ཕྲག་དོག་ལ་ཞིབ་ཕྲར་དཔྱད་པ། ང་དམིགས་བསལ་དང་ཁྱོད་དམིགས་བསལ་ཟེར་བ་མེད།

ཕྲག་དོག་གི་རྣམ་པ་དེ་དག་རྟོགས་པ་ནི་དཀའ་ངལ་ལ་གདོང་ལེན་བྱེད་པའི་རིམ་པ་དང་པོ་དེ་རེད། དེ་དག་ཐམས་ཀྱི་རྨང་གཞིར་གྱུར་བ་ནི། གང་ལྟར་ཡང་ “ང་” ཞེས་བྱ་བའི་དཀའ་ངལ་དེ་རེད། མཐར་ང་ཚོ་ཕྲག་དོག་བཟའ་གི་མེད་ཅེས་ངེས་བརྟན་བཟོ་བར། འདི་ལ་ཡར་རྒྱས་གཏོང་དགོས་ཀྱི་ཡོད། ནོར་འཁྲུལ་དེ་གང་རེད་ཅེ་ན། ང་ཚོས་མི་ཚེའི་རྣམ་པ་བྱེ་བྲག་པ་ཞིག་ལ་ཚད་བརྒལ་གྱི་སྒྲོ་འདོགས་བྱེད་སྟངས་དེ་དང་། ང་ཚོའི་རང་མཐོང་དང་རང་གི་རིན་ཐང་གི་ཚོར་བ་ཡོངས་སུ་རྫོགས་པ་དེ་ལ་གཞི་རྩ་བྱེད་པ་དེ་རེད། གཞི་རྩ་དེ་ཁོ་ན་ལ་བརྟེན་ནས་ང་ཚོ་ཕྲག་དོག་ཅན་ཆགས་ཀྱི་ཡོད་པ་དང་། དེས་རང་གི་ངོ་བོ་དང་འབྲེལ་བའི་དཀའ་ངལ་འབྱུང་བར་བྱེད་ཀྱི་ཡོད། དེ་ཡང་ “ང་སུ་རེད་དམ་” ཞེས་ཟེར་བ་དང་། སོ་སོ་རང་ཉིད་འགྲེལ་བརྗོད་ཇི་ལྟར་བྱེད་དམ། དེ་ནི་ང་ཚོའི་དངུལ་རེད་དམ། ང་ཚོ་ལྟ་ན་སྡུག་པ་ཡོད་ཙང་རེད་དམ། ཡང་ན་ང་ཚོའི་མི་ཚེའི་ནང་གི་གོ་གནས་ལ་བརྟེན་ནས་རེད་དམ། མི་མང་པོས་དེ་འདྲ་བྱེད་ཀྱི་ཡོད། མ་རེད་དམ། དཔེར་ན། “ང་ནི་སྨན་པ་ཞིག་ཡིན། ང་ནི་ཕ་མ་ཡིན། ང་ནི་གཅིག་ཡིན་གཉིས་ཡིན་” ཞེས་སོགས་ཟེར་བ་ལྟ་བུ་རེད། དེ་འདྲ་བྱེད་པའི་སྐབས་སུ་ང་ཚོས་ང་ཞེས་བྱ་བ་དེ་ལ་ཚད་བརྒལ་གྱི་ནན་བརྗོད་བྱེད་ཀྱི་ཡོད་པ་དང་། ང་ཟེར་བ་དེ་རྡོག་རྡོག་ཅིག་ཡོད་པ་དང་དེ་ལ་ཚུགས་ཐུབ་ཏུ་གྲུབ་པའི་ངོ་བོ་གཅིག་ཡོད་པར་འགྲེལ་བརྗོད་བྱེད་ཀྱི་ཡོད། དེ་ལ་ང་ཚོས་ང་ཟེར་བ་བདེན་པ་དང་ངོ་མ་ཞིག་ཡིན་པར་ཡིད་ཆེས་བྱེད་ཀྱི་ཡོད། དེ་ལྟར་ང་དེ་མི་ཚེའི་ནང་དགོས་པའི་གནད་དོན་ཁོ་ན་དེ་ཆགས་ནས་གཞན་ཐམས་ཅད་གལ་ཆེན་མིན་པ་ལྟ་བུར་ང་ཚོས་ཁས་ལེན་བྱེད་ཀྱི་མེད། ང་ཚོའི་དངུལ་ཁང་དུ་དངུལ་ག་ཚོད་ཡོད་པ་ལྟ་བུ་འདི་གཅིག་པུ་དངོས་སུ་བརྩི་གི་ཡོད། ང་ཚོར་མང་ཆེ་བ་ལ་འདི་ནི་ང་ཚོའི་ཕ་མས་གང་བཤད་པ་དེ་རེད། 

འདི་ནི་དངུལ་དང་གོ་གནས་སོགས་ཕྱིའི་དངོས་པོར་གདོང་ལེན་བྱེད་པ་ཙམ་མིན་པར། བརྩེ་སེམས་ལའང་དེ་ངོས་འཛིན་རྒྱུ་གལ་ཆེན་པོ་རེད། ང་ཚོ་འགའ་ཤས་ཀྱིས་མི་ཚེའི་ནང་གི་གལ་ཆེ་ཤོས་ནི་བྱམས་པ་དང་བརྩེ་བ་ཐོབ་པ་དེ་ཡིན་ཞེས་བསམ་སྲིད། ང་ཚོས་མི་གཞན་ཞིག་ལ་དེ་ཡོད་པ་དང་ང་ཚོར་མེད་ཅེས་བསམ་པ་དང་རང་མཐོང་གི་ཚོར་བ་དེ་ལ་གཞི་བཅོལ་གྱི་ཡོད། དེ་ནི་ཕྱི་དངོས་པོ་ལས་ཀྱང་ཤིན་ཏུ་ཕྲ་བ་ཞིག་རེད། གལ་ཏེ་ང་ཚོས་ངོ་ཤེས་པའི་མི་ཚང་མར་ཟླ་རོགས་བརྩེ་བ་དང་ལྡན་པ་ཡོད་པ་དང་། སོ་སོ་རང་ཉིད་ནང་དུ་ཁེར་རྐྱང་ཡིན་ན། ང་ཚོ་སྨྱོན་པ་ནང་བཞིན་ཕྲག་དོག་ཅན་ཆགས་ངེས་རེད། ང་ཚོས་ཤིན་ཏུ་ཕྲ་བའི་གནད་དོན་དེ་དག་ལའང་གདོང་ལེན་བྱེད་དགོས་ཤིང་། ཕྲག་དོག་གི་དཀའ་ངལ་འདི་རྩ་མེད་གཏོང་བར་དངོས་གནས་ངེས་བརྟན་བཟོ་དགོས། 

འདི་ལ་བསམ་ཞིབ་ཏོག་ཙམ་བྱོས་དང་། ང་ཚོ་མང་ཆེ་བས་ཕྲག་དོག་གི་སྐད་ཅིག་གམ་དུས་སྐབས་ཉམས་སུ་མྱངས་ཡོད། ཕྲག་དོག་གིས་ང་ཚོའི་མི་ཚེ་སྡུག་བསྔལ་བར་བྱས་པའི་སྣང་ཚུལ་དེ་འདྲ་བྱུང་ཡོད། ང་ཚོའི་ཉམས་མྱོང་གི་ནང་དེ་དག་ཐམས་ཅད་ཀྱི་རྨང་གཞིར་གྱུར་བ་དེ་གང་རེད་ཅེས་ངོས་འཛིན་ཐབས་བྱེད་ཀྱི་ཡིན། ང་ཚོས་སོ་སོའི་མི་ཚེའི་ནང་གལ་ཆེ་ཤོས་དེ་གང་ལ་ངོས་འཛིན་བྱེད་དམ། ང་ཚོར་མེད་པའམ་མི་གཞན་ཞིག་ལ་ང་ཚོ་ལས་མང་བ་ཡོད་ན། ཕྲག་དོག་ཅན་ཆགས་པ་དེ་རེད་དམ། དེ་ལ་བསམ་ཞིབ་བྱེད་དགོས། གནད་དོན་འདི་དངོས་གནས་མི་ཚེའི་ནང་གི་གལ་ཆེ་ཤོས་དང་། རང་ཉིད་སུ་ཡིན་འགྲེལ་བརྗོད་བྱེད་མཁན་གཅིག་པུ་དེ་རེད་དམ། དཔེར་ན། “ང་ནི་ཟླ་རོགས་མེད་མཁན་ཞིག་ཡིན།” དེ་ནི་སོ་སོ་རང་ཉིད་ཀྱི་སྐོར་ཤོད་རྒྱུ་གཅིག་པུ་དེ་རེད་དམ། ང་ཚོ་འཆི་རྒྱུ་ཡིན་པ་དང་མི་ཞིག་གིས་ང་ཚོའི་མི་ཚེ་ཚིག་སྒྲུབ་གཅིག་གི་ནང་ཕྱོགས་སྡོམ་རྒྱག་པ་དང་། དེ་ནི་ང་ཚོའི་དུར་བྱང་ལ་གང་དགོས་འདོད་བྱེད་པ་དེ་རེད་དམ། དེ་ནི་གཞན་གྱིས་ང་ཚོར་དྲན་དགོས་པའི་གནད་དོན་གཅིག་པུ་དེ་རེད་དམ། བསམ་བློ་དེ་འདྲ་གཏོང་བ་ནི་གནད་དོན་ཡོངས་རྫོགས་ཀྱི་ཆོ་མེད་པའི་རང་བཞིན་དེ་ལྟ་བའི་ཐབས་ལམ་ཡག་པོ་ཞིག་རེད། 

དེ་ཆོ་མེད་བཟོས་ནས་ང་ཚོས་གནད་དོན་གཅིག་རང་གི་ཐོག་ལ་དམིགས་པ་གཏད་པའི་ཆོ་མེད་ཀྱི་རང་བཞིན་དེ་མཐོང་གི་ཡོད། ང་ཚོས་ “འདི་ང་རང་སུ་ཡིན་པ་དེ་རེད། འདི་ནི་གནད་དོན་གལ་ཆེ་ཤོས་དེ་ཡིན་པ་དང་། མི་གཞན་སུ་འདྲ་ཞིག་ང་ལས་ཡག་ག་ཡོད་ན། ངས་བཟོད་ཐུབ་ཀྱི་མི་འདུག་” ཅེས་བསམ་པའི་སྐབས། འདིས་ང་ཚོར་དེ་དག་ཐམས་ཅད་ཇི་ལྟར་རྒོད་བྲོ་པོ་ཞིག་ཡོད་པ་ཤེས་ཕྱིར་དང་དེ་ལས་ཐར་བར་རོགས་བྱེད་ཀྱི་ཡོད། གལ་ཏེ་ཁྱེད་ཀྱིས་དེ་ཅི་འདྲའི་ཆོ་མེད་པ་ཞིག་ཡིན་པ་དེ་མ་མཐོང་ན། དེ་འདོར་རྒྱུ་ཧ་ཅང་ཁག་པོ་ཡོད། ཁྱེད་ཀྱིས་ཕྲག་དོག་ལ་ཡོད་པའི་སོ་སོ་སྒེར་གྱི་ཉམས་མྱོང་ལ་གཞིགས་ནས་དེ་འདྲར་ཏོག་ཙམ་བསམ་བློ་གཏོང་དགོས། 

(སྒོམ་གྱི་བར་མཚམས།)

གལ་ཏེ་ཁྱེད་ཀྱིས་ཏོག་ཙམ་གྱི་རིང་བསམ་ཞིབ་བྱས་ན། ང་ཚོས་ཕྲག་དོག་གི་སྐོར་ཤོད་སྐབས་ནང་ཆོས་ནས་གང་འགྲེལ་བརྗོད་བྱེད་ཀྱི་ཡོད་ཤེས་སྲིད། ནུབ་ཕྱོགས་སུ་ང་ཚོས་ཨིན་སྐད་ནང་གི་ (envy) མིག་སེར་གྱི་སྐོར་ཤོད་ཀྱི་ཡོད། འོན་ཀྱང་འདི་ལ་ཚིག་ལོགས་སུ་ལེགས་སྦྱར་དང་བོད་སྐད་ནང་མེད། མིག་སེར་དེ་ཕྲག་དོག་གི་སྒང་ལ་ཁ་སྣོན་བྱེད་པ་དང་དེ་ལ་ནང་ཆོས་ནང་རྣབ་སེམས་ཟེར་གྱི་ཡོད། དེ་ནི་ང་ཚོས་མི་ཚེའི་ཆ་ཤས་གཅིག་ལ་ཚད་བརྒལ་གྱི་ནན་བཤད་བྱེད་པ་དང་། མི་གཞན་ཞིག་རང་ཉིད་ལས་ཡག་ག་དང་ལམ་ལྷོང་ཆེ་བ་ཡོད་པའི་སྐབས་དེ་ལ་བཟོད་མི་ཐུབ་པ་ཙམ་དུ་མ་ཟད། དེ་དག་རང་ཉིད་ལ་འཐོབ་འདོད་བྱེད་ཀྱི་ཡོད། དེ་ནི་མིག་སེར་རེད། ང་ཚོ་མིག་སེར་ཅན་ཆགས་པ་རེད།

འདི་ཡང་གནས་སྟངས་གཉིས་ཀྱི་ནང་སླེབས་ཀྱི་ཡོད། དང་པོ། ང་ཚོ་སོ་སོ་རང་ཉིད་ལ་གང་ཡང་མེད་པ་དང་གཞན་ལ་གང་ཡོད་པ་དེ་འཐོབ་འདོད་བྱེད་པ་དེ་ཡིན་སྲིད། གཉིས་པ། ང་ཚོར་སྔོན་ཚུད་ནས་གཅིག་ཡོད་པ་དང་དེ་ཡང་འདང་ངེས་ཤིག་ཡོད། འོན་ཀྱང་ང་ཚོ་འདོད་རྔམ་སྐྱེ་གི་ཡོད། ང་ཚོར་དེ་ལས་མང་བ་དགོས་འདོད་བྱེད་ཀྱི་ཡོད། གང་ཡིན་ཞེ་ན། མི་གཞན་དེ་ལ་མང་བ་ཡོད། གནས་སྟངས་གཉིས་པ་ལ་མཚོན་ན། འདོད་རྔམ་དེས་འགྲན་སེམས་སྐྱེ་འཇུག་པ་དང་། དེ་ལ་བརྟེན་ནས་ང་ཚོས་མི་གཞན་དེ་ཟིལ་གྱིས་གནོན་འདོད་སྐྱེ་གི་ཡོད། 

