བླ་མ་མཆོད་པའི་ཆོ་ག།

༩༽བདེ་སྟོང་དབྱེར་མེད་ལྷ་ལམ་ཡངས་པར་ཀུན་བཟང་མཆོད་སྤྲིན་འཁྲིགས་པའི་དབུས། །ལོ་མ་མེ་ཏོག་འབྲས་བུས་ཡོངས་མཛེས་འདོད་དགུའི་དཔག་བསམ་ལྗོན་པའི་རྩེར། །གདོང་ལྔ་འབར་བའི་རིན་ཆེན་ཁྲི་སྟེང་ཆུ་སྐྱེས་ཉི་ཟླ་རྒྱས་པའི་སྟེང༌། །

༡༠༽བཀའ་དྲིན་གསུམ་ལྡན་རྩ་བའི་བླ་མ་སངས་རྒྱས་ཀུན་གྱི་ངོ་བོ་ཉིད། །རྣམ་པ་ངུར་སྨྲིག་འཛིན་པའི་དགེ་སློང་ཞལ་གཅིག་ཕྱག་གཉིས་འཛུམ་དཀར་འཕྲོ། །ཕྱག་གཡས་ཆོས་འཆད་གཡོན་པ་མཉམ་བཞག་བདུད་རྩིས་གང་བའི་ལྷུང་བཟེད་བསྣམས། །གུར་གུམ་མདངས་ལྡན་ཆོས་གོས་གསུམ་གསོལ་གསེར་མདོག་པཎ་ཞྭས་དབུ་ལ་མཛེས།

༡༡༽རྣམ་པ་ཁྱབ་བདག་རྡོ་རྗེ་འཆང་དབང་ཞལ་གཅིག་ཕྱག་གཉིས་སྐུ་མདོག་སྔོ། །རྡོ་དྲིལ་བཟུང་ནས་དབྱིངས་ཕྱུག་མར་འཁྱུད་ལྷན་སྐྱེས་བདེ་སྟོང་རོལ་བས་དགྱེས། །རྣམ་མང་རིན་ཆེན་རྒྱན་གྱིས་སྤྲས་ཤིང་ལྷ་རྫས་དར་གྱི་ན་བཟས་བཀླུབས།

༡༢༽མཚན་དཔེའི་རྒྱན་ལྡན་འོད་ཟེར་སྟོང་འབར་འཇའ་ཚོན་སྣ་ལྔས་བསྐོར་པའི་དབུས། །རྡོ་རྗེ་སྐྱིལ་ཀྲུང་ཚུལ་གྱིས་བཞུགས་པའི་ཕུང་བོ་རྣམ་དག་བདེ་གཤེགས་ལྔ། །ཁམས་བཞི་ཡུམ་བཞི་སྐྱེ་མཆེད་རྩ་རྒྱུས་ཚིགས་རྣམས་བྱང་ཆུབ་སེམས་དཔའ་དངོས། །བ་སྤུ་དགྲ་བཅོམ་ཉི་ཁྲི་ཆིག་སྟོང་ཡན་ལག་ཁྲོ་བོའི་དབང་བོ་ཉིད། །འོད་ཟེར་ཕྱོགས་སྐྱོང་གནོད་སྦྱིན་གསང་བ་འཇིག་རྟེན་པ་རྣམས་ཞབས་ཀྱི་གདན། །

༡༣༽མཐའ་སྐོར་རིམ་བཞིན་དངོས་བརྒྱུད་བླ་མ་ཡི་དམ་དཀྱིལ་འཁོར་ལྷ་ཚོགས་དང༌། །སངས་རྒྱས་བྱང་སེམས་དཔའ་བོ་མཁའ་འགྲོ་བསྟན་སྲུང་རྒྱ་མཚོས་བསྐོར་ནས་བཞུགས། །

༡༤༽དེ་དག་སྒོ་གསུམ་རྡོ་རྗེ་གསུམ་མཚན་ཧཱུཾ་ཡིག་འོད་ཟེར་ལྕགས་ཀྱུ་ཡིས། །རང་བཞིན་གནས་ནས་ཡེ་ཤེས་པ་རྣམས་སྤྱན་དྲངས་དབྱེར་མེད་བརྟན་པར་གྱུར། །

༡༥༽ཕུན་ཚོགས་བདེ་ལེགས་འབྱུང་གནས་དུས་གསུམ་གྱི། །རྩ་བརྒྱུད་བླ་མ་ཡི་དམ་དཀོན་མཆོག་གསུམ། །དཔའ་བོ་མཁའ་འགྲོ་ཆོས་སྐྱོང་སྲུང་ཚོགས་བཅས། །ཐུགས་རྗེའི་དབང་གིས་འདིར་གཤེགས་བརྟན་པར་བཞུགས། །

༡༦༽ཆོས་རྣམས་རང་བཞིན་འགྲོ་འོང་ཀུན་བྲལ་ཡང༌། །སྣ་ཚོགས་གདུལ་བྱའི་བསམ་པ་ཇི་བཞིན་དུ། །ཅིར་ཡང་འཆར་བའི་མཁྱེན་བརྩེའི་འཕྲིན་ལས་ཀྱིས། །སྐྱབས་མགོན་དམ་པ་འཁོར་བཅས་གཤེགས་སུ་གསོལ། །

༡༧༽ཨོཾ་གུ་རུ་བུདྷཱ་བོ་དྷི་ས་ཏྭ་དྷརྨ་པཱ་ལ་ས་པ་རི་ཝཱ་ར་ཨེ་ཧྱེ་ཧིཿ ཛཿཧཱུཾ་བཾ་ཧོཿ ཡེ་ཤེས་པ་རྣམས་དམ་ཚིག་པ་དང་གཉིས་སུ་མེད་པར་གྱུར།།

༡༨༽གང་གི་ཐུགས་རྗེས་བདེ་བ་ཆེན་པོའི་དབྱིངས། །སྐུ་གསུམ་གོ་འཕང་མཆོག་ཀྱང་སྐད་ཅིག་ལ། །སྩོལ་མཛད་བླ་མ་རིན་ཆེན་ལྟ་བུའི་སྐུ། །རྡོ་རྗེ་ཅན་ཞབས་པདྨོར་ཕྱག་འཚལ་ལོ། །

༡༩༽རབ་འབྱམས་རྒྱལ་བ་ཀུན་གྱི་ཡེ་ཤེས་ནི། །གང་འདུལ་ཅིར་ཡང་འཆར་བའི་ཐབས་མཁས་མཆོག །ངུར་སྨྲིག་འཛིན་པའི་གར་གྱིས་རྣམ་རོལ་པ། །སྐྱབས་མགོན་དམ་པའི་ཞབས་ལ་ཕྱག་འཚལ་ལོ། །

༢༠༽ཉེས་ཀུན་བག་ཆགས་བཅས་པ་དྲུངས་ཕྱུང་ཞིང༌། །དཔག་མེད་ཡོན་ཏན་རིན་ཆེན་ཚོགས་ཀྱི་གཏེར། །ཕན་བདེ་མ་ལུས་འབྱུང་བའི་སྒོ་གཅིག་པུ། །རྗེ་བཙུན་བླ་མའི་ཞབས་ལ་ཕྱག་འཚལ་ལོ། །

༢༡༽ལྷ་བཅས་སྟོན་པ་སངས་རྒྱས་ཀུན་གྱི་དངོས། །བརྒྱད་ཁྲི་བཞི་སྟོང་དམ་ཆོས་འབྱུང་བའི་གནས། །འཕགས་ཚོགས་ཀུན་ཀྱི་དབུས་ན་ལྷང་ངེ་བ། །དྲིན་ཅན་བླ་མ་རྣམས་ལ་ཕྱག་འཚལ་ལོ། །

༢༢༽དུས་གསུམ་ཕྱོགས་བཅུར་བཞུགས་པའི་བླ་མ་དང༌། །རིན་ཆེན་མཆོག་གསུམ་ཕྱག་འོས་ཐམས་ཅད་ལ། །དད་ཅིང་མོས་པས་བསྟོད་དབྱངས་རྒྱ་མཚོར་བཅས། །ཞིང་རྡུལ་མཉམ་པའི་ལུས་སྤྲུལ་འཚལ་ལོ། །

༢༣༽སྐྱབས་མགོན་རྗེ་བཙུན་བླ་མ་འཁོར་བཅས་ལ། །སྣ་ཚོགས་མཆོད་སྤྲིན་རྒྱ་མཚོ་འབུལ་བ་ནི། །

༢༤༽བཀོད་ལེགས་རིན་ཆེན་འོད་འབར་སྣོད་ཡངས་ལས། །དག་བྱེད་བདུད་རྩིའི་ཆུ་བཞི་དལ་གྱིས་འབབ། །

