རང་གཅེས་འཛིན།

ང་ཚོས་སོ་སོ་རང་ཉིད་ཀྱི་རྒྱུད་ལ་རང་གཅེས་འཛིན་གྱི་བསམ་བློ་ཞིག་ཡོད་པ་དེ་ངོས་བཟུང་བའི་སྒོ་ནས་དེ་སྤོང་ཐབས་བྱེད་དགོས། ང་ཚོས་མ་མཐར་ཡང་དེ་ལྟ་བུའི་བསམ་བློ་ཞིག་ཡོད་པ་རྟོགས་པ་དེ་རང་ནི་ཡར་རྒྱས་ཆེན་པོ་ཞིག་ཆགས་ཀྱི་ཡོད།

བློ་སྦྱོང་ནི་ང་ཚོའི་བསམ་བློའི་ཁྱེར་སོ་ཡར་རྒྱས་གཏོང་བ་ལ་བརྟེན་ནས་རྐྱེན་ངན་པའམ་མི་དགེ་བའི་རྐྱེན་རྣམས་དགེ་བའི་ལམ་དུ་བསྒྱུར་བའི་ཐབས་ཤིག་ཡིན།

ངེས་འབྱུང་སྡུག་བསྔལ་དང་སྡུག་བསྔལ་གྱི་རྒྱུ་དང་བཅས་པ་ལས་ཐར་བའི་ཆོད་སེམས་དེ་ཡིན། གཞན་ལ་དམིགས་པའི་སྐབས། གཞན་རྣམས་སྡུག་བསྔལ་རྒྱུ་དང་བཅས་པ་ལས་འབྲལ་བའི་ཆོད་སེམས་ཡོད་པ་ནི་སྙིང་རྗེ་ཡིན།

ཚིགས་སུ་བཅད་པ་བསྡུས་པ་བརྒྱད་ཀྱི་ནང་དགེ་བཤེས་གླང་རི་ཐང་པས་རྒྱས་སྲས་ཞི་བ་ལྷའི་སྤྱོད་འཇུག་དང་ཨ་ཏི་ཤའི་བྱང་ཆུབ་སེམས་དཔའི་ནོར་བུའི་ཕྲེང་བ་གཉིས་ལ་གཞི་རྩ་བཞག་ནས་བློ་སྦྱོང་གི་སྙིང་པོ་རྣམས་ཕྱོགས་བསྡོམས་གནང་གི་ཡོད།

སངས་རྒྱས་ཀྱི་གོ་འཕང་ཐོབ་ནས་གཞན་ཐམས་ཅད་ལ་ཕན་ཐོགས་སྒྲུབ་པའི་ཆེད། ང་ཚོས་ཚང་མ་འདྲ་མཉམ་ཡིན་པ་དང་། རང་ཉིད་གཅིག་པུ་གཅེས་འཛིན་མི་བྱེད་པར། དེ་ཚབ་ཏུ་ང་ཚོའི་སེམས་འཁུར་གཙོ་བོ་དེ་གཞན་ཐམས་ཅད་ལ་གཅེས་པར་འཛིན་དགོས།