འདི་དང་འབྲེལ་བའི་ཉོན་མོངས་པའི་སེམས་ཀྱི་གནས་བབས་གཞན་མང་པོ་ཡོད། དེ་དག་ཀྱང་ཕྲག་དོག་ཅེས་འགྲེལ་བརྗོད་བྱས་པའི་ཧ་ཅང་གཞི་རྩའི་རྣམ་པ་འདི་ལས་འབྱུང་གི་ཡོད། ད་དུང་ཡང་དེ་དག་ཐམས་ཅད་ཀྱི་འོག་ཏུ་ “ང་” ཞེས་བྱ་བའི་བསམ་བློའི་དཀའ་ངལ་གཅིག་མཚུངས་ཤིག་ཡོད། ང་ཚོས་རང་ཉིད་དམིགས་བསལ་ཡིན་བསམ་གྱི་ཡོད། ང་ཚོས་སོ་སོ་རང་ཉིད་གལ་ཆེན་པོ་ཡིན་བསམ་གྱི་ཡོད། དེ་འདྲ་སོང་ཙང་། ང་ཚོ་རྟག་ཏུ་དང་པོ་ཡོང་དགོས་པ་དང་ཡག་ཤོས་དེ་ཡིན་དགོས་ཀྱི་ཡོད། ང་ཚོས་གཞན་རྣམས་འདྲ་མཉམ་དུ་བརྩི་གི་མེད་ལ། ང་ཚོ་ལ་གང་ཡོད་པ་ནང་བཞིན་གཞན་དག་ལའང་ཡོད་ན་ཅི་མ་རུང་ཞེས་བསམ་བློ་གཏོང་གི་མེད་ངེས་རེད། ང་ཟེར་བའི་ཚོར་བ་ཤུགས་ཆེན་འདི་ལ་བརྟེན་ནས་ང་ཚོ་ཡག་ག་དང་བཟང་བ་ཡིན་དགོས་ཀྱི་ཡོད། 

ང་ཚོས་གོང་དུ་མཐོང་བ་ལྟར། སྤྱི་ཚོགས་ཀྱི་རྣམ་པ་མང་པོས་ཕྲག་དོག་དང་འགྲན་སེམས་ལ་དཔུང་སྣོན་བྱེད་ཀྱི་ཡོད། ང་ཚོར་རྩེད་མོར་རྒྱལ་ཁ་ཐོབ་མཁན་དང་གྲགས་ཅན་མི་སྣ། དེ་བཞིན་ཐེར་འབུམ་བདག་པོ་བཅས་ཀྱི་ཆེ་བསྟོད་ཡོད་པ་དང་། དུས་དེབ་དང་བརྙན་དེབ་ཁག་གི་ནང་ཁོང་ཚོ་དམིགས་བསལ་བརྗོད་གཞིར་བཟུང་ནས་འགྲེལ་བརྗོད་བྱེད་པ་ལ་མང་ཚོགས་ཀྱི་ནང་ཁྱབ་བསྒྲགས་ཆེ་ཤོས་འགྲོ་གི་ཡོད། དཔེར་ན། ན་ཚ་ཞིག་དང་འདྲ་བར། འདིས་ང་ཚོའི་མི་ཚེ་ཇི་ལྟར་སྐྱེལ་ཚུལ་དང་ང་ཚོའི་ལས་ཀ་དང་འབྲེལ་ལམ་ལ་གདོང་ལེན་ཇི་ལྟར་བྱེད་ཚུལ་བཅས་ཀྱི་བསམ་བློའི་ཁྱེར་སོ་ལ་ཤན་ཞུགས་ཀྱི་ཡོད། གལ་ཏེ་བདེ་ཐང་ཆེ་ཤོས་དང་ནུས་སྟོབས་ཆེ་ཤོས་དེ་འཚོ་བ་ཡིན་ན། དེ་ནས་ང་ཚོས་ཚང་མ་དང་མཉམ་དུ་འགྲན་སྡུར་བྱེད་དགོས་པ་དང་། མི་སུ་འདྲ་ཞིག་གིས་ཡག་ག་དང་བཟང་བ་བྱེད་པའི་སྐབས། ང་ཚོ་ཕྲག་དོག་ཅན་ཆགས་ཀྱི་ཡོད། 

གང་ལྟར་ཡང་། ཕྲག་དོག་ནི་རྟག་ཏུ་འགྲན་སེམས་དང་འབྲེལ་བ་མེད། གང་ཡིན་ཟེར་ན། ཕྲག་དོག་དེ་སྐབས་རེར་སོ་སོའི་རང་མཐོང་གི་སྟེང་དུ་སླེབས་ཀྱི་ཡོད། གལ་ཏེ་ང་ཚོར་རང་མཐོང་ཧ་ཅང་དམའ་པོ་ཡོད་ན། དེ་ནི་རྒྱུ་མཚན་སྣ་ཚོགས་ལ་བརྟེན་ནས་ནུབ་ཕྱོགས་ཀྱི་རིག་གཞུང་ནང་ཁྱབ་གདལ་འགྲོ་བཞིན་པའི་དཀའ་ངལ་ཞིག་ཡིན་པ་དང་། ང་ཚོས་གཞན་ལ་གང་ལམ་ལྷོང་བྱུང་བ་དེར་ཧ་ཅང་ཕྲག་དོག་སྐྱེ་སྲིད་པ་རེད། འདིས་འགྲན་སྡུར་གྱི་ཕྱོགས་སུ་འཁྲིད་ཀྱི་མེད། འོན་ཀྱང་ “ངས་དེ་ཕལ་ཆེར་ལེགས་གྲུབ་ཐུབ་ས་མ་རེད། ང་རང་འགྲིག་ངེས་ཀྱི་ཡག་པོ་མེད་” ཅེས་པའི་ཚོར་བ་དེ་ཙམ་ཞིག་ཡོད། ང་ཚོས་ཐ་ན་ཐབས་ཤེས་ཙམ་མི་བྱེད་པར། སོ་སོ་རང་ཉིད་སེམས་པ་སྐྱོ་ནས་སྡོད་ཀྱི་ཡོད། ང་ཚོས་ “སོ་སོ་རང་ཉིད་ཕམ་ཁ་ཅན་ཞིག་” ཡིན་པའི་སྐབས། གཞན་ཚང་མ་ཧ་ཅང་ལམ་ལྷོང་ལྡན་པ་ཡིན་པ་སོང་ཙང་། སོ་སོ་རང་ཉིད་ལ་ཡ་ང་སྙིང་རྗེ་སྐྱེ་གི་ཡོད། འདི་ནི་ང་ཟེར་བ་དེ་ཕྲག་དོག་ལ་མངོན་དུ་འགྱུར་བ་དང་མཉམ་དུ་ཚད་བརྒལ་གྱི་ནན་བརྗོད་དང་སྔོན་ཚུད་ལས་བྲེལ་གྱི་རྣམ་པའི་ནང་ཡོད་པའི་ཐབས་ཚུལ་གཞན་ཞིག་རེད། 

ནང་ཆོས་ཀྱི་ནང་། ང་ཚོས་མི་གཞན་དག་གི་འགྲུབ་འབྲས་དང་ལམ་ལྷོང་ལ་དམིགས་པ་དེས་ཕ་རོལ་པོར་སྡང་འཛིན་ཅན་སྐྱེ་རུ་འཇུག་པ་ལ་གཞིགས་ནས་ཕྲག་དོག་ལ་བརྟག་དཔྱད་བྱེད་ཀྱི་ཡོད། དམིགས་གཏད་ཅུང་ཟད་མི་འདྲ་བའི་ང་ཚོས་ཉམས་སུ་མྱོང་བའི་ཕྲག་དོག་གི་རྣམ་པ་གཞན་དག་ཀྱང་ཡོད། དམིགས་ས་དེ་ཡང་མི་ཞིག་གིས་མི་གཞན་ཞིག་ལ་ཅ་དངོས་སོགས་གང་རུང་ཞིག་སྦྱིན་པ་དང་སོ་སོ་རང་ཉིད་ལ་མ་སྦྱིན་པའི་གང་ཟག་དེ་ལ་དམིགས་ཀྱི་ཡོད། དེ་ནི་འབྲེལ་བ་ཆགས་ཡོད་ནའང་ཅུང་ཟད་མི་འདྲ་བ་ཡོད། དེ་ནི་ “ཁྱེད་ཀྱིས་མི་ཞིག་ལ་བྱམས་པ་དང་བརྩེ་བ་སྤྲད་ཡོད་པ་དང་ང་ལ་སྤྲད་མེད་” པ་ལྟ་བུ་རེད། བྱམས་པ་དང་བརྩེ་བ་ཐོབ་མཁན་གྱི་མི་དེ་ལ་ང་ཚོ་ཧ་ཅང་ཁོང་ཁྲོ་བཟའ་བ་དང་བློ་ཕམ་དེ་འདྲ་བྱེད་ཀྱི་མེད་ནའང་། དེ་ལས་ལྡོག་སྟེ། ང་ཚོར་བྱམས་བརྩེ་མི་སྤྲོད་མཁན་གྱི་གང་ཟག་དེ་ལ་ང་ཚོས་ཁོང་ཁྲོ་བ་དང་བློ་ཕམ་བྱེད་ཀྱི་ཡོད། ཁོང་ཚོས་མི་གཞན་ཞིག་ལ་སྤྲད་པ་རེད། ང་ཚོས་འདིའི་རིགས་ཀྱི་ཕྲག་དོག་ཡང་སེ་ཉམས་སུ་མྱོང་གི་ཡོད། མ་རེད་དམ། 

གལ་ཏེ་ཁྱེད་ཀྱིས་དེའི་ཐད་ལ་བསམ་བློ་བཏང་ན། འདི་ནི་གང་འཚམ་གྱི་འགལ་འདུ་ཅན་ཞིག་རེད། གང་ཡིན་ཞེ་ན། ང་ཚོ་ཁོང་ཁྲོ་བཟའ་སའི་མི་དེ་ལ་སོ་སོའི་ཁོང་ཁྲོ་དང་ཕྲག་དོག་ཆ་ཚང་སྟོན་པའི་སྐབས། མི་དེའི་བློའི་ཁྱེར་སོ་འགྱུར་བ་བཏང་ནས་ད་ལྟ་ང་ཚོར་དགའ་པོ་བྱེད་ཀྱི་རེད་ཅེས་རེ་བ་ཇི་ལྟར་བྱེད་ཐུབ་བམ། དེ་ནི་གཏི་མུག་བྱིས་བློའི་སྒོ་ནས་རང་གིས་རང་ཕུངས་བའམ་རང་གིས་རང་ལ་གནོད་པ་ཞིག་རེད། འོན་ཀྱང་དེ་ནི་ནམ་རྒྱུན་ང་ཚོའི་ཐབས་བྱུས་དེ་རེད། ང་ཚོས་ཁོང་ཁྲོ་བཟས་ནས་མི་ཕ་རོལ་པོ་དེ་ལ་སྐད་ལོག་རྒྱག་བཞིན་དུ་ “ཁྱེད་རང་མི་གཞན་ཞིག་དང་མཉམ་དུ་ཕྱི་ལ་འགྲོ་དགོས་པའི་རྒྱུ་མཚན་གང་རེད་དམ། ང་དང་མཉམ་དུ་ནང་ལ་སྡོད་དང་” ཞེས་ནན་བཤད་བྱེད་པའི་སྐབས། མི་གཞན་དེས་གློ་བུར་དུ་ “ཨོ་རེད། དགོངས་དག །ད་ང་རང་ཁྱེད་ལ་བརྩེ་བ་ཡོད་” ཅེས་བརྗོད་རྩིས་ཡོད་པའི་ངེས་པ་ཆེར་མེད། གལ་ཏེ་མི་དེ་ནང་དུ་བསྡད་ན། དེ་ནི་ནག་ཉེས་དང་ང་ཚོར་ཡ་ང་སྙིང་རྗེ་ཁོ་ན་ཡོད་པའི་དབང་གིས་རེད། ཡིན་ནའང་དེ་ང་ཚོར་འདོད་བློ་ག་ཚོད་ཁེངས་སམ། ཁོང་ཚོའི་སེམས་པ་གཞན་ཞིག་གི་ཕྱོགས་སུ་ཡོད་པས། ང་ཚོ་མཉམ་དུ་དངོས་གནས་མེད། མཐར་ང་ཚོ་མུ་མཐུད་དེ་སྐྱིད་པོ་མེད་པ་ཆགས་ཀྱི་རེད། གང་ཡིན་ཞེ་ན། ང་ཚོའི་དཀའ་ངལ་དེ་རྩ་བ་ནས་སེལ་མེད། 

གལ་ཏེ་ཁྱེད་ཀྱིས་ཐབས་ཚུལ་འདིའི་རྗེས་སུ་འབྲངས་ཡོད་མེད་ཏོག་ཙམ་ལྟ་ཞིབ་བྱེད་དགོས། དེ་ལམ་ལྷོང་ཆེན་པོ་ག་ཚོད་བྱུང་ཡོད་དམ། ང་ཚོས་དེ་ལ་གད་མོ་ཤོར་ཐུབ་པའི་སྐབས་ཁོ་ནར་དེ་ག་ཚོད་ཀྱིས་ཆོ་མེད་ཡིན་པ་མཐོང་གི་རེད། དེ་ནི་དཀའ་ངལ་སེལ་བའི་ཐབས་ཤིག་མིན་པར་ངོས་འཛིན་བྱེད་དགོས། ཐ་ན་ང་ཚོ་ཁོང་ཁྲོ་བཟའ་བ་དང་ཕྲག་དོག་སྐྱེས་ནའང་། དཀའ་ངལ་སེལ་ཐབས་ནི་དེའི་དབང་འོག་ཏུ་བྱ་སྤྱོད་མི་སྤེལ་རྒྱུ་དེ་རེད། གནད་དོན་གཙོ་བོ་ནི་ཚོར་བ་འདི་དག་ཐམས་ལམ་གཞན་གྱི་བརྒྱུད་ནས་མེད་པ་བཟོ་རྒྱུ་དེ་རེད། 

