အခြားသူများကို ကူညီရန် နည်းလမ်း ၁၁ နည်း

လူနှင့် တိရစ္ဆာန်များစွာ နေ့စဉ် ဆင်းရဲဒုက္ခ ခံစားနေကြရပါသည်။ သူတို့ကို ကူညီရန် နည်းလမ်းများစွာ ရှိသော်လည်း သူတို့ အခြေအနေကို အသိအမှတ်ပြုကာ ကူညီရန် အကောင်းဆုံး နည်းလမ်းကို နားလည်သဘောပေါက်မှုအပေါ်တွင် မူတည်ပါသည်။ ကရုဏာတရားရှိပြီး ကျွမ်းကျင်ရုံမျှနှင့် မလုံလောက်ပါ။ ကျွန်ုပ်တို့ အချိန်ကို ရက်ရောမှု ရှိရန်လည်း လိုသည်။ ကိုယ်ပိုင်စည်းကမ်း လိုက်နာခြင်း၊ သည်းခံခြင်း၊ ဇွဲရှိခြင်း၊ အာရုံစူးစိုက်ခြင်းနှင့် အမြော်အမြင်ရှိခြင်းတို့လည်း ရှိရပါမည်။ အခြားသူများကို ကူညီရန် နည်းလမ်း ဆယ့်တစ်နည်းကို ယခုဖော်ပြလိုပါသည်။ အောက်ပါနည်းလမ်းများသည် လိုအပ်သူများအတွက် အကျိုးရှိစေရုံသာမက ကျွန်ုပ်တို့၏ အထီးကျန်မှု အကန့်အသတ်ထဲမှ ခွဲထွက်ရန်နှင့် ဘဝအဓိပ္ပာယ် ရှိစေရန်လည်း ကူညီပါသည်-

၁။ ဆင်းရဲဒုက္ခရောက်နေသူများအား ဂရုစိုက်ပါ

ဖျားနာသူ၊ မသန်စွမ်းသူ သို့မဟုတ် နာကျင်နေသူများကို ကျွန်ုပ်တို့ ပြုစုစောင့်ရှောက်ရန် လိုပါသည်။ မနိုင်ဝန် သို့မဟုတ် ခက်ခဲသော အလုပ်တစ်ခု ကြုံနေရသူကို မြင်တွေ့ပါက ကျွန်ုပ်တို့သည် ထိုသူတို့၏ ဝန်ထုပ်ဝန်ပိုးကို ကူညီသယ်ပိုးပေးရပါသည်။

၂။ မိမိဘာသာ မည်ကဲ့သို့ ဆောင်ရွက်ရမှန်း မသိသူများအား လမ်းညွှန်ပါ

ခက်ခဲသောအခြေအနေများတွင် ဘာလုပ်ရမှန်း မသိသူများအတွက် အကြံဉာဏ် တောင်းလာပါက အကြံပေးပါသည်။ သို့တည်းမဟုတ် အနည်းဆုံးတော့ နားထောင်ပေးပါသည်။ ကျွန်ုပ်တို့၏ ခွေးကလေး၊ ကြောင်ကလေးတစ်ကောင် အခန်းထဲတွင် ပိတ်မိနေလျှင် အခန်းတံခါးကို ဖွင့်ပေးလိုက်ပါသည်။ ယင်ကောင်တစ်ကောင် ပြတင်းပေါက်မှာ ယောက်ယက်ခတ်နေလျှင်ပင် ဤလမ်းညွှန်ချက်ကို ကျွန်ုပ်တို့ လိုက်နာပါသည်။ ထိုယင်ကောင်သည် ကျွန်ုပ်တို့ အခန်းထဲတွင် မနေချင်ပါ။ အပြင်ထွက်ချင်နေသည်။ ထို့ကြောင့် ပြတင်းပေါက်ဖွင့်ပြီး သူ့ကိုလွှတ်ပေးလိုက်ပါသည်။