༢༥༽སྡོང་བོ་སིལ་མ་ཕྲེང་བ་སྤེལ་ལེགས་པ། །མཛེས་པའི་མེ་ཏོག་ས་དང་བར་སྣང་གང༌། །

༢༦༽དྲི་ཞིམ་སྤོས་ཀྱི་དུད་པ་བཻཌཱུརྱའི། །དབྱར་སྐྱེས་སྔོན་པོའི་སྤྲིན་གྱིས་ལྷ་ལམ་འཁྲིགས། །

༢༧༽ཉི་ཟླ་ནོར་བུ་རབ་འབར་སྒྲོན་མེའི་ཚོགས། སྟོང་གསུམ་མུན་སེལ་འོད་ཟེར་རྩེ་དགའ་རྒོད། །

༢༨༽ག་བུར་ཙན་དན་གུར་ཀུམ་དྲིས་བགོས་པའི། །སྤོས་ཆུའི་མཚོ་ཆེན་འཁོར་ཡུག་ཀུན་ནས་འཁྱིལ། །

༢༩༽རོ་བརྒྱའི་བཅུད་ལྡན་བཟའ་བཅས་བཏུང་བ་དང༌། །ལྷ་དང་མི་ཡི་ཞལ་ཟས་ལྷུན་པོར་སྤུངས། །

༣༠༽སྣ་ཚོགས་རོལ་མོའི་བྱེ་བྲག་མཐའ་ཡས་ལས། །བྱུང་བའི་གདངས་སྙན་འགྱུར་བས་ས་གསུམ་འགེངས། །

༣༡༽གཟུགས་སྒྲ་དྲི་རོ་རེག་བྱའི་དཔལ་འཛིན་པའི། །ཕྱི་ནང་འདོད་ཡོན་ལྷ་མོས་ཕྱོགས་ཀུན་ཁྱབ། །

༣༢༽བྱེ་བ་ཕྲག་བརྒྱའི་གླིང་བཞི་ལྷུན་པོར་བཅས། །རིན་ཆེན་བདུན་དང་ཉེ་བའི་རིན་ཆེན་སོགས། །ཀུན་དགའ་སྐྱེད་པའི་སྣོད་བཅུད་ཕུན་སུམ་ཚོགས། །ལྷ་མིའི་ལོངས་སྤྱོད་འདོད་དགུའི་གཏེར་ཆེན་པོ། །དང་བའི་སེམས་ཀྱིས་ཕུལ་བྱུང་ཞིང་གི་མཆོག །སྐྱབས་མགོན་ཐུགས་རྗེའི་གཏེར་ལ་དབུལ་བར་བགྱི། །

༣༣༽དངོས་བཤམས་ཡིད་སྤྲུལ་ཡིད་བཞིན་རྒྱ་མཚོའི་ངོགས། །སྲིད་ཞིའི་རྣམ་དཀར་ལས་འོངས་མཆོད་རྫས་ཀྱི། །འདབ་སྟོང་རྒྱས་པས་ཀུན་གྱི་ཡིད་འཕྲོག་ཅིང༌། །འཇིག་རྟེན་འཇིག་རྟེན་ལས་འདས་རང་གཞན་གྱི། །སྒོ་གསུམ་དགེ་བའི་མེ་ཏོག་ཅི་ཡང་བཀྲ། །ཀུན་བཟང་མཆོད་པའི་དྲི་བསུང་འབུམ་འཕྲོ་ཞིང༌། །བསླབ་གསུམ་རིམ་གཉིས་ལམ་ལྔའི་འབྲས་ལྡན་པའི། །དགའ་ཚལ་རྗེ་བཙུན་བླ་མ་མཉེས་ཕྱིར་འབུལ། །

༣༤༽གུར་ཀུམ་མདངས་ལྡན་བཟང་བོའི་དྲི་ངད་ཅན། །རོ་བརྒྱའི་དཔལ་འཛིན་རྒྱ་ཇའི་བཏུང་བ་དང༌། །ལྕགས་ཀྱུ་ལྔ་དང་སྒྲོན་མ་ལྔ་ལ་སོགས། །སྦྱངས་རྟོག་སྤར་བའི་བདུད་རྩིའི་རྒྱ་མཚོས་མཆོད། །

༣༥༽ཡིད་འོང་ལང་ཚོའི་དཔལ་འཛིན་དྲུག་ཅུ་བཞིའི། །འདོད་པའི་སྒྱུ་རྩལ་ལ་མཁས་ལུས་ཕྲ་མ། །ཞིང་སྐྱེས་སྔགས་སྐྱེས་ལྷན་སྐྱེས་ཕོ་ཉའི་ཚོགས། །མཛེས་སྡུག་སྒྱུ་མའི་ཕྱག་རྒྱ་རྣམས་ཀྱང་འབུལ། །

༣༦༽སྒྲིབ་བྲལ་ལྷན་སྐྱེས་བདེ་བའི་ཡེ་ཤེས་ཆེ། །ཆོས་ཀུན་རང་བཞིན་སྤྲོས་དང་བྲལ་བའི་དབྱིངས། །དབྱེར་མེད་ལྷུན་གྲུབ་སྨྲ་བསམ་བརྗོད་ལས་འདས། །དོན་དམ་བྱང་ཆུབ་སེམས་མཆོག་ཁྱོད་ལ་འབུལ། །

༣༧༽ཉོན་མོངས་བཞི་བརྒྱ་རྩ་བཞིའི་ནད་འཇོམས་པའི། །བཟང་བོའི་སྨན་གྱི་བྱེ་བྲག་སྣ་ཚོགས་དང༌། །ཁྱོད་མཉེས་བགྱིད་ཕྱིར་བདག་བྲན་འབུལ་ལགས་ན། །ནམ་མཁའ་ཇི་སྲིད་འབངས་སུ་གཟུང་དུ་གསོལ།

༣༨༽ཐོག་མེད་དུས་ནས་མི་དགེ་སྡིག་པའི་ལས། །བགྱིས་དང་བགྱིད་བསྩལ་ཡི་རང་ཅི་མཆིས་པ། །ཐུགས་རྗེ་ཆེ་ལྡན་སྤྱན་སྔར་འགྱོད་སེམས་ཀྱིས། །བཤགས་ཤིང་སླན་ཆད་མི་བགྱིད་སྡོམ་པ་ནོད། །

༣༩༽ཆོས་རྣམས་རང་བཞིན་མཚན་མ་དང་བྲལ་ཡང༌། །རྨི་ལམ་ཇི་བཞིན་སྐྱེ་འཕགས་ཐམས་ཅད་ཀྱི། །བདེ་དགའ་ཅིར་ཡང་འཆར་བའི་རྣམ་དཀར་ལ། །བདག་ཅག་བསམ་པ་ཐག་པས་ཡི་རང་ངོ༌། །

༤༠༽ཕུལ་བྱུང་མཁྱེན་བརྩེའི་ཆུ་འཛིན་འབུམ་དཀྲིགས་ཏེ། །མཐའ་ཡས་འགྲོ་འདིའི་ཕན་བདེ་ཀུན་དའི་ཚལ། །བསྐྱེད་དང་ཡུན་དུ་གནས་དང་སྤེལ་བའི་ཕྱིར། །ཟབ་རྒྱས་ཆོས་ཀྱི་ཆར་བ་དབབ་ཏུ་གསོལ། །

༤༡༽རྡོ་རྗེའི་སྐུ་ལ་སྐྱེ་འཆི་མི་མངའ་ཡང༌། །ཟུང་འཇུག་དབང་གི་རྒྱལ་པོའི་ཟ་མ་ཏོག །བདག་ཅག་མོས་པ་ཇི་བཞིན་སྲིད་མཐའི་བར། །མྱ་ངན་མི་འདའ་རྟག་པར་བཞུགས་སུ་གསོལ། །

༤༢༽དེ་ལྟར་བསྐྲུན་པའི་རྣམ་དཀར་དགེ་བའི་ཚོགས། །བཀའ་དྲིན་གསུམ་ལྡན་རྗེ་བཙུན་བླ་མ་ཡིས། །ཚེ་རབས་ཀུན་ཏུ་འབྲལ་མེད་རྗེས་འཛིན་ཅིང༌། །ཟུང་འཇུག་རྡོ་རྗེ་འཆང་དབང་ཐོབ་ཕྱིར་བསྔོ།

དངོས་གྲུབ་ཀུན་བྱུང་ཐུབ་དབང་རྡོ་རྗེ་འཆང་། །དམིགས་མེད་བརྩེ་བའི་གཏེར་ཆེན་སྤྱན་རས་གཟིགས། །དྲི་མེད་མཁྱེན་པའི་དབང་པོ་འཇམ་དཔལ་དབྱངས། །བདུད་དཔུང་མ་ལུས་འཇོམས་མཛད་གསང་བའི་བདག །གངས་ཅན་མཁས་པའི་གཙུག་རྒྱན་ཙོང་ཁ་པ། །བློ་བཟང་གྲགས་པའི་ཞབས་ལ་གསོལ་བ་འདེབས། །

