ཤ་མྦྷ་ལའི་སྨོན་ལམ།

སྐད་ཡིག་གཞན།

༄༅།།ན་མོ་གུ་རུ། དཔལ་ལྡན་དང་པོའི་སངས་རྒྱས་རིང་ལུགས་ཆེ། །ཤ་མྦྷ་ལ་ཡི་གྲོང་དུ་རྒྱས་མཛད་པའི། །རྗེ་བཙུན་བླ་མ་ཁྱེད་ལ་གསོལ་འདེབསཀྱི། །བདག་གི་བདེན་པའི་ཚིག་དེ་འགྲུབ་པར་མཛོད། །

བྱང་སེམས་དུས་འཁོར་སོགས་ཀྱི་རྟག་བརྟེན་ཅིང་། །དམ་པའི་ཆོས་རྣམས་མཆོག་ཏུ་རྒྱས་པའི་ས། །བྱང་ཕྱོགས་ཀཱ་ལཱ་བ་ཞེས་བྱ་བའི་གྲོང་། །བརྒྱ་བྱིན་ཁང་བཟང་ལས་ཀྱང་ཆེས་ལྷག་པ། །ཕོ་བྲང་མཆོག་ནི་དཔག་ཚད་བཅུ་གཉིས་ཚད། །གྲུ་བཞིར་ལྷམ་ཞིང་རིན་ཆེན་དུ་མས་བརྒྱན། །བྱེ་བ་ཕྲག་ནི་དགུ་བརྒྱའི་གྲོང་གིས་བསྐོར། །སྐྱེད་མོས་ཚལ་མཆོག་ལྷ་ཡུལ་ལས་ལྷག་པར། །དང་པོའི་སངས་རྒྱས་དཀྱིལ་འཁོར་ཆེ་ཆུང་གཉིས། །མཐོང་བའི་མོད་ལ་དངོས་གྲུབ་མཆོག་སྩོལ་གྱིས། །

རྒྱུ་ནི་རིན་ཆེན་རིན་ཐང་བྲལ་ལས་གྲུབ། །དེ་ཡི་གཡས་གཡོན་ཡིད་འོང་མཚོ་ཆེན་ནི། །ནོར་བུས་གང་ཞིང་དཔག་ཚད་བཅུ་གཉིས་པ། །མི་རྣམས་ནོར་ཕྱུག་ཆོས་ཀྱི་དུས་འདའི་དབུས། །

བླ་མ་མཆོག་ཁྱེད་དེང་དུས་ནས་བཟུང་བའི། །ལོ་ནི་བདུན་བརྒྱ་ཙམ་ཞིག་རྫོགས་པ་ན། །རིགས་ལྡན་དྲག་པོར་གྱུར་ནས་ཀླ་ཀློའི་དཔུང་། །བཅོམ་ནས་རྫོགས་ལྡན་བཞིན་དུ་མཛད་པའི་དུས། །སྔོན་གྱི་ཞལ་བཞེས་དམ་བཅའ་མ་གཡེལ་བར། །བདག་ཀྱང་འཁོར་གྱི་ཐོག་མར་རྗེས་འཛིན་མཛོད། །

རྗེ་བཙུན་བླ་མ་དམ་པ་མཆོག་ཁྱེད་ཉིད། །རླུང་གི་ཤུགས་ཅན་རྡོ་ཡི་རྟར་ཆིབས་ནས༑ ༑ཕྱག་གི་མདུང་ཐུང་བྱིས་པའི་བློར་བསྣུན་ནས། །ངེས་པར་འཇོམས་ཚེ་བདག་ཀྱང་རྗེས་སུ་བཟུང་། །དམག་དཔུང་བྱེ་བ་ཁ་དོག་སྣ་ཚོགས་པ། །གླང་ཆེན་རིག་བྱེད་ཆང་དྲེགས་བཞི་འབུམ་དང་། །གླང་ཆེན་མྱོས་པ་འབུམ་ཕྲག་བཞི་འབུམ་དང་། །གསེར་གྱི་ཤིང་རྟ་མཚོན་ལྡན་དཔུང་བུ་ཆུང་། །འཇིགས་རུང་དམག་ཚོགས་དབུས་སུ་རབ་ཞུགས་ནས། །རང་གི་བྱིས་པའི་བློ་ལ་བསྣུན་མཛད་ཅིང་། །རྟར་གནས་ཟླ་བ་ཆེན་བོའི་བུ་ལ་ནི། །ཧ་ནུ་མནྡས་རྣོན་པོའི་མཚོན་གྱིས་བསྣུན། །དྲག་པོ་ལ་སོགས་ལྷ་ཆེན་བཅུ་གཉིས་ཀྱིས། །ལྷ་མིན་ལ་སོགས་ཐམས་ཅད་ཚར་གཅོད་ཅིང་། །གླང་པོ་ཆེ་ཡིས་གླང་པོ་རྣམ་པར་འཇོམས། །རྡོ་ཡི་རྟ་ཡིས་རྟ་རྣམས་གསོད་བྱེད་ཅིང་། །གསེར་གྱི་ཤིང་རྟས་ཤིང་རྟ་ཕྱེ་མར་བྱེད། །ས་སྐྱོང་རྣམས་ཀྱིས་ས་སྐྱོང་འདུལ་བར་མཛད། །ཀླ་ཀློའི་རྒྱུན་ནི་རབ་ཏུ་བཅད་བྱས་ནས། །དང་པོའི་སངས་རྒྱས་ཀྱིས་མཚོན་ཆོས་ཚུལ་ཀུན། །རྒྱས་པར་མཛད་ཚེ་བདག་ཀྱང་རྗེས་སུ་བཟུང་། །

དེ་ལྟར་ལོ་ནི་མང་པོར་ཆོས་བསྟན་ནས། །རྟ་ཡི་ལོ་ནི་ཧོར་རྟ་ཟླ་གཉིས་པ་ཡི། །ཉི་ཤུ་གཉིས་ཉིན་དཔའ་བོ་དཔའ་མོ་ཡིས། །རོལ་མོའི་སྒྲ་བཅས་འཁོར་ནི་འབུམ་ཕྲག་བཅས།བདེ་དུས་ལམ་ལས་འོག་མི་གནས་སུ་ནི། །ལོངས་སྤྱོད་རྫོགས་སྐུ་མངོན་དུ་མཛད་པའི་ཚེ། །བདག་ཀྱང་སངས་རྒྱས་གོ་འཕང་ཐོབ་པར་མཛོད། ། ། །ཅེས་པ་ནི་པཎ་ཆེན་བློ་བཟང་དཔལ་ལྡན་ཡེ་ཤེས་ཀྱིས་མཛད་པའོ། །

Top