ཨིན་སྐད་ཚིག་མཛོད་ནང་གི་ཕྲག་དོག་གམ་ (jealousy) ཞེས་པའི་མཚན་ཉིད་ནི། “འགྲན་རྩོད་དམ་ཡིད་ཆེས་མེད་པའི་རང་བཞིན་ལ་མི་བཟོད་པ་” ཞེས་པ་དེ་ཡིན་པ་དྲན་དགོས། གལ་ཏེ་མི་ཞིག་གིས་ང་ཚོའི་འགྲན་རྩོད་པ་ལ་གཅིག་སྤྲོད་པ་དང་ང་ཚོར་མ་སྤྲད་ན། ང་ཚོས་དེ་ནི་ཡིད་ཆེས་མེད་པ་རེད་བསམ་གྱི་ཡོད། འདི་ལ་མངོན་གསལ་དོད་པའི་རིགས་གཉིས་ཡོད། ཁོང་ཚོས་ང་ཚོར་སྔོན་གཅིག་སྤྲད་ཡོད་པ་དང་ད་གཟོད་སྤྲོད་ཀྱིན་མེད་པའམ། ཡང་ན་ཁོང་ཚོས་ཐོག་མ་ཉིད་ནས་ང་ཚོར་ནམ་ཡང་སྤྲད་མེད་པ་ཡིན་སྲིད། གལ་ཏེ་ཁོང་ཚོས་ང་ཚོར་སྔོན་ཚུད་ནས་སྤྲད་ཡོད་པ་དང་དེ་ནས་སྤྲད་མེད་ན། དེ་ནི་སྡུག་བསྔལ་ཆེ་བ་ཡོད། དེ་ཡང་ཡོངས་གྲགས་སུ་ནུབ་ཕྱོགས་པའི་བསམ་བློའི་ནང་ཡིད་ཆེས་མེད་པ་དེ་ཡོངས་གྲགས་ཆེ་བ་ཡོད། ང་ཚོས་མི་ཞིག་གིས་ང་ཚོར་བྱམས་བརྩེ་ནམ་ཡང་སྤྲད་མེད་ནའང་། ད་དུང་བྱམས་བརྩེ་སྤྲད་ཡོད་ན་ཅི་མ་རུང་ཞེས་ཡིད་སྨོན་བྱེད་ཆོག

སླར་ཡང་ང་ཚོས་མི་ཚེའི་རྣམ་པ་གཅིག་ལ་ཚད་བརྒལ་གྱི་ཚོད་དཔག་བྱེད་པ་དང་གཞན་ཞིག་ནས་བརྩེ་བ་ཐོབ་པ་དེ་གལ་ཆེ་ཤོས་བཟོ་གི་ཡོད། དེ་དག་ཐམས་ཅད་ནི་ “ང་” ཞེས་བྱ་བའི་ཚོར་བ་ཤུགས་ཆེན་དེ་ལ་གཞི་བྱས་ཡོད། ང་རང་བརྩེ་བ་དེ་འཐོབ་འདོད་འདུག །གཞན་སུ་དང་གང་ལའང་འབྲེལ་བ་མེད་ཅེས་པའི་ང་དེ་ཡོད། ང་རྡོག་རྡོག་ཚུགས་ཐུབ་ཏུ་གྲུབ་ཚུལ་དེ་ཁྱོད་རྡོག་རྡོག་ཚུགས་ཐུབ་ཏུ་གྲུབ་ཚུལ་ཡིན་པ་དེ་ལས་ཤུགས་ཆེ་བ་དེ་ཡང་ཡིན་སྲིད། ང་ཚོར་དེ་ཁྱེད་ཁོ་ན་ལས་དགོས་ཀྱི་ཡོད། མི་གཞན་བཅུ་ཡིས་ང་ལ་དགའ་བའམ་ཡང་ན་མི་བརྒྱ་ཐམ་པས་ང་ཚོར་བརྩེ་བ་ཡོད་ནའང་ཁྱད་པར་མེད། དེ་ལ་བརྟེན་རྒྱུ་མེད། ཁྱེད་ཁོ་ནས་ང་ལ་བརྩེ་བ་དགོས་ཀྱི་འདུག་ཅེས་པ་ལྟ་བུ་རེད། གལ་ཏེ་ཁོང་ཚོས་བརྩེ་བ་མ་སྤྲད་ན། གཞན་སུ་གཅིག་ཀྱིས་ཀྱང་ང་ཚོར་བརྩེ་བ་མེད་པ་ལྟ་བུ་ཚོར་གྱི་ཡོད། 

ཡིན་ནའང་འདི་ནི་ནོར་བ་རེད། ང་ཚོས་དེའི་སྐོར་བསམ་བློ་གཏོང་བའི་སྐབས། དེར་གོ་སྐབས་ཆུང་ངུ་ཞིག་ཡོད་སྲིད། འོན་ཀྱང་གནས་སྟངས་མང་ཆེ་བའི་ནང་། སུས་ཀྱང་ང་ཚོར་བརྩེ་བ་མེད་པའི་བཟོ་འདྲ་ཞིག་ཡོད། ང་ཚོས་རང་གིས་རང་ལ་སྙིང་རྗེ་བྱེད་པ་དང་། ཐ་ན་སོ་སོའི་ཨ་མ་དང་། གྲོགས་པོ། གཅེས་ཉར་སྲོག་ཆགས་ཁྱིས་རང་ལ་བརྩེ་བ་སྤྲད་ནའང་། ད་དུང་ཡང་གཞན་སུས་ཀྱང་ང་ཚོར་བརྩེ་བ་མི་འདུག་བསམ་གྱི་ཡོད། རང་ཉིད་ལ་དངོས་ཤུགས་བརྒྱུད་གསུམ་གྱི་སྒོ་ནས་བརྩེ་བ་ཡོད་མཁན་གྱི་སེམས་ཅན་ཧ་ཅང་མང་པོ་ཡོད། ང་ཚོས་མི་སྒེར་པ་གཅིག་ནས་འཐོབ་སྲིད་པའི་བརྩེ་བ་ལ་ཚད་བརྒལ་གྱི་ཚོད་དཔག་བྱེད་པའི་སྐབས། གཞན་དག་ལ་མཐོང་ཆུང་བྱེད་ཀྱི་ཡོད། ང་ཚོར་ཁྱེད་ཁོ་ན་ལས་བརྩེ་བ་དེ་དགོས་འདོད་བྱེད་ཀྱི་ཡོད། 

འདི་ནི་གང་ལ་གང་འཚམ་གྱི་དཀའ་ངལ་ཅན་ཞིག་རེད། དམིགས་བསལ་ང་ཚོས་དེ་མི་ཚེའི་ནང་ཐེངས་མ་འགའ་ཤས་གང་ཟག་མི་འདྲ་བ་དང་མཉམ་དུ་ཉམས་སུ་མྱངས་ཡོད་ན། དེ་ནི་དཀའ་ངལ་ཅན་ཞིག་རེད། “ང་ལ་ངེས་པར་དུ་དགའ་དགོས་པ་ནི་འདི་རེད་” ཅེས་ཟེར་དུས། མི་དེ་ལ་ཧ་ཅང་དམིགས་བསལ་གང་ཡོད་དམ། འདི་ནི་ང་ལ་ཧ་ཅང་དམིགས་བསལ་གང་ཡོད་དམ་ཞེས་དྲི་བ་གཏོང་བ་དེ་ལས་ལོགས་སུ་ཡིན་པ་དང་། དེ་ནི་མི་ཞིག་གིས་ང་ཁོ་ནར་བརྩེ་བ་སྤྲོད་དགོས་པ་ལས་གཞན་ལ་སྤྲོད་མི་དགོས་ཟེར་བ་དེ་རེད། བྱས་ཙང་། ང་ཚོར་དྲིབ་་དེ་གཉིས་ཡོད། སོ་སོ་རང་ཉིད་དང་གཞན་ཏེ། ང་ལ་དམིགས་བསལ་གང་ཡོད་པ་དང་ཁྱོད་ལ་དམིགས་བསལ་གང་ཡོད་དམ་ཞེས་པ་དེ་གཉིས་རེད། 

མི་འདི་ང་ལ་བརྩེ་བ་སྤྲོད་དགོས་ངེས་དང་གཞན་སུ་ལའང་སྤྲོད་མི་དགོས་པ་འདི་ལ་གཞི་རྩ་ངོ་མ་ཞིག་ཡོད་དམ། ཁོང་ཚོ་ང་ཚོར་བརྩེ་བ་ཡོད་པས་གཞན་སུས་ཀྱང་ང་ལ་བརྩེ་བ་སྤྲད་ནའང་ཁྱད་པར་མེད་ཅེས་པ་དེ་ཧ་ཅང་གལ་ཆེན་པོ་ཡིན་པའི་རྒྱུ་མཚན་ཡོད་དམ། འདི་དག་ནི་ང་ཚོའི་འཛམ་གླིང་ལ་ལྟ་ཚུལ་ཇི་ལྟར་འཛིན་པ་དང་། རང་གིས་རང་ལ་ལྟ་ཚུལ་ཇི་ལྟར་འཛིན་པ། དེ་བཞིན་ང་ཚོའི་གཞན་ལ་ལྟ་ཚུལ་ཇི་ལྟར་འཛིན་པའི་ཐད་ཡང་བསྐྱར་བསམ་ཞིབ་བྱེད་དགོས་པའི་དྲི་བ་གཏིང་ཟབ་ཁག་ཡིན་པ་རེད། སེམས་ཚོར་གྱི་དཀའ་ངལ་དེ་དག་ཐམས་ཅད་ལ་རྨང་གཞིར་གྱུར་བའི་གཞི་རྩའི་རྨོངས་པ་ཡོད་དམ། 

(སྒོམ་གྱི་བར་མཚམས།)

འདི་ནི་ངོས་འཛིན་བྱ་རྒྱུ་གལ་ཆེན་པོ་རེད། གང་ཡིན་ཞེ་ན། ང་ཚོས་སེམས་ཚོར་གྱི་དཀའ་ངལ་དེ་དག་སླར་ནམ་ཡང་མི་འབྱུང་བའི་ཚུལ་དུ་གཏིང་ཟབ་ཤོས་ཀྱི་རིམ་པ་ལས་ཐར་བའི་ཆེད། ང་ཚོས་དོན་ངོ་མར་འབད་བརྩོན་གང་ལ་བྱེད་དགོས་པ་དེ་ཤེས་ཀྱི་ཡོད། དཀའ་ངལ་དེ་དག་འབྱུང་བའི་སྐབས། ང་ཚོར་སྤོང་འདོད་ཙམ་ཡོད་པ་མིན། ཡིན་ནའང་ཐོག་མ་ཉིད་ནས་དེ་དག་སླར་ཡང་ནམ་ཡང་མི་འབྱུང་བའི་ཕྱིར། དེ་ལས་གཏིང་ཟབ་པའི་སྔོན་འགོག་གི་ཐབས་ལམ་ལག་བསྟར་བྱེད་དགོས། འདི་ལྟར་དངོས་གནས་བྱེད་ཐུབ་པའི་སྐབས་གཅིག་རང་ཡོད་པ་ནི། ང་ཚོ་ཇི་ལྟར་གནས་པ་དང་། གཞན་རྣམས་ཇི་ལྟར་གནས་ཡོད་པ། དེ་བཞིན་འཛམ་གླིང་ཇི་ལྟར་གནས་ཡོད་པ་བཅས་ཡོངས་སུ་རྫོགས་པ་རྟོགས་པའི་སྐབས་དེ་རེད། དེ་ལྟར་ང་ཚོས་རྟོག་སྒྲུང་དང་རྟོག་པའི་འཆར་སྣང་གི་དྲན་ཤེས་མི་ལྡན་པའི་རྣམ་རྟོག་སྐྲུན་རྒྱུ་ཆ་ཚང་མཚམས་འཇོག་བྱེད་ཐུབ། 

ཕྲག་དོག་དེ་གཅེས་འཛིན་གྱི་རང་བཞིན་དང་འབྲེལ་ནས་ཡོད་པ་ང་ཚོས་མཐོང་ཐུབ་པ་དང་། དེ་ཡང་ང་ཚོར་གཅིག་འཐོབ་འདོད་དང་གཞན་གྱི་ཅ་དངོས་སོགས་རང་ཉིད་ལ་དག་པར་འདོད་པའམ་རང་ཉིད་ཁོ་ནར་བསམ་གྱི་ཡོད། ང་ཚོས་ཡིད་དབང་འཕྲོག་སའི་ཧ་ཅང་ལྟ་ན་སྡུག་པའི་རི་སྐྱེས་བྱིའུ་ཞིག་ས་བོན་དང་བག་ཟན་ཕྲན་བུ་ལ་བརྟེན་ནས་སོ་སོའི་སྒེའུ་ཁུང་གི་མ་ཐེམ་ལ་བབས་པའི་སྣང་བརྙན་བེད་སྤྱོད་བྱེད་ཆོག །རི་སྐྱེས་ཀྱི་བྱིའུ་དེའི་ཕྱོགས་སུ་ང་ཚོའི་བློའི་ཁྱེར་སོ་དེ་གང་རེད་དམ། 