၃။ ကျွန်ုပ်တို့အား ကူညီထားသူများကို မေတ္တာပြန်ပေးပါ

ကမ္ဘာကြီးကို လှုပ်ရှားနေစေသည့် အခြားသူများ၏ အလုပ်တိုင်းကို တန်ဖိုးထားရန် အရေးကြီးပါသည်။ ကျွန်ုပ်တို့အတွက် အများကြီး ဆောင်ရွက်ပေးခဲ့သော မိဘများကဲ့သို့ ပုဂ္ဂိုလ်များကို ကူညီပေးကြည့်ပါ။ အပြစ်ရှိခြင်း သို့မဟုတ် တာဝန်ယူရခြင်း စသည့် ခံစားချက်များဖြင့်မဟုတ်ဘဲ ရိုးရိုးသားသား ကျေးဇူးတင်ခြင်းဖြင့် ထိုသို့ ဆောင်ရွက်သင့်ပါသည်။

၄။ ကြောက်ရွံ့မှု ကြီးစိုးနေသူများအား နှစ်သိမ့်ကာကွယ်ပေးပါ

ထိတ်လန့်နေသော လူနှင့်သတ္တဝါများကို ကျွန်ုပ်တို့ အတတ်နိုင်ဆုံး နှစ်သိမ့်ပေးသင့်ပါသည်။ တစ်စုံတစ်ယောက်သည် ဘေးတွေ့နိုင်သော နေရာတစ်ခုကို သွားရမည့်အခါ သူတို့နှင့်အတူ လိုက်ပါပြီး ကာကွယ်ပေးမည်ဟု ကမ်းလှမ်းပါ။ အတိတ်က အကြမ်းဖက်မှုများမှ ထွက်ပြေးလာသော ဒုက္ခသည်များအတွက် နေရာ အခြေကျစေရန် ကျွန်ုပ်တို့က လုံခြုံမှုနှင့် အကူအညီ ပေးပါသည်။ စစ်ကြောင့်ဖြစ်စေ၊ ညှဉ်းပန်းနှိပ်စက်မှုကြောင့်ဖြစ်စေ စိတ်ဒဏ်ရာ ရရှိသူများက သူတို့၏ စိတ်ဒဏ်ရာများ ကုသရန် ကျွန်ုပ်တို့၏ နားလည်ပေးမှုနှင့် အကူအညီတို့ အထူးသဖြင့် လိုအပ်ပါသည်။

၅။ ပူဆွေးသောက ရောက်နေသူများကို ဖြေသိမ့်ပါ

လင်မယားကွာရှင်းမှု သို့မဟုတ် ချစ်ခင်ရသူတစ်ယောက် သေဆုံးမှုတို့အတွက် အခြားသူများ ပူဆွေးသောက ရောက်သောအခါ ကျွန်ုပ်တို့သည် ကရုဏာစိတ်ဖြင့် သူတို့ကို နှစ်သိမ့်ပေးပါသည်။ ‘‘အို၊ သနားစရာပါလား’’ ဆိုပြီး သူတို့ကို အထက်စီးမှ လုံးဝမဆက်ဆံသင့်ပါ။ သူတို့နေရာတွင် ဝင်ကြည့်ပြီး သူတို့ဒဏ်ရာကို မျှဝေခံစားသင့်ပါသည်။

၆။ ဆင်းရဲနွမ်းပါးသူများအား လှူဒါန်းပေးကမ်းပါ

ပရဟိတအဖွဲ့များထံ လှူဒါန်းသည်မှာ ကောင်းပါသည်။ သို့သော် လမ်းပေါ်က တောင်းရမ်းစားသောက်သူများကို ပေးကမ်းရန်လည်း အရေးကြီးပါသည်။ အိမ်ရာမဲ့ သူတောင်းစားများက ညစ်ပေပြီး ရှုချင်စဖွယ် မကောင်းသည့် အခါမျိုးတွင် ကျွန်ုပ်တို့ နှုတ်ဆိတ်စေသည်ကို ကျော်လွှားရန် လိုပါသည်။ သူတို့ကို လေးစားစွာ ပြုံးပြပြီး ဆက်ဆံဖို့ဝေးစွ။ ကြည့်ပင် မကြည့်ချင်တတ်ကြပါ။ လမ်းပေါ်တွင် နေထိုင်သော ထိုသူသည် ကျွန်ုပ်တို့၏ မိခင် သို့မဟုတ် သားတစ်ယောက် ဖြစ်နေပါက စဉ်းစားကြည့်လိုက်ပါ။ မည်သို့လျှင် သူတို့ကို နံစော်နေသော အမှိုက်ပုံအလား အသည်းမာစွာ ကျော်ဖြတ်သွားနိုင်ပါမည်နည်း။