༸གོང་ས་མཆོག་གི་མཚན་སྔགས། ཨོྃ་ཨཱཿཧཱུཾ་གུ་རུ་བཛྲ་དྷ་ར་ཝཱ་གིནྡྲ་སུ་མ་ཏི་ཤཱ་ས་ན་དྷ་ར་ས་མུ་དྲ་ཤྲི་བྷ་དྲ་སརྦ་སིདྡྷི་ཧཱུཾ་ཧཱུཾ།

ཙོང་ཁ་པའི་མཚན་སྔགས། ཨོྃ་ཨཱཿགུ་རུ་བཛྲ་དྡྷ་ར་སུ་མ་ཏི་ཀིརྟི་སིདྡྷི་ཧཱུཾ་ཧཱུཾ།

ཐུབ་དབང་གི་མཚན་སྔགསྲ ཨོཾ་མུ་ནེ་མུ་ནེ་མ་ཧཱ་མུ་ན་ཡེ་སྭཱ་ཧཱ།

རྡོ་རྗེ་འཆང་གི་མཚན་སྔགས། ཨོྃ་བཛྲ་དྷ་ར་ཧཱུཾ་ཧཱུཾ།

ཨོྃ་ཨཱཿཧཱུཾ།

༤༣༽ཡོན་ཏན་འབྱུང་ནས་ཚུལ་ཁྲིམས་རྒྱ་མཚོ་ཆེ། །མང་ཐོས་ནོར་བུའི་ཚོགས་ཀྱིས་ཡོངས་སུ་གཏམས། །ངུར་སྨྲིག་འཛིན་པ་ཐུབ་དབང་གཉིས་པའི་རྗེ། །གནས་བརྟན་འདུལ་བ་འཛིན་ལ་གསོལ་བ་འདེབས། །

༤༤༽གང་དང་ལྡན་ན་བདེ་བར་གཤེགས་པའི་ལམ། །སྟོན་པར་འོས་པའི་ཡོན་ཏན་བཅུ་ལྡན་པ། །མ་ལུས་རྒྱལ་བའི་གདུང་འཚོབ་ཆོས་ཀྱི་རྗེ། །ཐེག་མཆོག་དགེ་བའི་བཤེས་ལ་གསོལ་བ་འདེབས། །

༤༥༽སྒོ་གསུམ་ལེགས་བསྡམས་བློ་ཆེན་བཟོད་ལྡན་དྲང༌། །གཡོ་དང་སྒྱུ་མེད་སྔགས་དང་རྒྱུད་ཤེས་ཤིང༌། །དེ་ཉིད་བཅུ་ཟུང་འབྲི་དང་འཆད་མཁས་པའི། །རྡོ་རྗེ་འཛིན་པའི་གཙོ་ལ་གསོལ་བ་འདེབ། །

༤༦༽སངས་རྒྱས་གྲངས་མེད་བྱོན་པས་མ་ཐུལ་བའི། །མ་རུང་གདུལ་དཀའི་སྙིགས་དུས་འགྲོ་བ་ལ། །བདེ་གཤེགས་ལམ་བཟང་ཇི་བཞིན་སྟོན་པ་ཡི། །སྐྱབས་མགོན་ཐུགས་རྗེ་ཅན་ལ་གསོལ་བ་འདེབས། །

༤༧༽ཐུབ་པའི་ཉི་མ་དུས་ཀྱིས་ནུབ་གྱུར་ཏེ། །མགོན་སྐྱབས་མེད་པའི་འགྲོ་བ་མང་པོ་ལ། །རྒྱལ་བའི་མཛད་པ་ཉེ་བར་སྒྲུབ་མཛད་པའི། །སྐྱབས་མགོན་ཐུགས་རྗེ་ཅན་ལ་གསོལ་བ་འདེབས། །

༤༨༽དུས་གསུམ་ཕྱོགས་བཅུའི་རྒྱལ་བ་ཐམས་ཅད་ལས། །གང་གི་བ་སྤུའི་བུ་ག་གཅིག་ཙམ་ཡང༌། །བདག་ཅག་བསོད་ནམས་ཞིང་དུ་ལེགས་བསྔགས་པའི། །སྐྱབས་མགོན་ཐུགས་རྗེ་ཅན་ལ་གསོལ་བ་འདེབས། །

༤༩༽བདེ་གཤེགས་སྐུ་གསུམ་རྒྱལ་གྱི་འཁོར་ལོ་ནི། །ཐབས་མཁས་སྒྱུ་འཕྲུལ་དྲ་བའི་འཇོ་སྒེག་ལས། །ཐ་མལ་ཚུལ་གྱིས་འགྲོ་བ་འདྲེན་མཛད་པའི། །སྐྱབས་མགོན་ཐུགས་རྗེ་ཅན་ལ་གསོལ་བ་འདེབས། །

༥༠༽ཁྱོད་ཀྱི་ཕུང་ཁམས་སྐྱེ་མཆེད་ཡན་ལག་རྣམས། །བདེ་གཤེགས་རིགས་ལྔ་ཡབ་ཡུམ་སེམས་དཔའ་དང༌། །ཁྲོ་བོའི་དབང་བོའི་རང་བཞིན་མཆོག་གསུམ་གྱི། །བདག་ཉིད་བླ་མ་མཆོག་ལ་གསོལ་བ་འདེབས། །

༥༡༽ཀུན་མཁྱེན་ཡེ་ཤེས་རོལ་བ་ལས་བྱུང་བའི། །དཀྱིལ་འཁོར་འཁོར་ལོ་བྱེ་བའི་བདག་ཉིད་དེ། །རིགས་བརྒྱའི་ཁྱབ་བདག་རྡོ་རྗེ་འཛིན་པའི་གཙོ། །ཟུང་འཇུག་དང་བོའི་མགོན་ལ་གསོལ་བ་འདེབས། །

༥༢༽སྒྲིབ་མེད་ལྷན་སྐྱེས་དགའ་བའི་རོལ་བ་དང༌། །དབྱེར་མེདབརྟན་གཡོ་ཀུན་ཁྱབ་ཀུན་གྱི་བདག །ཐོག་མ་མཐའ་བྲལ་ཀུན་བཟང་དོན་དམ་གྱི། །བྱང་ཆུབ་སེམས་དངོས་ཁྱོད་ལ་གསོལ་བ་འདེབས། །

༥༣༽ཁྱོད་ནི་བླ་མ་ཁྱོད་ནི་ཡི་དམ་ཁྱོད་ནི་མཁའ་འགྲོ་ཆོས་སྐྱོང་སྟེ། །དེང་ནས་བཟུང་སྟེ་བྱང་ཆུབ་བར་དུ་ཁྱོད་མིན་སྐྱབས་གཞན་མི་འཚོལ་བས། །འདི་དང་བར་དོ་ཕྱི་མའི་མཐར་ཡང་ཐུགས་རྗེའི་ལྕགས་ཀྱུས་གཟུང་མཛོད་ལ། །སྲིད་ཞིའི་འཇིགས་སྒྲོལ་དངོས་གྲུབ་ཀུན་སྩོལ་གཏན་གྱི་གྲོགས་མཛོད་བར་གཅོད་སྲུངས། །ལན་གསུམ།

༥༤༽དེ་ལྟར་ལན་གསུམ་གསོལ་བ་བཏབ་པའི་མཐུས། །བླ་མའི་སྐུ་གསུམ་ཐུགས་ཀྱི་གནས་རྣམས་ལས།བདུད་རྩི་འོད་ཟེར་དཀར་དམར་མཐིང་ག་གསུམ། །རིམ་དང་ཅིག་ཅར་བྱུང་ནས་བདག་ཉིད་ཀྱི། །གནས་གསུམ་རིམ་དང་ཅིག་ཅར་ཐིམ་པ་ལས། །སྒྲིབ་བཞི་དག་ཅིང་རྣམ་དག་དབང་བཞི་ཐོབ། །སྐུ་བཞི་ཐོབ་ཅིང་བླ་མ་གཉིས་པ་ཞིག །དགྱེས་བཞིན་ཐིམ་པས་བྱིན་གྱིས་བརླབས་པར་གྱུར། པར་སེམས།

༨༤༽ཞིང་མཆོག་དམ་པ་རྗེ་བཙུན་བླ་མ་ལ། །མཆོད་ཅིང་གུས་པས་གསོལ་བ་བཏབ་པའི་མཐུས། །བདེ་ལེགས་རྩ་བ་མགོན་པོ་ཁྱོད་ཉིད་ཀྱིས། །དགྱེས་བཞིན་རྗེས་སུ་འཛིན་པར་བྱིན་གྱིས་རློབས། །