དེ་ནི་བྱིའུ་རང་དབང་ཅན་ཞིག་རེད། དེ་ང་ཚོའི་སྒེའུ་ཁུང་འགྲམ་ལ་བབས་པའི་སྐབས། ང་ཚོས་དེ་ནི་ཅི་འདྲའི་ཡིན་མདོག་ཁ་པོ་དང་ལྟ་ན་སྡུག་པ་ཞིག་འདུག་ཅེས་བསམ་གྱི་ཡོད། བྱིའུ་དེས་ང་ཚོ་དང་མཉམ་དུ་དུས་ཚོད་བསྐྱལ་བའི་སྐབས། ང་ཚོས་ཡིད་དབང་འཕྲོག་པའི་དུས་ཚོད་དེ་ལ་རོལ་ཆོག །གལ་ཏེ་ང་ཚོ་དངོས་གནས་བསོད་བདེ་ཆེན་པོ་ཡིན་ན། བྱིའུ་དེ་ང་ཚོའི་སྒེའུ་འགྲམ་ལ་ཧ་ཅང་མི་བདེ་བ་ཚོར་བ་དང་། དེས་ལྡུམ་རའི་ནང་བྱིའུ་ཚང་བཟོས་ནས་དེར་ནམ་དུས་གཅིག་གི་རིང་སྡོད་ཀྱི་རེད། ང་ཚོས་ནམ་དུས་གཅིག་ཆ་ཚང་བྱིའུ་དེ་ང་ཚོའི་ལྡུམ་རའི་ནང་ཡོད་པ་ལ་སྐྱིད་ཚོར་ངང་གནས་ཆོག །འོན་ཀྱང་མཐར་དུས་གང་འཚམ་ཞིག་གམ་ནམ་དུས་གཅིག་གི་རྗེས་སུ་བྱིའུ་དེ་འཕུར་ནས་འགྲོ་ངེས་རེད། གང་ལྟར་ཡང་། བྱིའུ་དེ་ནི་རང་དབང་ཅན་གྱི་རི་སྐྱེས་སྲོག་ཆགས་ཤིག་རེད། གལ་ཏེ་བྱིའུ་དེ་ཚོར་རང་འཇགས་ལོག་སླེབས་ན། དེ་ནི་ཅི་འདྲའི་ངོ་མཚར་བ་ཞིག་མིན་ནམ། ད་དུང་ཡང་དེ་ནི་སྔོན་གྱི་རི་སྐྱེས་བྱིའུ་དེ་གཅིག་པུ་ཉེ་འཁོར་དུ་ཡོད་པ་མ་རེད། བྱིའུ་དེ་ག་རང་འབབ་པར་འདོད་པ་ནི་གླེན་རྟགས་ཤིག་རེད། བྱིའུ་གཞན་ཞིག་བབས་ནའང་། བྱིའུ་དེ་ང་ཚོ་དང་མཉམ་དུ་དུས་ཚོད་ཐུང་ངུ་གནས་ཡུན་རིང་ལ་ང་ཚོས་ཀྱང་བདེ་སྐྱིད་ལ་རོལ་ཆོག

གལ་ཏེ་ང་ཚོ་ཕྲག་དོག་གིས་མནར་ནས། “བྱིའུ་དེ་ང་གཅིག་པུའི་འགྲམ་ལ་སླེབས་ན་འདོད་ཀྱི་འདུག །གཞན་སུའི་འགྲམ་དུ་མ་འགྲོ་ན་བསམ་གྱི་འདུག །ང་ལ་བྱིའུ་གཞན་མི་དགོས། བྱིའུ་དེ་ག་རང་དགོས་” ཞེས་བསམས་ན། དེ་ཡང་གླེན་རྟགས་ཤིག་ལས་མ་འདས། ནང་པའི་ལྟ་ཚུལ་ལ་བྱིའུ་དེའི་ལོ་རེའི་འགྲུལ་བཞུད་ནང་མི་གཞན་དག་གིས་དེ་ཟས་སྦྱིན་པའི་སེམས་བཟང་གི་ལས་བྱས་ཡོད་ཅེས་དགའ་བ་སྒོམ་དགོས། ངས་གོང་དུ་ཞུས་པ་ལྟར། གལ་ཏེ་བྱིའུ་དེ་སླར་ཡང་ལོག་སླེབས་ན། དེ་ནི་ཁེ་བཟང་འཕར་བ་ཞིག་རེད། 

དེ་ལས་ལྡོག་སྟེ། བྱིའུ་དེ་ང་ཚོའི་སྒེའུ་ཁུང་འགྲམ་དུ་བབས་པའི་སྐབས། ང་ཚོས་འཛིན་ཐབས་བྱས་ན། བྱིའུ་དེ་ཧ་ཅང་དངངས་སྐྲག་སྐྱེ་ངེས་རེད། མ་རེད་དམ། དེ་འཕུར་ནས་ནམ་ཡང་ཚུར་ལོག་གི་མ་རེད། གལ་ཏེ་ང་ཚོས་བྱིའུ་དེ་བཟུང་ནས་རླུང་ཙིའམ་ལྕགས་ཁྲ་ཞིག་གི་ནང་བཅུག་ཐུབ་པ་བྱུང་ཡོད་ན། རི་སྐྱེས་བྱིའུ་དེ་སྐྱིད་པོ་ག་ཚོད་འབྱུང་ངེས་སམ། ང་ཚོས་བྱིའུ་དེ་ལྕགས་ཁྲའི་ནང་བཅུག་ཡོད། རྒྱུ་མཚན་ནི་དེ་ “ང་” ཞེས་བྱ་བ་དེ་ལ་དགོས་ཀྱི་ཡོད། ཡིན་ནའང་བྱིའུ་དེ་བདེ་ཚོར་ག་ཚོད་ཙམ་ཞིག་ཡོད་ངེས་སམ། བྱིའུ་དེས་བྱིའུ་ཚང་ཞིག་བཟོས་ནས་དེའི་ནང་སྒོ་ང་གཏོང་གི་རེད་དམ། མ་རེད། དེ་ལྟར་བྱེད་ཀྱི་མ་རེད། 

འདི་ནི་ང་ཚོའི་མི་ཚེའི་ནང་བསླེབ་པའི་རང་གི་དགའ་ས་དང་བརྩེ་ས་ལ་ཧ་ཅང་ཕན་ཐོགས་ཅན་གྱི་སྣང་བརྙན་ཞིག་དང་། ཐ་ན་སོ་སོའི་ཕྲུ་གུ་ཚོ་ལའང་ཕན་ཐོགས་ཅན་ཞིག་ཡིན་སྲིད། དེ་དག་ཐམས་ཅད་ང་ཚོའི་མི་ཚེའི་ནང་དུས་ཚོད་ཐུང་ཐུང་ཞིག་གི་ཆེད་དུ་རི་སྐྱེས་བྱིའུ་ནང་བཞིན་སླེབས་ཡོད། ཡིན་ནའང་ཁོང་ཚོར་རང་དབང་ཡོད་པས། གང་སར་འགྲོ་གི་ཡོད། ཁོང་ཚོར་གྲོགས་པོ་གཞན་དག་ཀྱང་ཡོད། གལ་ཏེ་ཁོང་ཚོ་མི་ཚེའི་རྗེས་ཙམ་ནས་སླར་ཡང་ང་ཚོའི་མི་ཚེའི་ནང་སླེབས་ནས་མུ་མཐུད་དེ་ཐུག་འཕྲད་བྱས་ན། དེ་ནི་ངོ་མཚར་དགོས་པ་ཞིག་རེད། ད་ལྟ་ང་ཚོ་ཕན་ཚུན་མཉམ་དུ་ཡོད་པའི་སྐབས་དུས་ཚོད་ལ་སྐྱིད་པོའི་ངང་ནས་ལོངས་སུ་སྤྱོད་ཆོག་པ་དང་། གལ་ཏེ་ཁོང་ཚོ་རྗེས་སུ་ལོག་སླེབས་ནའང་། ང་ཚོས་ད་དུང་ཡང་སྐྱིད་པོ་གཏོང་ཆོག 

གལ་ཏེ་ཕྱོགས་གཞན་ཞིག་ནས་ཁོང་ཚོས་མི་གཞན་དང་མཉམ་དུ་འབྲེལ་བ་བྱེད་ཀྱི་འདུག་བཅས་ཕྲག་དོག་བྱེད་པའམ། ཁོང་ཚོས་ང་ཚོར་དུས་ཚོད་ཆ་ཚང་ཞིག་སྤྲད་མ་སོང་ཞེས་ཕྲག་དོག་བྱས་ན། འདིས་འབྲེལ་ལམ་ལ་ཤུགས་རྐྱེན་ཇི་ལྟར་ཐེབས་ཀྱི་ཡོད་དམ། གལ་ཏེ་ང་ཚོས་ཁོང་ཚོ་ནང་དུ་སྡོད་དགོས་པ་དང་། རྟག་ཏུ་ང་ཚོར་མཉམ་དུ་ཡོད་དགོས་པ། གྲོགས་པོ་གཞན་མེད་པ་བཅས་དགོས་འདུན་བསྟན་ན། དེ་ལས་འབྲས་བུ་ཅི་འདྲ་ཞིག་ང་ཚོས་རེ་བ་བྱེད་ཐུབ་བམ། གལ་ཏེ་ང་ཚོས་ཁོང་ཚོ་བཟུང་ནས་ལྕགས་ཁྲའི་ནང་འཇུག་ཐབས་བྱས་ན། ཁོང་ཚོ་ལ་སྐྲག་སྣང་སློང་གི་མ་རེད་དམ། གལ་ཏེ་ང་ཚོས་གཞན་རྣམས་ལྕགས་ཁྲའི་ནང་ཉར་ཐུབ་ན། ཁོང་ཚོ་སྐྱིད་པོ་ག་ཚོད་ཡོང་གི་རེད་དམ། ང་ཚོའང་མཐར་སྐྱིད་པོ་གང་འདྲ་ཞིག་མྱོང་གི་རེད་དམ། 

ང་ཚོའི་བརྩེ་བ་ཡོད་ས་དང་དགའ་ས་དེ་སུ་ཡིན་ནའང་། དེ་ནི་ང་ཚོའི་མི་ཚེའི་ནང་སླེབས་པའི་རི་སྐྱེས་ཀྱི་བྱིའུ་ལྟ་ན་སྡུག་པ་ཞིག་ལྟར་ལྟ་རྒྱུ་དང་། ཁོང་ཚོ་དང་མཉམ་དུ་དུས་ཚོད་པ་དེ་སྐྱིད་པོའི་ངང་ནས་བསྐྱལ་རྒྱུ་དེ་ནི་ཧ་ཅང་ཕན་ཐོགས་ཆེན་པོ་ཡོད། ཁོང་ཚོར་གྲོགས་པོ་དང་དོ་དབྱིངས་སོགས་གཞན་ཡོད་ངེས་པ་རེད། ཁོང་ཚོ་ང་ཚོ་དང་མཉམ་དུ་དུས་ཡུན་རིང་པོ་སྡོད་སྲིད་ལ། མགྱོགས་པོ་འགྲོ་ཡང་སྲིད། གལ་ཏེ་ང་ཚོས་མི་དེ་ལ་དངོས་གནས་བརྩེ་བ་ཡོད་ན། ང་ཚོས་དངོས་གནས་དྲང་གནས་སེམས་བཟང་པོ་བྱས་དང་བྱེད་མུས་ནང་བཞིན་ཁོང་ཚོའི་གྲོགས་པོ་ཚོས་ཀྱང་ཁོང་ཚོར་སེམས་བཟང་པོ་བྱེད་པའི་རེ་བ་བྱེད་པ་དང་དེ་ལ་དགའ་བ་སྒོམ་ངེས་རེད། མ་རེད་དམ།

འདི་ནི་འབྲེལ་ལམ་ལ་འཇུག་ཚུལ་རྦད་དེ་བཟང་བ་ཞིག་ཡིན་པ་དང་། འདིས་ཕྲག་དོག་དང་གཅེས་འཛིན་གྱི་རང་བཞིན་སྤོང་བར་རོགས་བྱེད་ཀྱི་ཡོད། ཕྲག་དོག་དང་གཅེས་འཛིན་གྱིས་ང་ཚོར་ཡོད་པའི་དུས་ཚོད་དེ་ཆ་ཚང་བ་ཞིག་ལོངས་སུ་སྤྱོད་པར་དངོས་སུ་འགོག་རྐྱེན་བྱེད་ཀྱི་ཡོད། ཁྱེད་ཀྱིས་དུས་ཡུན་ཏོག་ཙམ་རིང་མ་མཐོང་བའི་མི་ཞིག་ལ། ཁྱེད་རང་དེ་ལས་ཡུན་རིང་བ་སྡོད་མི་ཐུབ་ཅེས་རྙོག་དྲ་ཤོད་པ་ཙམ་ཁོ་ན་ལ་བརྟེན་ནས་ཐུག་འཕྲད་དུ་འགྲོ་མྱོང་ཡོད་དམ། ཡང་ན་དེ་ལས་སྡོག་སྟེ། མཉམ་དུ་དུས་ཚོད་ཡོད་པ་དེ་སྐྱིད་པོའི་ངང་བསྐྱལ་ཡོད་དམ། འདིའི་སྐོར་ལ་བསམ་བློ་བཏང་ནས་སོ་སོའི་དགའ་ས་ཉེ་ས་དེ་རི་སྐྱེས་ཀྱི་བྱིའུའི་སྣང་བརྙན་དུ་བཀོལ་ཐབས་བྱེད་དགོས། ལྷག་པར་དུ་རང་གིས་དམིགས་བསལ་ཕྲག་དོག་བྱེད་སའི་ཕ་རོལ་གྱི་མི་དེ་དག་གིས་གཞན་དང་མཉམ་དུ་དུས་ཚོད་བསྐྱལ་བའམ་གཞན་དག་ལ་བརྩེ་བ་སྟོན་པའི་སྐབས། རི་སྐྱེས་བྱིའུའི་སྣང་བརྙན་དེ་བཀོལ་ཐབས་བྱེད་དགོས། 

(སྒོམ་གྱི་བར་མཚམས།)

