པ་དང་ངལ་རྩོལ་གྱི་སྡོད་སྒར་ལས་ཐར་བའི་རང་དབང་གི་གོ་སྐབས་བཟང་པོ་རྣམས་ཡོད། རེད། ང་ལ་དངོས་གནས་དྲང་གནས་གོ་སྐབས་དེ་དག་ཡོད་” ཅེས་བསམ་གྱི་ཡོད། ང་ཚོ་འདི་ལ་དངོས་གནས་ཧ་ཅང་ཡིད་ཆེས་པ་དགོས་ཀྱི་ཡོད། དེ་ནི་སྐབས་འདིར་ང་ཚོས་ “བདག་” གི་སྐོར་བསམ་བློ་གཏོང་བའི་སྐབས། ང་ཚོའི་བློའི་ཁྱེར་སོའི་ཆ་ཤས་གཅིག་རེད། 

དགེ་བའི་བཤེས་གཉེན་ཞིག་དང་ལྷན་དུ་འབྲེལ་བ་བཟང་པོ་ཡོད་པའི་སྐབས་དོན་གྱི་ནང་བློའི་ཁྱེར་སོ་གཉིས་པ་ནི། དགེ་བའི་བཤེས་གཉེན་གྱི་བཀའ་དྲིན་ལ་ཡི་རང་བྱེད་པ་དེ་རེད། མི་ལུས་རིན་ཆེན་སྒོམ་པའི་སྐབས། དེ་ནི་དེ་ཙམ་གྱི་བཀའ་དྲིན་མིན་པར། གེགས་དང་བར་ཆད་དེ་དག་ལས་ཐར་བ་དང་གོ་སྐབས་ལ་བརྟེན་ནས་ང་ཚོའི་མི་ཚེ་ལེགས་བཅོས་བཏང་བའི་རྒྱུ་མཚན་གྱིས་ང་ཚོར་ཡོད་པའི་ཕན་ཡོན་དེ་རེད། ང་ཚོས་འདི་ལ་དངོས་གནས་ཡི་རང་བྱ་རྒྱུའི་དུས་ཚོད་གཏོང་དགོས། དེ་ཡང་སྟབས་བདེ་པོའི་སྒོ་ནས་བཤད་ན། “ང་རང་ལ་གོ་སྐབས་བཟང་པོ་འདི་དངོས་གནས་འདུག །འདི་ནི་དཔེ་མི་སྲིད་པའི་ཡག་པོ་འདུག་” ཅེས་པ་དེ་རེད། དེ་ནི་ང་ཚོས་ “བདག་” ལ་མི་ལུས་རིན་ཆེན་འདི་ཐོབ་པར་ཇི་ལྟར་དམིགས་ཚུལ་དེ་རེད། “ང་ལ་འདི་དངོས་གནས་ཐོབ་འདུག །འདི་ནི་ཡིད་ཆེས་དཀའ་བ་རེད། ངས་དངོས་གནས་འདི་ལ་ཡི་རང་བྱེད་ཀྱི་ཡོད་” ཅེས་པ་ལྟ་བུ་རེད། ཏོག་ཙམ་རིང་དེ་འདྲ་ཞིག་བསམ་བློ་ཐོངས།

(སྒོམ་དུས།)

ང་ཚོར་ཡོད་པའི་ཁྱད་ཆོས་སམ་ཡོན་ཏན་གལ་ཆེ་ཤོས་དེ་ནི། ང་ཚོ་ཆོས་དང་ཆོས་ཀྱི་ལམ་ལ་བློ་གུ་དོག་པོ་མིན། ང་ཚོ་ནི་བློ་གུ་ཡངས་པོ་དང་དེ་དག་ནི་ང་ཚོའི་མི་ཚེའི་ནང་ཡོད་པའི་ཁྱད་ཆོས་ཁྱད་པར་དུ་འཕགས་པ་རྣམས་རེད་ཅེས་བསམ་གྱི་ཡོད། 

འདི་ལྟ་བུའི་ཡི་རང་ལ་བརྟེན་ནས་ང་ཚོས་སོ་སོ་རང་ཉིད་ཡིན་པ་མི་སྲིད་པའི་ཚུལ་དུ་གྲུབ་པ་དང་ “བདག་” རྫུས་མ་ལྟ་བུར་ཚུལ་མིན་གྱིས་བསམ་བློ་གཏོང་བའི་སྐབས། ང་ཚོར་ཡོད་པའི་ཐབས་སྐྱོ་བའི་ང་ཞེས་པའི་བསམ་ཕྱོགས་འདི་ལ་ཁ་གཏད་གཅོག་འགོ་གཙུག་གི་ཡོད། “ང་ནི་ཐབས་སྐྱོ་པོ་རེད། ངས་བྱེད་མི་ཐུབ་” ཅེས་པ་ལྟ་བུ་རེད། 

“ང་རང་ཐབས་སྐྱོ་བའི་” བསམ་ཕྱོགས་འདི་ལ་བརྟག་དཔྱད་བྱ་རྒྱུ་ནི་དངོས་གནས་དོ་སྣང་བྱ་འོས་པ་ཞིག་ཡོད། “ང་རང་ཐབས་སྐྱོ་བ་ལ། ང་ལ་དགའ་རོགས་མེད་” ཅེས་དང་ “ང་རང་ལ་ཕྲུ་གུ་མེད་” ཅེས་བསམ་པའམ། ཡང་ན་ “ང་ལ་དངུལ་འདང་ངེས་མེད་” ཅེས་བསམ་གྱི་ཡོད། ང་ཚོས་སོ་སོ་རང་ཉིད་ “ང་ཁ་ཐབས་སྐྱོ་པོ་” བཟོ་མཁན་གྱི་ཁྱད་ཆོས་དེ་དག་ཐམས་ཅད་ལ་བསམ་བློ་གཏོང་བཞིན་ཡོད། དེས་གང་བྱེད་དམ། དེས་ང་ཚོ་སྡུག་བསྔལ་མྱོང་འཇུག་གི་ཡོད། མ་རེད་དམ། དེ་ལས་ལྡོག་སྟེ། གལ་ཏེ་ང་ཚོས་རང་ཉིད་ལོང་བ་མིན་པ་དང་། གཟའ་གྲིབ་ཕོག་མེད་པ། བློ་གུ་དོག་པོ་མིན་པ་ནི་ཅི་འདྲའི་ཡག་པ་ལ་ཞེས་པར་གཞིགས་ནས་བསམ་བློ་བཏང་ན། དེ་ནི་ལྟ་ཚུལ་རྦད་དེ་མི་འདྲ་བ་ཞིག་རེད། ཀུན་རྫོབ་ཀྱི་ “བདག་” གི་ཕྱོགས་སུ་ང་ཚོར་བཟང་ཕྱོགས་ཀྱི་བློའི་ཁྱེར་སོ་རྦད་དེ་མང་བ་ཡོད་པ་དང་འདི་ནི་ “བདག་” བཟང་པོའི་འདུ་ཤེས་ཅན་ཞིག་ཡར་རྒྱས་འགྲོ་འགོ་བཙུག་གི་ཡོད། 

བྱམས་བརྩེ་དང་། བཀའ་དྲིན། བྱམས་པ། སྙིང་རྗེ་བཅས་ངོ་སྤྲོད། 

ད་ང་ཚོས་ནང་ཆོས་ལས་ཆ་རྐྱེན་གཞན་ཞིག་གི་སྐོར་ངོ་སྤྲོད་བྱ་རྒྱུ་ཡིན། ཆོས་ལ་སློབ་གཉེར་བྱེད་པའི་ཐབས་རྩལ་ཡོངས་སུ་རྫོགས་པ་ནི་ང་ཚོས་ཇི་ཙམ་གྱིས་མང་བ་སྦྱངས་པ་དེའི་ཚོད་ཀྱིས་ཆོས་ཀྱི་གནད་དོན་དུམ་ཚན་མི་འདྲ་བ་རྣམས་མཉམ་དུ་གསར་གཏོད་དང་ཕན་རླམས་ཅན་གྱི་ཐབས་ཚུལ་ནང་འཇོག་ཐུབ། འདི་དང་འབྲེལ་ནས་བྱང་ཆུབ་ཀྱི་སེམས་སྐྱེད་པར་རྒྱུ་འབྲས་མན་ངག་བདུན་ལ་སྒོམ་པའི་ཆོས་ཚུལ་རྣམས་ལས་བྱུང་བའི་བསླབ་བྱ་འགའ་ཞིག་འཆད་པར་བྱ་བ་ལ།