༨༥༽ལན་གཅིག་ཙམ་ཞིག་རྙེད་པའི་དལ་འབྱོར་འདི། །རྙེད་དཀའ་མྱུར་དུ་འཇིག་པའི་ཚུལ་རྟོགས་ནས། །དོན་མེད་ཚེ་འདིའི་བྱ་བས་མི་གཡེང་བར། དོན་ལྡན་སྙིང་བོ་ལེན་པར་བྱིན་གྱིས་རློབས། །

༨༦༽ངན་སོང་སྡུག་བསྔལ་འབར་བའི་མེས་འཇིགས་ནས། །སྙིང་ནས་དཀོན་མཆོག་གསུམ་ལ་སྐྱབས་འགྲོ་ཞིང༌། །སྡིག་སྤོང་དགེ་ཚོགས་མཐའ་དག་སྒྲུབ་པ་ལ། །བརྩོན་པ་ལྷུར་ལེན་བྱེད་པར་བྱིན་གྱིས་རློབས། །

༨༧༽ལས་དང་ཉོན་མོངས་རྦ་ཀློང་དྲག་ཏུ་འཁྲུག །སྡུག་བསྔལ་གསུམ་གྱི་ཆུ་སྲིན་མང་པོས་གཙེས། །མཐའ་མེད་འཇིགས་རུང་སྲིན་མཚོ་ཆེན་པོ་ལས། །ཐར་འདོད་ཤུགས་དྲག་སྐྱེ་བར་བྱིན་གྱིས་རློབས། །

༨༨༽བཟོད་དཀའ་བཙོན་ར་འདྲ་བའི་འཁོར་བ་འདི། །དགའ་བའི་ཚལ་ལྟར་མཐོང་པའི་བློ་སྤངས་ནས། །བསླབ་གསུམ་འཕགས་པའི་ནོར་གྱི་མཛོད་བཟུང་སྟེ། །ཐར་པའི་རྒྱལ་མཚན་འཛིན་པརབྱིན་གྱིས་རློབས། །

༨༩༽ཉམ་ཐག་འགྲོ་བ་འདི་ཀུན་བདག་གི་མ། །ཡང་ཡང་དྲིན་གྱིས་བསྐྱངས་པའི་ཚུལ་བསམས་ནས། །སྡུག་པའི་བུ་ལ་བརྩེ་བའི་མ་བཞིན་དུ། །བཅོས་མིན་སྙིང་རྗེ་སྐྱེ་བར་བྱིན་གྱིས་རློབས། །

༩༠༽སྡུག་བསྔལ་ཕྲ་མོ་ཙམ་ཡང་མི་འདོད་ཅིང༌། །བདེ་ལ་ནམ་ཡང་ཆོག་ཤེས་མེད་པར་ནི། །བདག་དང་གཞན་ལ་ཁྱད་པར་ཡོད་མིན་ཞེས། །གཞན་བདེ་དགའ་བ་བསྐྱེད་པར་བྱིན་གྱིས་རློབས། །

༩༡༽རང་ཉིད་གཅེས་པར་འཛིན་པའི་གཅོད་ནད་འདི། །མི་འདོད་སྡུག་བསྔལ་སྐྱེད་པའི་རྒྱུར་མཐོང་ནས། །ལེ་ལན་བདས་ལ་ཁོན་དུ་བཟུང་བྱས་ཏེ། །བདག་འཛིན་གདོན་ཆེན་འཇོམས་པརབྱིན་གྱིས་རློབས། །

༩༢༽མ་རྣམས་གཅེས་བཟུང་བདེ་ལ་འགོད་པའི་བློ། །མཐའ་ཡས་ཡོན་ཏན་འབྱུང་བའི་སྒོར་མཐོང་ནས། །འགྲོ་བ་འདི་དག་བདག་གི་དགྲར་ལངས་ཀྱང༌། །སྲོག་ལས་གཅེས་པར་འཛིན་པརབྱིན་གྱིས་རློབས། །

༩༣༽མདོར་ན་བྱིས་པ་རང་དོན་ཁོ་ན་དང༌། །ཐུབ་དབང་གཞན་དོན་འབའ་ཞིག་མཛད་པ་ཡི། །སྐྱོན་དང་ཡོན་ཏན་དབྱེ་བ་རྟོགས་པའི་བློ། །བདག་གཞན་མཉམ་བརྗེ་ནུས་བར་བྱིན་གྱིས་རློབས། །

༩༤༽རང་ཉིད་གཅེས་འཛིན་རྒུད་པ་ཀུན་གྱི་སྒོ། །མ་རྣམས་གཅེས་འཛིན་ཡོན་ཏན་ཀུན་གྱི་གཞི། །དེ་ཕྱིར་བདག་གཞན་བརྗེ་བའི་རྣལ་འབྱོར་ལ། །ཉམས་ལེན་སྙིང་བོར་བྱེད་པར་བྱིན་གྱིས་རློབས། །

༩༥༽དེས་ན་རྗེ་བཙུན་བླ་མ་ཐུགས་རྗེ་ཅན། །མར་གྱུར་འགྲོ་བའི་སྡིག་སྒྲིབ་སྡུག་བསྔལ་ཀུན། །མ་ལུས་ད་ལྟ་བདག་ལ་སྨིན་པ་དང༌། །བདག་གི་བདེ་དགེ་གཞན་ལ་བཏང་བ་ཡིས། །འགྲོ་ཀུན་བདེ་དང་ལྡན་པར་བྱིན་གྱིས་རློབས། །

༩༦༽སྣོད་བཅུད་སྡིག་པའི་འབྲས་བུས་ཡོངས་གང་སྟེ། །མི་འདོད་སྡུག་བསྔལ་ཆར་ལྟར་བབས་གྱུར་ཀྱང༌། །ལས་ངན་འབྲས་བུ་ཟད་པའི་རྒྱུར་མཐོང་ནས། །རྐྱེན་ངན་ལམ་དུ་ལོངས་བརབྱིན་གྱིས་རློབས། །

༩༧༽མདོར་ན་བཟང་ངན་སྣང་བ་ཅི་ཤར་ཡང༌། །ཆོས་ཀུན་སྙིང་བོ་སྟོབས་ལྔའི་ཉམས་ལེན་གྱིས། །བྱང་ཆུབ་སེམས་གཉིས་སྤེལ་བའི་ལམ་བསྒྱུར་ཏེ། །ཡིད་བདེ་འབའ་ཞིག་བསྒོམ་པར་བྱིན་གྱིས་རློབས། །

༩༨༽སྦྱོར་བ་བཞི་དང་ལྡན་པའི་ཐབས་མཁས་ ཀྱིས། །འཕྲལ་ལ་གང་ཐུག་སྒོམ་ལ་སྦྱོར་བ་དང༌།བློ་སྦྱོང་དམ་ཚིག་བསླབ་བྱའི་ཉམས་ལེན་གྱིས། །དལ་འབྱོར་དོན་ཆེན་བྱེད་པར་བྱིན་གྱིས་རློབས། །

༩༩༽གཏོང་ལེན་རླུང་ལ་བསྐྱོན་པའི་འཕྲུལ་འདེགས་ཅན། །བྱམས་དང་སྙིང་རྗེ་ལྷག་པའི་བསམ་པ་ཡིས། །འགྲོ་རྣམས་སྲིད་མཚོ་ཆེ་ལས་སྒྲོལ་བའི་ཕྱིར། །བྱང་ཆུབ་སེམས་ཉིད་འབྱོངས་བར་བྱིན་གྱིས་རློབས། །

༡༠༠༽དུས་གསུམ་རྒྱལ་བ་ཀུན་གྱི་བགྲོད་གཅིག་ལམ། །རྣམ་དག་རྒྱལ་སྲས་སྡོམ་པས་རྒྱུད་བསྡམས་ཤིང༌། །ཐེག་མཆོག་ཚུལ་ཁྲིམས་གསུམ་གྱི་ཉམས་ལེན་ལ། །བརྩོན་པ་ལྷུར་ལེན་བྱེད་པར་བྱིན་གྱིས་རློབས། །

༡༠༡༽ལུས་དང་ལོངས་སྤྱོད་དུས་གསུམ་དགེ་ཚོགས་བཅས། །སེམས་ཅན་རང་རང་འདོད་པའི་དངོས་བསྒྱུར་ཏེ། །ཆགས་མེད་གཏོང་སེམས་སྤེལ་བའི་མན་ངག་གིས། །སྦྱིན་པའི་ཕར་ཕྱིན་རྫོགས་པར་བྱིན་གྱིས་རློབས། །

༡༠༢༽སོ་ཐར་བྱང་སེམས་གསང་སྔགས་སྡོམ་པ་ཡི། །བཅས་མཚམས་སྲོག་གི་ཕྱིར་ཡང་མི་གཏོང་ཞིང༌། །དགེ་ཆོས་སྡུད་དང་སེམས་ཅན་དོན་བསྒྲུབ་པའི། །ཚུལ་ཁྲིམས་ཕར་ཕྱིན་རྫོགས་པར་བྱིན་གྱིས་རློབས། །