ང་ཚོའི་རང་མཐོང་དེས་ང་ཚོ་སུ་ཡིན་པ་དང་ “ང་” ཟེར་བ་འདི་གང་ཡིན་པའི་གོ་རྟོགས་དེ་སྐྲུན་གྱི་ཡོད། སྐབས་རེར་ང་ཚོས་གཞན་རྣམས་ལྕགས་ཁྲའི་ནང་འཇུག་ཐབས་བྱེད་ཀྱི་ཡོད། ཡིན་ནའང་ང་ཚོས་ཡང་སེ་སོ་སོ་རང་ཉིད་དེའི་ནང་ཚུད་ཡོད་པ་ཤེས་ཀྱི་ཡོད། ང་ཚོ་ནི་མི་གཞན་ཞིག་གིས་ལྕགས་ཁྲའི་ནང་བླུག་ཐབས་བྱེད་བཞིན་པའི་རི་སྐྱེས་བྱིའུ་དེ་རེད། ང་ཚོས་དེ་ལ་གདོང་ལེན་ཇི་ལྟར་བྱེད་ཐུབ་བམ།

ཐོག་མར་དུས་རྟག་ཏུ་གནས་སྟངས་ཀྱི་དངོས་པོའི་གནས་ལུགས་དེ་གསལ་པོ་དགོས་རྒྱུ་ཧ་ཅང་གལ་ཆེན་པོ་རེད། དམིགས་བསལ་འབྲེལ་ལམ་དང་ཆང་སའི་ནང་། མི་རེ་ངོ་རེ་ལ་འབྲེལ་ལམ་དེའི་ནང་གང་འཚུད་ཀྱི་ཡོད་པ་དང་ས་མཚམས་གང་དག་ཡིན་པའི་བསམ་ཚུལ་མི་འདྲ་བ་རེར་ཡོད། དེའི་ཐད་ལ་གསལ་པོ་དགོས། དེ་མིན་མི་གཅིག་གིས་རེ་བ་ཞིག་བྱེད་སྲིད་པ་དང་། རེ་བ་དེ་བསྒྲུབ་ཀྱི་མ་རེད། ཡང་ན་རེ་བ་དེ་ང་ཚོའི་ལྟ་ཚུལ་དང་རྦད་དེ་མི་འདྲ་བ་ཡིན་པ་རེད། 

འདི་ནི་འབྲེལ་ལམ་གྱི་ཕྱོགས་གཉིས་ཀ་ནས་གལ་ཆེན་པོ་རེད། གང་ལྟར་ཡང་། ང་ཚོས་རྒྱུན་ཆད་མེད་པར་གྲོས་དན་ལ་གྲོས་མོལ་བྱེད་པ་དང་། དེ་ནས་སླར་ཡང་གྲོས་མོལ་བྱེད་པའི་མཐའ་དེ་སྤོང་དགོས། དེ་ག་ནང་བཞིན་རྟག་ཏུ་འབྲེལ་ལམ་གྱི་སྐོར་ཤོད་པ་དང་། ང་ཚོས་དེ་ལ་གནས་ལུགས་ཇི་ལྟར་བརྗོད་པའི་ཐད་ལ་བསམ་བློ་གཏོང་བ་མ་གཏོགས་སྐྱིད་ཚོར་ངང་ནས་ལོངས་སུ་སྤྱོད་ཀྱི་མེད། དྲང་པོ་བྱ་རྒྱུ་དང་དཀའ་ངལ་རྣམས་སེམས་ནང་མི་ཉར་བ་དེ་ཡག་པོ་རེད། ང་ཚོར་དངོས་གནས་གནོད་པའི་སྐབས། གཞན་དེ་ལ་ཤེས་སུ་འཇུག་དགོས། འོན་ཀྱང་ང་ཚོས་འདི་ནི་མི་གཞན་དེ་ནག་ཉེས་ཅན་དུ་ཚོར་འཇུག་པ་དང་ང་ཚོས་གང་འདོད་པ་ལྟར་བཙན་གྱིས་བྱེད་དུ་འཇུག་པའི་སྦས་པའི་ཀུན་སློང་མེད་པའི་སྒོ་ནས་བྱ་རྒྱུའི་ཐབས་ཤེས་བྱེད་དགོས། 

ང་ཚོའི་སྤྱོད་ལམ་གྱི་ཕན་གནོད་དེ་རྟོགས་དུས་འདི་ལས་སླ་རུ་འགྲོ་གི་རེད། དེའི་ཐད་ལ་ང་ཚོ་ནམ་རྒྱུན་ཧ་ཅང་གཏི་མུག་ནས་ཡོད། སྐབས་རེར་ང་ཚོས་གང་འདོད་ལྟར་བྱ་སྤྱོད་སྤེལ་ཆོག་པ་དང་དེས་སུ་ལའང་ཤུགས་རྐྱེན་འགྲོ་གི་མ་རེད་ཅེས་ང་ཚོ་མ་གཏོགས་མི་གཞན་སུ་ལའང་ཚོར་བ་མེད་པ་དང་གནོད་ཀྱི་མེད་བསམ་པ་ལྟ་བུ་སྣང་གི་ཡོད། འོན་ཀྱང་འཁྲིག་སྤྱོད་ཀྱི་ཡིད་ཆེས་མེད་པ་སོགས་ལ་གཞིགས་ན། ང་ཚོས་ཉར་འཚག་བྱེད་འདོད་ཡོད་སྲིད་པའི་ས་མཚམས་ངེས་ཅན་འགའ་ཞིག་ཡོད། ས་མཚམས་གཞན་དག་ནི་ཏོག་ཙམ་སྟབས་བསྟུན་བདེ་བ་ཡོད་ཆོག 

གལ་ཏེ་འབྲེལ་ལམ་གྱི་ཆ་ཤས་གཅིག་ལམ་ལྷོང་མ་བྱུང་ན། ང་ཚོས་མི་དེ་གད་སྙིགས་ནང་བཞིན་འདོར་མི་ཉན། ཐ་ན་ཁྱེད་ལ་བཟའ་ཚང་ཁ་བྲལ་གྱི་གནས་སྟངས་བྱུང་ནའང་། ཁྱེད་ཀྱིས་མི་དེ་ལ་བརྩེ་བ་སྤྲོད་རྒྱུ་མཚམས་འཇོག་བྱེད་དགོས་པའམ་སེམས་འཁུར་བྱ་རྒྱུ་མཚམས་འཇོག་བྱེད་དགོས་པའི་དོན་མིན། ཁྱེད་ཀྱིས་མི་ཞིག་རྟག་པར་མཐོང་མི་དགོས་ཀྱང་། ཕན་ཚུན་འབྲེལ་ལམ་ནི་ཡོད་ཚད་ཡིན་མི་དགོས་ལ་གང་ཡང་མིན་པའང་ཡིན་མི་དགོས། འབྲེལ་ལམ་དེ་སླར་ཡང་འགྲེལ་བརྗོད་བྱེད་ཆོག །ནང་པའི་ལྟ་ཚུལ་ལྟར་བྱས་ན། ལས་ཀྱི་འབྲེལ་བ་ཞིག་ཀྱང་ཡོད་པས། ཁྱེད་ཀྱིས་དེ་ལ་སྣང་མེད་ཐོག་གད་སྙིགས་ལྟར་བསྐྱུར་ན་མི་འགྲིགས།

གལ་ཏེ་སོ་སོའི་ཟླ་རོགས་ཀྱིས་དངོས་གནས་ཁྱེད་ལ་གནོད་བསྐྱལ་ཡོད་ན། དཔེར་ན། མགོ་སྐོར་གཏོང་བ་སོགས་བྱས་ཡོད་ན། ང་ཚོས་ “ང་རང་ཁྱེད་ཀྱི་སྤྱོད་ལམ་ལ་བརྟེན་ནས་དངོས་གནས་གནོད་སོང་། ཕལ་ཆེར་ངེད་གཉིས་ཁ་གྱེས་དགོས་ས་རེད། ཁྱེད་རང་ངའི་གྲོགས་པོ་ཞིག་ཡིན་པའི་ཆ་ནས་ཤོར་འདོད་མི་འདུག །ཡིན་ནའང་ང་ལ་དུས་ཚོད་སྤྲོད་དང་། ཟླ་བ་གཉིས་ཙམ་གྱི་རྗེས་སུ་ང་རང་ཞི་ལྷོད་ཆགས་པ་དང་གནས་སྟངས་འདི་ལ་གདོང་ལེན་བྱེད་ཐུབ་ཀྱི་རེད། དེ་ནས་ང་རང་ཁྱེད་དང་མཉམ་དུ་མུ་མཐུད་དེ་གྲོགས་པོ་བྱེད་འདོད་འདུག །ངས་ཁྱེད་ལ་སེམས་འཁུར་ཡོད། དེ་མིན་ཐོག་མ་ཉིད་ནས་ང་རང་ཁྱེད་དང་མཉམ་དུ་འབྲེལ་ལམ་འདིའི་ནང་ནམ་ཡང་ཚུད་ཡོད་མ་རེད་” ཅེས་བརྗོད་ཆོག །དེ་ནི་ང་ཚོ་ཕྱོགས་གང་ན་ཡོད་མེད་ལ་མ་ལྟོས་པར། གནས་སྟངས་ལ་གནས་ཚད་སྨིན་པའི་སྒོ་ནས་གདོང་ལེན་བྱེད་སྟངས་ཤིག་རེད། གང་ཡིན་ཞེ་ན། མི་སུ་གཅིག་ཀྱང་དུས་ནམ་ཡང་མཐར་བདེ་ཞིང་སྐྱིད་པའི་ངང་གནས་པའི་ལྷ་སྒྲུང་ནང་བཞིན་ཆགས་ཀྱི་མ་རེད། དེ་འདྲ་ཞིག་ཡོང་གི་མ་རེད། 

གལ་ཏེ་ང་ཚོས་འཁྲིག་སྤྱོད་ཀྱི་དཀའ་ངལ་ལ་གདོང་ལེན་བྱེད་ཀྱིན་མེད་པར་དུས་ཚོད་ཀྱི་དཀའ་ངལ་ལ་གདོང་ལེན་བྱེད་ཀྱིན་ཡོད་ན། དཔེར་ན། མི་ཞིག་གིས་ང་ཚོའི་དུས་ཚོད་ཆ་ཚང་དགོས་འདུན་སྟོན་པའི་སྐབས། ང་ཚོས་ཁོང་ཚོར་དུས་ཚོད་ངེས་ཅན་ཞིག་བཏོན་ནས་མཉམ་དུ་དུས་ཚོད་བསྐྱལ་ཆོག །གལ་ཏེ་ང་ཚོ་དེ་ལ་བརྟེན་རུང་ཞིག་ཡིན་ན། དེས་འགྲིག་པ་རེད། གང་ཡིན་ཞེ་ན། ཁོང་ཚོས་ད་དུང་ཡང་དེ་ལ་བརྩི་ཐུབ་ཀྱི་ཡོད། ཁོང་ཚོས་སྣང་མེད་བཏང་བ་དང་ངོས་ལེན་མི་བྱེད་པ་དེ་འདྲ་ཚོར་གྱི་མ་རེད། ང་ཚོ་ཁོང་ཚོ་དང་མཉམ་དུ་ཡོད་ན། ང་ཚོའི་བློ་སེམས་བརྒྱ་ཆ་བརྒྱ་ཐམ་པ་རྩེ་གཅིག་ཏུ་ཁོང་ཚོ་མཉམ་དུ་ཡོད་པས། དེ་ནི་ད་དུང་དེ་ལས་ཡག་ག་རེད། དེའི་ཐད་བསམ་ཞིབ་གནང་རོགས།

(སྒོམ་གྱི་བར་མཚམས།)

སོ་སོའི་བྱམས་བརྩེའི་ཐད་ལ་ཉེན་སྲུང་ཆེ་བ་ཡོང་བའི་ཕྱིར། ང་ཚོས་ཕན་ཐོགས་ཅན་གྱི་སྣང་བརྙན་གཞན་ཞིག་བེད་སྤྱོད་བྱེད་ཆོག །མི་རྣམས་ཀྱིས་ང་ཚོར་བརྩེ་བ་དེ་ཇི་ལྟར་སྟོན་གྱི་ཡོད་པ་དེའི་མཚུངས་དཔེར་མི་རྣམས་ཀྱིས་ང་ཚོར་སེམས་ཚོར་གྱི་བྱེད་སྟངས་སམ་དངུལ་ལོར་གང་འདྲ་ཞིག་སྤྲོད་ཀྱི་ཡོད་པའི་ཐོག་ལ་བསམ་བློ་གཏོང་ཆོག སྐབས་རེར་ང་ཚོ་མི་རྣམས་ཀྱིས་དངུལ་གང་འདྲ་སྤྲོད་པར་སྟབས་བསྟུན་བདེ་པོ་བྱེད་དགོས་པ་ནང་བཞིན་གཞན་གྱིས་ང་ཚོར་བྱམས་པ་དང་བརྩེ་སེམས་ཇི་ལྟར་སྟོན་གྱི་ཡོད་པའི་ཐད་ལའང་སྟབས་བསྟུན་བདེ་པོ་བྱེད་དགོས། 

ང་ཚོས་ཡུ་རོའི་དངུལ་ལོར་སྤྲོད་འདོད་བྱེད་སྲིད། འོན་ཀྱང་མི་དེ་ལ་ཌོ་ལར་ལས་མེད་པ་རེད། བྱས་ཙང་། ཁོང་ཚོས་ང་ཚོར་དངུལ་ཇི་ལྟར་སྤྲོད་ཐུབ་བམ། ཕྱོགས་གཞན་ཞིག་ནས་ཁོང་ཚོས་ང་ཚོའི་འདོད་པ་ནང་བཞིན་གཅིག་པ་གཅིག་རྐྱང་བརྩེ་བ་སྤྲོད་མི་ཐུབ། ཡིན་ནའང་ང་ཚོས་ཁོང་ཚོའི་དངུལ་དེའམ་ཡང་ན་ཁོང་ཚོས་ང་ཚོར་གང་སྤྲོད་ཐུབ་པ་དེ་ངོས་ལེན་བྱེད་དགོས། དེ་ནི་ཁོང་ཚོའི་བརྩེ་བའི་རྣམ་འགྱུར་ཙམ་ཞིག་ཡིན་པར་རྟོགས་དགོས། དེ་ནི་ཁོང་ཚོས་གང་བྱེད་ཐུབ་པ་དེ་རེད། གལ་ཏེ་ང་ཚོ་ཕྱོགས་གཞན་དེར་ཡོད་པ་དང་ང་ཚོར་དངུལ་ངེས་ཅན་ཞིག་ཡོད་ཅིང་། མི་དེས་དགའ་འདེམས་བྱེད་པའི་དངུལ་ལོའི་ནང་བརྩེ་བ་སྤྲད་མ་ཐུབ་ན། དེ་ནི་གཅིག་པ་རེད། 