ང་ཚོས་འདི་ཇི་ལྟར་བྱེད་དམ། ང་ཚོས་དགེ་བའི་བཤེས་གཉེན་གྱི་བཀའ་དྲིན་དང་དེ་ཡང་མི་ལུས་རིན་ཆེན་དང་འབྲེལ་ནས་ཡི་རང་བྱ་རྒྱུའི་སྐོར་བསམ་བློ་བཏང་ཡོད། རང་ཉིད་ལ་ཡོད་པའི་གོ་སྐབས་ཧ་ཅང་བཟང་པོ་ཡོད་པའི་བཀའ་དྲིན་ལ་ཡི་རང་བྱེད་ཀྱི་ཡོད། ད་ང་ཚོའི་ནང་ལོགས་ཀྱི་འཚོལ་ཞིབ་འཕྲུལ་ཆས་ནང་བཀའ་དྲིན་ཞེས་པའི་ཚིག་དེ་བླུགས་པ་དང་། དེ་ནས་ང་ཚོས་བཀའ་དྲིན་སྐོར་གྱི་ཆོས་ཚུལ་རྣམས་ལ་ལྟ་དགོས། དེ་དག་གང་རེད་དམ། དཔེ་མཚོན་གཅིག་ནི། སྐྱེ་བ་སྔ་མའི་ནང་སེམས་ཅན་ཐམས་ཅད་ང་ཚོའི་ཨ་མ་བྱས་མྱོང་ཡོད་པ་དང་ང་ཚོ་ལ་ཧ་ཅང་བཀའ་དྲིན་ཆེན་པོ་ཡིན་པར་རྟོགས་པ་ལྟ་བུ་རེད། ད་ང་ཚོས་ཆོས་ཚུལ་གྱི་དུམ་ཚན་འདི་གཉིས་མཉམ་དུ་རན་པར་འཇོག་ཐུབ་མིན་ལྟ་རྒྱུ་ཡིན། 

ང་ཚོས་རྒྱུ་འབྲས་མན་ངག་བདུན་གྱི་སྐབས་སུ་མཐོང་བ་ལྟར། མའི་བཀའ་དྲིན་དྲན་པའི་རྗེས་ཀྱི་རིམ་པ་དེ་ནི་ང་ཚོའི་རྒྱུད་ལ་ཚོར་བ་ངེས་ཅན་ཞིག་འབྱུང་གི་ཡོད་པ་དེ་རེད། ནམ་རྒྱུན་དེ་ནི་དྲིན་བཟོ་བར་འདོད་པ་དེ་རེད། ཡིན་ནའང་། ཨིན་སྐད་ནང་དྲིན་ལན་འཇལ་བ་ཞེས་པ་དེ་ (repay that kindness) ཞེས་བསྒྱུར་ཡོད་པས། དེ་ནི་བུ་ལོན་ལྟ་བུ་ཞིག་ཡོད་པ་དང་དེ་འཇལ་དགོས་ཤིང་། མ་འཇལ་ན་ང་ཚོ་ནག་ཉེས་ཅན་ཡིན་པ་ལྟ་བུ་སྣང་གི་འདུག །དེ་ནི་གོ་དོན་ལོག་འཛིན་ཞིག་རེད། དེའི་ཚོར་བ་དང་བློའི་ཁྱེར་སོ་ངོ་མ་ནི། “ཁྱེད་ཀྱིས་ང་ལ་ཧ་ཅང་བཀའ་དྲིན་བསྐྱངས་ཡོད་པ་དང་ཁྱེད་རང་དངོས་གནས་བཀའ་དྲིན་ཅན་ཡིན་” ཞེས་པ་དེ་རེད། ང་ཚོས་ཧ་ཅང་བཀའ་དྲིན་ཅན་དུ་ཚོར་བ་སོང་ཙང་། དེའི་ལན་དུ་སེམས་བཟང་པོ་བྱེད་འདོད་ཡོད་པ་རེད། སེམས་ཀྱི་གནས་བབས་ནི་ང་ཚོར་བུ་ལོན་ཞིག་ཡོད་པ་དེ་འདྲ་མིན་པར། དེའི་ཚབ་ལ་དེ་ནི་བཀའ་དྲིན་ནང་གི་གཅིག་ཡིན་པ་རེད། ང་ཚོ་སོ་སོར་ཐོབ་པའི་མི་ལུས་རིན་ཆེན་འདི་དངོས་གནས་བཀའ་དྲིན་ཆེན་པོ་རེད། “ང་རང་ལ་མི་ལུས་རིན་ཆེན་འདི་ཡོད་པས། དེ་ལ་ངས་ཡི་རང་བྱེད་ཀྱི་ཡོད། འདི་ང་རང་ལ་ཧ་ཅང་བཀའ་དྲིན་ཅན་ཡིན་” ཞེས་པ་ལྟ་བུ་རེད།

འོན་ཀྱང་། ང་ཚོས་སུ་ལ་བཀའ་དྲིན་ཅན་དུ་ཚོར་གྱི་ཡོད་དམ། ནང་ཆོས་ལྟར་བྱས་ན། ནུས་མཐུ་ཅན་ཞིག་གིས་ང་ཚོར་མི་ལུས་རིན་ཆེན་འདི་བྱིན་པ་ཞིག་མིན། ང་ཚོའི་ཕ་མ་ལ་བརྟེན་ནས་མངལ་དུ་ཆགས་པ་ཞིག་ཡིན་ནའང་། དེ་ནི་གཞན་ཞིག་གིས་ང་ཚོར་མི་ལུས་འདི་སྤྲད་པ་ཞིག་མིན། འོན་ཀྱང་། ང་ཚོའི་ཕ་མས་མི་ལུས་རིན་ཆེན་འདི་ཆ་རྐྱེན་རྣམས་མཁོ་སྤྲོད་བྱས་པ་ཙམ་ཞིག་རེད། གལ་ཏེ་ང་ཚོས་སྐྱེ་བ་ཕྱི་མར་ཡིད་ཆེས་ན། སོ་སོའི་སྐྱེ་བ་སྔོན་མའི་སྤྱོད་ལམ་དང་དགེ་བའི་ནུས་པ་གང་བསགས་པ་དེའི་འབྲས་བུར་ང་ཚོ་ཕ་མ་གཉིས་ལ་བརྟེན་ནས་མི་ལུས་རིན་ཆེན་འདི་ཐོབ་པའི་ཕྱིར། མའི་མངལ་དུ་ཆགས་པ་ཞིག་ཡིན་པ་རྟོགས་ཀྱི་རེད། བྱས་ཙང་། དོན་ངོ་མར་ང་ཚོས་རང་གིས་རང་ལ་མི་ལུས་རིན་ཆེན་འདི་སྤྲད་ཡོད་པ་ཞིག་རེད། འདི་ལྟར་བརྟག་དཔྱད་བྱེད་པའི་སྒོ་ནས་ང་ཚོས་རང་གིས་རང་ལ་བཀའ་དྲིན་ཅན་དུ་ཚོར་གྱི་ཡོད། 

རྒྱུ་འབྲས་མན་ངག་བདུན་སྒོམ་པའི་ནང་། ང་ཚོས་བཀའ་དྲིན་ཆེན་པོ་འདི་དང་ཡི་རང་འདི་སེམས་ཅན་ཐམས་ཅད་ང་ཚོའི་མ་བྱས་པའི་སྐབས་དོན་གྱི་ནང་ཚོར་བའི་སྐབས། རང་ཤུགས་ཀྱིས་གང་འབྱུང་གི་ཡོད་དམ། ང་ཚོར་ཐོབ་པའི་ཨ་མའི་བཀའ་དྲིན་དྲན་པའི་སྐབས། གང་འབྱུང་གི་ཡོད་དམ། དེ་ནི་ཚོར་བ་འདྲེན་ནུས་སྤྲོ་ལྷང་གི་བྱམས་བརྩེ་རེད། གཞི་རྐང་ནས་ང་ཚོས་ག་དུས་ཡིན་ནའང་མི་སུ་འདྲ་ཞིག་མཐོང་ནའང་། དེས་ང་ཚོའི་སེམས་སྤྲོ་ལྷང་གི་བྱམས་བརྩེ་དང་ལྡན་པར་བྱེད་ཀྱི་ཡོད། ང་ཚོས་ “ཨོ། ཁོང་ཚོ་མཐོང་བ་ནི་ཅི་འདྲའི་ལེགས་པ་ལ། ཁོང་ཚོ་ལ་གལ་ཏེ་རྐྱེན་ངན་ཞིག་ཕྲད་ན། དེ་ནི་དངོས་གནས་འཇིགས་སུ་རུང་བ་ཞིག་ཆགས་ཀྱི་རེད་” ཅེས་བསམ་གྱི་ཡོད། 

དེ་དང་མཚུངས་པར་ང་ཚོས་འདི་ལྟ་བུའི་ཚོར་བ་ནི་མི་ལུས་རིན་ཆེན་ལ་སྒོམ་པའི་སྐབས་སུ་ལག་བསྟར་བྱེད་ཆོག །གོ་སྐབས་འདི་དག་ཐམས་ཅད་ང་ཚོར་ཡོད་པ་ནི་ཅི་འདྲའི་ལེགས་པ་ལ་ཞེས་ང་ཚོས་བསམ་བློ་གཏོང་ཆོག་པ་དང་། དེ་ག་ནང་བཞིན་གོ་སྐབས་བཟང་པོ་དེ་དག་ང་ཚོར་ཐོབ་པ་ལ་ཡི་རང་བྱེད་པ་དང་བཀའ་དྲིན་ཅན་དུ་ཚོར་བ། ཚེ་སྔོན་མ་གོ་སྐབས་འདི་དག་ཐོབ་པའི་རྒྱུ་རྣམས་བསགས་པར་རང་གིས་རང་ལ་བཀའ་དྲིན་ཅན་དུ་ཚོར་དགོས། བཀའ་དྲིན་དེ་ལ་བརྟེན་ནས་ང་ཚོས་སོ་སོ་རང་གི་སྐོར་ལ་བསམ་བློ་གཏོང་བའི་སྐབས། ང་ཚོར་ཚོར་བ་འདྲེན་ནུས་སྤྲོ་ལྷང་གི་བྱམས་བརྩེ་དང་ལྡན་པའི་བཟང་ཕྱོགས་དགེ་བའི་བསམ་ཕྱོགས་ཤིག་ཡོད། ང་ཚོས་སོ་སོ་རང་ཉིད་ལ་ཡག་པོ་ཚོར་བ་དང་། གལ་ཏེ་ང་ཚོས་གོ་སྐབས་བཟང་པོ་དང་རྩ་ཆེན་འདི་དག་ཆུད་ཟོས་སུ་བཏང་ན། དེ་ལ་དངོས་གནས་འཇིགས་སུ་རུང་བ་ཚོར་གྱི་ཡོད། 