༡༠༣༽ཁམས་གསུམ་སྐྱེ་དགུ་མ་ལུས་ཁྲོས་གྱུར་ཏེ། །གཤེ་ཞིང་འཚང་འབྲུ་བསྡིགས་ཤིང་སྲོག་གཅོད་ཀྱང༌། །མི་འཁྲུགས་གནོད་ལན་ཕན་པ་སྒྲུབ་བྱེད་པའི། །བཟོད་པའི་ཕར་ཕྱིན་རྫོགས་པར་བྱིན་གྱིས་རློབས། །

༡༠༤༽སེམས་ཅན་རེ་རེའི་ཕྱིར་ཡང་མནར་མེད་པའི། །མེ་ནང་བསྐལ་བ་རྒྱ་མཚོར་གནས་དགོས་ཀྱང༌། །སྙིང་རྗེའི་མི་སྐྱོ་བྱང་ཆུབ་མཆོག་བརྩོན་པའི། །བརྩོན་འགྲུས་ཕར་ཕྱིན་རྫོགས་པར་བྱིན་གྱིས་རློབས། །

༡༠༥༽བྱིང་རྒོད་རྣམ་པར་གཡེང་བའི་སྐྱོན་སྤངས་ནས། །ཆོས་ཀུན་བདེན་པས་སྟོང་པའི་གནས་ལུགས་ལ། །རྩེ་གཅིག་མཉམ་པར་འཇོག་པའི་ཏིང་འཛིན་གྱིས། །བསམ་གཏན་ཕར་ཕྱིན་རྫོགས་པར་བྱིན་གྱིས་རློབས། །

༡༠༦༽དེ་ཉིད་སོ་སོར་རྟོག་པའི་ཤེས་རབ་ཀྱིས། །དྲངས་པའི་ཤིན་སྦྱངས་བདེ་ཆེན་དང་འབྲེལ་བ། །དོན་དམ་མཉམ་བཞག་ནམ་མཁའི་རྣལ་འབྱོར་གྱིས། །ཤེས་རབ་ཕར་ཕྱིན་རྫོགས་པར་བྱིན་གྱིས་རློབས། །

༡༠༧༽ཕྱི་ནང་ཆོས་རྣམས་སྒྱུ་མ་རྨི་ལམ་དང༌། །དྭངས་པའི་མཚོ་ནང་ཟླ་གཟུགས་ཇི་བཞིན་དུ། །སྣང་ཡང་བདེན་པར་མེད་པའི་ཚུལ་རྟོགས་ནས། །སྒྱུ་མའི་ཏིང་འཛིན་རྫོགས་པར་བྱིན་གྱིས་རློབས། །

༡༠༨༽འཁོར་འདས་རང་བཞིན་རྡུལ་ཙམ་མེད་པ་དང༌། །རྒྱུ་འབྲས་རྟེན་འབྲེལ་བསླུ་བ་མེད་པ་གཉིས། །ཕན་ཚུན་འགལ་མེད་གྲོགས་སུ་འཆར་བ་ཡིས། །ཀླུ་སྒྲུབ་དགོངས་དོན་རྟོགས་པར་བྱིན་གྱིས་རློབས། །

༡༠༩༽དེ་ནས་རྡོ་རྗེ་འཛིན་པའི་དེད་དཔོན་གྱི། །དྲིན་ལས་རྒྱུད་སྡེ་རྒྱ་མཚོའི་འཇིངས་བརྒལ་ཏེ། །དངོས་གྲུབ་རྩ་བ་དམ་ཚིག་སྡོམ་པ་རྣམས། །སྲོག་ལས་གཅེས་པར་འཛིན་པར་བྱིན་གྱིས་རློབས། །

༡༡༠སྐྱེ་ཤི་བར་དོ་རྒྱལ་བའི་སྐུ་གསུམ་དུ། །སྒྱུར་བའི་རིམ་པ་དང་བོའི་རྣལ་འབྱོར་གྱིས། །ཐ་མལ་སྣང་ཞེན་དྲི་མ་ཀུན་སྦྱངས་ཏེ། །གང་སྣང་ལྷ་སྐུར་འཆར་བར་བྱིན་གྱིས་རློབས། །

༡༡༡༽སྙིང་གའི་འདབ་བརྒྱད་དྷུ་ཏཱིའི་དབུས་དག་ཏུ། །མགོན་ཁྱོད་ཞབས་སེན་བཀོད་པ་ལས་བྱུང་བ། །འོད་གསལ་སྒྱུ་ལུས་ཟུང་དུ་འཇུག་པའི་ལམ། །ཚེ་འདིར་མངོན་དུ་འགྱུར་བར་བྱིན་གྱིས་རློབས། །

༡༡༢༽ལམ་སྣ་མ་ཟིན་འཆི་བའི་དུས་བྱེད་ན། །བཙན་ཐབས་འཚང་རྒྱ་བླ་མའི་འཕོ་བ་ནི། །སྟོབས་ལྔ་ཡང་དག་སྦྱར་བའི་གདམས་གིས། །དག་པའི་ཞིང་དུ་བགྲོད་པར་བྱིན་གྱིས་རློབས། །

༡༡༣༽མདོར་ན་སྐྱེ་ཞིང་སྐྱེ་བ་ཐམས་ཅད་དུ། །མགོན་པོ་ཁྱོད་ཀྱིས་འབྲལ་མེད་རྗེས་བཟུང་ནས། །སྐུ་གསུང་ཐུགས་ཀྱི་གསང་བ་ཀུན་འཛིན་པའི། །སྲས་ཀྱི་ཐུ་བོར་འགྱུར་བར་བྱིན་གྱིས་རློབས། །

༡༡༤༽མགོན་ཁྱོད་གང་དུ་མངོན་པར་སངས་རྒྱས་པའི། །འཁོར་གྱི་ཐོག་མ་ཉིད་དུ་བདག་གྱུར་ཏེ། །གནས་སྐབས་མཐར་ཐུག་དགོས་འདོད་མ་ལུས་བ། །འབད་མེད་ལྷུན་གྱིས་གྲུབ་པའི་བཀྲ་ཤིས་སྩོལ། །

༡༡༥༽དེ་ལྟར་གསོལ་བ་བཏབ་པས་བླ་མ་མཆོག །བྱིན་གྱིས་བརླབ་ཕྱིར་དགྱེས་བཞིན་སྤྱི་བོར་བྱོན། །སླར་ཡང་སྙིང་གའི་པདྨོའི་ཟེའུ་འབྲུ་ལ། །ཞབས་སེན་འོད་ཆགས་བརྟན་པར་བཞུགས་སུ་གསོལ། །

༡༡༦༽འདི་ལྟར་བགྱིས་པའི་རྣམ་དཀར་དགེ་བ་ཡང༌། །དུས་གསུམ་བདེ་གཤེགས་སྲས་བཅས་ཐམས་ཅད་ཀྱི། །མཛད་པ་སྨོན་ལམ་མ་ལུས་བསྒྲུབ་པ་དང༌། །ལུང་རྟོགས་དམ་ཆོས་འཛིན་པའི་རྒྱུ་རུ་བསྔོ། །

༡༡༧༽དེ་ཡི་མཐུ་ལས་ཚེ་རབས་ཀུན་ཏུ་བདག །ཐེག་མཆོག་འཁོར་ལོ་བཞི་དང་མི་འབྲལ་ཞིང༌། །ངེས་འབྱུང་བྱང་སེམས་ཡང་དག་ལྟ་བ་དང༌། །རིམ་གཉིས་ལམ་གྱི་བགྲོད་པ་མཐར་ཕྱིན་ཤོག །

༡༡༨༽སྲིད་ཞིའི་རྣམ་དཀར་ཇི་སྙེད་དགེ་མཚན་གྱིས། །དེང་འདིར་མི་ཤིས་རྒུད་པ་ཀུན་ཟད་ཅིང༌། །གནས་སྐབས་མཐར་ཐུག་དགེ་ལེགས་ནམ་མཁའི་མཛོད། །ཕུན་ཚོགས་དཔལ་ལ་རོལ་པའི་བཀྲ་ཤིས་ཤོག །

༡༡༩༽བློ་བཟང་མདུན་ས་ཆོས་ཀྱི་ཕོ་བྲང་ཆེར། །བསླབ་གསུམ་རྣམ་དག་རྩེ་གཅིག་སྒྲུབ་ལ་བརྩོན། །རྣལ་འབྱོར་རབ་གྱུར་ཚོགས་ཀྱིས་ཡོངས་གང་བས། །ཐུབ་བསྟན་ཡུན་དུ་གནས་པའི་བཀྲ་ཤིས་ཤོག །