ཁོང་ཚོས་ “དགོངས་དག །ང་ལ་ད་ལྟ་དངུལ་འདང་ངེས་མེད། ང་ལ་ད་ལྟ་དུས་ཚོད་མེད། ང་རང་ཧ་ཅང་བྲེལ་བ་ཆེ་བས། བདུན་ཕྲག་འདིའི་ནང་ཁྱེད་རང་ཐུག་ཐུབ་ས་མ་རེད་” ཅེས་བརྗོད་པའི་སྐབས། དེ་ནི་འགྲིག་གི་འདུག་ཅེས་ང་ཚོ་འགྲིག་ངེས་ཀྱི་སྟབས་བསྟུན་བདེ་པོ་ཞིག་དགོས། སྟབས་བསྟུན་བདེ་བའི་རང་བཞིན་ལ་བརྟེན་ནས་ཕ་རོལ་པོ་དེ་ལ་དངུལ་ག་ཚོད་ཡོད་པ་དང་ཁོང་ཚོས་ང་ཚོར་དངུལ་ག་ཚོད་སྤྲོད་དགོས་པའི་ཐོག་ནས་མི་གཞན་དེ་རྟོགས་ཐུབ། ཨ་ཅང་ཅང་ང་ཚོ་ལ་དངུལ་སྤྲོད་རྒྱུ་མེད་པའི་སྐབས། གནས་སྟངས་གཅིག་པ་རེད། 

བརྩེ་བ་དང་གཅེས་སྐྱོང་ནི་ཉོ་འཚོང་བྱེད་པའི་རྒྱུན་མཁོའི་དངོས་རིགས་མིན་ནའང་། དེ་ནི་སྣང་བརྙན་ཕན་ཐོགས་ཅན་ཞིག་རེད། འདིས་ད་དུང་ཡང་ང་ཚོའི་ཉེན་སྲུང་མེད་པའི་དཀའ་ངལ་ལ་རོགས་བྱེད་ཐུབ། འདི་ནི་ང་ཚོ་དངོས་གནས་ཇི་ལྟར་ཡོད་པའི་སྐོར་གཏིང་ཟབ་པའི་རྩ་བ་དེ་མིན་ནའང་། འདི་ནི་གནས་སྐབས་ཙམ་གྱི་གནས་སྟངས་ཤིག་ལ་གདོང་ལེན་བྱེད་པར་ཕན་ཐོགས་ཅན་ཞིག་ཡིན། དཀའ་ངལ་ངོ་མ་ནི་མི་དེས་འབུལ་ཐབས་བྱེད་པའི་དངུལ་ལོ་དེ་རེད། གང་ཡིན་ཟེར་ན། སྐབས་རེར་ཐ་ན་ང་ཚོས་དེ་མི་ཤེས་པར། “ང་ལ་འདི་ནི་པོ་ལིཤའི་དངུལ་ཛི་ལོ་ཌི་ (Polish zloty) ནང་མི་དགོས། ང་རང་འདི་དངུལ་ལོར་ངོ་མའི་ནང་དགོས་” ཞེས་བརྗོད་ཀྱི་ཡོད། 

འདི་ལ་ཐུན་མོང་གི་དཔེ་མཚོན་ཞིག་ནི་ཆང་ས་རྒྱག་ཟིན་པའི་བཟའ་ཚང་དང་ཕྲུ་གུ་ཚོ་ལྟ་བུ་རེད། ནང་དུ་ཕྲུ་གུ་ཚོར་གཅེས་སྐྱོང་བྱེད་མཁན་དང་ཁྱིམ་ཚང་སྐྱོང་མཁན་གཉིས་ལྟ་བུ་ཡོད་པའི་དབང་དུ་བཏང་ནས། ཁྱིམ་ཚང་སྐྱོང་མཁན་དེས་ཁོང་ཚོར་གཅེས་སྐྱོང་བྱེད་ཀྱི་མེད་པ་དང་དུས་ཚོད་འདང་ངེས་གཏོང་གི་མེད་པའི་རྙོག་དྲ་ཤོད་ཀྱི་ཡོད། ཁྱིམ་ཚང་སྐྱོང་མཁན་དེས་ཁྱིམ་ཚང་ལ་རྒྱབ་སྐྱོར་ཆེད་དུས་ཚོད་རིང་པོར་ལས་ཀ་བྱེད་པའི་སྒོ་ནས་གཅེས་སྐྱོང་བྱེད་ཀྱིན་ཡོད་པ་དེ་ཁོང་ཚོས་ངོས་འཛིན་བྱེད་ཀྱི་མེད། དེ་ནི་ཁོའམ་མོའི་དངུལ་ལོ་དེ་རེད། ཕྱོགས་གཞན་དེར་ཁྱིམ་ཚང་སྐྱོང་མཁན་དེས་ནང་དུ་སྡོད་མཁན་དེ་ལ། མཚན་མོ་ནང་དུ་ལོག་སྐབས། ཁོང་ཚོར་གཅེས་སྐྱོང་འདང་ངེས་བྱེད་ཀྱི་མི་འདུག་ཅེས་ནང་དུ་སྡོད་མཁན་དེ་ལ་རྙོག་དྲ་ཤོད་ཀྱི་ཡོད། ཁོས་རང་གི་བཟའ་ཟླས་ཕྲུ་གུ་དང་ཁང་པར་བལྟ་སྐྱོང་གི་དངུལ་སྤྲོད་ཀྱི་ཡོད་པ་དེ་ངོས་འཛིན་བྱེད་ཀྱི་མེད། མི་རེ་རེ་ནས་སོ་སོའི་གཅེས་སྐྱོང་དང་སེམས་འཁུར་སྟོན་ཕྱིར་དངུལ་ལོ་མི་འདྲ་བ་རེར་བེད་སྤྱོད་བྱེད་ཀྱིན་ཡོད་པ་དང་། ཕན་ཚུན་གྱི་དངུལ་ལོ་དེ་གཉིས་ཀས་ངོས་ལེན་བྱེད་སྟངས་སྦྱོང་དགོས།

ང་ཚོས་སྟོང་པ་ཉིད་དང་དེ་ཇི་ལྟར་ལག་བསྟར་བྱེད་དགོས་པའི་སྐོར་ཤེས་པའི་སྐབས། ང་ཚོས་གོ་རྟོགས་འདི་འགངས་ཆེན་དང་གལ་ཆེན་གང་འདྲ་ཡིན་པ་ཤེས་ཀྱི་ཡོད། འདི་ནི་ཧ་ཅང་ནུས་ཤུགས་ཆེ་བའི་སྨན་ཞིག་རེད། གནས་སྟངས་མང་པོའི་ནང་། གང་ལྟར་ཡང་། སྨན་གྱི་ནུས་ཤུགས་ཞན་པ་དེ་བཀོལ་སྤྱོད་བྱས་ཏེ། དེ་ནས་ག་ལེར་ག་ལེར་གཏིང་ཇེ་ཟབ་ཏུ་འགྲོ་རྒྱུ་དེ་དགའ་འདེམས་བྱ་འོས་ཤིག་ཡིན་སྲིད། 

སྟོང་པ་ཉིད་ལ་ཡོད་པའི་དཀའ་ངལ་ཆེན་པོ་དེ་ནི་ང་ཚོའི་རྟོག་འཆར་དེ་རེད། དེ་ལ་བརྟེན་ནས་རྣམ་པ་གཉིས་སུ་གྱུར་ཡོད་པ་ནི། 

• གཅིག་ནི་ང་ཚོའི་སེམས་ཀྱིས་ཆོས་རྣམས་དངོས་པོའི་གནས་ལུགས་དང་མི་མཐུན་པའི་ཚུལ་ཞིག་རང་ཤུགས་ཀྱིས་སྣང་བར་བྱེད་ཀྱི་ཡོད།
• གཉིས་ནི་གང་སྣང་བ་དེ་བདེན་པ་ཡིན་པ་དང་དངོས་གནས་དངོས་པོའི་གནས་ལུགས་དང་མཐུན་ཡོད་བསམ་གྱི་ཡོད། 

འདི་ནི་རང་ཤུགས་ཀྱིས་ཡིན་པ་ལས། ང་ཚོས་བསམ་བཞིན་དུ་བྱེད་པ་ཞིག་མིན། ང་ཚོས་དེ་ལ་ཡིད་ཆེས་ཀྱི་ཡོད། གང་ཡིན་ཞེ་ན། ང་ཚོས་དངོས་པོའི་གནས་ལུགས་ཉམས་སུ་མྱོང་གི་ཡོད་པའི་ཚོར་སྣང་ཞིག་སྐྱེ་གི་ཡོད། འདི་ནི་ང་ཚོས་དེ་ཇི་ལྟར་ཉམས་སུ་མྱོང་བ་དང་། ང་ཚོས་དངོས་གནས་དྲང་གནས། སེམས་གཏིང་ནས། གཞི་རྩའི་ཆ་ནས་དངོས་པོའི་གནས་ལུགས་དང་མཐུན་གྱི་ཡོད་པར་ཡིད་ཆེས་བྱེད་ཀྱི་ཡོད། འདི་ནི་དཀའ་ངལ་ཆེན་པོ་ཞིག་ཡིན་ཏེ། ང་ཚོས་ཕལ་ཆེར་རྟག་ཏུ་སོ་སོའི་ཚོར་བ་དེ་བདེན་པ་ཡིན་དགོས་པར་བསམ་གྱི་ཡོད། ང་ཚོས་གང་ཚོར་བ་དེ་བདེན་པ་ཡིན་དགོས་ཤིང་། ང་ཚོས་དེ་ལ་ཐ་ན་དྲི་རྩད་ཀྱང་བྱེད་ཀྱི་མེད། 

གལ་ཏེ་ང་ཚོས་ཕྲག་དོག་ལ་བལྟས་ན། སེམས་ཀྱིས་རྡོག་རྡོག་ཚུགས་ཐུབ་ཏུ་གྲུབ་པའི་སྡེ་ཚན་གྱི་ནང་ “ང་” དང་ “ཁྱོད་” ཅེས་པའི་གཉིས་སྣང་གི་རྟོག་འཆར་ཞིག་སྐྲུན་གྱི་ཡོད། ལྷན་སྐྱེས་ཀྱི་སྒོ་ནས་དགོས་དོན་འགྲུབ་པའི་འོས་འབབ་ཡོད་པའི་རྡོག་རྡོག་ཚུགས་ཐུབ་ཏུ་གྲུབ་པའི་སྣང་ཚུལ་ལྟར་གྱི་ང་ཟེར་བ་ཞིག་ཡོད། འོན་ཀྱང་དགོས་དོན་དེ་གྲུབ་མེད། རང་བཞིན་ལྷན་སྐྱེས་ཀྱིས་ང་ཚོས་ “ང་ལ་འདི་འོས་འབབ་ཡོད་ཀྱང་ཐོབ་མ་སོང་། ཁྱེད་རང་ལ་ཕ་གིར་འོས་འབབ་མེད་ནའང་། ཡིན་ནའང་ཁྱེད་ལ་ཐོབ་འདུག་” ཅེས་ཚོར་གྱི་ཡོད། དེ་འདྲ་ཞིག་ཚོར་གྱི་ཡོད། མ་རེད་དམ། དེས་གནོད་ཀྱི་ཡོད་པ་སོང་ཙང། ང་ཚོས་དེ་བདེན་པ་ཡིན་པར་ཡིད་ཆེས་ཀྱི་ཡོད། 

འདི་ནི་དངོས་གནས་མགོ་འཐོམས་དགོས་པ་ཞིག་ཡོད། གང་ཡིན་ཞེ་ན། བསམ་བཞིན་དུ་མ་ཡིན་པར་ང་ཚོས་མི་རྣམས་ཀྱིས་ང་ཚོར་གཅིག་སྤྲོད་འཇལ་བྱེད་དགོས་ཀྱི་ཡོད་པ་དང་། དེ་ཡང་སོ་སོའི་ཚབ་ལ་མི་གཞན་དག་ལ་རག་ན། དེ་ནི་དྲང་པོ་མིན་པར་ཚོར་གྱི་ཡོད། ང་ཚོས་དེ་ནི་དྲང་པོ་མིན་ཞེས་བསམ་གྱི་ཡོད། དྲི་བ་འདི་འདྲ་གཏོང་བ་ནི་ཞེད་སྣང་ཚ་པོ་རེད། འོན་ཀྱང་མི་རྣམས་ཅིའི་ཕྱིར་དྲང་པོ་ཡིན་དགོས་སམ། འཇིག་རྟེན་གྱི་ཟུར་དུ་རང་བཞིན་ལྷན་སྐྱེས་ཀྱི་དྲང་བདེན་ཟེར་བ་ཞིག་ཡོད་དམ། དེ་ནི་གང་ལ་གང་འཚམ་གྱི་ནུབ་ཕྱོགས་པའི་བསམ་བློ་ཞིག་ཡིན་པ་དང་། དེ་ནི་བྱེད་པོ་དཀོན་མཆོག་དེ་དྲང་བདེན་ཡིན་པ་དང་འཇིག་རྟེན་ན་དྲང་བདེན་ཡོད་པ་དང་འབྲེལ་ནས་ཡོད། འོན་ཀྱང་མི་ཚང་མས་དེ་འདྲ་བསམ་བློ་གཏོང་བའམ་ཡིད་ཆེས་བྱེད་ཀྱི་མེད།