བྱང་ཆུབ་ཀྱི་སེམས་སྐྱེད་པའི་སྒོམ་འདི་དག་གི་ནང་། ག་རེ་འབྱུང་གི་ཡོད་ཅེ་ན། བྱམས་པ་དང་སྙིང་རྗེ་འབྱུང་གི་ཡོད། བྱམས་པ་ནི་གཞན་བདེ་བ་དང་བདེ་བའི་རྒྱུ་དང་ལྡན་པར་འདོད་པའི་འདུན་སེམས་དེ་རེད། སྙིང་རྗེ་ནི་གཞན་སྡུག་བསྔལ་དང་སྡུག་བསྔལ་གྱི་རྒྱུ་དང་བཅས་པ་ལས་འབྲལ་བར་འདོད་པ་དེ་རེད། དེ་བཞིན་འདིར་ང་ཚོར་ཐོབ་པའི་མི་ལུས་རིན་ཆེན་ལ་སྒོམ་པའི་སྐབས་དོན་གྱི་ནང་། ང་ཚོས་སོ་སོ་རང་ཉིད་ཀྱི་ཐད་ལ་ཚོར་བའི་བཟང་ཕྱོགས་དགེ་བའི་བསམ་ཕྱོགས་དེ་ང་ཚོར་ཡོད་པའི་དལ་བ་དང་འབྱོར་བར་ཧ་ཅང་ཡི་རང་བྱེད་པ་དང་། དེ་དག་འབྱུང་བར་ང་ཚོས་གང་དག་བྱས་པ་དེ་དག་གིས་སོ་སོ་རང་ཉིད་ལ་བྱམས་དང་སྙིང་རྗེ་དང་ལྡན་པར་བྱེད་ཀྱི་ཡོད། ང་ཚོར་བདེ་བ་དང་བདེ་བའི་རྒྱུ་དང་ལྡན་ཞིང་། སྡུག་བསྔལ་དང་སྡུག་བསྔལ་གྱི་རྒྱུ་དང་འབྲལ་བར་འདོད་ཀྱི་ཡོད། འདིས་དེ་འདྲ་ཞིག་ཡོང་བར་སོ་སོའི་ཡར་རྒྱས་ལ་འགན་འཁྲི་འཁྱེར་དགོས་པར་བཟོ་གི་ཡོད། ཁྱེད་ཀྱིས་དེ་ཤེས་ཀྱི་འདུག་གམ། 

འཆི་བ་དྲན་པ།

ང་ཚོར་ཡོད་པའི་གནས་སྟངས་དང་གོ་སྐབས་འདི་དག་ཐམས་ཅད་ནི་ཡུན་དུ་གནས་ཀྱི་མ་རེད། ང་ཚོ་འཆི་རྒྱུ་རེད། དེ་ནི་དངོས་ཡོད་གནས་སྟངས་ཤིག་རེད། ང་ཚོར་ཡོད་པའི་བཟང་ཕྱོགས་ཀྱི་རྐྱེན་འདི་དག་མེད་པ་ཆགས་ཀྱི་རེད། རྒྱུ་མཚན་དེ་ལ་བརྟེན་ནས་ང་ཚོར་དེ་དག་ཡོད་པའི་སྐབས་སུ་ང་ཚོས་དེ་དག་ལས་ཁེ་ཕན་ལེན་དགོས། དེ་ནི་ང་ཚོ་ཟ་ཁང་ཞིག་ལ་ཡོད་པ་དང་ཟ་ཁང་དེ་ཆུ་ཚོད་གཉིས་པར་སྒོ་རྒྱག་གི་ཡོད། ང་ཚོས་དེའི་སྔོན་ལ་ཁ་ལག་བཟའ་དགོས། གང་ཡིན་ཞེ་ན། དེའི་རྗེས་སུ་སྒོ་རྒྱག་རྒྱུ་ཡིན་པ་དང་ཁ་ལག་རག་གི་མ་རེད། གཞི་རྩ་ནས་ང་ཚོས་ཟ་ཁང་སྒོ་མ་རྒྱག་གོང་ནས་ཕན་ཐོགས་ཅན་གྱི་གོ་སྐབས་དེ་ལས་ཁེ་ཕན་བླང་དགོས་ཀྱི་ཡོད། 

ང་ཚོས་འཆི་བ་ཁོ་ནར་བསམ་བློ་གཏོང་མི་དགོས། ད་དུང་ང་ཚོར་ན་བ་དང་རྒ་བའི་སྡུག་བསྔལ་ཡོད། སོ་སོའི་དྲན་པ་དང་། མཐོང་རྒྱ། ཐོས་རྒྱ། ནུས་པ་སོགས་མ་བརླག་གོང་ལ་ད་ཡོད་ཀྱི་གོ་སྐབས་འདི་བེད་སྤྱོད་བྱེད་དགོས། ང་ཚོ་ལོ་ཚད་ཉི་ཤུ་དང་སུམ་ཅུའི་ནང་ཡོད་པའི་སྐབས། རྒས་འཁོགས་ཆགས་རྒྱུ་དེ་ནི་ཧ་ཅང་ཐག་རིང་པོ་ལྟར་སྣང་གི་ཡོད། ཡིན་ནའང་། ངའི་ལོ་ཚད་ལ་མཚོན་ན། ང་རང་ལོ་དྲུག་ཅུ་རེ་དྲུག་རེད། འདིའི་སྐབས་སུ་ང་ཚོས་དངོས་གནས་མི་ཚེའི་ནང་གི་གྲུབ་འབྲས་ལྡན་པའི་ལོ་ག་ཚོད་ལྷག་ཡོད་པའི་ཐད་ལ་གོ་གལ་ཆེན་པོ་བྱེད་ཀྱི་རེད། ང་ཚོར་ག་རེ་འབྱུང་རྒྱུ་ཡིན་པ་ནམ་ཡང་ཤེས་ཀྱི་མེད། 

འདི་ལ་བསམ་ཞིབ་བྱེད་པས་ང་ཚོར་གང་འབྱུང་བ་དང་ང་ཚོས་གང་ཉམས་སུ་མྱོང་བ། དེ་ཡང་ད་ལྟ་ཙམ་མིན་པར་མ་འོངས་པར་གང་འབྱུང་མིན་སོགས་ཀྱི་ཐད་ལ་བག་ཡོད་དང་གཟབ་ནན་གྱི་འདུ་ཤེས་ཤིག་སྐྱེད་ཀྱི་ཡོད། བདག་གི་འདུ་ཤེས་བཟང་པོ་ཞིག་སྐྱེད་པར་འདི་ནི་ཧ་ཅང་གལ་ཆེན་པོ་ཡིན། སོ་སོ་རང་ཉིད་ཀྱི་ཕྱོགས་ལ་བཟང་ཕྱོགས་ཀྱི་བསམ་བློའི་ཁྱེར་སོ་ཞིག་ཡོད། གང་ཡིན་ཞེ་ན། ང་ཚོར་གང་ཡོད་པ་ལ་ཡི་རང་བྱེད་པ་དང་ “ང་རང་ད་ལྟ་སྐྱིད་པོ་འདོད་པ་མ་ཟད། མ་འོངས་པ་ལའང་བདེ་སྐྱིད་འདོད་ཀྱི་འདུག །གང་ཡིན་ཞེ་ན། ང་རང་མ་འོངས་པར་གང་འབྱུང་རྒྱུ་ཡིན་པའི་ཐད་ལ་སེམས་འཁུར་ཡོད། ང་རང་ལ་ད་ལྟ་ཡོད་པའི་གོ་སྐབས་འདི་དག་ནི་ཡུན་དུ་གནས་ཀྱི་མ་རེད་” ཅེས་བསམ་གྱི་ཡོད། གོང་དུ་ཞུས་པའི་དཔེ་མཚོན་ལྟར། ཟ་ཁང་དེ་སྒོ་ཕྱེ་བའི་སྐབས་སུ་ང་ཚོས་གང་ཐུབ་ཀྱིས་ཁ་ལག་འཁྱེར་འདོད་བྱེད་ཀྱི་རེད། མ་རེད་དམ། ཟ་ཁང་དེ་ཡང་བསྐྱར་སྒོ་མི་ཕྱེ་བ་སྲིད་པས། ང་ཚོས་མ་འོངས་པའི་ཆེད་དུ་སྡེབ་གསོག་བྱེད་དགོས། 