༡༢༠༽གཞོན་ནུའི་དུས་ནས་བླ་མ་ལྷ་མཆོག་ལ། །གསོལ་བ་བཏབ་པས་བློ་བཟང་གྲགས་པ་ཡི། །བྱིན་རླབས་ཞུགས་ནས་གཞན་དོན་ལྷུན་གྱིས་གྲུབ། །བློ་བཟང་རྡོ་རྗེ་འཆང་གི་བཀྲ་ཤིས་ཤོག །

༡༢༡༽འདོད་རྒུའི་འབྱོར་བ་དབྱར་གྱི་མཚོ་ལྟར་འཕེལ། །སྐྱོན་མེད་རིགས་ཀྱི་དལ་འགྲོ་རྒྱུན་ཆད་མེད། །ཉིན་མཚན་བློ་བཟང་དམ་པའི་ཆོས་ཀྱིས་འདའ། །ཕུན་ཚོགས་དཔལ་ལ་རོལ་པའི་བཀྲ་ཤིས་ཤོག །

༡༢༢༽བདག་སོགས་རྣམས་ཀྱིས་དེང་ནས་བྱང་ཆུབ་པར། །བགྱིས་དང་བགྱིད་འགྱུར་དགེ་བ་ཅི་བསགས་པ། །ཞིང་འདིར་རྗེ་བཙུན་དམ་པའི་གཟུགས་ཀྱི་སྐུ། །འགྱུར་མེད་རྡོ་རྗེ་ལྟར་བརྟན་བཀྲ་ཤིས་ཤོག །

༡༽དེར་ནི་རིང་དུ་འབད་ལས་ཚོགས་གཉིས་ནི། །མཁའ་ལྟར་ཡངས་པ་གང་ཞིག་བསགས་པ་དེས། །བློ་མིག་མ་རིག་གིས་ལྡོངས་འགྲོ་བ་ཀུན། །རྣམ་འདྲེན་རྒྱལ་བའི་དབང་བོར་བདག་གྱུར་ཅིག །

༢༽དེར་མ་སོན་པའི་ཚེ་རབས་ཀུན་ཏུ་ཡང་། །འཇམ་པའི་དབྱངས་ཀྱིས་བརྩེ་བས་རྗེས་བཟུང་སྟེ། །བསྟན་པའི་རིམ་པ་ཀུན་ཚང་ལམ་གྱི་མཆོག །རྙེད་ནས་སྒྲུབ་པས་རྒྱལ་རྣམས་མཉེས་བྱེད་ཤོག །

༣༽རང་གིས་ཇི་བཞིན་རྟོགས་པའི་ལམ་གྱི་གནད། །ཤུགས་དྲག་བརྩེ་བས་དྲངས་པའི་ཐབས་མཁས་ཀྱིས། །འགྲོ་བའི་ཡིད་ཀྱི་མུན་པ་བསལ་བྱས་ནས། །རྒྱལ་བའི་བསྟན་པ་རིང་དུ་འཛིན་གྱུར་ཅིག །

༤༽བསྟན་པ་རིན་ཆེན་མཆོག་གིས་མ་ཁྱབ་པའམ། །ཁྱབ་ཀྱང་ཉམས་པར་གྱུར་པའི་ཕྱོགས་དེར་ནི། །སྙིང་རྗེ་ཆེན་པོས་ཡིད་རབ་བསྐྱོད་པ་ཡིས། །ཕན་བདེའི་གཏེར་དེ་གསལ་བར་བྱེད་པར་ཤོག །

༥༽སྲས་བཅས་རྒྱལ་བའི་རྨད་བྱུང་འཕྲིན་ལས་ལས། །ལེགས་སྒྲུབ་བྱང་ཆུབ་ལམ་གྱི་རིམ་པས་ཀྱང་། །ཐར་འདོད་རྣམས་ཀྱི་ཡིད་ལ་དཔལ་སྟེར་ཞིང་། །རྒྱལ་བའི་མཛད་པ་རིང་དུ་སྐྱོང་གྱུར་ཅིག །

༦༽ལམ་བཟང་བསྒྲིག་པའི་མཐུན་རྐྱེན་སྒྲུབ་བྱེད་ཅིང་། །འགལ་རྐྱེན་སེལ་བྱེད་མི་དང་མི་མིན་ཀུན། །ཚེ་རབས་ཀུན་ཏུ་རྒྱལ་བས་བསྔགས་པ་ཡི། །རྣམ་དག་ལམ་དང་འབྲལ་བར་མ་གྱུར་ཅིག །

༧༽གང་ཚེ་ཐེག་པ་མཆོག་ལ་ཆོས་སྤྱོད་བཅུས། །ཚུལ་བཞིན་སྒྲུབ་ལ་བརྩོན་པ་དེ་ཡི་ཚེ། །མཐུ་ལྡན་རྣམས་ཀྱིས་རྟག་ཏུ་གྲོགས་བྱེད་ཅིང་། །བཀྲ་ཤིས་རྒྱ་མཚོས་ཕྱོགས་ཀུན་ཁྱབ་གྱུར་ཅིག །

དཔལ་ལྡན་བླ་མའི་སྐུ་ཚེ་བརྟན་པ་དང་། །མཁའ་མཉམ་ཡོངས་ལ་བདེ་སྐྱིད་འབྱུང་བ་དང་། །བདག་གཞན་མ་ལུས་ཚོགས་བསགས་སྒྲིབ་བྱང་ནས། །མྱུར་དུ་སངས་རྒྱས་ས་ལ་འགོད་པར་ཤོག །

གངས་རི་ར་བས་སྐོར་བའི་ཞིང་ཁམས་སུ། །ཕན་དང་བདེ་བ་མ་ལུས་བྱུང་བའི་གནས། །སྤྱན་རས་གཟིགས་དབང་བསྟན་འཛིན་རྒྱ་མཚོ་ཡི། །ཞབས་པད་སྲིད་མཐའི་བར་དུ་བརྟན་གྱུར་ཅིག །

༥༥༽ ༄༅། །ཨོཾ་ཨཱ་ཧཱུྃ་། (ལན་གསུམ་) ངོ་བོ་ཡེ་ཤེས་ལ་རྣམ་པ་ནང་མཆོད་དང་མཆོད་རྫས་སོ་སོའི་རྣམ་པ་བྱེད་ལས་དབང་པོ་དྲུག་གི་སྤྱོད་ཡུལ་དུ་བདེ་སྟོང་གི་ཡེ་ཤེས་ཁྱད་པར་ཅན་བསྐྱེད་པས་ས་དང་བར་སྣང་ནམ་མཁའི་ཁྱོན་ཐམས་ཅད་ཡོངས་སུ་ཁྱབ་པའི་ཕྱི་ནང་གསང་བའི་མཆོད་སྤྲིན་དམ་རྫས་སྤྱན་གཟིགས་བསམ་གྱིས་མི་ཁྱབ་པས་གང་བར་གྱུར༎

༥༦༽ ༈།ཨེ་མ་ཧོ་ཡེ་ཤེས་རོལ་པ་ཆེ། །ཞིང་ཁམས་ཐམས་ཅད་རྡོ་རྗེའི་ཞིང་། །གནས་རྣམས་རྡོ་རྗེའི་ཕོ་བྲང་ཆེ། །ཀུན་བཟང་མཆོད་སྤྲིན་རྒྱ་མཚོ་འབར། །

༥༧༽ལོངས་སྤྱོད་འདོད་དགུའི་དཔལ་དང་ལྡན། །བཅུད་རྣམས་དཔའ་བོ་དཔའ་མོ་དངོས། །མ་དག་འཁྲུལ་པའི་མིང་ཡང་མེད། །དག་པ་རབ་འབྱམས་འབའ་ཞིག་གོ།

༥༨༽ ཧཱུྃ་སྤྲོས་ཀུན་ཉེར་ཞི་ཆོས་སྐུའི་ངང་། །རླུང་མེ་གཡོ་ཞིང་འབར་བའི་སྟེང་། །མི་མགོའ་ིསྒྱེད་པུ་གསུམ་གི་ཁར། །ཨཱཿམཚན་ལྡན་ཐོད་པ་ཀ་པཱ་ལར། །ཨོཾ་རྫས་རྣམས་སོ་སོར་སྦར་བར་གྱུར། །

༥༩༽དེ་དག་སྟེང་གནས་ཨོཾ་ཨཱ་ཧཱུྃ། །ཁ་དོག་གཟི་བརྗིད་སོ་སོར་འབར། །རླུང་གཡོས་མེ་འབར་རྫས་རྣམས་ཞུ། །ཁོལ་བས་རླངས་པ་ཆེར་གཡོས་པས། །