དྲང་པོ་མིན་པའི་ཚོར་བ་འདི་རིག་གཞུང་གི་ཆ་ནས་དཔུང་སྣོན་བྱས་ཡོད་ནའང་། དེའི་རྣམ་པ་རང་ཤུགས་ཀྱིས་འབྱུང་བ་ཞིག་ཡོད། འདིར་ང་ཚོས་འཛམ་གླིང་འདི་ “རྒྱལ་ཁ་ཐོབ་མཁན་” དང་ “ཕམ་ཁ་ཁུར་མཁན་” ཞེས་པའི་རྡོག་རྡོག་ཚུགས་ཐུབ་ཀྱི་སྡེ་ཚན་གཉིས་སུ་དབྱེ་བ་འབྱེད་ཀྱི་ཡོད། འདི་ནི་གཉིས་སྣང་རེད། ཡེ་ཤུའི་གསུང་རབ་བྷ་ཡེ་བྷལ་གྱི་བཞེད་ཚུལ་ལྟར་བྱས་ན། དེ་ནི་སྡིག་ཅན་དང་དགེ་ལྡན་ལྟ་བུ་རེད། རྒྱལ་ཁ་ཐོབ་མཁན་དང་ཕམ་ཁ་ཁུར་མཁན་གཉིས་པོ་རྡོག་རྡོག་ཚུགས་ཐུབ་ཏུ་སོ་སོའི་སྒམ་གྱི་ནང་འཁར་ནས་ཡོད་པ་དང་། ཕམ་མཁན་གྱི་སྒམ་ནང་རང་ཉིད་སྡུག་པོ་དང་སྐྱོ་བོ་དེ་ཡོད། དངོས་གནས་དྲང་གནས་དེ་འདྲ་ཞིག་ཚོར་གྱི་ཡོད། རྒྱུ་མཚན་དེ་ལ་བརྟེན་ནས་ཧ་ཅང་ཞེད་སྣང་ཚ་པོ་ཡོད། སྒམ་གཉིས་ཡོད། གཉིས་སྣང་ལ་བརྟེན་ནས་ང་ཚོ་དེ་གཉིས་གང་རུང་ནང་དུ་ཡོད། 

ང་ཚོས་སོ་སོ་རང་ཉིད་བརྟན་པོ་དང་རྟག་པའི་སྡེ་ཚན་ཞིག་གི་ནང་བླུག་གི་ཡོད། རྟག་པ་ཟེར་དུས་ནམ་ཡང་འགྱུར་བ་མེད་པའི་དོན་རེད། དུས་ནམ་ཡང་ཡོད་པ་དེ་རེད། ང་ཚོ་ནི་བརྟན་པོ་དང་རྟག་པའི་ཕམ་མཁན་གྱི་སྡེ་ཚན་ནང་ཡོད་པ་དང་མི་གཞན་དག་ནི་རྒྱལ་ཁ་ཐོབ་མཁན་གྱི་སྡེ་ཚན་བརྟན་པོ་དང་རྟག་པའི་ནང་ཡོད། འདིས་ང་ཚོ་འཁོན་འཛིན་ཅན་དུ་ཚོར་འཇུག་པ་ཙམ་དུ་མ་ཟད། ལས་ངན་ཅན་ཡིན་པའང་ཚོར་གྱི་རེད། དེ་ཡང་ང་ཚོར་ཉེས་ཆད་བཏང་དང་གཏོང་མུས་ཡིན་པ་དང་དེ་ནི་མཐའ་གཅིག་ཏུ་དྲང་པོ་མིན་པ་ལྟ་བུ་རེད། ང་ཚོའི་བསམ་ཕྱོགས་དེ་དངོས་པོའི་གནས་ལུགས་དང་རྦད་དེ་འབྲེལ་བ་མེད་པ་ཞིག་ཆགས་ནས་རང་ཉིད་ཕམ་མཁན་གྱི་སྒམ་ནང་ཡོད་མཁན་གཅིག་པུ་དེ་ཡིན་སྲིད་བསམ་གྱི་ཡོད། གང་ཡིན་ཞེ་ན། ང་ཚོ་རང་གཅེས་འཛིན་གྱི་བསམ་བློ་ལ་བརྟེན་ནས་སྔོན་ཚུད་ནས་རྦད་དེ་ལས་བྲེལ་ཆགས་ཡོད། ང་ཚོས་རང་གིས་རང་ལ་སྙིང་རྗེའི་ཚོར་བ་སྐྱེ་བ་དང་། རང་ཉིད་ཕམ་དུ་འཇུག་མཁན་གྱི་ང་ཟེར་བ་རང་བཞིན་ལྷན་སྐྱེས་སུ་གྲུབ་པ་ཞིག་ཡོད་པ་དང་ང་ཚོ་དེ་འདྲ་ཞིག་དུས་རྟག་ཏུ་ཡིན་དགོས་པ་ནང་བཞིན་བསམས་ནས་སྡུག་བསྔལ་མྱོང་གི་ཡོད། 

ང་ཚོ་དང་གཞན་རྣམས་ཇི་ལྟར་གནས་ཡོད་པ་མི་ཤེས་པ་སོང་ཙང་། འདི་མགོ་རྙོག་ཅན་ཡིན་པ་ཙམ་དུ་མ་ཟད། ང་ཚོ་རྒྱུ་འབྲས་ལ་རྨོངས་པའི་གཏི་མུག་དབང་གིས་ཀྱང་ཡིན་པ་རེད། འདི་ནི་ནམ་རྒྱུན་ཕྲག་དོག་དང་མིག་སེར་གྱི་རྒྱབ་ལ་ཡོད། ཕ་གི་མི་དེ་ལས་ཀའི་གོ་གནས་སྤར་ཡོད་ནའང་ཁོ་ལ་འོས་འབབ་མི་འདུག །གང་ཡིན་ཞེ་ན། ཁོས་དེ་ཐོབ་པར་བྱས་མེད་ཅེས་དང་། ང་ཚོར་ཐོབ་མེད་པའི་གོ་གནས་འདི་ཁོ་ལ་སྤར་བའི་རྒྱུ་མཚན་དང་ཁྱད་ཆོས་གང་ཡང་ཁོ་ལ་མི་འདུག་ཅེས་ང་ཚོས་རྒྱུ་དང་འབྲས་བུའི་རྣམ་གཞག་ལ་ངོས་ལེན་མི་བྱེད་པ་ཡིན། གནས་སྤར་དེ་ནི་གང་ཡང་བྱེད་མི་དགོས་པར་ཐོབ་དགོས་པ་ཚོར་གྱི་ཡོད་པའམ། ཡང་ན་ང་ཚོས་འབད་བརྩོན་ཧ་ཅང་ཆེན་པོ་བྱས་ནའང་། ང་ཚོར་ཐོབ་མེད། ང་ཚོར་སོ་སོའི་ལེགས་སྐྱེས་སམ་བྱ་དགའ་དེ་ཐོབ་མེད་པ་སོང་ཙང་། དེ་ནི་དྲང་པོ་མིན། ང་ཚོས་གང་བྱས་པའི་འབད་བརྩོན་ཆུང་ངུ་དེ་ལས་འདས་པའི་ནུས་པ་དང་རྒྱུ་རྐྱེན་གཞན་ཧ་ཅང་མང་པོ་ཡོད་པ་དེ་དག་མཐོང་གི་མེད།

སྐབས་རེར་བསམ་བློ་གཏོང་སྟངས་འདི་རིག་གཞུང་གི་ཆ་ནས་སྤྱི་ཚོགས་རིང་ལུགས་ཀྱི་སྲིད་གཞུང་ནང་དཔུང་སྣོན་བྱས་པ་ལྟར་སྣང་གི་ཡོད། ཁྱེད་རང་སྤྱི་ཚོགས་རིང་ལུགས་ཀྱི་རྒྱལ་ཁབ་ཅིག་གི་ནང་སྐྱེས་པ་རྒྱུ་མཚན་ཙམ་བྱས་ནས་ཁྱེད་ཀྱིས་འབྲས་བུ་ཞིག་ཐོབ་ཕྱིར་འབད་བརྩོན་གང་ཡང་བྱེད་མི་དགོས་པར། འབྲུས་བུ་ངེས་ཅན་ཞིག་འཐོབ་པའི་འོས་འབབ་ཡོད་པ་ལྟ་བུ་ཚོར་སྣང་སྐྱེ་གི་ཡོད། འདིས་ང་ཚོར་དེ་དག་ཐམས་ཅད་འོས་འབབ་ཡོད་དགོས་ཞེས་ང་ཚོའི་ཚོར་བ་ལ་ཤན་ཞུགས་ཀྱི་ཡོད། གལ་ཏེ་ང་ཚོར་གང་འོས་འབབ་ཡོད་པར་ཚོར་བའི་བསམ་བློ་ཡོངས་སུ་རྫོགས་པར་བལྟས་ན། དེ་ནི་གང་ལ་གང་འཚམ་གྱི་དོ་སྣང་བྱེད་འོས་པ་ཞིག་ཡོད། མི་ཞིག་ལ་འབྲས་བུ་ཞིག་འོས་འབབ་ཡོད་དམ། ཡང་མ་རྒྱུ་མེད་པར་ཆོས་རྣམས་འབྱུང་གི་ཡོད་དམ། དེ་ནི་གཏིང་ཟབ་པོ་ཆགས་ཀྱི་ཡོད། ང་ཚོས་འདི་བཅུ་ཐོག་ན་གཞོན་ཚོར་མཚོན་ན། རང་གིས་སྤྱོད་ངན་ག་ཚོད་སྟོན་ཨེ་ཐུབ་ཀྱི་ཚོད་ལྟ་བྱས་ཏེ། ཁོང་ཚོའི་ཕ་མས་ད་དུང་ཡང་བརྩེ་བ་སྤྲོད་ཀྱི་ཡོད་མེད་ལྟ་བ་ནང་བཞིན་རེད། 

ད་ང་ཚོས་རྒྱལ་ཁ་ཐོབ་མཁན་དང་ཕམ་ཁ་ལེན་མཁན་གྱི་སྒམ་ལ་ཡོད་པའི་རྟོག་འཆར་དེ་དག་ངོས་འཛིན་བྱེད་ཀྱི་ཡིན། དེ་ཡང་རིམ་པ་གསུམ་གྱི་སྒོ་ནས་ངོས་འཛིན་བྱེད་དགོས། དང་པོ། ང་ཚོས་འཛམ་གླིང་ལ་དབྱེ་བ་ཕྱེ་གི་ཡོད་དམ། འཛམ་གླིང་འདི་རྒྱལ་ཁ་ཐོབ་མཁན་དང་ཕམ་ཁ་ལེན་མཁན་གཉིས་སུ་དབྱེ་བ་ཕྱེས་ཡོད་པ་དེ་བདེན་པ་རེད་དམ། གཉིས་པ། ངས་འཇིག་རྟེན་འདི་དྲང་པོ་དང་བདེན་པ་དགོས་པར་ཡིད་ཆེས་བྱེད་ཀྱི་ཡོད་དམ། མཐར་ང་རང་གི་ཕྱོགས་ནས་ང་ལ་རང་བཞིན་ལྷན་སྐྱེས་ཀྱིས་འོས་འབབ་ཡོད་པ་ཞིག་ལ་ཡིད་ཆེས་བྱེད་དམ། དཔེར་ན། ང་རང་ག་ཚོད་ཀྱིས་རང་འདོད་དོན་གཉེར་དང་ཞེད་སྣང་ཚ་པོ་ཡོད་མེད་ལ་མ་ལྟོས་པར། ང་ལ་རྒྱུ་མཚན་རྩ་ནས་མེད་པར་བརྩེ་བ་སྤྲོད་དགོས་པ་ལྟ་བུ་རེད། 

(བསམ་ཞིབ་བྱེད་བཞིན་པ།)

ང་ཚོས་སོ་སོ་རང་ཉིད་ལ། འཇིག་རྟེན་འདི་དྲང་པོ་ཅིའི་ཕྱིར་དགོས་པའམ་ཡང་ན་རྒྱུ་རྩ་ནས་མེད་པར་ང་ལ་ག་རེ་ཡིན་ནའང་འོས་འབབ་ག་རེ་བྱས་ནས་ཡོད་དམ་ཞེས་འདྲི་བའི་སྐབས། ང་ཚོས་སོ་སོའི་དད་པ་ལ་རྩོད་ལེན་བྱེད་འགོ་བཙུག་གི་ཡོད། དངོས་པོའི་གནས་ལུགས་དེ་འདྲ་ཞིག་ཅིའི་ཕྱིར་ཡིན་དགོས་སམ། དེ་ནི་ལན་འདེབས་གཅིག་དང་མཉམ་དུ་ཡོང་རྒྱུ་ཁག་པོ་ཡིན་པ་དང་ང་ཚོ་མང་པོ་ཞིག་གིས་ “ངེས་པར་དུ་ཡིན་དགོས་” ཞེས་པ་དེ་རྒྱུ་མཚན་ཡིན་པར་བརྗོད་ཀྱི་རེད། དེ་ནི་ “ངའི་ཇི་ལྟར་འདོད་པ་དེ་རེད་” ཅེས་སྒྱུར་གྱི་ཡོད། 