སྔོན་སུའུ་ལེན་མནའ་འབྲེལ་རྒྱལ་ཁབ་ཀྱི་དུས་སྐབས་སུ་དེ་དང་འདྲ་པོ་རེད། མ་རེད་དམ། 

ཁྱེད་རང་ལ་འཚིག་ཇ་ཕོར་པ་གང་རག་པར་བང་སྒྲིག་ནས་ཆུ་ཚོད་ཕྱེད་ཀའི་རིང་ལངས་ནས་བསྡད་དགོས་པ་དང་ཤ་ལྟ་བུ་ཉོ་བར་དེ་ལས་དུས་ཚོད་རིང་བ་འགོར་གྱི་ཡོད། 

རེད། དེ་ཐོབ་རུང་ཡིན་པའི་སྐབས། མི་རྣམས་ཀྱིས་གང་ཐུབ་ཉོ་ཐབས་བྱེད་ངེས་རེད། གང་ཡིན་ཞེ་ན། དེ་ཡང་བསྐྱར་ག་དུས་རག་མིན་ཁོང་ཚོས་རྩ་ནས་ཤེས་ཀྱི་མེད། 

འཆི་བའི་རྗེས་སུ་གང་འབྱུང་བའི་སྐོར་ངོ་སྤྲོད།

འོ་ན་འཆི་བའི་རྗེས་སུ་གང་འབྱུང་གི་རེད་དམ། གལ་ཏེ་ང་ཚོས་ནང་ཆོས་དང་ཧིནྡུའི་ཆོས་ལུགས་ཡང་ན་སྐྱེ་བ་ཕྱི་མ་འདོད་མཁན་གྱི་ལུགས་གང་ཞིག་ལ་ཡིད་ཆེས་བྱས་ན། ང་ཚོར་སླར་ཡང་གོ་སྐབས་འདི་དག་མེད་སའི་ངན་སོང་གི་གནས་སུ་སྐྱེ་སྲིད་པ་རེད། དཔེར་ན། གལ་ཏེ་ང་ཚོ་འབུ་ཞུ་ལུ་མ་ཞིག་ཏུ་སྐྱེས་ན་གང་འདྲ་ཆགས་ཀྱི་རེད་དམ་ཞེས་དངོས་གནས་དོ་གལ་ཆེན་པོ་བྱས་ན། དེ་ནི་གང་འཚམས་ཀྱི་ཞེད་སྣང་ཅན་ཞིག་ཡོད། འབུ་ཞུ་ལུ་མ་ལྟ་བུར་མཚོན་ན། སུས་ང་ཚོར་མཐོང་བ་དང་ལམ་སེང་རྡོག་རྫིས་གཏོང་འདོད་བྱེད་ཀྱི་ཡོད། ཡང་ན་གལ་ཏེ་ང་ཚོས་ནུབ་ཕྱོགས་དང་དབུས་ཤར་གྱི་ཆོས་ལུགས་ཁག་ལ་ཡིད་ཆེས་བྱེད་ཀྱི་ཡོད་ན། དམྱལ་བའི་ནང་རྟག་ཏུ་མྱོང་སྲིད་པ་ཞིག་རེད། འདིའང་བསམ་བློ་ཧ་ཅང་ཡག་པོ་ཞིག་མིན། ཡང་མིན་ན། གལ་ཏེ་ང་ཚོས་སོ་སོ་རང་ཉིད་གང་ཡང་མིན་པ་ཞིག་ཆགས་ཀྱི་ཡོད་པར་ཡིད་ཆེས་བྱེད་ཀྱི་ཡོད་ན། དེ་ནི་མི་མང་པོ་ཞིག་ལ་གང་ལ་གང་འཚམས་ཀྱི་ཞེད་སྣང་ཅན་ཞིག་རེད། གང་ཡིན་ཞེ་ན། དེ་ནི་དངོས་གནས་དྲང་གནས་གང་ཡང་མིན་པ་དེ་གང་འདྲ་ཞིག་ཡོད་པ་མི་ཤེས་པའི་གནས་སུ་ལྷུང་གི་ཡོད། “ང་ནི་གང་ཡང་མིན་” ཞེས་པའི་ནང་དུའང་ “བདག་” ཡོད། དེ་ནི་དངོས་གནས་གང་འཚམས་ཀྱི་ཞེད་སྣང་ཅན་ཞིག་རེད། 

གོང་དུ་ཞུས་པ་ལྟར། ང་ཚོས་མ་འོངས་མི་རབས་རྗེས་མ་ལ་གཞིགས་ནས་ཀྱང་བསམ་བློ་གཏོང་ཆོག །གཅིག་བྱས་ན། མི་རྣམས་ལ་ང་ཚོའི་ཐད་དྲན་པ་སྡུག་ཅག་ཅིག་ཡོད་སྲིད་པའམ། ཡང་ན་ང་ཚོས་དཀའ་ངལ་གྱི་རིགས་ཚང་མ་མ་འོངས་མི་རབས་རྗེས་མའི་ཆེད་དུ་འཇོག་སྲིད། འདིའང་ཧ་ཅང་ཡག་པོ་ཞིག་མིན། ང་ཚོ་སུ་གཅིག་ཀྱང་མི་ཞེད་སྣང་ཚ་པོ་ཞིག་དྲན་ན་བསམ་པའི་འདོད་པ་དེ་མེད། ཡོད་དམ། 

ང་ཚོ་ཤི་བའི་རྗེས་ཀྱི་ངན་སོང་དུ་སྐྱེ་བར་གཞིགས་པའི་སྒོམ་ཆ་ཚང་ནི་སླར་ཡང་ “བདག་” བཟང་པོའི་འདུ་ཤེས་ཅན་འདི་ཡར་རྒྱས་གཏོང་བར་ཧ་ཅང་ཕན་ཐོགས་ཅན་ཞིག་ཡིན་སྲིད། ང་ཚོས་སྐྱེ་བ་ངན་པ་ཞིག་ཏུ་མི་སྐྱེ་བའི་སྔོན་འགོག་བྱེད་འདོད་ཡོད། ང་ཚོར་ཡོད་པའི་གོ་སྐབས་རྣམས་ལ་བཀའ་དྲིན་ཅན་དུ་ཚོར་བ་དང་རང་གིས་རང་ལ་སྤྲོ་ལྷང་གི་ཚོར་བ་འདི་ཡོད་པ། དེ་བཞིན་རང་གིས་རང་ལ་བདེ་སྐྱིད་འདོད་ཀྱི་ཡོད། དེའི་འབྲས་བུར་ང་ཚོ་ཤི་བའི་རྗེས་སུ་འཇིགས་སུ་རུང་བའི་གནས་སྟངས་འབྱུང་བར་སྤོང་འདོད་ཡོད་པ་གསལ་པོ་རེད། དེ་ལ་སྔོན་འགོག་གི་ཆེད་དུ་ང་ཚོས་ཐབས་ཤེས་ཤིག་བྱེད་འདོད་ཡོད་པ་གསལ་པོ་རེད། 

དེར་མ་ཟད། གལ་ཏེ་ང་ཚོས་རོགས་མགོན་མེད་པ་དང་རེ་བ་མེད་པ་ཚོར་ན། དེས་ “བདག་” བཟང་པོའི་འདུ་ཤེས་ཅན་ཞིག་ལ་འཁྲིད་ཀྱི་མེད། དེ་ལས་ལྡོག་སྟེ། ང་ཚོས་སོ་སོ་ལ་གང་འབྱུང་གི་ཡོད་པར་འགན་འཁྱེར་ཐུབ་པ་དང་དེའི་སྐབས་སུ་ངས་བརྗོད་པའི་ “ཉེན་མེད་ཀྱི་ཁ་ཕྱོགས་” ཡང་ན་སྐྱབས་འགྲོའི་སྐོར་དེ་བསླེབ་གྱི་ཡོད། དེ་ནི་རེ་བ་ཟད་པ་མིན་ལ་ང་ཚོ་ནི་ཅི་བྱ་གཏོལ་མེད་ཀྱི་གནས་སུ་ལྷུང་མེད། གོ་སྐབས་འདི་མི་བརླག་པའི་ཕྱིར་དང་སླར་ཡང་མི་ལུས་རིན་ཆེན་ཞིག་མི་ཐོབ་པའི་ཐབས་ཤིག་ང་ཚོས་བྱེད་ཐུབ། ཆོས་ཐུན་རྗེས་མའི་ནང་ཉེན་མེད་ཀྱི་ཁ་ཕྱོགས་བཟང་པོའམ་སྐྱབས་འགྲོ་དང་སྐྱེ་བ་ཕྱི་མར་ངན་སོང་དུ་མི་སྐྱེ་བའི་ཆེད་ང་ཚོས་གང་བྱེད་ཐུབ་པའི་སྐོར་གོ་བསྡུར་བྱ་རྒྱུ་ཡིན། 