༦༠༽ཡི་གེ་གསུམ་ལས་འོད་ཟེར་ཚོགས། །ཕྱོགས་བཅུར་འཕྲོས་པས་རྡོ་རྗེ་གསུམ། །བདུད་རྩིར་བཅས་རྣམས་སྤྱན་དྲངས་ནས། །སོ་སོར་ཡི་གེ་གསུམ་ཐིམ་པས། །བདུད་རྩིར་ཞུ་ནས་བཅུད་དང་འདྲེས། །སྦྱངས་རྟོགས་སྦར་བྱས་ཨེ་མ་ཧོ། །འདོད་དགུའི་དཔལ་འབར་རྒྱ་མཚོར་གྱུར། །ཨོཾ་ཨཱ་ཧཱུྃ་། (ལན་གསུམ)

༦༡༽ཐུགས་རྗེའི་བདག་ཉིད་རྩ་བརྒྱུད་བླ་མ་དང་། །ཡི་དམ་ལྷ་ཚོགས་སྐྱབས་གནས་དཀོན་མཆོག་གསུམ། །དཔའ་བོ་མཁའ་འགྲོ་ཆོས་སྐྱོང་སྲུང་མའི་ཚོགས། །སྤྱན་འདྲེན་མཆོག་པའི་གནས་འདིར་གཤེགས་སུ་གསོལ། །

༦༢༽ ཕྱི་ནང་གསང་བའི་མཆོད་སྤྲིན་རྒྱ་མཚོའི་དབུས། །རིན་ཆེན་ལས་གྲུབ་མཛེས་པའི་གདན་ཁྲི་ལ། །ཞབས་སེན་འོད་ཆགས་བརྟན་པར་བཞུགས་ནས་ཀྱང་། །སྒྲུབ་མཆོག་བདག་ལ་འདོད་དགུའི་དངོས་གྲུབ་སྩོལ། །

༦༣༽ཧོ༑ ཏིང་འཛིན་སྔགས་དང་ཕྱག་རྒྱས་བྱིན་བརླབས་པའི། །ཟག་མེད་བདུད་རྩིའི་ཚོགས་མཆོད་རྒྱ་མཚོ་འདི། །རྩ་བརྒྱུད་བླ་མའི་ཚོགས་རྣམས་མཉེས་ཕྱིར་འབུལ། །ཨོཾ་ཨཱ་ཧཱུྃ། །འདོད་དགུའི་དཔལ་ལ་རོལ་པས་ཚིམ་མཛད་ནས། །ཨེ་མ་ཧོ། །བྱིན་རླབས་ཆར་ཆེན་དབབ་ཏུ་གསོལ། །

༦༤༽ཧོ༑ཏིང་འཛིན་སྔགས་དང་ཕག་རྒྱས་བིན་བརླབས་པའི། །ཟག་མེད་བདུད་རིའི་ཚོགས་མཆོད་རྒྱ་མཚོ་འདི། །ཡི་དམ་ལྷ་ཚོགས་འཁོར་བཅས་མེས་ཕིར་འབུལ། །ཨོཾ་ཨཱ་ཧཱུྃ། །འདོད་དགུའི་དཔལ་ལ་རོལ་པས་ཚིམ་མཛད་ནས། །ཨེ་མ་ཧོ། །དངོས་གྲུབ་ཆར་ཆེན་དབབ་ཏུ་གསོལ། །

༦༥༽ཧོ༑ ཏིང་འཛིན་སྔགས་དང་ཕྱག་རྒྱས་བྱིན་བརླབས་པའི། །ཟག་མེད་བདུད་རྩིའི་ཚོགས་མཆོད་རྒྱ་མཚོ་འདི། །དཀོན་མཆོག་རིན་ཆེན་ཚོགས་རྣམས་མཉེས་ཕྱིར་འབུལ། །ཨོཾ་ཨཱ་ཧཱུྃ། །འདོད་དགུའི་དཔལ་ལ་རོལ་པས་ཚིམ་མཛད་ནས། །ཨེ་མ་ཧོ། །དམ་ཆོས་ཆར་ཆེན་དབབ་ཏུ་གསོལ། །

༦༦༽ཧོ༑ ཏིང་འཛིན་སྔགས་དང་ཕྱག་རྒྱས་བྱིན་བརླབས་པའི། །ཟག་མེད་བདུད་རྩིའི་ཚོགས་མཆོད་རྒྱ་མཚོ་འདི། །མཁའ་འགོ་ཆོས་སྐྱོང་ཚོགས་རྣམས་མཉེས་ཕྱིར་འབུལ། །ཨོཾ་ཨཱ་ཧཱུྃ། །འདོད་དགུའི་དཔལ་ལ་རོལ་པས་ཚིམ་མཛད་ནས། །ཨེ་མ་ཧོ། །འཕྲིན་ལས་ཆར་ཆེན་དབབ་ཏུ་གསོལ། །

༦༧༽ཧོ༑ ཏིང་འཛིན་སྔགས་དང་ཕྱག་རྒྱས་བྱིན་བརླབས་པའི། །ཟག་མེད་བདུད་རྩིའི་ཚོགས་མཆོད་རྒྱ་མཚོ་འདི། །མར་གྱུར་སེམས་ཅན་ཚོགས་རྣམས་མཉེས་ཕྱིར་འབུལ། །ཨོཾ་ཨཱ་ཧཱུྃ། །འདོད་དགུའི་དཔལ་ལ་རོལ་པས་ཚིམ་མཛད་ནས། །ཨེ་མ་ཧོ། །འཁྲུལ་སྣང་སྡུག་བསྔལ་ཞི་གྱུར་ཅིག །

༦༨༽ ཨེ་མ་ཧོ་ཚོགས་ཀྱི་འཁོར་ལོ་ཆེ། །དུས་གསུམ་བདེ་གཤེགས་གཤེགས་ཤུལ་ཏེ། །དངོས་གྲུབ་མ་ལུས་འབྱུང་བའི་གནས། །དེ་ལྟར་ཤེས་ནས་དཔའ་བོ་ཆེ། །རྣམ་པར་རྟོག་པའི་སེམས་བོར་ནས། །ཚོགས་ཀྱི་འཁོར་ལོར་རྒྱུན་དུ་རོལ། །ཨ་ལ་ལ་ཧོ།

༦༩༽ ཨོཾ། རྡོ་རྗེ་གསུམ་དབྱེར་མེད་པའི་བདག །རང་ཉིད་བླ་མ་ལྷར་གསལ་ནས། །ཨཱཿ ཟག་མེད་ཡེ་ཤེས་བདུད་རྩི་འདི་། །ཧཱུྃ། བྱང་ཆུབ་སེམས་ལས་གཡོ་མེད་པར། །ལུས་གནས་ལྷ་རྣམས་ཚིམ་ཕྱིར་རོལ། །ཨ་ཧོ་མ་ཧཱ་སུ་ཁ།

༧༠༽ཧཱུྃ། དེ་བཞིན་གཤེགས་པ་ཐམས་ཅད་དང་། །དཔའ་བོ་དང་ནི་རྣལ་འབྱོར་མ། །མཁའ་འགྲོ་དང་ནི་མཁའ་འགྲོ་མ། །ཀུན་ལ་བདག་ནི་གསོལ་བ་འདེབས། །བདེ་བ་མཆོག་ལ་དགྱེས་པའི་ཧེ་རུ་ཀ །བདེ་བས་རབ་མྱོས་མ་ལ་བསྙེན་བྱས་ནས། །ཆོ་ག་བཞིན་དུ་ལོངས་སྤྱོད་པ་ཡིས་ནི། །ལྷན་སྐྱེས་བདེ་བའི་སྦྱོར་བ་ལ་ཞུགས་སོ། །ཨ་ལ་ལ། །ལ་ལ་ཧོ། །ཨ་ཨི་ཨཱཿ། ཨ་ར་ལི་ཧོ། །དྲི་མེད་མཁའ་འགྲོའི་ཚོགས་རྣམས་ཀྱིས། །བརྩེ་བས་གཟིགས་ལ་ལས་ཀུན་མཛོད། །

༧༡༽ཧཱུྃ༑ །དེ་བཞིན་གཤེགས་པ་ཐམས་ཅད་དང་། །དཔའ་བོ་དང་ནི་རྣལ་འབྱོར་མ། །མཁའ་འགྲོ་དང་ནི་མཁའ་འགྲོ་མ། །ཀུན་ལ་བདག་ནི་གསོལ་བ་འདེབས། །བདེ་བ་ཆེན་པོས་ཡིད་ནི་རབ་བསྐྱོད་པས། །ལུས་ནི་ཀུན་ཏུ་གཡོ་བའི་གར་གིས་ནི། །ཕྱག་རྒྱའི་པདྨར་རོལ་པའི་བདེ་བ་ཆེ། །རྣལ་འབྱོར་མ་ཚོགས་རྣམས་ལ་མཆོད་པར་མཛོད། །ཨ་ལ་ལ། །ལ་ལ་ཧོ། །ཨ་ཨི་ཨཱཿ།།ཨ་ར་ལི་ཧོ། །དྲི་མེད་མཁའ་འགྲོའི་ཚོགས་རྣམས་ཀྱིས། །བརྩེ་བས་གཟིགས་ལ་ལས་ཀུན་མཛོད། །