၇။ ကျွန်ုပ်တို့နှင့် ဆက်နွှယ်နေသူများအား ဓမ္မဖြန့်ဝေပါ

ကျွန်ုပ်တို့ အနီးအနားတွင် တစ်ချိန်လုံး ရှိနေချင်သူများကို ကူညီရန်လည်း ကြိုးစားရပါမည်။ သူတို့ကို မှီခိုနေစေ လိုသည့်အတွက်တော့ မဟုတ်ပါ။ သူတို့သည် ကျွန်ုပ်တို့နှင့် အလွန်ခိုင်မာသော ဆက်သွယ်မှု ရှိပါက ပျော်ရွှင်မှု ရရှိရန်၊ အခြားသူများကို ကူညီရန် အခြေခံ ဗုဒ္ဓဘာသာ နည်းလမ်းများကို သင်ကြားပေးခြင်းဖြင့် ကူညီပေးနိုင်ပါသည်။ သို့သော် သူတို့စိတ်ပါဝင်စားရန်တော့ လိုပါသည်။ ဤသည်မှာ လူတို့ကို ဘာသာပြောင်းခိုင်းခြင်း မဟုတ်ပါ။ အထွေထွေ အကူအညီနှင့် အကြံဉာဏ်ပေးခြင်းသာ ဖြစ်ပါသည်။ ဤနည်းဖြင့် ကျွန်ုပ်တို့သည် ဆက်ဆံရေးများကို အဓိပ္ပာယ် ရှိစေနိုင်ပါသည်။

၈။ အခြားသူများကို သူတို့အလိုဆန္ဒအတိုင်း ကူညီပါ

အခြားသူများနှင့် သင့်တော်သော နည်းလမ်းအတိုင်း သူတို့ကို ကူညီကြည့်သင့်ပါသည်။ တစ်ယောက်ယောက်က ကျွန်ုပ်တို့ကို တစ်ခုခု လာသင်ခိုင်းပါက ကျွန်ုပ်တို့နှစ်သက်သော ကိစ္စတစ်ခု မဟုတ်သည့်တိုင် သူတို့အတွက် သင့်တော်ပါက သင်ပေးနိုင်ပါသည်။ အတတ်နိုင်ဆုံး ကြိုးစားပေးသင့်ပါသည်။ ဤသည်မှာ သူငယ်ချင်းများနှင့် စားသောက်ဆိုင်ကို သွားသလို ဖြစ်ပါသည်။ ကိုယ်နှစ်သက်သော အစားအသောက်ကိုသာ အမြဲ မှာစားနေပါက မစဉ်းစား မဆင်ခြင်ရာရောက်သလို တစ်ကိုယ်ကောင်းလည်း ဆန်ပါသည်။ အခြားသူများ နှစ်သက်တာကိုလည်း တစ်ခါတစ်ရံ လိုက်စားပေးနိုင်ပါသည်။ ပေါင်းသင်းဆက်ဆံရေးမှာလိုပင် ကိုယ်လိုချင်သောအချက်နှင့် အခြားသူလိုချင်သောအချက်ကို ညှိနှိုင်းပေးရန် လိုပါသည်။ ကိုယ့်အတွက်၊ ကိုယ်ကြိုက်တာကိုပဲ အမြဲကြည့်မနေသင့်ပါ။

၉။ ဘဝလမ်းကြောင်းမှန်နေသူများကိုလည်း အားပေးပါ

လမ်းကြောင်းမှန်နေသော ဘဝဖြင့် နေထိုင်သူများ၊ အပြုသဘော လမ်းကြောင်းအတိုင်း လိုက်ပြီး ကောင်းမွန်စွာ အဆင်ပြေနေသူများကို ကျွန်ုပ်တို့က ချီးမွမ်းခြင်းအားဖြင့် ကူညီပေးနိုင်ပါသည်။ သူတို့ကို မောက်မာသွားအောင် မပြုမိရန်တော့ သတိထားရပါမည်။ ဤသည်မှာ ကိုယ့်ကိုယ်ကိုယ် ယုံကြည်မှု နည်းပါးသူများနှင့် ဆက်ဆံရာတွင် အထူးသဖြင့် ဆီလျော်မှု ရှိပါသည်။ မောက်မာသော်လည်း အရည်အသွေးကောင်းများ ရှိထားသူများ ဖြစ်လျှင်မူ သူတို့ကို အခြားသူများထံတွင် ချီးမွမ်းပေးနိုင်ပါသည်။ သူတို့ရှေ့တွင် မဟုတ်ပါ။ အခြားသူများ အကျိုးအတွက် သူတို့ အစွမ်းအစများ အသုံးပြုရန် သူတို့ကို အားပေးနိုင်ပါသေးသည်။ သို့သော် သူတို့ပြုလုပ်သည့် အမှားတစ်ခုခုကို သူတို့အား ထောက်ပြခြင်းဖြင့်လည်း သူတို့မာနကို လျော့ကျအောင် ကူညီပေးနိုင်ပါသည်။