ད་ལྟ་དུས་ཚོད་ཏོག་ཙམ་ལྷག་པའི་ནང་དྲི་བ་དྲིས་ལན་འགའ་ཞིག་བྱ་རྒྱུ་ཡིན།

སྡུག་བསྔལ་ལ་སྔོན་འགོག་བྱེད་ཆེད་དཀའ་ངལ་ཅན་གྱི་གནས་སྟངས་ཁག

གཞན་གྱི་སྡུག་བསྔལ་ཡང་དུ་གཏོང་ཐབས་སྐོར་འཆད་པ་ལ། གལ་ཏེ་བཀྲེས་སྐོམ་གྱིས་མནར་བའི་བྱིའུ་ཞིག་གི་སྡུག་བསྔལ་དེ་ཆུང་ངུ་གཏོང་བའི་ཐབས་གཅིག་རང་ཡོད་པ་ནི་བྱིའུ་དེ་ལ་འབུ་སྲིན་རྒྱགས་པ་ཞིག་ཟས་སུ་སྟེར་དགོས་པའི་གནས་སྟངས་ཤིག་གི་ནང་ང་ཚོར་ཡོད་ན། ང་ཚོས་དེ་ཇི་ལྟར་རྟོགས་ཀྱི་ཡོད་དམ། 

འདི་ནི་གནས་སྟངས་ལས་སླ་པོ་ཞིག་མིན་པ་གསལ་པོ་རེད། ངས་ངའི་ཕྲུ་གུའི་སྲོག་བསྐྱབ་ཀྱི་ཡོད་དམ་ཡང་ན་ངའི་ཕྲུ་གུའི་ཁའི་ནང་ཡོད་པའི་གཞན་བརྟེན་གྱི་འབུ་སྲིན་ (འཚོ་གནས་གཞན་བརྟེན་གྱི་འབུ་སྲིན་རིགས། parasitic worms) དེ་དག་གི་སྲོག་བསྐྱབ་ཀྱི་ཡོད་ཅེས་པའི་གནས་སྟངས་ཡིན་པའི་སྐབས། ང་ཚོས་སོ་སོའི་ཕྲུ་གུའི་སྲོག་བསྐྱབ་ཀྱི་ཡོད་པ་དེ་གསལ་པོ་རེད། གཞན་དོན་བསྒྲུབ་པར་ཕྲུ་གུ་དེས་མིའི་ལུས་རྟེན་འདི་ལ་བརྟེན་ནས་ད་ལྟ་སེམས་ཀྱི་རྒྱུན་དེ་འབུ་སྲིན་གྱི་རྣམ་པར་ཡོད་པ་དེ་ལས་རྦད་དེ་ཕན་ཐོགས་ཆེ་བ་བསྒྲུབ་ཐུབ། དཔེ་མཚོན་འདིའི་ནང་། ང་ཚོས་རྣམ་པར་ཇི་ལྟར་འབྱེད་ཚུལ་དེ་གང་ལ་གང་འཚམས་ཀྱི་གསལ་པོ་རེད། འོན་ཀྱང་། དེ་ནི་སྡོམ་འབུ་དང་སྦྲང་བུའི་དཔེ་ཞིག་ཡིན་པའམ་ཡང་ན་བྱིའུ་དང་འབུ་སྲིན་གྱི་དཔེ་ཞིག་ཡིན་པའི་སྐབས། ང་ཚོས་གང་བྱེད་ངེས་པ་དང་ཇི་ལྟར་གདམ་ཀ་བྱེད་ངེས་པ་ནི་དེ་ཙམ་གྱིས་གསལ་པོ་མེད། 

ང་ཚོས་ནང་པའི་སྐྱེས་རབས་སོགས་གཞུང་ལུགས་ནང་གསལ་བའི་དཔེ་མཚོན་ཁག་ལ་ལྟ་དགོས། སངས་རྒྱས་ཀྱིས་རང་གི་སྐུ་སྐྱེ་སྔོན་མའི་ནང་འདི་ལྟ་བུའི་གནས་སྟངས་ལ་གདོང་ལེན་ཇི་ལྟར་གནང་ཡོད་དམ། སྐྱེ་བ་སྔོན་མ་ཞིག་གི་ནང་། སངས་རྒྱས་བཅོམ་ལྡན་འདས་ལ་ཤིན་ཏུ་བཀྲེས་སྐོམ་གྱིས་མནར་བའི་སྟག་མོ་ཞིག་དང་སྟག་ཕྲུག་འགའ་དང་ཕྲད་པ་རེད། དེའི་སྐབས་སངས་རྒྱས་ཀྱིས་གང་གནང་ཡོད་དམ། སངས་རྒྱས་ཀྱིས་རང་གིས་སྐུ་ལུས་སྟག་མོར་བྱིན་པ་རེད། དེ་བཞིན་སློབ་དཔོན་ཐོགས་མེད་ཀྱིས་ཁྱི་ཞིག་ལ་སྦྱིན་པའི་ཕྱིར་རང་གི་རྐང་པ་དུམ་བུ་གཅིག་བཅད་ནས་བྱིན་ཡོད། དེ་དག་ནི་བྱང་ཆུབ་སེམས་དཔའ་རྣམས་ཀྱི་སྤྱོད་པའི་དཔེ་མཚོན་རྣམས་རེད། དེ་ནས་ང་ཚོས་ “ང་རང་དེ་འདྲ་བྱེད་ཐུབ་པའི་གནས་ཚད་ལ་བསླེབ་ཡོད་དམ་” ཞེས་རང་གིས་རང་ལ་འདྲི་དགོས། 

གལ་ཏེ་ང་ཚོས་ད་ལྟ་གང་བྱེད་ཐུབ་པར་གཞིགས་ནས་བསམ་བློ་བཏང་ན། ང་ཚོས་ཐོག་མར་སྡོམ་འབུའམ་བྱིའུ་གསོད་པའི་མི་དགེ་བའི་ལས་ཀྱི་ནུས་པ་གསོག་པར་སྔོན་འགོག་བྱེད་པའི་སྟེང་ལ་འབུ་སྲིན་ནམ་སྦྲང་བུའི་སྲོག་བསྐྱབ་པའི་ལས་ཀྱི་འབྲས་བུར་བསམ་ཞིབ་བྱེད་ངེས་རེད། ལས་ལ་གཞིགས་ན་དེ་དག་ནི་བཟང་ཕྱོགས་དགེ་བའི་གནད་དོན་གཉིས་རེད། ང་ཚོས་བྱེད་ཐུབ་པའི་སྐབས་སུ་གང་ཡང་མ་བྱས་ན། དེ་ནས་སྦྲང་བུ་དང་འབུ་སྲིན་གྱིས་རང་གི་སྲོག་ཤོར་བ་དང་བྱིའུ་དང་སྡོམ་འབུས་མི་དགེ་བའི་ལས་ཀྱི་ནུས་པ་དེ་གསོག་གི་ཡོད། གང་ཡང་མི་བྱེད་པའི་སྒོ་ནས་ང་ཚོས་དགེ་བའི་ལས་ཤིག་བྱེད་ཀྱིན་ཡོད་དམ། སྡོམ་འབུ་དང་བྱིའུས་ས་ཆ་གཞན་ཞིག་ནས་ཟས་རག་ཐབས་བྱེད་སྲིད་ནའང་། ང་ཚོས་དེ་དག་བཀྲེས་སྐོམ་ལས་སྐྱོབ་ཐབས་བྱེད་ཀྱིན་ཡོད། 

ང་ཚོར་དེ་འདྲ་བའི་དྲི་བ་ཡོད་པའི་སྐབས། བརྟག་དཔྱད་བྱེད་ཐུབ་པ་དགོས། གལ་ཏེ་ནང་ཆོས་ཀྱི་ནང་ང་ཚོར་གནས་སྟངས་དེ་འདྲ་ཞིག་ལ་བརྟག་དཔྱད་བྱེད་ཐུབ་པའི་རྟོག་པའི་སྒྲོམ་གཞི་ཡོད་ན། ག་རེ་བྱེད་དགོས་པ་དེ་ཤེས་པར་བྱེད་ཐུབ། ང་ཚོས་གང་བེད་སྤྱོད་བྱེད་བཞིན་པ་ནི་ལས་ཀྱི་རྗེས་འབྲས་ཏེ། རྒྱུ་དང་འབྲས་བུའི་རྣམ་གཞག་སྐོར་གྱི་ཆོས་རྣམས་བཀོལ་སྤྱོད་བྱེད་བཞིན་ཡོད། གདམ་ཀ་གཅིག་གམ་གཞན་དེའི་ལས་ཀྱི་རྗེས་འབྲས་གང་ཞིག་ཡོང་ངེས་སམ། དེ་དག་ལས་གང་གིས་སྡིག་པ་མི་དགེ་བའི་རྗེས་འབྲས་ལྕི་བ་དང་གང་གིས་དགེ་བའི་ནུས་པ་ཤུགས་ཆེ་བ་གསོག་གི་ཡོད་པར་ཐག་གཅོད་བྱེད་པའི་ཆེད་ང་ཚོས་དེ་གཉིས་ཀྱི་དབར་ལ་རྣམ་པར་འབྱེད་དགོས། དེ་ནི་ང་ཚོའི་ཇི་ལྟར་ཐག་གཅོད་བྱེད་ཚུལ་དེ་རེད། ངས་འདི་ཁྱེད་རང་ཚོ་མི་རེ་ངོ་རེ་ནས་དེའི་ཐད་ལ་སོ་སོ་རང་ངོས་ནས་བརྟག་དཔྱད་བྱ་རྒྱུའི་འགན་སྤྲོད་རྒྱུ་ཡིན། 