༧༢༽ཧཱུྃ༑ །དེ་བཞིན་གཤེགས་པ་ཐམས་ཅད་དང་། །དཔའ་བོ་དང་ནི་རྣལ་འབྱོར་མ། །མཁའ་འགྲོ་དང་ནི་མཁའ་འགྲོ་མ། །ཀུན་ལ་བདག་ནི་གསོལ་བ་འདེབས། །ཡིད་འོང་ཞི་བའི་ཉམས་ཀྱིས་གར་མཛད་མ། །རབ་དགྱེས་མགོན་པོ་ཁྱོད་དང་མཁའ་འགྲོའི་ཚོགས། །བདག་གི་མདུན་དུ་བཞུགས་ཏེ་བྱིན་རློབས་ལ། །ལྷན་སྐྱེས་བདེ་ཆེན་བདག་ལ་རྩོལ་དུ་གསོལ། །ཨ་ལ་ལ། །ལ་ལ་ཧོ། ཨ་ཨི་ཨཱཿ། །ཨ་ར་ལི་ཧོ། །དྲི་མེད་མཁའ་འགྲོའི་ཚོགས་རྣམས་ཀྱིས། །བརྩེ་བས་གཟིགས་ལ་ལས་ཀུན་མཛོད། །

༧༣༽ཧཱུྃ༑ །དེ་བཞིན་གཤེགས་པ་ཐམས་ཅད་དང་། །དཔའ་བོ་དང་ནི་རྣལ་འབྱོར་མ། །མཁའ་འགྲོ་དང་ནི་མཁའ་འགྲོ་མ། །ཀུན་ལ་བདག་ནི་གསོལ་བ་འདེབས། །བདེ་ཆེན་ཐར་བའི་མཚན་ཉིད་ལྡན་པ་ཁྱོད། །བདེ་ཆེན་སྤངས་པའི་དཀའ་ཐུབ་དུ་མ་ཡིས། །ཚེ་གཅིག་གྲོལ་བར་མི་བཞེད་བདེ་ཆེན་ཡང་། །ཆུ་སྐྱེས་མཆོག་གི་དབུས་ན་གནས་པ་ཡིན། །ཨ་ལ་ལ། །ལ་ལ་ཧོ། །ཨ་ཨི་ཨཱཿ།།ཨ་ར་ལི་ཧོ། །དྲི་མེད་མཁའ་འགྲོའི་ཚོགས་རྣམས་ཀྱིས། །བརྩེ་བས་གཟིགས་ལ་ལས་ཀུན་མཛོད། །

༧༤༽ ཧཱུྃ༑ །དེ་བཞིན་གཤེགས་པ་ཐམས་ཅད་དང་། །དཔའ་བོ་དང་ནི་རྣལ་འབྱོར་མ། །མཁའ་འགྲོ་དང་ནི་མཁའ་འགྲོ་མ། །ཀུན་ལ་བདག་ནི་གསོལ་བ་འདེབས། །འདམ་གྱི་དབུས་སུ་སྐྱེས་པའི་པདྨ་བཞིན། །ཆགས་ལས་སྐྱེས་ཀྱང་ཆགས་པས་སྐྱོན་མ་གོས། །རྣལ་འབྱོར་མ་མཆོག་པདྨའི་བདེ་བ་ཡིས། །སྲིད་པའི་འཆིང་བ་མྱུར་དུ་གྲོལ་བར་མཛོད། །ཨ་ལ་ལ། །ལ་ལ་ཧོ། །ཨ་ཨི་ཨཱཿ། །ཨ་ར་ལི་ཧོ། །དྲི་མེད་མཁའ་འགྲོའི་ཚོགས་རྣམས་ཀྱིས། །བརྩེ་བས་གཟིགས་ལ་ལས་ཀུན་མཛོད། །

༧༥༽ཧཱུྃ༑ །དེ་བཞིན་གཤེགས་པ་ཐམས་ཅད་དང་། །དཔའ་བོ་དང་ནི་རྣལ་འབྱོར་མ། །མཁའ་འགྲོ་དང་ནི་མཁའ་འགྲོ་མ། །ཀུན་ལ་བདག་ནི་གསོལ་བ་འདེབས། །སྦྲང་རྩིའི་འབྱུང་གནས་རྣམས་ཀྱི་སྦྲང་རྩིའི་བཅུད། །བུང་བའི་ཚོགས་ཀྱིས་ཀུན་ནས་འཐུང་བ་ལྟར། །མཚན་ཉིད་དྲུག་ལྡན་མཚོ་སྐྱེས་རྒྱས་པ་ཡིས། །བཅུད་བཅིངས་པ་ཡི་རོ་ཡིས་ཚིམས་པར་མཛོད། །ཨ་ལ་ལ། །ལ་ལ་ཧོ། །ཨ་ཨི་ཨཱཿ། །ཨ་ར་ལི་ཧོ། ། དྲི་མེད་མཁའ་འགྲོའི་ཚོགས་རྣམས་ཀྱིས། །བརྩེ་བས་གཟིགས་ལ་ལས་ཀུན་མཛོད། །

༧༦༽ཧཱུྃ༑ མ་དག་འཁྲུལ་སྣང་དབྱིངས་སུ་དག །ཨཱཿ།ཡེ་ཤེས་ལས་གྲུབ་བདུད་རྩི་ཆེ། ཨོཾ༑ །འདོད་དགུའི་རྒྱ་མཚོ་ཆེན་པོར་གྱུར། །ཨོཾ་ཨཱ་ཧཱུྃ། (ལན་གསུམ)

༧༧༽ཧོཿ༑ ཏིང་འཛིན་སྔགས་དང་ཕྱག་རྒྱས་བྱིན་བརླབས་པའི། །ཟག་མེད་བདུད་རྩིའི་ཚོགས་ལྷག་རྒྱ་མཚོ་འདི། །དམ་ཅན་ཞིང་སྐྱོང་ཚོགས་རྣམས་མཉེས་ཕྱིར་འབུལ། །ཨོཾ་ཨཱ་ཧཱུྃ། འདོད་དགུའི་དཔལ་ལ་རོལ་པས་ཚིམ་མཛད་ནས། །ཨེ་མ་ཧོ་རྣལ་འབྱོར་འཕྲིན་ལས་ཚུལ་བཞིན་སྒྲུབས།

༧༨༽ཧོ༑ ལྷག་མའི་མགོན་རྣམས་འཁོར་བཅས་ཀྱིས། །ཚོགས་ལྷག་རྒྱ་མཚོ་འདི་བཞེས་ནས། །བསྟན་པ་རིན་ཆེན་རྒྱས་པ་དང་། །བསྟན་འཛིན་ཡོན་མཆོད་འཁོར་བཅས་དང་།

༧༩༽ །ཁྱད་པར་རྣལ་འབྱོར་བདག་ཅག་ལ། །ནད་མེད་ཚེ་དང་དབང་ཕྱུག་དང་། །དཔལ་དང་གྲགས་དང་སྐལ་བ་བཟང་། །ལོངས་སྤྱོད་རྒྱ་ཆེན་ཀུན་ཐོབ་ཅིང་།

༨༠༽ །ཞི་དང་རྒྱས་ལ་སོགས་པ་ཡི། །ལས་ཀྱི་དངོས་གྲུབ་བདག་ལ་རྩོལ། །དམ་ཚིག་ཅན་གིས་བདག་ལ་སྲུངས། །དངོས་གྲུབ་ཀུན་གྱིས་སྡོང་གྲོགས་མཛོད། །

༨༡༽ དུས་མིན་འཆི་དང་ནད་རྣམས་དང་། །གདོན་དང་བགེགས་རྣམས་མེད་པར་མཛོད། །རྨི་ལམ་ངན་དང་མཚན་མ་ངན། །བྱ་བྱེད་ངན་པ་མེད་པར་མཛོད། །

༨༢༽འཇིག་རྟེན་བདེ་ཞིང་ལོ་ལེགས་དང་། །འབྲུ་རྣམས་རྒྱས་ཤིང་ཆོས་འཕེལ་དང་། །བདེ་ལེགས་ཐམས་ཅད་འབྱུང་བ་དང་། །ཡིད་ལ་འདོད་པ་ཀུན་འགྲུབ་ཤོག

༨༣༽ སྦྱིན་པ་རྒྱ་ཆེར་གྱུར་པ་འདི་ཡི་མཐུས། །འགྲོ་བའི་དོན་དུ་རང་བྱུང་སངས་རྒྱས་ནས། །སྔོན་ཚེ་རྒྱལ་བ་རྣམས་ཀྱིས་མ་སྒྲོལ་བའི། །སྐྱེ་བོའི་ཚོགས་རྣམས་སྦྱིན་པས་གྲོལ་གྱུར་ཅིག །