၁၀။ ယိုယွင်းနေသော ဘဝဖြင့် နေထိုင်သူများကို အပြုသဘော ပြုမူမှုများ သင်ပေးပါ

အလွန်ပျက်စီးယိုယွင်းပြီး အပျက်သဘော ဘဝဖြင့် နေထိုင်သူများကို တွေ့လျှင် အထင်သေးခြင်း၊ ငြင်းပယ်ခြင်း သို့မဟုတ် ရှုတ်ချခြင်းများ လုံးဝမပြုလုပ်သင့်ပါ။ လူတို့ကို အကဲဖြတ်မည့်အစား သူတို့ကလည်း ပြောင်းလဲလိုစိတ်ရှိပါက အပျက်သဘော အပြုအမူကို ကျော်လွှားနိုင်မည့် နည်းလမ်းများ ပြသပေးသင့်ပါသည်။

၁၁။ အားလုံးမအောင်မြင်ပါက ထူးထူးခြားခြား အစွမ်းအစ တစ်ခုခုကို အသုံးပြုပါ

အချို့သူများတွင် သာမန်ထက်လွန်ကဲသော အစွမ်းအစများ ရှိပါသည်။ လက်ဝှေ့ ပညာရှင် တစ်ယောက် ဖြစ်နိုင်သော်လည်း အခြားသူများကို ကြွားဝါခြင်း မပြုပါ။ တစ်စုံတစ်ယောက် အတိုက်ခိုက် ခံနေရပါက တိုက်ခိုက်သူကို မည်သည့်နည်းနှင့်မျှ တားဆီး၍မရပါက သူ့ကိုတားဆီးဖို့ ကျွန်ုပ်တို့ အစွမ်းအစများ အသုံးပြုသင့်ပါသည်။

အခြားသူများကို အကျိုးပြုရန် နည်းလမ်းများစွာ ရှိပါသည်။ ဘယ်လို ကူညီမလဲ၊ ဘယ်သူ့ကို ဘာကူညီမလဲဆိုသည်ကို သိရုံသာ မဟုတ်ဘဲ ထိုအကူအညီကို ဘယ်အချိန်မှာ ပေးမလဲ၊ အခြားသူများက သူတို့ဘာသာ ဆောင်ရွက်တတ်အောင် ဘယ်အချိန် နောက်ဆုတ်နေမလဲ ဆိုသည်ကိုပါ သိရှိရန်လိုသည်။ တကယ်ပင် ကိုယ်၊ စိတ် တစ်ခုခု ဒုက္ခရောက်နေသူ များသည် ကျွန်ုပ်တို့ထံမှ ပြုစုစောင့်ရှောက်မှုကို ချင်ချင်းလိုအပ်ပါသည်။ သို့သော် အကူအညီကို မှန်ကန်သော နည်းဖြင့် အသုံးချရပါမည်။ အများကြီး မပေးရသလို မဆိုစလောက်လည်း မပေးရပါ။ ကံမကောင်း အကြောင်းမလှ သူများကို သူတို့ ခြေထောက်ပေါ် ရပ်တည်နိုင်အောင် ကူညီရန် လိုပါသည်။ သို့သော် အကောင်းဆုံး ရေရှည် အကူအညီမှာ သူတို့ကိုယ်တိုင် လျှောက်လှမ်းပြီး ပြုစုစောင့်ရှောက်နိုင်မည့် အခြေအနေများနှင့် နည်းစနစ်များ ပေးအပ်ရန် ဖြစ်ပါသတည်း။

Top