རང་འདོད་དོན་གཉེར་དང་ “བདག་” བཟང་པོའི་འདུ་ཤེས་ཅན།

ང་ཚོས་མི་ལུས་རིན་ཆེན་གྱི་ཕན་ཡོན་སྐོར་བསམ་བློ་གཏོང་བ་དང་། དེ་ནས་ཚོར་བ་འདྲེན་ནུས་ཀྱི་བྱམས་བརྩེའི་ཚོར་བ་འདི་སོ་སོ་རང་ཉིད་ལ་སྐྱེད་པ་དང་སོ་སོ་རང་ཉིད་ཀྱི་བདེ་དོན་ཆེད་དུ་སེམས་འཁུར་ཅན་ཆགས་པའི་སྐབས། དེ་ནི་རང་འདོད་དོན་དུ་གཉེར་བའི་ཁ་ཕྱོགས་སུ་འགྲོ་བཞིན་ཡོད་པ་མིན་ནམ། 

རེད། དེ་ནི་མཐའ་གཅིག་ཏུ་རང་འདོད་དོན་གཉེར་གྱི་ཁ་ཕྱོགས་སུ་འགྲོ་བཞིན་ཡོད། འོན་ཀྱང་། དེ་ནི་སྐབས་འདིར་ནོར་འཁྲུལ་ཞིག་མིན། བདག་བཟང་པོའི་འདུ་ཤེས་ཅན་ཞིག་དང་བདག་སྒྲོ་འདོགས་ཅན་ནམ་ངན་པའི་འདུ་ཤེས་ཅན་ལ་འབད་པའི་སྐབས། ང་ཚོས་བཟང་པོ་མིན་པ་དེ་ཞིབ་དཔྱོད་མ་བྱས་གོང་ལ་ཐོག་མར་ང་ཚོས་བཟང་པོའི་འདུ་ཤེས་ཅན་གྱི་བདག་དེ་སྐྲུན་དགོས། རྒྱུ་མཚན་དེ་ལ་བརྟེན་ནས་བྱིས་པའམ་གཞོན་སྐྱེས་བདག་བཟང་པོའི་འདུ་ཤེས་ཅན་ཞིག་བསྐྲུན་མེད་ན། དེ་དག་ལ་སྟོང་ཉིད་ཀྱི་ལྟ་བའི་སྐོར་བསླབ་རྒྱུ་མེད་ཅེས་རྟག་ཏུ་ལམ་སྟོན་བྱེད་ཀྱི་ཡོད། དེ་ག་ནང་བཞིན་ང་ཚོས་སྟོང་ཉིད་ཀྱི་ལྟ་བ་དེ་སེམས་ཚོར་གྱི་ཆ་ནས་ཛ་དྲག་གིས་སེམས་དཀྲོག་རྐྱེན་ཐེབས་པའམ། ཡང་ན་བདག་གི་འདུ་ཤེས་དངོས་གནས་མེད་མཁན་གྱི་མི་རྣམས་ལ་བསླབ་མི་རུང་བ་ཡིན། དེ་གང་ཡིན་ཞེ་ན། ཀུན་རྫོབ་ཀྱི་བཟང་ཕྱོགས་དགེ་བའི་བདག་ཅིག་མེད་པའི་སྐབས། གལ་ཏེ་ང་ཚོས་བདག་གི་འདུ་ཤེས་གང་རུང་ཉུང་དུ་གཏོང་འགོ་ཚུགས་ན། ང་ཚོར་གང་ཡང་མེད་པ་ལྷག་གི་རེད། དེ་ནི་ཧ་ཅང་གནོད་སྐྱོན་ཆེན་པོ་ཆགས་སྲིད། 

ང་ཚོས་ལས་དང་པོ་བའི་ཚུལ་དུ་ལམ་རིམ་ལ་འཇུག་པའི་སྐབས། རང་འདོད་དོན་གཉེར་འདི་དང་བདག་གི་འདུ་ཤེས་ཤུགས་ཆེན་པོ་ཞིག་སྐྲུན་གྱིན་ཡོད། འདི་ནི་འགྲིག་གི་རེད། གང་ཡིན་ཞེ་ན། ལམ་གྱི་རིམ་པའི་རྗེས་སོར་ང་ཚོས་ཇི་ཡོད་པའི་སྒྲོ་འདོགས་བཤིག་གི་རེད། ཡིན་ནའང་། ང་ཚོར་གཞི་རྟེན་བཟང་པོ་ཞིག་ད་དུང་ཡང་དེར་ཡོད། ངས་འགྲེལ་བརྗོད་བྱས་པ་ལྟར། གཞི་རྟེན་བཟང་པོ་དེ་ནི་ཀུན་རྫོབ་ཀྱི་བདག་དེ་ཡིན་པ་དྲན་དགོས། ང་ཚོས་འབད་བརྩོན་བྱེད་དགོས་པ་ནི་ཀུན་རྫོབ་ཀྱི་བདག་དེའི་ཕྱོགས་སུ་ཡོད་པའི་ང་ཚོའི་བློའི་ཁྱེར་སོ་དེ་རེད། ཐོག་མར་ང་ཚོར་ཀུན་རྫོབ་ཀྱི་བདག་ཅིག་ཡོད་པར་ངེས་བརྟན་བཟོ་དགོས་པ་དང་། དེ་ལ་ཡོད་པའི་ཚུལ་བཞིན་མ་ཡིན་པའི་ཡིད་བྱེད་དེ་སྤོང་འགོ་མ་ཚུགས་པའི་གོང་དུ་དགེ་བའི་བསམ་ཕྱོགས་ཤིག་སྐྱེད་དགོས། 

མདང་དགོང་ཞུས་པ་ལྟར། ལམ་རིམ་ལ་འཇུག་ཚུལ་གྱི་རིམ་པ་གཉིས་ཡོད། གཅིག་ནི་ནང་པའི་སྟོང་ཉིད་ཀྱི་ལྟ་བ་སོགས་མེད་པའི་ལས་དང་པོ་བ་དེ་རེད། གཉིས་པ་དེ་ནི་ཐེག་པ་ཆེན་པོའི་ལྟ་བ་དང་ལྡན་ཞིང་སྟོང་ཉིད་ཀྱི་གོ་བ་ཏོག་ཙམ་ཡོད་མཁན་དེ་རེད། བྱས་ཙང་། ང་ཚོས་ལམ་རིམ་དེ་དག་ཐེངས་གཅིག་འགྲིམས་པའི་རྗེས་སུ་ང་ཚོས་རང་འཇགས་ཕྱིན་ཏེ། རྒྱུད་རིམ་ཡོངས་སུ་རྫོགས་པ་སླར་ཡང་འགྲིམ་དགོས། ང་ཚོས་ལམ་གྱི་རིམ་པར་ཡང་ནས་ཡང་དུ་བསྐྱར་ལྡབ་ཡང་ལྡབ་ཀྱིས་འཇུག་དགོས། དེའི་ཚེ་སྐབས་རེ་རེའི་ནང་ང་ཚོ་གཏིང་ཇེ་ཟབ་ནས་ཇེ་ཟབ་ཏུ་འགྲོ་གི་རེད། 

ང་ཚོ་མང་ཆེ་བ་ནི་ལམ་རིམ་ལ་ཆོས་ཡངས་པའི་སྒོ་ནས་འཇུག་གི་ཡོད། དེ་ལྟར་འཇུག་པའི་སྐབས། ང་ཚོས་སྐྱེས་བ་ཕྱི་མའི་སྐོར་ལ་བསམ་བློ་གཏོང་བའམ་ཡིད་ཆེས་བྱེད་ཀྱི་མེད། དེ་ནི་ཚེ་འདི་ཙམ་གྱི་དོན་དུ་ཡིན་པ་དང་ངས་གོང་དུ་ཞུས་ཟིན་པ་ལྟར། ལམ་རིམ་ལ་འཇུག་པ་དང་ཀུན་སློང་གི་རིམ་པ་དེ་ལ་བརྟེན་ནས་ཡར་རྒྱས་གཏོང་བ་ནི་ཧ་ཅང་ཕན་ཐོགས་ཆེན་པོ་ཡོད། དེ་ནི་ནང་པའི་ཚན་རིག་དང་ནང་པའི་ལྟ་གྲུབ་ཀྱི་ཁོངས་སུ་གཏོགས་ཀྱི་ཡོད། ང་ཚོས་སྐྱེ་བ་ཕྱི་མ་ལ་སོགས་པའི་ཆོས་ལུགས་ཀྱི་དད་པའི་ལམ་ལུགས་ནང་འཇུག་གི་མེད། 