ཐ་ན་ང་ཚོས་འདི་ལྟར་ངེས་པར་དུ་སྣང་དགོས་བསམས་ནའང་། སྣང་བ་དེ་དངོས་པོའི་གནས་ལུགས་དང་མཐུན་གྱི་མེད། དཔེར་ན། ང་ཚོས་ཡེ་ཤུ་མ་ཤི་ཀའི་འཁྲུངས་སྟོན་སྐབས་ཀྱི་པཱ་ལགས་སེན་ཊ་ཡོད་དགོས་ཞེས་བསམ་པ་ཙམ་རྒྱུ་མཚན་དུ་བྱས་ཏེ། དེར་ག་རེ་བྱས་ནས་གཅིག་ཡོད་དགོས་སམ། དེ་ལ་རྒྱུ་མཚན་མེད་པ་དང་དེ་འདྲ་ཞིག་ཡིན་དགོས། དེ་ནི་རྟོག་པའི་འཆར་སྣང་རེད། ཡིན་ནའང་ང་ཚོས་སེན་ཊའི་སྟོང་པ་ཉིད་ལ་བལྟ་བའི་སྐབས། དེར་དངོས་གནས་གང་ཡོད་པ་དེ་རྟོགས་དགོས། ང་ཚོས་སེན་ཊ་དེ་ཚོང་ཁང་ནང་མཐོང་བའི་སྐབས། དེར་སེན་ཊ་ནང་བཞིན་གོས་གྱོན་པ་ཞིག་ཡོད། སེན་ཊ་མེད་ནའང་སེན་ཊའི་གོས་གྱོན་མཁན་གྱི་མི་དེ་དེར་ཡོད་པ་རེད། དེ་ནི་གང་སྣང་བ་དེ་དངོས་པོའི་གནས་ལུགས་དང་མཐུན་གྱི་མེད། སྟོང་པ་ཉིད་ཀྱིས་གང་ཡིན་པ་ཚང་མར་དགག་པ་རྒྱག་གི་མེད་པར། དེས་རྟོག་འཆར་གྱིས་བསྐྲུན་པའི་སྣང་བ་ལ་ཡིད་ཆེས་པ་དེ་ལ་དགག་པ་རྒྱག་གི་ཡོད། ད་དུང་གསལ་དུ་བཏང་ན། མི་ཞིག་སེན་ཊ་ནང་བཞིན་སྣང་བ་དེ་རྒྱུ་མཚན་ཙམ་བྱས་ནས་དེ་སེན་ཊ་ཡིན་པར་སྒྲུབ་ཀྱི་མེད། དེ་ནི་སྟོང་པ་ཉིད་ཀྱི་གོ་རྟོགས་ཀྱིས་དགག་པ་རྒྱག་གི་ཡོད། 

དེར་བརྟེན་རང་ཉིད་ཕམ་མཁན་ཞིག་ཡིན་པར་ཚོར་བ་ཙམ་རྒྱུ་མཚན་དུ་བྱས་ནས་རང་ཉིད་དངོས་གནས་ཕམ་མཁན་དེ་ཡིན་པར་སྒྲུབ་ཀྱི་མེད། ཐ་ན་ཁྱེད་ཀྱིས་ང་ལ་ཕམ་མཁན་དང་ཤོར་མཁན་ཞེས་འབོད་ནའང་། ང་རང་ཕམ་མཁན་དེ་ཡིན་པའི་དོན་མ་རེད། གལ་ཏེ་ངས་དགོས་དོན་ཞིག་གྲུབ་མེད་ན། ངས་གྲུབ་མེད་པ་རེད། དེ་ག་རང་རེད། ང་རང་འབད་བརྩོན་དང་ཐབས་ཤེས་བྱེད་བཞིན་པའི་འགྲོ་བ་མི་ཞིག་ཡིན་པ་དང་། འདི་ལ་དགག་པ་རྒྱག་མེད། འདི་སེམས་ལ་ངེས་པར་བྱེད་དགོས། 

(སྒོམ་གྱི་བར་མཚམས།)

མི་ཞིག་རྗེས་ལུས་ཐེབས་པའམ་ཁྱེད་ལ་ཁ་པར་མ་བཏང་བ་ཙམ་རྒྱུ་མཚན་དུ་བྱས་ནས་མི་དེས་ཁྱེད་ལ་བརྩེ་བ་མེད་པར་སྒྲུབ་ཀྱི་མེད། དེ་འདྲ་ཞིག་ཚོར་སྲིད་ནའང་། དེས་ “ཁྱེད་ཀྱིས་ང་ལ་བརྩེ་བ་མེད་པ་” དེ་ཁུངས་སྐྱེལ་བྱེད་མི་ཐུབ། དེ་ནི་དོན་མེད་དང་ཆོ་མེད་ཀྱི་བསམ་བློ་ཞིག་ཡིན་པ་དང་། འཇར་མིན་གྱི་སྐད་ནང་འདི་ལ་ཚིག་ཏག་ཏག་ཅིག་ཡོད་པ་ནི་ཁུ་ཝ་ཆི་ (quatsch) ཟེར་གྱི་ཡོད། ང་ཚོ་སེམས་ཀྱི་བསླུ་ཐབས་དེ་དག་གི་ནང་འགྲོ་བའི་སྐབས། དེ་ནི་རང་གིས་རང་ལ་དྲན་གསོ་གཏོང་བའི་ཆེད་ཕན་ཐོགས་ཅན་གྱི་ཚིག་གནད་འགག་ཅན་ཞིག་ཡིན་ཆོག །དེ་གང་གིས་ཀྱང་དངོས་པོའི་གནས་ལུགས་ལ་གོ་གི་མེད།

མི་ཞིག་རྗེས་ལུས་ཐེབས་པ་དང་དུས་ཚོད་ཏག་ཏག་མ་བསླེབ་པའི་སྐབས། ང་ཚོར་སྣང་མེད་བསྐྱུར་བའི་ཚད་བརྒལ་གྱི་ཞེད་སྣང་འདི་ཡོད། ཡིན་ནའང་དེ་ནི་ཆོ་མེད་རེད། དངོས་ཡོད་གནས་ཚུལ་ནི་ཁོང་ཚོ་རྗེས་ལུས་ཐེབས་པའམ་ཡང་ན་འབྱོར་མེད་པ་རེད། དེ་ནི་དངོས་ཡོད་གནས་ཚུལ་རེད། ང་ཚོས་ “ཨོ། ང་རང་ཐབས་སྐྱོ་བ་ལ། ང་རང་སྣང་མེད་བསྐྱུར་སོང་། སུས་ཀྱང་ང་ལ་བརྩེ་བ་མི་འདུག །འདི་ཡང་བསྐྱར་ང་ལ་བྱུང་སོང་། ང་ནི་ཕམ་མཁན་ཞིག་རེད་” ཅེས་བསམ་བློ་མི་གཏོང་བའི་སྒོ་ནས་རྒྱུ་མཚན་འཚོལ་ཐབས་བྱེད་ཆོག །དོན་མེད་དང་ཆོ་མེད་རང་རེད།

ང་ཚོ་སྣང་མེད་དུ་བསྐྱུར་བ་དང་རྟག་ཏུ་ཕམ་མཁན་དེ་ཡིན་པར་ཚོར་བ་ཙམ་རྒྱུ་མཚན་དུ་བྱས་ནས་ང་ཚོ་སྣང་མེད་དུ་བསྐྱུར་བའམ་ང་ཚོ་ཕམ་མཁན་དེ་ཡིན་པ་སྒྲུབ་ཀྱི་མེད། དེ་ནི་ང་ཚོས་དེ་ལྟར་བདེན་པ་ཡིན་པ་དང་དངོས་པོའི་གནས་ལུགས་དང་མཐུན་གྱི་ཡོད་ཅེས་ཚོར་བ་དང་བསམ་པ་ཙམ་སྟོན་གྱི་ཡོད། དེར་བརྟེན་དེས་གནོད་ཀྱི་ཡོད། གལ་ཏེ་ང་ཚོས་དེ་བདེན་པ་ཡིན་པར་ཡིད་ཆེས་བྱ་རྒྱུ་དེ་མཚམས་འཇོག་བྱས་ན། དེས་ང་ཚོར་གནོད་ཚབས་ཆེན་པོ་བྱེད་ངེས་མ་རེད་ལ། མཐར་གང་ཡང་མིན་པ་ལྟ་བུ་ཚོར་ངེས་རེད། ང་ཚོས་རིམ་བཞིན་མི་དེ་རྗེས་ལུས་ཐེབས་པ་ཙམ་ཡིན་པའམ་ཡང་ན་མི་གཞན་ཞིག་བརྙེད་པ་སོགས་མཐོང་ངེས་རེད། དེ་ནས་ང་ཚོས་དེ་ལ་གདོང་ལེན་བྱེད་ངེས་རེད། གལ་ཏེ་ང་ཚོར་རྟག་ཏུ་རྗེས་ལུས་ཐེབས་མཁན་གྱི་གྲོགས་པོ་ཞིག་ཡོད་ན། ང་ཚོས་མི་དེ་ལ་སྔོན་ཚུད་ནས་ཐུག་ག་ཤོག་ཨང་ཞེས་བརྗོད་པ་དང་། ཡང་མིན་ན་ས་མཚམས་ཤིག་བཟོས་ཏེ། ང་ཚོས་དུས་ཚོད་ངེས་ཅན་ཞིག་གི་བར་དུ་སྒུག་གི་ཡིན། ཡིན་ནའང་ད་དུང་མ་འབྱོར་ན་ང་ཚོ་འགྲོ་རྒྱུ་ཡིན་ཞེས་བརྗོད་དགོས། དེ་ལྟར་བྱུང་ན་ཚང་མ་གསལ་པོ་ཆགས་པ་དང་ང་ཚོ་སོ་སོའི་མི་ཚེའི་ནང་མདུན་སྐྱོད་བྱེད་ཀྱི་ཡོད། ང་ཚོས་ཆོ་མེད་དོན་མེད་ལ་ཡིད་ཆེས་ནས་རང་གིས་རང་སྡུག་བསྔལ་མྱོང་དུ་འཇུག་མི་དགོས།

ནམ་རྒྱུན་འདིའི་རྒྱབ་ལ་གནད་དོན་ཧ་ཅང་མང་པོ་ཡོད་པ་དེ་ནི། རྟག་ཏུ་ཚོད་འཛིན་དགོས་འདོད་དང་བཅས་རིག་གཞུང་གི་ཆ་ནས་ཧ་ཅང་དཔུང་སྣོན་བྱས་པའི་གོ་བ་ལོག་སྒྲུབ་རེད། ངས་འདི་འཇར་མིན་གྱི་མི་རྣམས་ཀྱི་ཁྲོད་དུ་འདི་ནི་དམིགས་བསལ་ཤུགས་ཆེན་ཡོད་པ་མཐོང་སོང་། ཚང་མ་ཚོད་འཛིན་གྱི་འོག་ཏུ་ཡོད་དགོས། གལ་ཏེ་ཚང་མ་གོ་རིམ་ལྡན་པ་དང་གསལ་པོ་ཡོད་ན། དེ་ནས་ཁྱེད་ཀྱིས་ཉེན་སྲུང་དེ་ཚོར་ཐུབ། འདི་ཡང་ཁུངས་མེད་ཅིག་རེད། མི་སུ་གཅིག་ཀྱང་མི་ཚེར་ཚོད་འཛིན་བྱེད་མི་ཐུབ། གང་ཡིན་ཞེ་ན། མི་ཚེའི་ནང་གནད་དོན་ཧ་ཅང་མང་པོ་འབྱུང་བཞིན་པ་དང་དེས་ཚང་མར་ཤུགས་རྐྱེན་སྤྲོད་པ་ལ་བརྟེན་ནས་ཧ་ཅང་རྙོག་འཛིངས་ཅན་རེད། ང་ཚོས་ཆོ་མེད་པ་དང་དངོས་ཡོད་དང་མི་མཐུན་པའི་རེ་བའི་རིམ་པ་ཧ་ཅང་མང་པོ་ངོས་འཛིན་བྱེད་དགོས་ཀྱི་ཡོད། 

ཧ་ལམ་ང་ཚོ་ཚང་མས་ “ང་” ཟེར་བ་དེ་ལ་ཚད་བརྒལ་གྱི་ནན་བརྗོད་བྱེད་ཀྱི་ཡོད། དོན་ངོ་མར་ང་ཚོས་སོ་སོ་རང་ཉིད་འཇིག་རྟེན་གྱི་ལྟེ་བའམ་གཙོ་བོ་དེ་ཡིན་པར་ཡིད་ཆེས་བྱེད་ཀྱི་ཡོད་པ་དང་། གཞན་ཚང་མ་སོ་སོའི་སྒང་ལ་བསླེབ་ཀྱི་ཡོད་པ་ནི་རང་བཞིན་ཞིག་རེད། དེའི་སྒང་ལ་ང་ཚོས་སོ་སོ་རང་ཉིད་ལྟ་ན་སྡུག་པ་དང་། རྣམ་དཔྱོད་ལྡན་པ། ཡང་ན་རྒྱུ་ནོར་བཅས་ཁ་སྣོན་བྱས་ཏེ། དེ་ནི་སོ་སོའི་སྐོར་གྱི་གནད་དོན་གལ་ཆེ་ཤོས་དེ་རེད་ཅེས་བསམ་གྱི་ཡོད། འདིར་ང་ཚོའི་དཀའ་ངལ་ཆེ་ཤོས་དེ་གནས་ཡོད། དེ་ནི་རྡོག་རྡོག་ཚུགས་ཐུབ་ཏུ་གྲུབ་པའི་ང་ཞེས་བྱ་བ་ལྟ་ན་སྡུག་པ་དང་ཕྱུག་པོ་དེ་རེད། 

ང་ཚོས་དེ་ལྟར་བསམ་བློ་གཏོང་བའི་སྐབས། ང་ཚོ་སོ་སོའི་གྲོགས་པོ་ལ་གཅེས་འཛིན་སྐྱེ་བ་དང་། གལ་ཏེ་ང་ཚོས་སོ་སོའི་གྲོགས་པོ་གཞན་དང་མཉམ་དུ་དུས་ཚོད་བསྐྱལ་བ་དང་སྐྱིད་པོ་གཏོང་བ་མཐོང་ན། ཕྲག་དོག་བཟའ་གི་ཡོད། གལ་ཏེ་ང་ཚོས་ཡིད་ཆེས་འདི་ལ་རྩོད་ལེན་བྱས་ན། དེ་ནི་གང་ལྟར་ཡང་མཐའ་གཅིག་ཏུ་ནོར་བ་རེད། ང་ཚོས་གཞི་རྩ་ནས་ལྟ་ཚུལའགྱུར་བ་གཏོང་དགོས། རྒྱུ་མཚན་དེ་ལ་བརྟེན་ནས་སྟོང་པ་ཉིད་ཀྱི་གོ་རྟོགས་ནི་ཕྲག་དོག་ཁོ་ནའི་ཆེད་དུ་མིན་པར། ཉོན་མོངས་ཐམས་ཅད་ཀྱི་སྨན་ནུས་ཤུགས་དང་ཕན་ནུས་ཆེ་ཤོས་དེ་ཡིན་པ་རེད།།