འོན་ཀྱང་། གལ་ཏེ་ང་ཚོས་སྐྱེ་བ་ཕྱི་མ་ངོ་སྤྲོད་བྱས་ན། ལྟོས་དང་ག་རེ་འབྱུང་གི་རེད། “སྐྱེ་བ་ཕྱི་མར་ང་རང་ལ་མི་ལུས་རིན་ཆེན་ཞིག་དགོས་འདོད་འདུག །གང་ཡིན་ཞེ་ན། ང་རང་ཆོས་ཀྱི་ལམ་དུ་མུ་མཐུད་ནས་འཇུག་འདོད་ཡོད་” ཅེས་བསམ་དགོས། ཡིན་ནའང་། ང་ཚོས་འདིའི་ཐད་ལ་བསམ་བློ་གང་འདྲ་ཞིག་གཏོང་གི་ཡོད་དམ། ཕལ་ཆེར་ང་ཚོས་འདི་ཐད་ལ་ “ང་རང་ངའི་དགེ་བའི་བཤེས་གཉེན་རྣམས་དང་སླར་ཡང་མཇལ་འདོད་འདུག་” ཅེས་དང་། “ང་རང་ངའི་གྲོགས་པོ་རྣམས་དང་འཕྲད་འདོད་འདུག་” ཅེས་པ་ལ་གཞིགས་ནས་བསམ་བློ་གཏོང་གིན་ཡོད་སྲིད། དེ་ལྟ་བུའི་ཆགས་སེམས་ཀྱི་རིགས་དེ་དག་ཐམས་ཅད་དེར་ཡོད་པ་རེད། ང་ཚོས་རང་གིས་རང་ལ་སྤྲུལ་སྐུ་ (ཡང་སྲིད་) ཞིག་ཡིན་བསམས་ནས། “ཁོང་ཚོས་ང་རང་སླར་ཡང་རྙེད་ཀྱི་རེད་ཅེས་དང་ང་ནི་ངའི་གྲོགས་པོ་དང་དགེ་བའི་བཤེས་གཉེན་ཚང་མ་དང་མཉམ་དུ་སླར་འཛོམས་ཡོང་གི་རེད། ང་རང་མུ་མཐུད་ནས་སྐྱེ་གི་རེད་” ཅེས་བསམ་བློ་འཁོར་གྱི་ཡོད་དམ། དེ་ནི་ང་ཚོས་གནད་དོན་འདི་ལ་འབད་བརྩོན་བྱེད་པའི་ཐོག་མའི་རིམ་པ་ཡིན་སྲིད་ནའང་། དེ་འདྲ་ཞིག་མིན་པ་གསལ་པོ་རེད། དཔེ་མཚོན་དེ་དག་གི་ནང་། ང་ཚོས་སླར་ཡང་མི་ལུས་རིན་ཆེན་དེ་ལ་དམིགས་པའི་ཚུལ་དེ་ལ་འདོད་ཆགས་དང་རང་འདོད་དོན་གཉེར་ཤུགས་ཆེན་པོ་ཞིག་ཡོད། གནས་སྐབས་རིང་དེ་ནི་འགྲིག་གི་རེད། གང་ཡིན་ཞེ་ན། མ་མཐར་ཡང་ང་ཚོས་ངན་སོང་གི་སྐྱེ་བ་སྤོང་ཕྱིར་བྱ་བ་རྩོམ་པ་ལ་གཞིགས་ནས་བསམ་བློ་གཏོང་གི་ཡོད། 

ང་ཚོས་ “ཐ་ན་ང་རང་སླར་ཡང་ངའི་གྲོགས་པོ་དང་དགེ་བའི་བཤེས་གཉེན་རྙིང་མ་རྣམས་དང་མཉམ་དུ་ཡོད་ནའང་། ད་དུང་ཡང་དཀའ་ངལ་གྱི་རིགས་ཡོང་གི་རེད་” ཅེས་པའི་བསམ་བློ་འདི་ནི་སྐྱེས་བུ་འབྲིང་གི་ལམ་གྱི་རིམ་པ་ཁོ་ནའི་སྐབས་སུ་བསམ་རྒྱུ་འགོ་ཚུགས་ཀྱི་ཡོད། ང་ཚོས་སོ་སོའི་འདོད་ཆགས་ཀྱི་ངེས་འབྱུང་དེ་ངེས་པར་དུ་སྐྱེད་དགོས། དེ་ནི་གོམ་པའམ་ཐབས་རྗེས་མ་དེ་རེད། དེ་ནི་ང་ཚོས་ལམ་རིམ་ཆ་ཚང་བ་འགྲིམས་ནས་ཐོག་མའི་སྐབས་སུ་ཚུར་ལོག་པ་དང་ངན་སོང་དུ་མི་སྐྱེ་བ་དང་བདེ་འགྲོའི་སྐྱེ་བ་བཟང་པོར་སྐྱེ་བའི་འདུན་སེམས་སྐྱེད་འགོ་ཚུགས་ཆོག །དེ་ཡང་ཚེ་འདིའི་ནང་སོ་སོའི་དགེ་བའི་བཤེས་གཉེན་དང་གྲོགས་པོ་ཚོ་ལ་ཆགས་སེམས་ཡོད་པའི་རྒྱུ་མཚན་གྱིས་མིན་པར། དེ་ལས་སེམས་རྣམ་པར་དག་པའི་སྒོ་ནས་ཡིན་པ་རེད། དེ་ལས་ཚད་མཐོ་བའི་རིམ་པའམ་སྐྱེས་བུ་ཆེན་པོའི་སྐབས། ང་ཚོས་ “ཐར་པ་དང་ཐམས་ཅད་མཁྱེན་པའི་གོ་འཕང་ཐོབ་པར་དུས་ཚོད་ཡུན་རིང་འགོར་གྱི་རེད། བྱས་ཙང་། དེ་ལ་ཉེ་བར་མཁོ་བའི་དགེ་བའི་ནུས་པ་གསོག་པ་དང་རྟོགས་པ་སྐྱེད་པར། ང་རང་ལ་མི་ལུས་རིན་པོ་ཆེ་མང་པོ་དགོས་” ཞེས་བསམ་ངེས་རེད། འདི་ནི་རིམ་པ་གཞན་ཞིག་རེད། དེ་ལྟར་ང་ཚོས་རང་འདོད་དོན་གཉེར་དབང་གིས་རང་ཉིད་ལ་ཕན་འདོགས་པར་གཞིགས་ནས་བསམ་བློ་མི་གཏོང་བར། ང་ཚོས་དེ་ལས་ཚད་མཐོ་བའི་རིམ་པ་བརྒྱུད་ནས་ཡར་རྒྱས་གོང་འཕེལ་ཆ་ཚང་བ་གཏོང་བའི་སྐབས། དེ་འདྲ་འབྱུང་གི་ཡོད། 

བཅོས་མིན་གྱི་ཀུན་སློང་དང་ལྡན་པ།

དཀའ་ངལ་ནང་གི་གཅིག་ནི་ང་ཚོར་ཕྱི་དངོས་པོའི་སྐོར་ལ་ཧ་ཅང་མགྱོགས་པོར་ངོ་སྤྲོད་བྱས་ཡོད། ང་ཚོས་རང་འདོད་དོན་གཉེར་སྤོང་དགོས་པ་དེ་སྔོན་ཚུད་ནས་ཐོས་ཟིན་པ་རེད། སྟོང་པ་ཉིད་ཀྱི་སྐོར་ལའང་ཅུང་ཟད་ཙམ་ཞིག་ཐོས་ཡོད། འོན་ཀྱང་། ང་ཚོས་ལམ་རིམ་བརྒྱུད་དེ་གཞི་རྐང་གི་རྨང་གཞིར་གྱུར་བའི་ཐོག་མའི་རིམ་པ་འདི་ལ་དངོས་གནས་འབད་བརྩོན་བྱ་རྒྱུ་དང་ཀུན་སློང་དེ་དག་ལ་བཅོས་མིན་གྱི་སྒོ་ནས་ཚོར་རྒྱུ་ཐད་ལ་སྣང་མེད་ཤོར་ཡོད། ཀུན་སློང་དེ་དག་བཅོས་མིན་གྱི་སྒོ་ནས་ཚོར་རྒྱུ་དེ་དངོས་གནས་ཁག་པོ་ཡོད། ང་ཚོས་ཚིག་རྣམས་བརྗོད་ཆོག་ཀྱང་། དེས་ང་ཚོ་སེམས་འགུལ་ཐེབས་པ་ཞིག་ཡོང་གི་མེད། 

བདག་བཟང་པོའི་འདུ་ཤེས་ཅན་ཞིག་སྐྱེད་པར་འབད་བརྩོན་བྱ་རྒྱུ་དེ་ཏོག་ཙམ་བརྟན་ཆ་ཆེ་བ་དང་དངོས་ཡོད་དང་མཐུན་ཆེ་བ་ཆགས་ཀྱི་ཡོད། གལ་ཏེ་ང་ཚོ་དངོས་གནས་སྐྱེ་བ་ཕྱི་མར་ཕན་པའི་དོན་དུ་བཅོས་མིན་གྱིས་བསམ་བློ་གཏོང་བའི་མཚམས་སུ་བསླེབས་ན། དེ་ནི་ཐོག་མར་རང་འདོད་དོན་གཉེར་ལ་བརྟེན་པ་ཞིག་ཆགས་ཀྱི་རེད། དེ་ནི་འགྲིག་གི་རེད། “ང་རང་ངའི་དགེ་བའི་བཤེས་གཉེན་རྣམས་ཀྱིས་རྟག་ཏུ་བསྐྱབ་པའི་ཕྱིར། ང་ལ་མི་ལུས་རིན་ཆེན་ཞིག་དགོས་” ཞེས་སོགས་བསམ་བློ་དེའི་རིགས་གཏོང་གི་ཡོད། ང་ཚོས་དངོས་གནས་མུ་མཐུད་ནས་ཡར་རྒྱས་གཏོང་བའི་སྐབས། སྟོང་ཉིད་ཀྱི་གོ་རྟོགས་དེ་ལག་བསྟར་བྱེད་ནུས་པ་ཡོང་གི་རེད། དེ་ལྟ་ནའང་། ཆད་མཐར་ལྷུང་རྒྱུའི་ཉེན་ཁ་ཆེན་པོ་ཡོད་པས། ཆེས་ཐོག་མ་འགོ་འཛུགས་པའི་སྐབས་ནས་འདི་ལག་ལེན་བསྟར་ཐབས་བྱ་རྒྱུ་མེད།

ཇི་སྲིད་ང་ཚོས་རང་འདོད་དོན་གཉེར་དང་ཆགས་སེམས་ལ་བརྟེན་ནས་སྐྱེ་བ་ཕྱི་མའི་དོན་དུ་འབད་པའི་རིམ་པ་འདི་གནས་སྐབས་རིང་ཡིན་པ་རྟོགས་པ་དེ་སྲིད་དུ་དེ་ནི་འགྲིག་པ་རེད། ང་ཚོས་དེ་ནི་དོན་ངོ་མའི་མཐར་ཐུག་གི་གནད་དོན་ཞིག་ཏུ་དང་ལེན་བྱེད་ཀྱི་མེད། ཡིན་ནའང་། གནས་སྐབས་རིང་གི་ཐབས་ཚུལ་ལྟ་བུར་དང་ལེན་བྱེད་པ་དེས་ང་ཚོས་དེ་བཅོས་མིན་གྱི་སྒོ་ནས་ལས་སླ་བ་ཚོར་དུ་འཇུག་གི་ཡོད། བཅོས་མིན་ལྷག་བསམ་གྱི་སྒོ་ནས་ “ངས་ངའི་སྐྱེ་བ་ཕྱི་མའི་དོན་དུ་འབད་བརྩོན་བྱེད་ཀྱིན་ཡོད། དེའི་ཐད་ངས་བྱ་བ་ཞིག་བྱེད་བཞིན་ཡོད་” ཅེས་པའི་ཀུན་སློང་རང་རྒྱུད་ལ་སྐྱེད་རྒྱུ་དེ་ནི་ཧ་ཅང་གལ་ཆེན་པོ་རེད་བསམ་གྱི་འདུག །ཕྱིས་སུ་ང་ཚོས་སྐྱེ་བ་ཕྱི་མ་དེ་དག་གི་ནང་ང་ཚོ་ཇི་ལྟར་གྲུབ་ཚུལ་ལ་སོགས་པའི་སྐོར་བསམ་བློ་གཏོང་ཆོག་པ་དང་ང་ཚོའི་རྟོགས་པ་གོང་མཐོར་གཏོང་ཆོག

ང་རང་རང་གི་མི་ཚེ་ལས་ངས་དཔེ་མཚོན་ཞིག་ཞུ་རྒྱུ་ཡིན། ང་རང་ལ་མཚོན་ན། ནང་ཆོས་ལ་སློབ་སྦྱོང་བྱ་ཕྱིར་གཞི་རྒྱ་ཆེ་བའི་དྲྭ་ཚིགས་འདི་གསར་སྐྲུན་ཆེད་ཧ་ཅང་འབད་བརྩོན་གྱིས་མཉམ་བཞུགས་བྱེད་མཁན་ཞིག་ཡིན། ངས་འདིའི་ཆེད་དུ་ལས་ཀ་གང་བྱེད་བཞིན་པ་ཚང་མ་ལ་བརྟེན་ནས་སྐྱེ་བ་ཕྱི་མའི་ནང་ང་རང་ལ་མི་ལུས་རིན་ཆེན་ཞིག་ཐོབ་པ་དང་། ངས་འདི་དྲྭ་རྒྱའི་ལམ་ནས་ཧ་ཅང་མྱུར་པོར་རྙེད་ཐུབ་པ་དང་ཆོས་ལ་ཁ་སྒྱུར་ཐུབ་པའི་རེ་བ་བྱེད་བཞིན་ཡོད། ང་རང་གཞོན་པའི་དུས་སུ་ང་རང་དེའི་ཕྱོགས་སུ་ཡིད་འགུག་པ་ཞིག་ཡོང་བའི་རེ་བ་བྱེད་བཞིན་ཡོད། བསམ་བློ་དེ་དག་ནི་དངོས་གནས་དྲང་གནས་དྲྭ་ཚིགས་ལ་བརྟེན་ནས་ང་རང་ལ་འཐོབ་པར་འགྱུར་བའི་ཕན་ཡོན་ཁོ་ནར་དམིགས་ཡོད། མི་གཞན་དག་ལ་དེས་ཕན་སྲིད་པ་དང་དེ་ནི་བྱ་བ་རླབས་ཆེན་ཞིག་རེད། འོན་ཀྱང་། ངས་དེ་ཧ་ཅང་མྱུར་པོ་དང་ལས་སླ་པོའི་ངང་ནས་རྙེད་ཐུབ་པ་དང་ཤེས་ཐུབ་པར་དངོས་གནས་དོ་འཁུར་ཅན་ཞིག་ཡིན་པ་དང་། དེ་ནས་ངས་མུ་མཐུད་ནས་དེ་རྒྱུན་སྲིང་བ་དང་སླར་ཡང་འབད་བརྩོན་བྱེད་ཐུབ་པའི་རེ་བ་ཡོད། དེ་ལ་ཆགས་སེམས་ཡོད་ངེས་པ་རེད། ཡིན་ནའང་། དེས་རང་ཉིད་ལ་སྐྱེ་བ་ཕྱི་མའི་དོན་དུ་བཅོས་མིན་གྱི་འབད་བརྩོན་བྱེད་པའི་ཀུན་སློང་འདིའང་སྐྱེད་དུ་འཇུག་གི་ཡོད། མཐར་རང་ཉིད་ཐོག་མའི་ཀུན་སློང་གི་རིམ་པའམ་སྐྱེས་བུ་ཆུང་ངུའི་ལམ་གྱི་རིམ་པའི་བཅོས་མིན་ལྷག་བསམ་གྱི་རིམ་པ་ངེས་ཅན་ཞིག་ལ་ཡོད་སྲིད་ཅེས་ངས་བསམ་བློ་གཏོང་འགོ་ཚུགས་ཆོག

ངས་གང་བརྗོད་ཀྱིན་ཡོད་ཅེ་ན། ཀུན་སློང་དེ་དག་ལྷག་བསམ་རྣམ་པར་དག་པ་ཞིག་ཡོང་ཐབས་བྱེད་པ་ནི་གོམ་པ་དང་པོ་དེ་ཡིན་ལ། གོམ་པ་གལ་ཆེ་ཤོས་དེ་རེད། དེ་ནས་ང་ཚོས་ཀུན་སློང་བཅོས་མིན་ལྷག་བསམ་ཅན་ལ་གཞིགས་ནས་བདག་ལ་སོགས་པའི་དངོས་ཡོད་གནས་ཚུལ་གྱི་རྟོགས་པ་གོང་མཐོར་གཏོང་ཐུབ། ཡིན་ནའང་། གལ་ཏེ་ང་ཚོའི་ཀུན་སློང་དེ་ལྷག་བསམ་རྣམ་དག་ཅིག་མེད་པར་ང་ཚོས་དེ་ལྷག་བསམ་ཡོང་བར་མཆོང་རྒྱག་རང་རྒྱག་པའམ་ཡང་ན་དེ་གོང་མཐོར་གཏོང་བའི་ཆེད་མཆོངས་པ་ཡིན་ན། ང་ཚོས་གང་ཡར་རྒྱས་གཏོང་བཞིན་ཡོད་དམ། ང་ཚོར་གང་ཡང་མེད་པར་ལྷག་པ་རེད། གལ་ཏེ་ང་ཚོས་བདག་མེད་པའི་ཕྱིར་ན་བྲེལ་འཚུབ་ངང་ནས་རང་འདོད་དོན་གཉེར་མེད་པ་ཞིག་དགོས་ཞེས་བསམ་པ་དང་། ཡང་གལ་ཏེ་བདག་མེད་ན། བདག་ཅིག་གི་དོན་དུ་ང་ཚོས་སྐྱེ་བ་ཕྱི་མར་མིའི་ལུས་རྟེན་དུ་སྐྱེ་བར་འབད་བརྩོན་གང་དྲག་ཅིའི་ཕྱིར་བྱེད་དགོས་སམ། དེ་ནས་ང་ཚོར་གང་ཡང་མེད་པར་ལྷག་པ་རེད། 

དེ་དག་ནི་བསམ་ཞིབ་བྱ་དགོས་པའི་གནད་དོན་གལ་ཆེན་ཁག་རེད། དེ་དག་རང་རྒྱུད་ལ་ངེས་ཐབས་གནང་རོགས། 

(སྒོམ་དུས།)